ଓଡିଶା ଖବର

ଖୁଚୁରା ବ୍ୟବସାୟରେ ବିଦେଶୀ ପୁଞ୍ଜି ନିବେଶକୁ ବିରୋଧ

ଓଡିଶା ଡଟ୍ କମ୍ ସମ୍ବାଦଦାତା

କଟକ, ଜାନୁଆରୀ ୨୮(ଓଡିଶା ଡଟ୍ କମ୍ )-ଖୁଚୁରା ବ୍ୟବସାୟରେ ବିଦେଶୀ ପୁଞ୍ଜି ନିବେଶ ଶୀର୍ଷକ ଏକ ରାଜ୍ୟସ୍ତରୀୟ ସେମିନାର ସ୍ୱଦେଶୀ ଜାଗରଣ ମଞ୍ଚର ଜିଲ୍ଲା ସଂଯୋଜକ ସୁଭାଶିଷ ମହାନ୍ତିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଚୌଧୁରୀ ବଜାରସ୍ଥିତ ଶ୍ରୀରାମଚନ୍ଦ୍ର ଭବନ ପରିସରରେ ଅନୁଷ୍ଠିତ ହୋଇଯାଇଛି ।

FDI Seminar at Cuttack

ଆରମ୍ଭରେ ମଞ୍ଚର ବିଭାଗ ସଂଯୋଜକ ଆଇ ସୁବ୍ରମଣ୍ୟମ୍ଙ୍କ ଅତିଥି ପରିଚୟ ପ୍ରଦାନ ପରେ ଏହି ଆଲୋଚନା ଚକ୍ରର ଉଦ୍ଦେଶ୍ୟ ସଂପର୍କରେ କହିଲେ ଦେଶର ଏହି ଘଡ଼ିସନ୍ଧି ମୁହୁର୍ତ୍ତରେ ବିଦେଶୀ ପୁଞ୍ଜି ନିବେଶର ଆବଶ୍ୟକତା ବୁଦ୍ଧିଜିବୀ ମହଲରେ ଆଲୋଚନା ହେବା ଉଚିତ୍ ।

ମୁଖ୍ୟ ଅତିଥି ଭାବରେ ମଞ୍ଚର ରାଷ୍ଟ୍ରୀୟ ସହସଂଯୋଜକ ସରୋଜ ମିତ୍ର ଯୋଗଦେଇ କହିଲେ ଦେଶର ଆର୍ଥିକ ଅଭିବୃଦ୍ଧି ନାମରେ ଖୁଚୁରା ବ୍ୟବସାୟରେ ବିଦେଶୀ ପୁଞ୍ଜି ନିବେଶ କରିବା ଦ୍ୱାରାକେନ୍ଦ୍ର ସରକାର କୃଷକ, ଦରିଦ୍ର, ଖଟିଖିଆ ଓ ସାଧାରଣ ଜନତାଙ୍କୁ ମରଣ ମୁହଁକୁ ଠେଲିଦେଇଛନ୍ତି । ଏହାଦ୍ୱାରା ଦେଶର ଆର୍ଥିକ ଅଭିବୃଦ୍ଧି ନହୋଇ ଦେଶର ଅର୍ଥନୀତି ଭୁଶୁଡ଼ି ପଡ଼ିବ ।

ସ୍ତମ୍ଭକାର ତଥା ଅର୍ଥନୀତି ବିଶେଷଜ୍ଞ ସନ୍ତୋଷ କୁମାର ମହାପାତ୍ର ମୁଖ୍ୟବକ୍ତା ଭାବରେ ଯୋଗଦେଇ କହିଲେ ରିଟେଲ ମାର୍କେଟ ଭଳି ଏକ ସ୍ପର୍ଶକାତର କ୍ଷେତ୍ରକୁ ବିଦେଶୀମାନଙ୍କ ହାତକୁ ଟେକିଦେବା ଦ୍ୱାରାଭାରତ ଭଳି ଏକ କୃଷି ପ୍ରଧାନ ଦେଶର ଚାଷୀ, ଉତ୍ପାଦନକାରୀ ଏବଂ ଦାରିଦ୍ର୍ୟ ସୀମାରେଖା ତଳେ ଥିବା ଲୋକମାନେ କ୍ଷତିଗ୍ରସ୍ତ ହୋଇ ଏହି ବିଦେଶୀ କମ୍ପାନୀମାନଙ୍କ ଦ୍ୱାରାଶୋଷିତ ହେବେ ।

ଦେଶରେ ବେକାର ସମସ୍ୟା ବୃଦ୍ଧି ଘଟିବ ଏବଂ ଅନେକ ଲୋକ ଅସାମାଜିକ କାର୍ଯ୍ୟରେ ଲିପ୍ତ ରହିବାକୁ ବାଧ୍ୟ ହେବେ ।

ଓଡିଶା ବ୍ୟବସାୟୀ ମହାସଙ୍ଘର ରାଜ୍ୟ ସମ୍ପାଦକ ସୁଧାକର ପଣ୍ଡା ଯୋଗଦେଇ କହିଲେ ବିଦେଶୀ ବ୍ୟବସାୟୀମାନେ ସ୍ଥାନୀୟ ଅଞ୍ଚଳରୁ ଏକକାଳୀନ ସମସ୍ତ ସାମଗ୍ରୀ କିଣିନେବା ଯୋଗୁଁ ଗ୍ରାମାଞ୍ଚଳ ଓ ସହରାଞ୍ଚଳରେ ଗୁଜୁରାଣ ମେଣ୍ଟାଉଥିବା ଦେଶର ଚାରି କୋଟି ଖୁଚୁରା ବ୍ୟବସାୟୀ ତଥା କର୍ମଚାରୀମାନେ ନିଜର ଜୀବିକା ହରାଇବେ ଯାହାଦଦ୍ୱାରା ସେମାନଙ୍କ ଉପରେ ନିର୍ଭରଶୀଳ ୨୦ କୋଟି ଲୋକଙ୍କ ପରିବାର କ୍ଷତିଗ୍ରସ୍ତ ହେବ, ନିଜ ଦେଶରେ ଉତ୍ପାଦିତ ହୋଇ ମଧ୍ୟ ଅନେକ ଜିନିଷର ଦର ଆକାଶ ଛୁଆଁ ହେବ ।

ନୂତନ ସୁବିଧା ସୁଯୋଗ ଆଦି ପାଇବାକୁ ଚାହୁଁଥିବା ସ୍ଥାନୀୟ ଅଧିବାସୀମାନେ ପୁଞ୍ଜି ଓ ଆବଶ୍ୟକୀୟ ବୁଦ୍ଧି ଅଭାବରୁ କେବଳ ଚାକର ଓ ସାମାନ୍ୟ ଉପଭୋକ୍ତା ହୋଇ ରହି ଠକାମି ଏବଂ ଶୋଷଣର ଶିକାର ହେବେ ବୋଲି ଯୁକ୍ତି ଦର୍ଶାଇଥିଲେ ।

ସ୍ୱଦେଶୀ ଜାଗରଣ ମଞ୍ଚର ପ୍ରାନ୍ତ ବିଚାର ପ୍ରମୁଖ ଶିକ୍ଷାବିତ୍ ଡକ୍ଟର ଧୀରେନ୍ଦ୍ର ନନ୍ଦ ଯୋଗଦେଇ କହିଲେ ଆମ ରାଜନେତାମାନଙ୍କ ଅପରିଣାମ ଦର୍ଶିତା ହିଁ ଦେଶର ବିକାଶରେ
ଅନ୍ତରାୟ ସୃଷ୍ଟି କରିଛି । ଦେଶ ଓ ଜନତାର ସ୍ୱାର୍ଥକୁ ଏମାନେ ଅଣଦେଖା କରିଚାଲିଛନ୍ତି ।

ଦେଶରେ ପ୍ରତ୍ୟକ୍ଷ ବିଦେଶୀ ପୁଞ୍ଜି ନିବେଶ କାହା ସ୍ୱାର୍ଥରେ ବୋଲି ପ୍ରଶ୍ନ କରି କେନ୍ଦ୍ର୍ର ସରକାର ନିଜର ସହଯୋଗୀ ଦଳ ଓ ବିରେଧି ଦଳକୁ ବିଶ୍ୱାସକୁ ନ ନେଇ ଅତ୍ୟନ୍ତ
ତରବରିଆ ଭାବରେ ଖୁଚୁରା ବ୍ୟବସାୟରେ ମଲ୍ଟିବ୍ରାଣ୍ଡରେ ୫୧% ଓ ସିଙ୍ଗଲ୍ ବ୍ରାଣ୍ଡ୍ରେ ୧୦୦% ବିଦେଶୀ ପୁଞ୍ଜି ନିବେଶକୁ ଅନୁମତି ଦେବା ଏକ ଦେଶ ବିରୋଧି କାର୍ଯ୍ୟ ବୋଲି
କହିଥିଲେ ।

ଏହି ଆଲୋଚନାଚକ୍ରରେ ଅନ୍ୟମାନଙ୍କ ମଧ୍ୟରେ ମଞ୍ଚର ପ୍ରାନ୍ତ ସମ୍ପର୍କ ପ୍ରମୁଖ ନିର୍ମଳ ଚନ୍ଦ୍ର ଷଡଙ୍ଗୀ, ସର୍ବେଶ୍ୱର ବେହେରା, ବସନ୍ତ ସାହୁ, ପ୍ରଭାତ ପାଢୀ, ପ୍ରେମ କୁମାର ମହାନ୍ତି,
ନିରଞ୍ଜନ ବେହେରା ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ ।

ଓଡିଶା ଡଟ୍ କମ୍

Leave a Reply

This site uses Akismet to reduce spam. Learn how your comment data is processed.