ମୁଖ୍ୟ ଖବର

ସମ୍ବଲପୁରୀ, ଓଡ଼ିଶୀ ନୃତ୍ୟ ସହ ଦୁବାଇରେ ଓଡ଼ିଶା ଦିବସ

ସୁଧାଶ୍ରୀ ଦାଶ

ଦୁବାଇ, ଅପ୍ରେଲ ୧୮(ଓଡ଼ିଶା ଡ଼ଟ୍ କମ୍) ସମ୍ବଲପୁରୀ ଓ ଓଡ଼ିଶୀ ନୃତ୍ୟର ତାଳେ ତାଳେ ଦୁବାଇ (ୟୁଏଇ)ରେ ଥିବା ଓଡ଼ିଆ ସମାଜ ପକ୍ଷରୁ ଓଡ଼ିଶା ଦିବସ ପାଳିତ ହୋଇଯାଇଛି ।

ଦୁବାଇରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସେଠାରେ ରହୁଥିବା ଶତାଧିକ ଓଡ଼ିଆ ପରିବାର ସାମିଲ ହୋଇଥିଲେ ।

କାର୍ଯ୍ୟକ୍ରମ ଆରମ୍ଭରେ ପ୍ରବାସୀ ଓଡ଼ିଆଙ୍କ ଦ୍ୱାରା ବନ୍ଦେ ଉତ୍କଳ ଜନନୀ ପରିବେଷଣ କରାଯାଇଥିଲା ।

ପରେ ମଙ୍ଗଳାଚରଣ ଏବଂ ଓଡ଼ିଶୀ ସଂଗୀତ ପରିବେଷିତ ହୋଇଥିଲା । ବହୁ ଦିନ ଧରି ନିଜ ରାଜ୍ୟରୁ ଦୂରରେ ରହୁଥିବା ଓଡ଼ିଆମାନେ ଏହାକୁ ମନଭରି ଉପଭୋଗ କରିଥିଲେ ।

ଏହି ଅବସରରେ ଛୋଟଛୋଟ ପିଲାମାନେ ଓଡ଼ିଶୀ ନୃତ୍ୟ ପରିବେଷଣ କରିଥିଲେ । ଉପସ୍ଥିତ ଲୋକମାନେ ସମ୍ବଲପୁରୀ ଲୋକ ନୃତ୍ୟ ଓ ଓଡ଼ିଶୀ ନୃତ୍ୟର ଖୁବ୍ ମଜା ନେଇଥିଲେ ।

ଦ୍ୱିତୀୟ ଥର ପାଇଁ ଅନୁଷ୍ଠିତ ଏହି କାର୍ଯ୍ୟକ୍ରମରେ ବହୁ ପ୍ରତିଷ୍ଠିତ ଓଡ଼ିଆ ଯୋଗେଇଥିଲେ । ସେଠାରେ ରହୁଥିବା ଓଡ଼ିଆଙ୍କୁ ବାନ୍ଧି ରଖିବା ପାଇଁ ଏକ ୱେବସାଇଟ୍ ଆରମ୍ଭ କରାଯାଇଛି ।

ନିଜ ସଂସ୍କୃତି ସହ ଯୁବପିଢିଙ୍କୁ ବାନ୍ଧି ରଖିବାର ଏହା ଏକ ପ୍ରୟାସ ବୋଲି ଆୟୋଜକ କହିଛନ୍ତି । ଆଗାମୀ ଦିନରେ ବିଭିନ୍ନ ପର୍ବପର୍ବାଣୀ ସହ ଅନ୍ୟାନ୍ୟ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯିବ ବୋଲି ଓଡ଼ିଶା ସମାଜ ପକ୍ଷରୁ କୁହାଯାଇଛି ।

ଓଡ଼ିଶା ଡ଼ଟ୍ କମ୍

Leave a Reply

This site uses Akismet to reduce spam. Learn how your comment data is processed.