ମୁଖ୍ୟ ଖବର

ରେଳବାଇ ଅର୍ଥ ହ୍ରାସକୁ ମୁଖ୍ୟମନ୍ତ୍ରୀଙ୍କ ବିରୋଧ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜୁଲାଇ ୨୮(ଓଡ଼ିଶା ଡ଼ଟ୍ କମ୍) ରେଳ ବଜେଟରେ ଓଡ଼ିଶା ପାଇଁ ଦିଆଯାଇଥିବା ଅର୍ଥ ପରିମାଣକୁ ହ୍ରାସ କରାଯାଇଥିବାରୁ ଏହାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିରୋଧ କରିଛନ୍ତି ।

ବଜେଟରେ ଯେତିକି ପରିମାଣର ଅର୍ଥ ବରାଦ କରାଯାଇଥିଲା ତାହା ଦିଅନ୍ତୁ ବୋଲି ସେ ଦାବି କରିଛନ୍ତି । ଏହାବ୍ୟତୀତ ଖୋର୍ଦ୍ଧା ରୋଡ-ପୁରୀ ରେଳପଥର ଦୋହରିକରଣ କାମ ନବକଳେବର ପୂର୍ବରୁ ସାରିବା ପାଇଁ ସେ ଅନୁରୋଧ କରିଛନ୍ତି ।

ଏସଂପର୍କରେ ସେ ଶନିବାର ରେଳବାଇ ମନ୍ତ୍ରୀ ମୁକୁଲ ରାୟଙ୍କୁଦୁଇଟି ଚିଠି ଲେଖିଥିବା ବେଳେ ଓଡ଼ିଶା ପ୍ରତି କେନ୍ଦ୍ର ସରକାର ବେମାତୃକ ମନୋଭାବ ପୋଷଣ କରୁଛନ୍ତି ବୋଲି ଉଲ୍ଲେଖ କରିଛନ୍ତି ।

ଗତ ଆର୍ଥିକ ବର୍ଷରେ ଓଡ଼ିଶାରୁ ଭାରତୀୟ ରେଳବାଇ ୭୫୦୦ ଟଙ୍କାର ରାଜସ୍ୱ ସଂଗ୍ରହ କରିଛି । ୨୦୧୨-୧୩ ବର୍ଷର ରେଳ ବଜେଟରେ ଓଡ଼ିଶାକୁ ୨୩୪୫ କୋଟି ଟଙ୍କା ଦେବାକୁ ଦାବି କରାଯାଇଥିଲା । କିନ୍ତୁ ୭୨୩ କୋଟି ଟଙ୍କା ଦିଆଯାଇଥିଲା । ତେବେ ସେଥିରୁ ୧୮୬ କୋଟି ଟଙ୍କା କାଟି ଦେଇଥିବା ଏବେ ଜାଣିବାକୁ ମିଳିଛି ବୋଲି ମୁଖ୍ୟମନ୍ତ୍ରୀ ଦର୍ଶାଇଛନ୍ତି ।

ଆବଶ୍ୟକ ପରିମାଣର ଅର୍ଥ ନମିଳିଲେ ରେଳ ଷ୍ଟେସନ ଓ ଯାତ୍ରୀ ପ୍ରତୀକ୍ଷା ଘର ଗୁଡିକର ଉନ୍ନତି ହୋଇପାରିବ ନାହିଁ । ତେଣୁ ବଜେଟରେ ଦିଆଯାଇଥିବା ପରିମାଣର ଅର୍ଥ ଓଡ଼ିଶାକୁ ମିଳୁ ବୋଲି ସେ ଦାବି କରିଛନ୍ତି

ନବକଳେବର ସମୟରେ ପୁରୀକୁ ୧୦୦ଟି ସ୍ୱତନ୍ତ୍ର ଟ୍ରେନ୍ ର ବ୍ୟବସ୍ଥା କରିବାକୁ ସେ ଅନୁରୋଧ କରିଛନ୍ତି ।

ଓଡ଼ିଶା ଡ଼ଟ୍ କମ୍