ମୁଖ୍ୟ ଖବର

ହୀରାକୁଦରୁ ୨୪ରେ ପ୍ରଥମ ବନ୍ୟା ଜଳ ନିଷ୍କାସନ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ସମ୍ବଲପୁର, ଜୁଲାଇ ୨୨(ଓଡ଼ିଶା ଡ଼ଟ୍ କମ୍) ହୀରାକୁଦ ଜଳଭଣ୍ଡାରରୁ ଚଳିତ ବର୍ଷର ପ୍ରଥମ ବନ୍ୟା ଜଳ ଆସନ୍ତା ୨୪ତାରିଖରେ ନିଷ୍କାସନ କରାଯିବ ବୋଲି କୁହାଯାଇଛି ।

ବନ୍ୟା ଜଳ ମହାନଦୀରେ ଯାଇ ୨୫ ତାରିଖ ଅପରାହ୍ନରେ ନରାଜ୍ ଓ ୨୬ ତାରିଖ ସକାଳେ ମହାନଦୀ ମୁହାଣ ପାରାଦୀପରେ ପହଞ୍ଚିବ ।

୨୪ ତାରିଖ ଅପରାହ୍ନ ୩ଟାରେ ବନ୍ୟା ଜଳ ନିଷ୍କାସନ ପୂର୍ବରୁ ପ୍ରତ୍ୟେକ ୫ ମିନିଟ୍ରେ ଉଚ୍ଚ କ୍ଷମତା ବିଶିଷ୍ଟ ସାଇରନ୍ ବାଜିବ ଏବଂ ୩ଟା ୪୫ମି. ପରେ ପ୍ରତ୍ୟେକ ୨୦ ସେକେଣ୍ଡରେ ୧୫ ମିନିଟ୍ ପାଇଁ ଥରେ ଲେଖାଏଁ ସାଇରନ ବାଜିବ ।

ଉକ୍ତଦିନ ଅପରାହ୍ନ ୪ଟା ପରେ ମସ୍ୟଜୀବୀଙ୍କୁ ମହାନଦୀକୁ ନଯିବା ପାଇଁ ଜଳଭଣ୍ଡାର କର୍ତୃପକ୍ଷ ନିବେଦନ କରିଛନ୍ତି । ରବିବାର ସନ୍ଧ୍ୟା ୬ଟା ସୁଦ୍ଧା ହୀରାକୁଦ ଜଳଭଣ୍ଡାରର ଜଳପତ୍ତନ ୬୦୦.୦୮ ଫୁଟ୍ ରହିଥିବା ବେଳେ ଜଳଭଣ୍ଡାର ମଧ୍ୟକୁ ପ୍ରତି ସେକେଣ୍ଡରେ ୭୫ ହଜାର ୪୯୧ ଘନଫୁଟ୍ ଜଳ ପ୍ରବେଶ କରୁଛି ।

ସେହିପରି ବିଭିନ୍ନ କେନାଲରେ ସମୁଦାୟ ୨୪ ହଜାର ୮୫୨ ଘନଫୁଟ୍ ଜଳ ନିଷ୍କାସିତ ହେଉଛି । ପାୱାର ଚେନାଲରେ ୨୦ ହଜାର ୯୭୧ ଘନଫୁଟ୍, ବରଗଡ଼ କେନାଲରେ ୩ ହଜାର ୫୩୦ ଘନଫୁଟ୍, ଶାସନ କେନାଲରେ ୩୦୦, ସମ୍ବଲପୁର କେନାଲରେ ୪୪ ଓ ହୀରାକୁଦ କେନାଲରେ ୭ ଘନଫୁଟ୍ ଜଳ ନିଷ୍କାସିତ ହେଉଛି ।

ଓଡ଼ିଶା ଡ଼ଟ୍ କମ୍