ମୁଖ୍ୟ ଖବର

ଦ୍ରୁତ ଗାଡ଼ି ଚାଳନା ଉପରେ କଟକଣା

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୨୧(ଓଡ଼ିଶା ଡ଼ଟ୍ କମ୍) ବେପରୁଆ ତଥା ଦ୍ରୁତ ଗାଡ଼ି ଚାଳନା ଉପରେ ନିୟନ୍ତ୍ରଣ କରିବା ପାଇଁ ପରିବହନ ବିଭାଗ ପକ୍ଷରୁ ନିଷ୍ପତି ନିଆଯାଇଛି ।

ଗାଡ଼ିର ବେଗ ନିୟନ୍ତ୍ରଣ ପାଇଁ ସମସ୍ତ ଦୁଇ ଚକିଆ, ତିନି ଚକିଆ ଏବଂ ଚାରି ଚକିଆ ଗାଡ଼ିରେ ସ୍ପିଡ଼ ଗଭର୍ଣ୍ଣର ଲଗାଯିବ । ନିଷ୍ପତି ଅନୁଯାୟୀ କୌଣସି ଗାଡ଼ି ନିର୍ଦ୍ଧାରିତ ଗତି ଠାରୁ ଅଧିକ ବେଗରେ ଯାଇପାରିବେ ନାହିଁ ।

ପ୍ରତ୍ୟେକ ଗାଡ଼ି ପାଇଁ ଗତିକୁ ଏକ ନିର୍ଦ୍ଧିଷ୍ଟ ସୀମା ମଧ୍ୟରେ ରଖିବାକୁ ନିଷ୍ପତି ନିଆଯାଇଛି । ଦୁଇ ଚକିଆ ଯାନ ପାଇଁ ଘଣ୍ଟା ପ୍ରତି ୫୦ କିମି ରଖାଯାଇଥିବା ବେଳେ ଅଟୋ ରିକ୍ସା ପାଇଁ ୩୦ କିମି ଏବଂ ଚାରି ଚକିଆ ଯାନ ପାଇଁ ସର୍ବାଧିକ ବେଗ ୬୫ରୁ ୭୦ କିମି ପର୍ଯ୍ୟନ୍ତ ରଖାଯାଇଛି ।

ଗାଡ଼ିରେ ସ୍ପିଡ଼ ଗଭର୍ଣ୍ଣର ଲଗାଇନଥିବା ବ୍ୟକ୍ତିଙ୍କ ଠାରୁ ଅତିକମ୍ ରେ ୧୦୦ରୁ ୩୦୦ ଟଙ୍କା ପର୍ଯ୍ୟନ୍ତ ଜରିମାନା ଆଦାୟ କରାଯିବ । ରାଜ୍ୟରେ ପାଞ୍ଜିକୃତ ହୋଇଥିବା ୩୯ ଲକ୍ଷ ଗାଡ଼ିରେ ସ୍ପିଡ଼ ଗଭର୍ଣ୍ଣର ଲଗାଇବା ବାଧ୍ୟତାମୂଳକ କରାଯାଇଛି ।

ନୂଆ ଗାଡ଼ିରେ ପଞ୍ଜିକରଣ ସମୟରେ ସ୍ପିଡ଼ ଗଭର୍ଣ୍ଣର ଲଗାଇବାକୁ ନିର୍ଦ୍ଦେଶ ଦିଆଯାଇଥିବା ବେଳେ ଅଟୋ ଓ ଅନ୍ୟାନ୍ୟ ଗାଡ଼ିରେ ଏକ ମାସ ମଧ୍ୟରେ ଲଗାଇବାକୁ କୁହାଯାଇଛି ।

ଦ୍ରୁତ ଗତି ଯୋଗୁଁ ବିଭିନ୍ନ ସମୟରେ ଦୁର୍ଘଟଣା ହେଉଥିବାରୁ ଏକ ଜନସ୍ୱାର୍ଥ ମାମଲାର ଶୁଣାଣି କରି ବେଗ ନିୟନ୍ତ୍ରଣ ଉପରେ ପଦକ୍ଷେପ ଗ୍ରହଣ କରିବାକୁ ହାଇକୋର୍ଟ ପରିବହନ ବିଭାଗକୁ ନିର୍ଦ୍ଦେଶ ଦେଇଥିଲେ । ଏହି ନିର୍ଦ୍ଦେଶକୁ ଆଧାର କରି ବିଭାଗ ପକ୍ଷରୁ ନିଷ୍ପତି ନିଆଯାଇଥିବା ଜଣେ ଅଧିକାରୀ କହିଛନ୍ତି ।

ଓଡ଼ିଶା ଡ଼ଟ୍ କମ୍