ସ୍ଥାୟୀତ୍ଵ ଦାବିକରି ପର୍ଯ୍ୟଟନ ନିଗମ କର୍ମଚାରୀଙ୍କ ଆନ୍ଦୋଳନ ଧମକ

ଓଡିଶା ଡଟ କମ ସଂବାଦ ଦାତା

ଭୁବନେଶ୍ୱର,ମଇ ୩ (ଓଡିଶା ଡଟ କମ) ୨୫ ବର୍ଷ ଧରି ନିୟମିତ ଭାବେ କାର୍ଯ୍ୟ କରି ଆସୁଥିଲେବି ୨୭ ଜଣ ବିଭାଗୀୟ କର୍ମଚାରୀଙ୍କୁ ସରକାର ସ୍ଥାୟୀ କରୁନଥିବାରୁ ଏହା ବିରୁଦ୍ଧରେ ଆନ୍ଦୋଳନ କରିବା ପାଇଁ ଓଡିଶା ପର୍ଯ୍ୟଟନ ଉନ୍ନୟନ ନିଗମ ଶ୍ରମିକ ସଂଘ ଧମକ ଦେଇଛି ।

୧୯୮୦ ମସିହାରେ ରାଜ୍ୟସରକାର ଦର୍ଶନୀୟସ୍ଥାନ ମାନଙ୍କରେ ପର୍ଯ୍ୟଟକମାନଙ୍କ ଭ୍ରମଣ, ରହିବା ଓ ଆନୁଷଙ୍ଗିକ ବ୍ୟବସ୍ଥା ପାଇଁ ଓଡିଶା ପର୍ଯ୍ୟଟନ ଉନ୍ନୟନ ନିଗମ ସଂସ୍ଥା ଗଠନ କରିଥିଲେ । ଏଥିପାଇଁ ସାରା ରାଜ୍ୟର ବିଭିନ୍ନ ସ୍ଥାନରେ ପ୍ରାୟ ୨୬ ଟି ଶାଖା ଖୋଲଯାଇଥିଲା ଓ ସେଥିରେ ପ୍ରାୟ ୫୦୦ରୁ ଉର୍ଦ୍ଧ ଶ୍ରମିକ କର୍ମଚାରୀ କାମ କରୁଥିବା ସଂଘ କହିଛି ।

ତେବେ ୨୭ଜଣ କର୍ମଚାରୀ ଲଗାତର ଭାବରେ୨୫ ବର୍ଷଧରି କାର୍ଯ୍ୟକରୁ ଥିଲେ ମଧ୍ୟ ନା ସେମାନଙ୍କୁ ନା ସ୍ଥାୟୀ କରାଯାଇଛି ନା ସେମାନଙ୍କୁ ସ୍ଥାୟୀ କର୍ମଚାରୀଙ୍କର ସୁବିଧା ସୁଯୋଗ ଦିଆଯାଇଛି । ସେମାନଙ୍କର ମହଙ୍ଗାଭତ୍ତା୨୦୧୨ ମସିହାରୁ ବାକି ରହିଛି। କାର୍ଯ୍ୟ ସମୟରେ ୧୮ଜଣ ଶ୍ରମିକ ମୃତ୍ୟୁବରଣ କରିଥିଲେ ମଧ୍ୟ ତାଙ୍କ ପରିବାରର କାହାକୁ ହେଲେ ନିଯୁକ୍ତି ମିଳିନାହିଁ ।

ରାଜ୍ୟ ସରକାରଙ୍କ ଅନ୍ୟ ସଂସ୍ଥାମାନଙ୍କରେ କର୍ମଚାରୀମାନଙ୍କ ପାଇଁ ପେନସନ ବ୍ୟବସ୍ଥା ଥିଲାବେଳେ ପର୍ଯ୍ୟଟନ ନିଗମ କର୍ମଚାରୀମାନେ ସେଥିରୁ ବଞ୍ଚିତ । ଗୁପ୍ତ ଭୋଟ ଜରିଆରେ ସଂଗଠନ ସ୍ଵୀକୃତିପାଇଁ ଶ୍ରମ କମିଶନର ନୋଟିସ କରିଥିଲେ ମଧ୍ୟ ନିଗମ କର୍ତ୍ତୁପକ୍ଷ ବେଖାତିର କରି ଚାଲିଥିବା ସଂଘ ଅଭିଯୋଗ କରିଛି ।

ଦୁର୍ନୀତି ରୋକିବାପାଇଁ କର୍ତ୍ତୁପକ୍ଷ ଓ କର୍ମଚାରୀ ସଂଗଠନ ପ୍ରତିନିଧୀଙ୍କୁ ନେଇ ଏକ କମିଟି ଗଠନ ହୋଇଥିଲେ ମଧ୍ୟ ତାହା ଆଉ କାର୍ଯ୍ୟ କରୁନାହିଁ । ନିଗମରେ ଦୁର୍ନୀତି ଦିନକୁ ଦିନ ବଢୁଥିବା ବେଳେ ଷଡଯନ୍ତ୍ର କରି ଶ୍ରମିକମାନଙ୍କୁ ଶୋଷଣ କରାଯାଉଛି ।

ଏପରି ପରିସ୍ଥିତିରେ ଶ୍ରମିକ ଓ  କର୍ମଚାରୀଙ୍କ ସ୍ଵାର୍ଥରକ୍ଷା ପାଇଁ ସଂଗଠନ ତରଫରୁ ୧୨ ଦଫା ସମ୍ବଳିତ ଦାବିପତ୍ର କର୍ତ୍ତୁପକ୍ଷଙ୍କ ସମେତ ଶ୍ରମ ବିଭାଗକୁ ପ୍ରଦାନ କରାଯାଇ ତୁରନ୍ତ ଚୁକ୍ତିନାମା କରିବାକୁ ନିବେଦନ କରଯାଇଥିଲେ ସୁଦ୍ଧା କର୍ତ୍ତୁପକ୍ଷଙ୍କର ଏହାଉପରେ ନୀରବତା ଶ୍ରମିକମାନଙ୍କ ମନରୁ ବିଶ୍ଵାସ ହରାଇ ସାରିଛି ।

ନିକଟ ଭବିଷ୍ୟତରେ ଯଦି ଶ୍ରମିକ ଓ କର୍ମଚାରୀମାନଙ୍କର ସୁବିଧା ସୁଯୋଗପ୍ରତି ଦ୍ରୁଷ୍ଟି ଦିଅ ନ ଯାଏ ତେବେ ଆନ୍ଦୋଳନାତ୍ମକ କାର୍ଯ୍ୟକ୍ରମ ଗ୍ରହଣ କରାଯିବ ବୋଲି ସଂଗଠନ ସାଧାରଣ ସଂମ୍ପାଦକ ଲକ୍ଷ୍ମୀଧର ବାରିକ ଓ ସଭାପତି ନବକିଶୋର ମହାନ୍ତି ଏକ ପ୍ରେସ ବିବୃତ୍ତିରେ ଜଣାଇଛନ୍ତି।

ଓଡିଶା ଡଟ କମ

News Bureau :

This website uses cookies.