ଅଶୋକ ମହାପାତ୍ର ହାଇକୋର୍ଟ ବାର ଏସୋସିଏସନ ସଭାପତି

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ମଇ ୧୭ (ଓଡିଶା ଡଟ କମ) ବରିଷ୍ଠ ଆଇନଜୀବୀ ଅଶୋକ କୁମାର ମହାପାତ୍ର ଓଡିଶା ହାଇକୋର୍ଟ ବାର ଏସୋସିଏସନର ନୂଆ ସଭାପତି ଭାବେ ଶନିବାର ନିର୍ବାଚିତ ହୋଇଛନ୍ତି ।

୨୫୧୩ ଜଣ ସଦସ୍ୟ ବିଶିଷ୍ଟ ଏହି ଏସୋସିଏସନର ସଭାପତି ପଦବୀ ପାଇଁ ମହାପାତ୍ରଙ୍କ ସମେତ ଜଗବନ୍ଧୁ ସାହୁ ଓ ଶ୍ରୀକାନ୍ତ କୁମାର ନାୟକ ମଧ୍ୟ ପ୍ରତିଦ୍ଵନ୍ଦୀତା କରୁଥିଲେ ।

ନିଜର ନିକଟତମ ପ୍ରତିଦ୍ଵନ୍ଦୀଙ୍କ ଠାରୁ ଛଅ ଖଣ୍ଡ ଅଧିକ ଭୋଟ ପାଇ ମହାପାତ୍ର ନିର୍ବାଚିତ ହୋଇଥିବା ଜଣେ ଆଇନଜୀବୀ ଓଡିଶା ଡଟ କମକୁ କହିଛନ୍ତି ।

ରାଜ୍ୟରେ ୧୫୨ ଟି ବାର ଏସୋସିଏସନ ରହିଥିବା ବେଳେ ହାଇକୋର୍ଟ ବାର ଏସୋସିଏସନ ଏକ ଗୁରୁତ୍ଵପୂର୍ଣ ବାର ଏସୋସିଏସନ ।

ସଂଘର ଉପସଭାପତି ଭାବେ ଲଲାଟେନ୍ଦୁ ସାମନ୍ତରାୟ, ସମ୍ପାଦକ ଭାବେ ବିଜୟ କୁମାର ରଗଡ, ଯୁଗ୍ମ ସମ୍ପାଦକ ଭାବେ କରୁଣାକର ଦାସ, ସହ ସଂପାଦକ ଭାବେ ରୂପେଶ କୁମାର କାନୁନଗୋ ପ୍ରମୁଖ ନିର୍ବାଚିତ ହୋଇଛନ୍ତି ।

ପ୍ରତି ବର୍ଷ ହାଇକୋର୍ଟ ବାର ଏସୋସିଏସନର ନିର୍ବାଚନ ହୋଇଥାଏ । ସୂର୍ଯ୍ୟ ପ୍ରସାଦ ମିଶ୍ର ଗତ ବର୍ଷ ନିର୍ବାଚନରେ ଏହି ଏସୋସିଏସନର ସଭାପତି ନିର୍ବାଚିତ ହୋଇଥିଲେ ।

ସେ ବର୍ତ୍ତମାନ ରାଜ୍ୟର ଆଡଭୋକେଟ ଜେନେରାଲ ଭାବେ କାର୍ଯ୍ୟ କରୁଛନ୍ତି ।

ଓଡିଶା ଡଟ କମ

ନିଉଜ ଡେସ୍କ :

This website uses cookies.