ଓଡିଶା ନ୍ୟୁଜ/ Odisha News
ସଭା ସମିତି

ଜୁନ୍ ୨୬ରେ ଭୁବନେଶ୍ଵରରେ ନିଶା ମୁକ୍ତି ଗଣଦୌଡ଼

ଓଡିଶା ଡଟ କମ ସଂବାଦ ଦାତା

ନୂଆଦିଲ୍ଲୀ, ଜୁନ ୧୮ (ଓଡିଶା ଡଟ କମ ) ଦିଲ୍ଲୀରେ ସର୍ବଭାରତୀୟ ସ୍ତରରେ ସ୍ୱୀକୃତିପ୍ରାପ୍ତ ଓଡ଼ିଆ ସମାଜସେବୀ ସଂସ୍ଥା ଓଡ଼ିଶା ପ୍ରାଇଡ୍ ଆସନ୍ତା ଜୁନ୍ ୨୬ ତାରିଖରେ ଭୁବନେଶ୍ୱରଠାରେ ଏକ ନିଶାମୁକ୍ତି ଗଣଦୌଡ଼ ତଥା ସଚେତନତା ସଭା କଳିଙ୍ଗ ଷ୍ଟାଡିୟମ୍ ରେ ଆୟୋଜନ କରୁଛନ୍ତି ।

ଭାରତ ସରକାରଙ୍କ ଅବସରପ୍ରାପ୍ତ ସ୍ୱାସ୍ଥ୍ୟ ସଚିବ ତଥା ଓଡ଼ିଶା ପ୍ରାଇଡ୍ ର ମୁଖ୍ୟ ଉପଦେଷ୍ଟା ଶ୍ରୀଯୁକ୍ତ ଅମୂଲ୍ୟରତ୍ନ ନନ୍ଦଙ୍କ ପ୍ରତ୍ୟକ୍ଷ ପ୍ରେରଣାରେ ନିଶାର କୁପରିଣତି ଉପରେ ସଚେତନତା ଆଣିବା ପାଇଁ ଏହି ରାଜ୍ୟସ୍ତରୀୟ କାର୍ଯ୍ୟକ୍ରମଟି ଆୟୋଜନ କରାଯାଉଅଛି ।

ବିଗତ କିଛି ବର୍ଷ ହେବ ଓଡ଼ିଶାର ବ୍ରହ୍ମପୁର ସହରରେ ଓଡ଼ିଶା ପ୍ରାଇଡ୍ ନିଶା ମୁକ୍ତି ସଚେତନତା ଅଭିଯାନ ଚଳାଇ ଆସିଅଛି ।

ସଂସ୍ଥାର ସଭାପତି ମାନସ ଦାସଙ୍କ ନେତୃତ୍ୱରେ ବିଭିନ୍ନ ସମୟରେ ଯୁବ-ଛାତ୍ରମାନଙ୍କୁ ସଂଗଠିତ କରି ଆଦର୍ଶ ଜୀବନଯାପନ ଉପରେ ଶିବିରମାନ ଆୟୋଜନ କରିବା, ବନ୍ୟା-ବାତ୍ୟା ସମୟରେ ପୀଡ଼ିତମାନଙ୍କ ସେବା ତଥା ଥଇଥାନ କରିବା, ଓଡ଼ିଶାର କୀର୍ତ୍ତିରାଜିକୁ ୱେବ ସାଇଟ ରେ ପ୍ରଚାର ପ୍ରସାର କରିବା ଇତ୍ୟାଦି କାର୍ଯ୍ୟକ୍ରମ ବେଶ୍ ଜନାଦୃତ ହୋଇପାରିଛି ।

ଶିକ୍ଷା ପାଠ୍ୟକ୍ରମରେ ନିଶାର କୁପ୍ରଭାବ ଉପରେ ସଚେତନତା ଆଣିବା ପାଇଁ ବିଶେଷ ପାଠ୍ୟଖସଡ଼ା ପ୍ରସ୍ତୁତ କରିବା ପାଇଁ ଓଡ଼ିଶା ପ୍ରାଇଡ୍ ଅଭିଯାନ ଆରମ୍ଭ କରିଛି । ଆସନ୍ତା ଜୁନ୍ ୨୬ ତାରିଖରେ ରାଜ୍ୟର ବିଭିନ୍ନ ସ୍ଥାନରୁ ପାଖାପାଖି ତିନି ହଜାର ଯୁବ-ଛାତ୍ରଙ୍କ ପାଇଁ ଏକ ଗଣଦୌଡ଼ ସକାଳ ୭ ଘଟିକା ସମୟରେ ଭୁବନେଶ୍ୱର କଳିଙ୍ଗ ଷ୍ଟାଡିୟମ ରୁ ଆରମ୍ଭ ହୋଇ ସହର ପରିକ୍ରମା କରି କଳିଙ୍ଗ ଷ୍ଟାଡିୟମରେ ସମାପ୍ତ ହେବ ।

ଦିନ ୯.୩୦ ମିନିଟ୍ ଠାରୁ ୧୨ଟା ପର୍ଯ୍ୟନ୍ତ ଆଧ୍ୟାତ୍ମିକ, ସାମାଜିକ ତଥା ବିଜ୍ଞାନ ଭିତ୍ତିକ ଆଲୋଚନାଚକ୍ର କଳିଙ୍ଗ ଷ୍ଟାଡିୟମ୍ ଠାରେ ଅନୁଷ୍ଠିତ ହେବ । ଯେଉଁଥିରେ ୟୁ.ଏନ୍.ଓ.ଡି.ସି., ଏନ୍.ସି.ବି., ଆନ୍ତର୍ଜାତିକ ସ୍ତରରେ ପ୍ରସିଦ୍ଧି ଲାଭ କରିଥିବା ସନ୍ଥ, ପ୍ରଖର ବକ୍ତା, ସମାଜସେବୀ, ଓ ସରକାରୀ ପ୍ରତିନିଧିମାନେ ପ୍ରତିଭାଗୀମାନଙ୍କୁ ପ୍ରେରଣା ଦେବେ ।

ବିଶିଷ୍ଟ ବାଲୁକାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ, ଗିନିଜ୍ ବୁକ୍ ଅଫ୍ ୱାର୍ଲଡ୍ ରେକର୍ଡ଼ କରିଥିବା ଦୁର୍ଗା ଚରଣ ମିଶ୍ର, ସଫଳ ପର୍ବତାରୋହୀ ଯୋଗବ୍ୟାସ ଭୋଇ, ସିନେ ତାରିକା ସବ୍ୟସାଚୀ ମିଶ୍ର କାର୍ଯ୍ୟକ୍ରମରେ ଉପସ୍ଥିତ ରହି ଯୁବ-ଛାତ୍ରମାନଙ୍କୁ ଅନୁପ୍ରାଣିତ କରିବେ ।

ଏଥିପାଇଁ ରେଜିଷ୍ଟ୍ରେସନ୍ ମାଗଣା ଅଟେ । ଯେଉଁମାନେ ପ୍ରଥମରୁ ନିଜକୁ ପଞ୍ଜିକୃତ କରିଥିବେ, ସେମାନଙ୍କ ପାଇଁ ଟି-ସାର୍ଟ, ଟୋପି ଏବଂ ମାନପତ୍ର ପ୍ରଦାନ କରାଯିବ । ସମାଜ ପାଇଁ ବିଶେଷ ଅବଦାନ ତଥା ବିଶେଷ କରି ନିଶାମୁକ୍ତ ଅଭିଯାନରେ ଉତ୍ସର୍ଗୀକୃତ ବ୍ୟକ୍ତିମାନଙ୍କୁ ସମ୍ବର୍ଦ୍ଧିତ କରାଯିବ ।

ରେଜିଷ୍ଟ୍ରେସନ୍ ପାଇଁ ଏହି ନମ୍ବରମାନଙ୍କରେ ଯୋଗାଯୋଗ କରିବା ପାଇଁ ସଭାପତି ମାନସ ଦାସ ନିବେଦନ କରିଛନ୍ତି । ୯୬୯୨୩୭୨୧୧୬, ୮୮୯୫୦୪୮୩୯୯, ୯୪୩୯୩୩୫୦୯, ୭୮୦୯୯୭୮୬୨୨, ୦୮୮୦୦୧୩୪୩୨୬, ୯୪୩୯୩୬୫୯୯୨, ୯୪୩୭୯୩୬୩୧୫, ୮୭୬୩୫୪୬୧୨୩, ୯୪୩୮୭୪୭୩୨୦

ଦିଲ୍ଲୀରେ ରହୁଥିବା ବିଭିନ୍ନ ଓଡ଼ିଆ ସଂସ୍ଥା ତଥା ବିଶିଷ୍ଟ ବ୍ୟକ୍ତିମାନେ ଓଡ଼ିଶା ପ୍ରାଇଡ୍ ଏହି ନିଶାମୁକ୍ତି ଅଭିଯାନର ସଫଳ କାମନା କରିଥିବା ବେଳେ ଓଡ଼ିଶାରେ ସମସ୍ତ ଶିକ୍ଷାନୁଷ୍ଠାନ, ସମାଜସେବୀ ସଂସ୍ଥା ତଥା ଆଗ୍ରହୀ ବ୍ୟକ୍ତିମାନଙ୍କୁ କାର୍ଯ୍ୟକ୍ରମରେ ସହଯୋଗ ପାଇଁ ଓଡ଼ିଶା ପ୍ରାଇଡ୍ ନିବେଦନ କରିଛନ୍ତି ।

ଓଡିଶା ଡଟ କମ

Leave a Reply

This site uses Akismet to reduce spam. Learn how your comment data is processed.