ଓଡିଶା ଖବର

ବିଜେଡି ସଭାପତିଙ୍କୁ ସୁପ୍ରିମକୋର୍ଟଙ୍କ ନୋଟିସ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୩ (ଓଡିଶା ଡଟ୍ କମ୍)-ବିଜେଡ଼ିରୁ ବହିଷ୍କାର କରାଯାଇଥିଲେ ହେଁ ଏ ପର୍ଯ୍ୟନ୍ତ ପ୍ୟାରୀଙ୍କୁ ବହିଷ୍କାର ସମ୍ପର୍କରେ ଲିଖିତ ଆଦେଶ ମିଳିନଥିବାରୁ ସେ ଦାଖଲ କରିଥିବା ଆବେଦନକୁ ମାନ୍ୟବର ସୁପ୍ରିମକୋର୍ଟ ବୁଧବାର ଦିନ ଗ୍ରହଣ କରିଛନ୍ତି ।

ଏହାଛଡା ତାଙ୍କୁ ଦଳରୁ ବହିଷ୍କାର କରାଯିବା ପ୍ରସଙ୍ଗରେ ଆଭିମୁଖ୍ୟ ସ୍ପଷ୍ଟ କରିବା ପାଇଁ ମଧ୍ୟ ବିଜେଡି ସଭାପତିଙ୍କୁ ସୁପ୍ରିମକୋଟ ପକ୍ଷରୁ ନୋଟିସ୍ ଜାରି କରାଯାଇଛି ।

ପ୍ୟାରୀଙ୍କ କହିବା କଥାହେଲା ସୁପ୍ରୀମକୋର୍ଟ ତାଙ୍କର ଗୁହାରି ଶୁଣି ନ୍ୟାୟ ପ୍ରଦାନ କରିଛନ୍ତି । ରାଜ୍ୟ ସଭାରେ ଏଫଡ଼ିଆଇ ପ୍ରସଙ୍ଗରେ ଭୋଟ ଦାନ ଉପରେ ତାଙ୍କୁ ବିଜେଡ଼ି ପକ୍ଷରୁ ହ୍ୱିପ ଜାରି କରାଯାଇ ନଥିଲା । ତାଙ୍କୁ ବହିଷ୍କାର କରାଯାଇଥିବା ସଂକ୍ରାନ୍ତରେ ବାଚସ୍ପତିଙ୍କୁ ମଧ୍ୟ ଅବଗତ କରାଯାଇ ନାହିଁ ।

ରାଜ୍ୟସଭାରେ ତାଙ୍କର ସ୍ଥିତି ଅସ୍ପଷ୍ଟ ରଖିବା ପାଇଁ ଏଭଳି ଯୋଜନା ଚାଲିଥିବାରୁ ସେ ସୁପ୍ରିମକୋର୍ଟ ଯାଇଛନ୍ତି । ବିଜେଡ଼ିରୁ ନିଲମ୍ବନ ହେବା ପରେ ଚିଠି ମିଳି ନଥିଲା । ଦଳରୁ ବହିଷ୍କାର କରାଯିବା ପରେ ବି ଚିଠି ମିଳିଲା ନାହିଁ ।

ତାଙ୍କ ପକ୍ଷରୁ ଓକିଲ ସୁରେଶ ତ୍ରିପାଠୀ ମାମଲା ପରିଚାଳନା କରୁଛନ୍ତି । ନିଲମ୍ବନର ୬ମାସ ବିତିଯାଇଥିଲେ ହେଁ ତାଙ୍କ ନିକଟକୁ ଏ ପର୍ଯ୍ୟନ୍ତ ଏ ସଂକ୍ରାନ୍ତରେ ଆଦେଶନାମା ପଠାଯାଇ ନାହିଁ । ସେ ତ୍ରିଶଙ୍କୁ ଅବସ୍ଥାରେ ଥିଲେ ।

ପ୍ରଧାନ ବିଚାରପତି ଅଲତମସ କବିର,ବିଚାରପତି ସୁରେନ୍ଦ୍ର ସିଂହ ନିଜାର ଓ ବିଚାରପତି ଜେ ଚେଲମେଶ୍ୱରଙ୍କ ଖଣ୍ଡପୀଠରେ ଏହି ଶୁଣାଳୀ ହୋଇଥିଲା । ଶୁଣାଣି ବେଳେ କୋର୍ଟ କହିଥିଲେ ସ୍ୱାଧୀନ ସଦସ୍ୟ ଭାବେ ପ୍ୟାରୀ ଗୃହରେ ଆଲୋଚନା ଓ ବିତର୍କରେ ଭାଗ ନେଇ ପାରିବେ ।

ଓଡିଶା ଡଟ୍ କମ୍

Leave a Reply

This site uses Akismet to reduce spam. Learn how your comment data is processed.