ଡାଲି ଦୁର୍ନୀତି, ସିଏଜି ରିପୋର୍ଟକୁ ନେଇ ଝଡ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୫(ଓଡିଶା ଡଟ୍ କମ୍)-ଡାଲିକିଣା ଓ ବିପିଏଲ ଚାଉଳ ହେରେଫେର ନେଇ ବିରୋଧୀ ଯେଉଁ ଅଭିଯୋଗ କରିଆସୁଥିଲେ ତାକୁ ଅଧିକ ମଜବୁତ କରିଛି ସିଏଜି ରିପୋର୍ଟ । ସିଏଜିଙ୍କ ରିପୋର୍ଟ ପରେ ସରକାରଙ୍କୁ ଘେରିଛନ୍ତି ବିରୋଧୀ କଂଗ୍ରେସ ଓ ବିଜେପି ।

ବିଧାନସଭାରେ ଉପସ୍ଥାପିତ ହୋଇଥିବା ଏହି ରିପୋର୍ଟରେ ଅନିୟମିତତା ଓ ଦୁର୍ନୀତି ବିଷୟ ଉଲ୍ଲେଖ ରହିଛି । ଡାଲି କିଲୋ ୭୫ଟଙ୍କା ନିର୍ଦ୍ଧାରଣ ହୋଇଥିବାରୁ ଠିକାଦାରମାନେ କମ୍ ଦରରେ ଡାଲିକିଣି ସେହି ପରିମାଣରେ ଟଙ୍କା ଦର୍ଶାଇଛନ୍ତି ବୋଲି ରିପୋର୍ଟରେ ଉଲ୍ଲେଖ ରହିଛି ।

ଫଳରେ ରାଜ୍ୟ ସରକାର ୪୩କୋଟି ୬୧ଲକ୍ଷ ଟଙ୍କା କ୍ଷତି ସହିଛନ୍ତି । ଧାର୍ଯ୍ୟଡାଲିର ମାନ ମଧ୍ୟ ଠିକ୍ ନଥିଲା । ଏନେଇ ମହିଳା ଓ ଶିଶୁ ବିକାଶ ବିଭାଗ ଚୁପ୍ ରହିଥିଲା ବୋଲି ରିପୋର୍ଟରେ ଦର୍ଶାଯାଇଛି ।

ଏପରିକି ସାଧରଣ ବଣ୍ଟନ ବ୍ୟବସ୍ଥା ବିପିଏଲ ପରିବାରକୁ ବଣ୍ଟାଯାଉଥିବା ଚାଉଳରେ ଅନିୟମିତତା । ସିଏଜି ତାଙ୍କ ରିପୋର୍ଟରେ ସାଧାରଣ ବଣ୍ଟନ ବ୍ୟବସ୍ଥାରେ ବାଟ ହୁଡିଛନ୍ତି । ବିପିଏଲ ପରିବାରକୁ ୨ ଟଙ୍କିଆ ଚାଉଳର ଭୁଲ ବଣ୍ଟନ ଯୋଗୁଁ ୨,୬୫୫କୋଟି ୬୧ ଲକ୍ଷ ଟଙ୍କାର କେନ୍ଦ୍ରୀୟ ରିହାତି ଏପଟ ସେପଟ ହୋଇଛି ।

୨୦୦୨ରୁ ୧୨ ମଧ୍ୟରେ ବିପିଏଲ ପରିବାରକୁ ୫ ଟଙ୍କା ୬୫ ପଇସା ହିସାବରେ ମାସିକ ୩୫କେଜି ଚାଉଳ ଦେବାକୁ କେନ୍ଦ୍ର ସରକାର ଯୋଜନା ଆରମ୍ଭ କରିଥିଲେ । ଏହି ସମୟରେ ରାଜ୍ୟ ସରକାର ୪୪ ଲକ୍ଷ ପରିବାରକୁ ୩୫ କେଜି ବଦଳରେ ୨୫ କେଜି ଚାଉଳ ଦେଇଥିଲେ ।

ଏହାକୁ କେନ୍ଦ୍ର ସରକାର ବିରୋଧ କରିଥିଲେ ଏବଂ ବିପିଏଲ ପରିବାରକୁ ୩୫ କେଜି ଚାଉଳ ଦେବକୁ କହିଥିଲେ ବୋଲି ସିଏଜି ତାଙ୍କ ରିପୋର୍ଟରେ ଦର୍ଶାଇଛନ୍ତି ।

ରକ୍ତ ଭଣ୍ଡାର ପାଇଁ ରକ୍ତ କିଣାରେ ହେରେଫେର,ସରକାରୀ ଓ ଘରୋଇ ସହଭାଗିତା ନିର୍ମାଣଧିନ ବନ୍ଦରରେ ଆର୍ଥିକ ଅନିୟମିତତା ଓ ନିୟମ ବହିର୍ଭୂତ କାର୍ଯ୍ୟ ହୋଇଥିବା ସିଏଜି ତାଙ୍କ ରିପୋର୍ଟ ରେ ଦର୍ଶାଇଛନ୍ତି ।

ରାଜ୍ୟରେ ୮୨ ପ୍ରତିଶତ ରକ୍ତ ଭଣ୍ଡାରର ଆବଶ୍ୟକ ଭିତିଭୂମି ନଥିବାବେଳେ ରକ୍ତ ସଂଗ୍ରହ ହେଉଥିବା ସିଏଜି ତାଙ୍କ ରିପୋର୍ଟରେ ସମାଲୋଚନା କରିଛନ୍ତି ।

ବିଜେପି ବିଧାୟକ ଦଳର ନେତା କନକ ବର୍ଦ୍ଧନ ସିଂଦେଓ କହିଛନ୍ତି ଯେଉଁ ସିଏଜି ରିପୋର୍ଟକୁ ନେଇ ବିଜେଡି ସଂସଦରେ କେନ୍ଦ୍ର ସରକାର ବିରୋଧରେ ହୋହାଲ୍ଲା କରୁଛି କିନ୍ତୁ ଓଡିଶା ପାଇଁ ସିଏଜି ଯେଉଁ ରିପୋର୍ଟ ଦେଇଛନ୍ତି ତାକୁ କାହିଁକି ଗ୍ରହଣ କରାଯିବନାହିଁ ବୋଲି ସେ ପ୍ରଶ୍ନ କରିଛନ୍ତି ।

ସ୍ୱାଧୀନ ବିଧାୟକ ପ୍ରତାପ ଷଡଙ୍ଗୀ କହିଛନ୍ତି ସିଏଜି ରାଜ୍ୟ ସରକାରଙ୍କ ବହୁତ ଦୁର୍ନୀତି କଥା ତାଙ୍କ ରିପୋର୍ଟରେ ପ୍ରକାଶ କରିଛନ୍ତି । ତିନୋଟି ନିଗମରେ ସରକାର ହଜାର ହଜାର କୋଟି ଟଙ୍କା କ୍ଷତି କରିଛନ୍ତି । ସରକାରଙ୍କ ସମସ୍ତ ଭଷ୍ଟାଚାର,ଦୁର୍ନୀତି ଓ ଅପାରଗତା ସଂପର୍କରେ ସିଏଜି ତାଙ୍କ ରିପୋର୍ଟରେ ପ୍ରମାଣ କରିଦେଇଛନ୍ତି ।

କଂଗ୍ରେସ ବିଧାୟକ ଅନୁପସାଏ କହିଛନ୍ତି ଯେଉଁଭଳି ଭାବରେ ସେହି ଟଙ୍କା ଆତ୍ମସାତ କରାଯାଇଛି ସେଥିପାଇଁ ବହୁତ ଲୋକ ଏଥିପାଇଁ ଜେଲ ଯିବେ । ସିଏଜି ରିପୋର୍ଟକୁ ସରକାର ଢାଙ୍କିକି ରଖିଥିଲେ । ଭାରତ ସରକାର ହଜାର ହଜାର କୋଟି ଟଙ୍କା ଦେଉଛନ୍ତି ତାହା ମଧ୍ୟ ଖର୍ଚ୍ଚ ହେଲାନାହିାଁ ମା ଓ ପେଟରେ ଥିବା ଛୁଆଙ୍କ ପାଇଁ ଆସୁଥିବା ଟଙ୍କା ମଧ୍ୟ ଆତ୍ମସାତ ହୋଇଛି ।

ଓଡିଶା ଡଟ୍ କମ୍