Site icon Odisha.com

ଭୁବନେଶ୍ୱରରେ ସ୍ୱାମୀ ବିବେକାନନ୍ଦ ଜନ୍ମଜୟନ୍ତୀ ଉତ୍ସବ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଜାନୁଆରୀ ୧୨(ଓଡିଶା ଡଟ୍ କମ୍)- ସ୍ୱାମୀ ବିବେକାନନ୍ଦଙ୍କ ଚିକାଗୋ ଭାଷଣ ଦ୍ୱାରା ଏ ଜାତିର ଧର୍ମ ସଂସ୍କୃତି କ’ଣ ତାହା ସାରା ବିଶ୍ୱ ଜାଣିପାରି ଥିଲା,ଏହା କହିଛନ୍ତି ବିଶିଷ୍ଟ ହୃଦରୋଗ ବିଶେଷଜ୍ଞ ତଥା ଶ୍ରୀଜଗନ୍ନାଥ ତତ୍ତ୍ୱ ଗବେଷକ ଡକ୍ଟର କବିପ୍ରସାଦ ମିଶ୍ର ।

ସେଥିପାଇଁ ଆନିବେଶାନ୍ତ କହିଥିଲେ ସ୍ୱାମୀଜୀଙ୍କ ଜରିଆରେ ହିନ୍ଦୁ ଧର୍ମ ପୁନର୍ଜନ୍ମ ଲାଭ କଲା । ବିଶ୍ୱବାସୀଙ୍କୁ ସମସ୍ତଙ୍କ ଇଶ୍ୱର ଏକ ବୋଲି ପ୍ରମାଣ ଦେଇଥିଲେ ସ୍ୱାମୀଜୀ । ସେହିପରି ସେବା କାର୍ଯ୍ୟ ଦ୍ୱାରା ଭାରତର ପୁନରୁତଥାନ ପାଇଁ ସ୍ୱାମୀଜୀ ବେଶ୍ ଉଦ୍ୟମ କରିଥିଲେ ।

ପରୋପକାର ପାଇଁ ଜୀଅଁ, ନଚେତ୍ ତୁମ ଜୀଇଁବା ମୃତ୍ୟୁ ଠାରୁ ମଧ୍ୟ ହୀନ ବୋଲି କହିଥିଲେ ସେ । ଏଣୁ ସେ ଥିଲେ ପ୍ରକୃତରେ ଭାରତ ଓ ଭାରତୀୟତାର ପ୍ରତୀକ ।

ତେବେ ଆମେ ତାଙ୍କ ଆଦର୍ଶକୁ ଭୁଲି ଯାଇଥିବାରୁ ଆଜି ଆମର ଅଧୋଃପତନ ଘଟିଛି” । ସ୍ୱାମୀ ବିବେକାନନ୍ଦ ସାର୍ଦ୍ଧଶତୀ ସମାରୋହ ସମିତି ଦ୍ୱାରାକ୍ୟାପିଟାଲ୍ ହାଇସ୍କୁଲ ପଡିଆରେ ଅନୁଷ୍ଠିତ ସ୍ୱାମୀଜୀଙ୍କ ୧୫୦ତମ ଜନ୍ମଜୟନ୍ତୀ ଉତ୍ସବରେ ମୁଖ୍ୟବକ୍ତା ଭାବେ ଯୋଗ ଦେଇ ସେ ଏହା କହିଛନ୍ତି ।

ସଭାରେ ମୁଖ୍ୟ ଅତିଥି ଭାବେ ଯୋଗଦେଇଥିବା ଚିନ୍ମୟ ମିଶନର ଆଞ୍ଚଳିକ ସଂଯୋଜକ ଶ୍ରୀ ସଦାନନ୍ଦଜୀ ମହାରାଜ ସ୍ୱାମୀଜୀଙ୍କ ବାଣୀ ଉତିଷ୍ଠତ ଜାଗ୍ରତକୁ ସମସ୍ତଙ୍କ ସମ୍ମୁଖରେ ଉଚ୍ଚାରଣ କରି କହିଥିଲେ ଯେ, “ଆମେ ଆଜି ଉଠିଛେ, କିନ୍ତୁ ଜାଗ୍ରତ ହୋଇଛେ କି ନାହିଁ ତାହା ନିଜେ ଚିନ୍ତା କରିବା ଉଚିତ୍ ।

କୂଅ ଭିତରେ ବେଙ୍ଗ ହୋଇ ରହିଲେ ଆମେ କେବେ ସମୁଦ୍ର ଦେଖିପାରିବାନି । ଲକ୍ଷ୍ୟ ସବୁବେଳେ ମାଧ୍ୟମ ଠାରୁ ଉଚ୍ଚା ହେବା ଦରକାର । ଏଣୁ ପରୋପକାର ଜରିଆରେ ଆମ ଜୀବନ ସାର୍ଥକ ହୋଇପାରିବ” । ସଭାରେ ବିଶିଷ୍ଟ ସ୍ତମ୍ଭକାର ତଥା ସମାରୋହ ସମିତିର ପ୍ରାନ୍ତ ଅଧ୍ୟକ୍ଷ କର୍ଣ୍ଣେଲ୍ ଶରତ ମହାପାତ୍ର ସଭାପତିତ୍ୱ କରିଥିଲେ ।

ସ୍ୱାମୀଜୀଙ୍କ ୧୫୦ତମ ଜନ୍ମଜୟନ୍ତୀ ପାଳନ ଅବସରରେ ସ୍ୱାମୀ ବିବେକାନନ୍ଦ ସାର୍ଦ୍ଧଶତୀ ସମାରୋହ ସମିତି ଆନୁକୂଲ୍ୟରେ ଏକ ଶୋଭାଯାତ୍ରା କ୍ୟାପିଟାଲ୍ ହାଇସ୍କୁଲ ପଡିଆରୁ ବାହାରି ଲୋୟର ପିଏମଜି, ମାଷ୍ଟରକ୍ୟାଣ୍ଟିନ୍ ପରିକ୍ରମା କରିଥିଲା ।

ଏଥିରେ ବିଭିନ୍ନ ସ୍କୁଲ କଲେଜର ଛାତ୍ରଛାତ୍ରୀ ସ୍ୱାମୀଜୀଙ୍କ ବେଶରେ ସଜ୍ଜିତ ହୋଇ ସାମିଲ୍ ହୋଇଥିଲେ । ସଭା ଶେଷରେ ସୁନ୍ଦର ବେଶ ପ୍ରତିଯୋଗିତାର କୃତି ବିଦ୍ୟାଳୟଗୁଡିକୁ ପୁରସ୍କୃତ କରାଯାଇ ଥିଲା । ଏଥିସହ ସମାରୋହ ସମିତି ଦ୍ୱାରାବର୍ଷବ୍ୟାପୀ ସ୍ୱାମୀଜୀଙ୍କ ସ୍ମୃତିରେ ହେବାକୁ ଥିବା ବିଭିନ୍ନ ସେବା, ଜନଜାଗରଣ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା ।

ଓଡିଶା ଡଟ୍ କମ୍

Exit mobile version