ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର,ମାର୍ଚ୍ଚ ୧୩(ଓଡ଼ିଶା ଡ଼ଟ୍ କମ୍) ଉଚ୍ଚମାଧ୍ୟମିକ ଶିକ୍ଷା ପରିଷଦ ଦ୍ୱାରାପରିଚାଳିତ ଯୁକ୍ତଦୁଇ ପରୀକ୍ଷାରେ କେତେକ କେନ୍ଦ୍ରରେ ପରୀକ୍ଷାର୍ଥୀଙ୍କୁ କପିରେ ସହାୟତା କରୁଥିବା ଅଧ୍ୟାପକ ଏବଂ କର୍ମଚାରୀଙ୍କୁ ଦଣ୍ଡିତ କରାଯାଇଛି ।
କେନ୍ଦୁଝର ଜିଲ୍ଲା ଘଟଗାଁ ସ୍ଥିତ ତାରିଣୀ ଠାକୁରାଣୀ ମହାବିଦ୍ୟାଳୟରେ ପରୀକ୍ଷା କାର୍ଯ୍ୟରେ ବ୍ୟାପକ ଅନିୟମିତତା ହେଉଥିବା ଖବର ପାଇ ପରିଷଦ ଦ୍ୱାରାସ୍କ୍ୱାଡ଼ ସୋମବାର ସେଠାରେ ଚଢ଼ାଉ କରିଥିଲେ ଏବଂ କପି ଯୋଗାଇବା ସମୟରେ ଜଣେ କର୍ମଚାରୀଙ୍କୁ ଧରିଥିଲେ ।
ସେହିପରି କେନ୍ଦ୍ରାପଡ଼ା ଜିଲ୍ଲା କୋରୁଆ ମହିଳା ମହାବ୍ୟିାଳୟର ଅଧ୍ୟାପକ ଅନୁପ୍ରଭା ରାୟ, ଦିଲ୍ଲୀପ କୁମାର ସାହୁ, ବିଜୟଲକ୍ଷ୍ମୀ ସାହୁ, ବବିତା ନାୟକ ଓ ଚିତ୍ରୋତ୍ପଳା ମହିଳା ମହାବ୍ୟିାଳୟର ଅଧ୍ୟାପକ ଅକ୍ଷୟ କୁମାର ଜେନା କପି ଯୋଗାଉଥିବା ବେଳେ ଧରାପଡ଼ିଛନ୍ତି ।
ଏହି ଅଧ୍ୟାପକ, ଅଧ୍ୟାପିକା ତଥା କର୍ମଚାରୀଙ୍କୁ ଅବଶିଷ୍ଟ ପରୀକ୍ଷା କାର୍ଯ୍ୟରୁ ଅନ୍ତର କରାଯିବା ସହିତ ବିଭାଗୀୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନିମନ୍ତେ ଉଚ୍ଚଶିକ୍ଷା ବିଭାଗକୁ ସୁପାରିସ କରାଯାଇଥିବା ପରିଷଦର ଜଣେ ବରିଷ୍ଠ ଅଧିକାରୀ କହିଛନ୍ତି ।
ସେହିପରି ଯୁକ୍ତ ଦୁଇ କଳା ଏବଂ ବାଣିଜ୍ୟ ପରୀକ୍ଷା ଚାଲିଥିବା ବେଳେ ବିଭିନ୍ନ ପରୀକ୍ଷା କେନ୍ଦ୍ରରେ କପି କରୁଥିବା ୪୨୫ ଜଣ ଛାତ୍ରଛାତ୍ରୀ ଧରାପଡ଼ିଛନ୍ତି ।
ଓଡ଼ିଶା ଡ଼ଟ୍ କମ୍
