ରାଜନୀତି

ବିଜେଡି, ବିଜେପି ଗୁପ୍ତ ବୁଝାମଣା ଅଭିଯୋଗକୁ ଭେଙ୍କେୟାଙ୍କ ଖଣ୍ଡନ

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ମଇ ୨୮ (ଓଡିଶା ଡଟ କମ) ରାଜ୍ୟର ଶାସକ ବିଜେଡି ସହ ବିଜେପି ଗୁପ୍ତ ବୁଝାମଣା କରିଥିବା ବିରୋଧୀ ଦଳର ଅଭିଯୋଗକୁ କେନ୍ଦ୍ର ସହରାଞ୍ଚଳ ବିକାଶ ମନ୍ତ୍ରୀ ଭେଙ୍କେୟା ନାଇଡୁ ଖଣ୍ଡନ କରିଛନ୍ତି ।

ଇ ଟିଭି ଓଡିଆକୁ ଏକ ସାକ୍ଷାତକାର ରେ ସେ କହିଛନ୍ତି ଯେ ବିଜେଡି ନେତୃତ୍ଵାଧୀନ ରାଜ୍ୟ ସରକାରଙ୍କର ହୃଦବୋଧ ହୋଇଛି ଯେ କେବଳ ବିରୋଧ ପାଇଁ ବିରୋଧ କରିବା ଅନୁଚିତ। ବିଭିନ୍ନ କ୍ଷେତ୍ରରେ ବିଜେଡି ସରକାର କେନ୍ଦ୍ର ସରକାରଙ୍କ ଆଭିମୁଖ୍ୟ ବୁଝିପାରିଥିବା ସେ କହିଛନ୍ତି ।

ବିଜେଡି ଅତୀତରେ ମୁଖ୍ୟତଃ କଂଗ୍ରେସ ନେତୃତ୍ଵାଧୀନ ଇଉପିଏ ସରକାର ବିରୁଦ୍ଧରେ ରାଜ୍ୟକୁ ପାତରଅନ୍ତର କରୁଥିବା ଅଭିଯୋଗ ସବୁବେଳେ କରିଆସୁଥିଲା । ଯଦିଓ ବିଜେଡି ଏନଡିଏ ସରକାର ବିରୁଦ୍ଧରେ ମଧ୍ୟ ସମାନ ଅଭିଯୋଗ କରି ଆସିଛି ତେବେ କେନ୍ଦ୍ର ବିରୁଦ୍ଧରେ ନା ବିଜେଡି ଧାରଣ ପ୍ରଦର୍ଶନ କରୁଛି ନା ସରକାରଙ୍କ ପକ୍ଷରୁ କଡ଼ା ଆଭିମୁଖ୍ୟ ଗ୍ରହଣ କରା ଯାଉଛି ।

ରାଜ୍ୟର ମୁଖ୍ୟ ବିରୋଧୀ ଦଳ କଂଗ୍ରେସ ବିଜେଡି ସହ ବିଜେପି ଗୁପ୍ତ ବୁଝାମଣା କରିଥିବା ଅଭିଯୋଗ କରିଆସୁଛି ।

ଓଡ଼ିଶାକୁ ସ୍ଵତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦେବା ଏକ ପ୍ରଶ୍ନର ଉତ୍ତରରେ ଭେଙ୍କେୟା କହିଥିଲେ ଯେ ବର୍ତ୍ତମାନ ୮ଟି ରାଜ୍ୟ ଏହି ଦାବି କରୁଛନ୍ତି । ଏହା ମଧ୍ୟରେ ଓଡ଼ିଶା, ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ, ତେଲେଙ୍ଗାନକୁ ଛାଡି ମହାରାଷ୍ଟ୍ର ଓ ତାମିଲନାଡୁ ପରି ବିକଶିତ ରାଜ୍ୟ ମଧ୍ୟ ଅଛନ୍ତି।

ଏପରିସ୍ଥିତିରେ କେନ୍ଦ୍ର ସରକାରଙ୍କୁ ବିଭିନ୍ନ ମାପକାଠିର ବିଚାର କରିବାକୁ ପଡିଥାଏ। ଏଥିପାଇଁ କେନ୍ଦ୍ର ସରକାର ଅନୁଦାନ କିପରି ଯୋଗାଡ କରିବେ ତାହା ବିଷୟରେ ଚିନ୍ତା କରିବା ମଧ୍ୟ ଦରକାର ବୋଲି ସେ କହିଥିଲେ।

ଏଥର କେନ୍ଦ୍ର ସରକାର ରାଜ୍ୟକୁ ଦେଉଥିବା ୮ଟି ଯୋଜନାରେ ଅର୍ଥ କାଟି ଦେଇଛନ୍ତି। ଏହାକୁ ନେଇ ରାଜ୍ୟ ସରକାର ଆପତ୍ତି ମଧ୍ୟ ଦର୍ଶାଇଛନ୍ତି। ରାଜ୍ୟ ସରକାରଙ୍କ ଏହି ଅଭିଯୋଗର ଉତ୍ତର ରଖିଛନ୍ତି ଭେଙ୍କେୟା। କହିଛନ୍ତି କେନ୍ଦ୍ର ସରକାର ରାଜ୍ୟ ବାବଦରେ କେନ୍ଦ୍ରୀୟ ଅର୍ଥ ଭାଗ ୪୫ ପ୍ରତିଶତକୁ ବୃଦ୍ଧି କରିଛନ୍ତି।

ରାଜ୍ୟ ହାତରେ ଅଧିକ ଅର୍ଥ ଦେଇ କେନ୍ଦ୍ର ସରକାର ରାଜ୍ୟକୁ ଆର୍ଥିକ ସ୍ଵତନ୍ତ୍ରତା ଦେଇଛନ୍ତି। ଯାହା ଫଳରେ ରାଜ୍ୟ ସରକାର ରାଜ୍ୟର ଆବଶ୍ୟକତା ଅନୁସାରେ ଯୋଜନା ତିଆରି କରିପାରିବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜ ମୁଖ୍ୟମନ୍ତ୍ରୀ କାଳର ଅନୁଭବକୁ ଆଖିଆଗରେ ରଖି ଏହି ଯୋଜନା ତିଆରି କରିଛନ୍ତି। ଯାହାର ଲାଭ ରାଜ୍ୟ ସରକାର ଉଠାଇପାରିବେ ବୋଲି ସେ କହିଛନ୍ତି।

ଖାଲି ଅଧିକ ଅର୍ଥ ଦାବିନକରି କେନ୍ଦ୍ର ସରକାର ବିଭିନ୍ନ ଯୋଜନା ମାଧ୍ୟମରେ ଦେଉଥିବା ଅର୍ଥକୁ ରାଜ୍ୟ ସରକାର ଠିକ ଭାବେ ବିନିଯୋଗ କରିବାକୁ ଭେଙ୍କେୟା ପରାମର୍ଶ ଦେଇଛନ୍ତି ।

ଓଡିଶା ଡଟ କମ

Leave a Reply

This site uses Akismet to reduce spam. Learn how your comment data is processed.