ଭୁବନେଶ୍ଵର, ଏପ୍ରିଲ ୨୫ (ଓଡିଶା ଡଟ କମ) କନ୍ଧମାଳରୁ କେରଳକୁ କାମ କରିବାକୁ ଯାଇଥିବା ଜଣେ ଯୁବକର ସନ୍ଦେହଜନକ ମୃତ୍ୟୁକୁ ନେଇ ଜାତୀୟ ମାନବାଧିକାର କମିଶନ କେରଳ ପୁଲିସ୍ ଡିଜି ଓ କନ୍ଧମାଳ ଜିଲ୍ଲାପାଳଙ୍କୁ ରିପୋର୍ଟ ତଲବ କରିଛନ୍ତି ।
ଚାରି ସପ୍ତାହ ମଧ୍ୟରେ ଘଟଣା ସମ୍ପର୍କରେ ଜବାବ ଦେବା ଲାଗି କମିଶନ ଏହି ଦୁଇ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଦାଦନ ଖଟିବାକୁ ଯାଇଥିବା ରାଇକିଆ ଥାନା ଅନ୍ତର୍ଗତ ଟିଆଙ୍ଗିଆ ଗାଁର ଟାଇଟସ୍ ଦିଗାଲ (୧୭)ଙ୍କ ଗତ ବର୍ଷ ଡିସେମ୍ବର ୧୩ ତାରିଖରେ କେରଳରେ ରହସ୍ୟଜନକ ଭାବେ ମୃତ୍ୟୁ ହୋଇଥିଲା ।
କିନ୍ତୁ ସେଠାକାର ପୁଲିସ୍ ଏହାକୁ ଏକ ଦୁର୍ଘଟଣା ଜନିତ ମୃତ୍ୟୁ ବୋଲି ଦର୍ଶାଇ କୌଣସି ତଦନ୍ତ କରିନଥିଲା । ମାନବାଧିକାର କର୍ମୀ ଶ୍ରୀ ଅଖଣ୍ଡ ଏହାକୁ ନେଇ ଜାତୀୟ ମାନବାଧିକାର କମିଶନଙ୍କ ଦୃଷ୍ଟି ଆକର୍ଷଣ କରିଥିଲେ ।
ଟାଇଟସ୍ ଏରନାକୁଲମ୍ ଜିଲ୍ଲାର ପଲ୍ଲିପାଡି ଠାରେ ଏକ ପ୍ଲାଏଉଡ୍ କମ୍ପାନୀରେ କାମ କରୁଥିଲେ । ତାଙ୍କ ବାପା ଉଚ୍ଛବ ଦିଗାଲ ତାଙ୍କ ପୁଅଙ୍କ ମୃତ୍ୟୁ ବେଳର ଫଟୋ ଓ ତାକୁ ସେଠାକୁ ନେଇଥିବା ତାଙ୍କ ଅଂଚଳର କିଛି ଦଲାଲ୍ ଙ୍କ ହାବଭାବ ଦେଖି ଏହା ଏକ ହତ୍ୟାକାଣ୍ଡ ବୋଲି ଅଭିଯୋଗ କରିଥିଲେ ।
ଏହି ଦଲାଲ ମାନେ ତାଙ୍କ ପୁଅକୁ ମାରିଥାଇ ପାରନ୍ତି ବୋଲି ସନ୍ଦେହ କରି ସେ ରାଇକିଆ ଥାନାରେ ଏତଲା ଦେଇଥିଲେ ଓ କନ୍ଧମାଳ ଏସ୍.ପି.ଙ୍କୁ ମଧ୍ୟ ଜଣାଇଥିଲେ । କିନ୍ତୁ ଏହି ଘଟଣାରେ କୌଣସି କାର୍ଯାନୁଷ୍ଠାନ ହୋଇନଥିଲା ।
ଏବେ ଜାତୀୟ ମାନବାଧିକାର କମିଶନ କନ୍ଧମାଳ ଜିଲ୍ଲାପାଳ ଓ କେରଳ ପୁଲିସ୍ ଡିଜିଙ୍କୁ ନୋଟିସ୍ ଜାରି କରିବା ପରେ ଘଟଣାର ଠିକ୍ ଭାବେ ତଦନ୍ତ ହେବ ବୋଲି ଆବେଦନକାରୀ ଶ୍ରୀ ଅଖଣ୍ଡ ଆଶାବ୍ୟକ୍ତ କରିଛନ୍ତି । ଦୋଷୀମାନଙ୍କୁ ତୁରନ୍ତ ଗିରଫ କରିବା ସହ ମୃତକଙ୍କ ପରିବାରକୁ କ୍ଷତିପୂରଣ ଦେବା ଲାଗି ସେ କମିଶନଙ୍କ ନିକଟରେ ନିବେଦନ କରିଛନ୍ତି ।
ଓଡିଶା ଡଟ କମ
