ତୃତୀୟ ନୟନ
ଦୀର୍ଘ ୧୫ ବର୍ଷ ହେଲା ରାଜ୍ୟରେ କ୍ଷମତା ଉପଭୋଗ କରି ଆସୁଥିବା ଏବଂ କ୍ରମାଗତ ଭାବେ ନିର୍ବାଚନରେ ବିଜୟ ହାସଲ କରି ଆସୁଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ବିଜେଡି ବିରୋଧରେ ଯେତେ ଯାହା ଅଭିଯୋଗ ଆସିଲେ ବି ତାଙ୍କ ପ୍ରତି ରହିଛି ଏବଂ ବିଜେଡି ବିରୋଧରେ ଯେତେ ଯାହା ଅଭିଯୋଗ ଆସିଲେ ବି ଲୋକଙ୍କ ସମର୍ଥନ ତାଙ୍କ ପ୍ରତି ରହିଛି ଏବଂ ନବୀନ ପଟ୍ଟନାୟକ ରାଜ୍ୟର ସର୍ବାଧିକ ଲୋକପ୍ରିୟ ନେତା ବୋଲି ପ୍ରମାଣିତ ହୋଇଛି ।
କଂଗ୍ରେସ ୩ଟିରେ ଖାତା ଖୋଲି ପାରିନଥିବା ବେଳେ ବିଜେପି ମଧ୍ୟ ଗୋଟିକରେ ଖାତା ଖୋଲିନାହିଁ । ମୋଟ୍ ୧୨୯ଟି ୱାର୍ଡ ମଧ୍ୟରୁ ବିଜେଡି ୧୦୩ଟିରେ ବିଜୟୀ ହୋଇଥିବା ବେଳେ ବିଜେପି ୧୨ଟି ଓ କଂଗ୍ରେସ ୧୧ଟି ୱାର୍ଡରେ ବିଜୟୀ ହୋଇଛି ।
ଫଳରେ ମୁଖ୍ୟ ବିରୋଧୀ ଦଳ ଭାବେ ବିଜେପି ପୁଣି ଥରେ ନିଜକୁ ପ୍ରମାଣିତ କରିଥିବା ବେଳେ ପ୍ରସାଦ ହରିଚନ୍ଦନଙ୍କ ନେତୃତ୍ୱରେ କଂଗ୍ରେସର ପୁନ୍ର୍ଉତ୍ଥାନ ହେବ ବୋଲି ଯାହା ଆଶା କରାଯାଉଥିଲା ତାହା ଭୁଲ୍ ପ୍ରମାଣିତ ହୋଇଛି । ଅନ୍ୟ ବିରୋଧୀ ଦଳଗୁଡିକ ରାଜ୍ୟ ରାଜନୀତିକରେ ମୂଲ୍ୟହୀନ ସାବ୍ୟସ୍ତ ହୋଇଛନ୍ତି ।
ଏପ୍ରିଲ୍ ୮ ସକାଳ ୮ଟାରୁ ୮ଟି ପୌରସଂସ୍ଥାରେ ଭୋଟ୍ଗଣତି ଆରମ୍ଭ ହୋଇଥିଲା ଏବଂ ଅପରାହ୍ନ ୨ଟା ସୁଦ୍ଧା ସମସ୍ତ ଆସନର ଫଳାଫଳ ପ୍ରକାଶ ପାଇଥିଲା । ଘୋଷିତ ଫଳାଫଳ ଅନୁଯାୟୀ ପାରାଦ୍ୱୀପର ୧୯ଟି ୱାର୍ଡ ମଧ୍ୟରୁ ବିଜେଡି ୧୬ ଟି ହାତେଇ ଥିବା ବେଳେ କଂଗ୍ରେସକୁ ୨ଟି ଓ ବିଜେପିକୁ ମିଳିଛି ଗୋଟିଏ ଆସନ ।
ବେଲପାହାଡର ମଧ୍ୟ ୧୯ଟି ଆସନ ମଧ୍ୟରୁ ବିଜେଡିକୁ ୧୬ଟିରେ ସଫଳତା ମିଳିଥିବା ବେଳେ ବିଜେପିକୁ ୨ଟି ଓ କଂଗ୍ରେସକୁ ଗୋଟିଏ ୱାର୍ଡରେ ସଫଳତ ମିଳିଛି । ସୁନାବେଡାର ୨୫ଟି ୱାର୍ଡ ମଧ୍ୟରେ ବିଜେଡି ୧୮ଟିକୁ ହାତେଇଥିବାରେ ସମର୍ଥ ହୋଇଥିବା ବେଳେ କଂଗ୍ରେସ ୫ଟି ଓ ବିଜେପି ୨ଟିରେ ସନ୍ତୁଷ୍ଟ ହୋଇଛି ।
ଧର୍ମଗଡରେ ୧୪ଟି ୱାର୍ଡ ମଧ୍ୟରୁ ବିଜେଡି ୧୩ଟି ଜିତିଥିବା ବେଳେ କଂଗ୍ରେସକୁ ଗୋଟିକରେ ସନ୍ତୁଷ୍ଟ ହେବାକୁ ପଡିଛି । ଏଠାରେ ବିଜେପି ଖାତା ଖୋଲିପାରିନାହିଁ । ବାଲିମେଳାରେ ବିଜେଡି ୧୩ଟି, ବିଜେପି ୧ଟି ଓ ସ୍ୱାଧୀନ ପ୍ରାର୍ଥୀ ୨ଟିରେ ବିଜୟୀ ହୋଇଛନ୍ତି ।
କଂଗ୍ରେସର ସ୍ଥିତି ଦୋହଲି ଯାଇଛି । ତୁଷରାରେ ବିଜେଡି ୮, ବିଜେପି ୨ ଓ ଅନ୍ୟପ୍ରାର୍ଥୀ ଗୋଟିଏ ଆସନରେ ଜିତିଥିବାବେଳେ ରେଢ଼ାଖୋଲରେ ବିଜେଡି ୧୨ଟି ୱାର୍ଡ ଜିତିଥିବା ବେଳେ ବିଜେପି ଭାଗରେ ପଡିଛି ମାତ୍ର ୧ ।
ଫଳରେ ଏହି ସମସ୍ତ ପୌରସଂସ୍ଥାର ଅଧ୍ୟକ୍ଷ ଓ ଉପାଧ୍ୟକ୍ଷ ପଦ ବିଜେଡି ହାତେଇବା ସୁନିଶ୍ଚିତ ହୋଇଯାଇଛି । କୌଣସି ସ୍ଥାନରେ ବିଜେଡିକୁ ଅନ୍ୟ କାହାରି ସମର୍ଥନର ଆବଶ୍ୟକତା ପଡିବ ନାହିଁ ।
ବିଜେଡିର ଏହି ବିପୁଳ ବିଜୟ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖୁସିବ୍ୟକ୍ତ କରିବା ସହ ସମ୍ପୃକ୍ତ ପୌରାଞ୍ଚଳବାସୀଙ୍କୁ କୃତଜ୍ଞତା ଓ ଦଳୀୟ କର୍ମୀଙ୍କୁ ଧନ୍ୟବାଦ ଜଣାଇଛନ୍ତି । ଦଳର ବରିଷ୍ଠ ନେତା ଡାକ୍ତର ଦାମୋଦର ରାଉତ ଏହି ବିଜୟର ଶ୍ରେୟ ନବୀନ ପଟ୍ଟନାୟକଙ୍କୁ ଦେଇଛନ୍ତି । ଏହି ବିଜୟ ଫଳରେ ନବୀନଙ୍କ ଉପରେ ଲୋକଙ୍କ ଆସ୍ଥା ଅତୁଟ ରହିଥିବା କଥା ପ୍ରମାଣିତ ହୋଇଛି ।
ଅନ୍ୟପକ୍ଷରେ ପିସିସି ସଭାପତି ପ୍ରସାଦ ହରିଚନ୍ଦନ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ପୌର ନିର୍ବାଚନ ଫଳାଫଳ ଆଶନୁରୂପ ହୋଇନାହିଁ । କେଉଁଠି ତ୍ରୁଟି ରହିଲା ସେ ସମ୍ପର୍କରେ ସମୀକ୍ଷା କରି ସଂଶୋଧନ କରାଯିବ । ଲୋକଙ୍କ ରାୟକୁ ଦଳ ବିନମ୍ରତାର ସହ ଗ୍ରହଣ କରୁଛି ବୋଲି ସେ କହିଛନ୍ତି ।
ତେବେ ଶାସକ ଦଳ ଅର୍ଥ ଓ ବାହୁ ବଳ ତଥା ଶାସନ କଳର ଦୂରୁପଯୋଗ କରି ଜିତିଥିବା ସେ କହିଛନ୍ତି । ବିଜେପି ରାଜ୍ୟ ସଭାପତି କନକ ବର୍ଦ୍ଧନ ସିଂହଦେଓ ମଧ୍ୟ ପରାଜୟର ସମୀକ୍ଷା କରାଯିବ ବୋଲି କହିବା ସହ ଶାସକ ଦଳ ଅର୍ଥ ଓ କ୍ଷମତାର ଅପପ୍ରୟୋଗ କରି ଜିତିଥିବା ଅଭିଯୋଗ କରିଛନ୍ତି ।
ଇତିମଧ୍ୟରେ ଲୋକସଭା ଓ ବିଧାନସଭା ନିର୍ବାଚନ ଠାରୁ ଆରମ୍ଭ କରି ରାଜ୍ୟରେ ଯେତେଗୁଡିଏ ନିର୍ବାଚନ ହୋଇଯାଇଛି ପ୍ରତିଟିରେ ବିଜେଡି ଦଳ ବିପୁଳ ସଂଖ୍ୟାଗରିଷ୍ଠତା ହାସଲ କରିଛି ।
ବିରୋଧୀ କଂଗ୍ରେସ ଓ ଭାରତୀୟ ଜନତା ପାର୍ଟି ନିଜ ଦଳର ଅପାରଗତା, ଦୁର୍ବଳ ନେତୃତ୍ୱ ଓ ଜନସାଧାରଣଙ୍କ ବିଶ୍ୱସନୀୟତା ହରାଇଥିବା କଥାକୁ ସ୍ୱୀକାର କରି ଆତ୍ମସମୀକ୍ଷା କରିବା ଏବଂ ନିଜର ତ୍ରୁଟି ବିଚ୍ୟୁତିକୁ ସଂଶୋଧନ କରିବା ପରିବର୍ତ୍ତେ ବିଜୁ ଜନତା ଦଳ ବିରୁଦ୍ଧରେ ଅଭିଯୋଗ କରି ସନ୍ତୁଷ୍ଟ ରହୁଥିବାରୁ ସେମାନେ ଯେ ବାରମ୍ବାର ବିପର୍ଯ୍ୟୟର ସମ୍ମୁଖୀନ ହେଉଛନ୍ତି ଏଥିରେ ସନ୍ଦେହ ନାହିଁ ।
ସର୍ବୋଚ୍ଚ ନ୍ୟାୟାଳୟର ସୁରକ୍ଷା
ବିଭିନ୍ନ ସମୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିରୋଧରେ ବିରୋଧୀ ଦଳ ତରଫରୁ ଏବଂ ବ୍ୟକ୍ତିବିଶେଷଙ୍କ ଦ୍ୱାରା ଦୁର୍ନୀତି ଓ ମହାଦୁର୍ନୀତିର ଅଭିଯୋଗମାନ କରାଯାଇ ଆସିଥିଲେ ମଧ୍ୟ ଶ୍ରୀ ପଟ୍ଟନାୟକଙ୍କ ବିରୁଦ୍ଧରେ କୌଣସି ଅଭିଯୋଗ ପ୍ରମାଣିତ ହୋଇନଥିବାରୁ ତାଙ୍କର ଶୁଭ୍ରପୋଷାକରେ କଳା ଦାଗ ଛିଟାଟିଏ ସୁଦ୍ଧା ଲାଗିନାହିଁ ।
ରାଜ୍ୟରେ ହୋଇଥିବା ଖଣି ମହାଦୁର୍ନୀତି ସମ୍ପର୍କରେ ଓଡିଶା ହାଇକୋର୍ଟରେ ୨୦୦୯ ମସିହାରେ ଆଗତ ହୋଇଥିବା ଏକାଧିକ ଜନସ୍ୱାର୍ଥ ମାମଲାରେ ସିବିଆଇ ଦ୍ୱାରା ଖଣି ମହାଦୁର୍ନୀତିର ତଦନ୍ତ ପାଇଁ ଦାବି କରାଯାଇଥିଲା ।
ଓଡିଶା ଉଚ୍ଚ ନ୍ୟାୟାଳୟର ତଦନାନ୍ତୀନ ମୁଖ୍ୟ ବିଚାରପତି ଜଷ୍ଟିସ୍.ଭି ଗୋପାଳଗୌଡ ଏବଂ ବିଚାରପତି ବି.ଏମ୍ ମହାପାତ୍ରଙ୍କ ଖଣ୍ଡପୀଠରେ ଏହାର ପୂର୍ଣ୍ଣାଙ୍ଗ ଶୁଣାଣି ହେବା ପରେ ୧୮ ଏପି୍ରଲ୍ ୨୦୧୧ରେ ଏହି ମକଦ୍ଧମାର ରାୟ ସଂରକ୍ଷିତ ରହିଲା ବୋଲି ଘୋଷଣା କରାଯାଇଥିଲା ।
ଇତିମଧ୍ୟରେ ବିଚାରପତି ଶ୍ରୀ ଗୋପାଳଗୌଡ ସୁପ୍ରିମକୋର୍ଟରୁ ବଦଳି ହୋଇଯାଇଛନ୍ତି ଏବଂ ଜଷ୍ଟିସ୍ ଶ୍ରୀ ମହାପାତ୍ର ଗତ ମାର୍ଚ୍ଚ ୩୧ ତାରିଖରେ ଅବସର ଗ୍ରହଣ କରିଛନ୍ତି । ବିଗତ ୪ ବର୍ଷ ଧରି ଏହି ଗୁରୁତ୍ୱପୂର୍ଣ୍ଣ ମକଦ୍ଧମା ସମ୍ପର୍କରେ ରାୟ ଅଧ୍ୟାବଧି ପ୍ରକାଶିତ ହୋଇନାହିଁ ।
ଓଡିଶାରେ ତଳବିରା – ୨ କୋଇଲା ଖଣି ଆବଣ୍ଟନ ନେଇ ସିବିଆଇ ମାମଲାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପକ୍ଷଭୁକ୍ତ କରିବା ନିମନ୍ତେ ସୁପ୍ରିମକୋର୍ଟରେ ହୋଇଥିବା ଆବେଦନ ଖାରଜ ହୋଇଛି । ସୁପ୍ରିମକୋର୍ଟ ଆବେଦନ ବା ପିଟିସନ୍କୁ ଖାରଜ କରି ଆବେଦନକାରୀଙ୍କ ଉପରେ ଲକ୍ଷେ ଟଙ୍କା ଜରିମାନା ଧାର୍ଯ୍ୟ କରିଛନ୍ତି ।
ଜଷ୍ଟିସ୍.ଭି ଗୋପାଳଗୌଡ ଓ ଜଷ୍ଟିସ୍ ସି.ନାଗାପ୍ପାନଙ୍କୁ ନେଇ ଗଠିତ ଖଣ୍ଡପୀଠ ଏହି ଆବେଦନକୁ ଖାରଜ କରିଛନ୍ତି । ଏଭଳି ଆବେଦନ ଗ୍ରହଣଯୋଗ୍ୟ ନୁହେଁ ବୋଲି ଦର୍ଶାଇବା ସହିତ ଖଣ୍ଡପୀଠ ଆବେଦନକାରୀଙ୍କୁ ସତର୍କ କରିଛନ୍ତି । ବିଚାରପତି ଦ୍ୱୟ ଭବିଷ୍ୟତରେ ଏଭଳି ଅଯୌକ୍ତିକ ବିଷୟ ଆଣି ବିଚାରାଳୟର ସମୟ ଅପଚୟ କରାନଯିବାକୁ ମଧ୍ୟ ଚେତାବନୀ ଦେଇଛନ୍ତି ।
ପୂର୍ଣ୍ଣଚନ୍ଦ୍ର ସାହୁଙ୍କ ପକ୍ଷରୁ ସୁପ୍ରିମକୋର୍ଟରେ ଏଭଳି ଆବେଦନ କରାଯାଇଥିଲା । ସ୍ୱତନ୍ତ୍ର ଲିଭ୍ ପିଟିସନ୍ (ଏସ୍ଏଲ୍ପି) ଜରିଆରେ ଏହି ଆବେଦନ ହୋଇଥିଲା । ଶ୍ରୀ ସାହୁଙ୍କ ପକ୍ଷରୁ ଆଇନ୍ଜୀବୀ ସୁରେଶ ତ୍ରିପାଠୀ ମାମଲାର ପରିଚାଳନା କରୁଥିଲେ ।
ତଳବିରା – ୨ କୋଇଲା ଖଣି ଆବଣ୍ଟନ ମାମଲାରେ ୬ ଜଣଙ୍କୁ ସିବିଆଇ ସମନ ଜାରି କରିଥିବାରୁ ଏଥିରେ ମୁଖ୍ୟମନ୍ତ୍ରୀଙ୍କୁ ମଧ୍ୟ ପକ୍ଷଭୁକ୍ତ କରାଯିବା ନେଇ ଆବେଦନକାରୀ ତାଙ୍କର ପିଟିସନ୍ ରଖିଥିଲେ ।
ସୁପ୍ରିମକୋର୍ଟର ଏହି ଖଣ୍ଡପୀଠ ପିଟିସନ୍ର ବୈଧତା ନେଇ ନିଷ୍ପତ୍ତି ନେବେ ବୋଲି ପୂର୍ବରୁ ରାୟ ଦେଇଥିଲେ । ଶ୍ରୀ ସାହୁଙ୍କ ପକ୍ଷରୁ ଆଇନ୍ଜୀବୀ ସୁରେଶ ତ୍ରିପାଠୀ ଏହାର ସପକ୍ଷରେ ଯୁକ୍ତି କରିବା ପାଇଁ ଛିଡା ହେବା ମାତ୍ରେ ମାନ୍ୟବର ବିଚାରପତି ଶ୍ରୀ ଗୌଡ ଏହି ଆବେଦନ ଗ୍ରହଣଯୋଗ୍ୟ ନୁହଁ ଏବଂ ଭବିଷ୍ୟତରେ ଏଭଳି ଅଯୌକ୍ତିତ ବିଷୟ ଆଣି ମାନ୍ୟବର ବିଚାରାଳୟର ସମୟ ଅପଚୟ ନକରିବା ପାଇଁ ଚେତାବନୀ ଦେଇଥିଲେ ।
ତଳବିରା କୋଲ୍ ଆବଣ୍ଟନ ମାମଲାରେ ପୂର୍ବରୁ ସିବିଆଇ କୋର୍ଟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦୋଷମୁକ୍ତ କରିବା ସହ ଏହି ମାମଲାରେ ସେ କୌଣସି ପ୍ରକାରେ ସମ୍ପୃକ୍ତ ନଥିବା ଦର୍ଶାଇଥିଲେ । ତେବେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ, ହିଣ୍ଡାଲ୍କୋ ଅଧ୍ୟକ୍ଷ କୁମାର ମଙ୍ଗଳମ ବିର୍ଲା, ପୂର୍ବତନ କୋଇଲା ସଚିବ ପି.ସି ପାରଖ ପ୍ରମୁଖଙ୍କୁ ମିଶାଇ ୬ ଜଣଙ୍କୁ ସିବିଆଇ ସମନ କରିଥିଲା ।
ସୁପ୍ରିମକୋର୍ଟ ଏହି ମାମଲାରେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କୁ ସିବିଆଇର ସମନ ଉପରେ ସ୍ଥଗିତାଦେଶ ଜାରି କରିଛନ୍ତି । ଏବେ ମୁଖ୍ୟମନ୍ତ୍ରୀଙ୍କୁ ପକ୍ଷଭୁକ୍ତ କରିବା ନେଇ ହୋଇଥିବା ଆବେଦନ ସୁପ୍ରିମକୋର୍ଟଙ୍କ ଦ୍ୱାରା ଖାରଜ ହୋଇଯିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏହି ମାମଲାରେ ପୂର୍ଣ୍ଣରୂପେ କ୍ଲିନ୍ଚିଟ୍ ସଦୃଶ ହୋଇଛି ।
ହିଣ୍ଡାଲ୍କୋକୁ କୋଇଲା ବ୍ଲକ୍ ଆବଣ୍ଟନ କରିବାର ନିଷ୍ପତ୍ତି ସମ୍ପୂର୍ଣ୍ଣଭାବେ କେନ୍ଦ୍ର ସରକାରଙ୍କର ଥିବା ବେଳେ ରାଜ୍ୟ ସରକାର କେବଳ ପ୍ରସ୍ତାବ ଅନୁଧ୍ୟାନ ଲାଗି ସୁପାରିଶ କରିଥିଲେ ।
ଓଡିଶାରେ ହିଣ୍ଡାଲ୍କୋ ଏକ ପ୍ରକଳ୍ପ କରିବାକୁ ଯାଉଥିବାରୁ ଏହାକୁ ଆଧାର କରି ମୁଖ୍ୟମନ୍ତ୍ରୀ ଏ ବିଷୟରେ ବିଚାର କରିବା ନିମନ୍ତେ ପ୍ରଧାନମନ୍ତ୍ରୀଙ୍କୁ ଲେଖିଥିଲେ । ପୂର୍ବରୁ ଏନେଇ ସେ ନିଜେ ସ୍ପଷ୍ଟ କରି ସାରିଛନ୍ତି ।
ରାଜ୍ୟରେ ଅଧିକ ପୁଞ୍ଜି ବିନିଯୋଗ ସହିତ ଶିଳ୍ପ ପ୍ରତିଷ୍ଠା ଏବଂ ଏହାଦ୍ୱାରା ରାଜସ୍ୱ ବୃଦ୍ଧି ଓ ନିଯୁକ୍ତି ସୁଯୋଗ ସୃଷ୍ଟିକୁ ଦୃଷ୍ଟିରେ ରଖି କେନ୍ଦ୍ରକୁ ବିଚାର ନିମନ୍ତେ ପ୍ରସ୍ତାବ ପାଠାଇଥିବା ସେ କହିଥିଲେ ବୋଲି ଦର୍ଶାଇଛନ୍ତି ।
ସୁପ୍ରିମକୋର୍ଟଙ୍କ ନିଷ୍ପତ୍ତିରେ ବିଜେଡି ନେତୃବୃନ୍ଦ ବେଶ୍ ଆନନ୍ଦ ପ୍ରକାଶ କରିଛନ୍ତି । ଅପରପକ୍ଷରେ ବିରୋଧୀ ରାଜନୈତିକ ଦଳଗୁଡିକୁ ଏହା ଶକ୍ତ ଧକ୍କା ସଦୃଶ ହୋଇଛି ।
କାରଣ ପୂର୍ବରୁ ପିସିସି ସଭାପତି ପ୍ରସାଦ ହରିଚନ୍ଦନଙ୍କ ସମେତ ବିିଜେପିର ବହୁ ନେତା ତଳବିରା-୨ କୋଇଲା ଖଣି ମାମଲାରେ ମୁଖ୍ୟମନ୍ତ୍ରୀଙ୍କୁ ପକ୍ଷଭୁକ୍ତ କରି ଜେରା କରିବା ପାଇଁ ଦାବି କରି ଆସୁଥିଲେ ।
ବିରୋଧୀ ଦଳ ନେତା ନରସିଂହ ମିଶ୍ର ମଧ୍ୟ ଏନେଇ ପ୍ରଶ୍ନ ଉଠାଇଥିଲେ । ମାତ୍ର ନବୀନଙ୍କ ବିରୁଦ୍ଧରେ ଦେଖାଦେଇଥିବା ଏହି ଝଡର ଅବସାନ ଘଟାଇ ସୁପ୍ରିମକୋର୍ଟଙ୍କ ରାୟ ପ୍ରକାଶିତ ହେବା ପରେ ସମସ୍ତେ ଆପାତତଃ ନିରବ ରହିବା ଲାଗି ବାଧ୍ୟ ହୋଇଛନ୍ତି ।
—
