ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ଵର, ୩୦ ଜୁନ (ଓଡିଶା ଡଟ୍ କମ୍): ବଜ୍ରପାତ, ଘୂର୍ଣ୍ଣିବାତ୍ୟା, ଟର୍ନାଡୋ, ପ୍ରବଳ ବୃଷ୍ଟିପାତ, ନୌକା ଦୁର୍ଘଟଣା, ବୁଡିଯିବା ଜନିତ ମୃତ୍ୟୁ ଏବଂ ସର୍ପାଘାତ ସମେତ ଆଠଟି ଦୁର୍ବିପାକକୁ ସରକାର ସ୍ଵତନ୍ତ୍ର ପ୍ରାକୃତିକ ବିପର୍ଯ୍ୟୟରେ ମଙ୍ଗଳବାର ଅନ୍ତର୍ଭୁକ୍ତ କରିଛନ୍ତି ।
ସଚିବାଳୟରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟସ୍ତରୀୟ ପ୍ରାକୃତିକ ବିପର୍ଯ୍ୟୟ କମିଟି ବୈଠକରେ ଏହି ନିଷ୍ପତ୍ତି ନିଆଯାଇଛି । ସ୍ଵତନ୍ତ୍ର ପ୍ରାକୃତିକ ବିପର୍ଯ୍ୟୟରେ ମୃତ୍ୟୁବରଣ କରୁଥିବା ବ୍ୟକ୍ତିଙ୍କ ପାଇଁ କ୍ଷତିପୂରଣ ରାଶିକୁ ଚାରି ଲକ୍ଷକୁ ବୃଦ୍ଧି କରିବା ପାଇଁ ମଧ୍ୟ ସ୍ଥିର କରାଯାଇଛି ।
ପ୍ରାକୃତିକ ବିପର୍ଯ୍ୟୟ ଗୁଡିକର ମୁକାବିଲା ଓ ମୃତ୍ୟୁ କ୍ଷେତ୍ରରେ ସହାୟତା ପ୍ରଦାନ ପାଇଁ ସବୁ ବିଭାଗକୁ ଆପାତକାଳୀନ ପ୍ରସ୍ତୁତି କରିବା ପାଇଁ ନିର୍ଦ୍ଦେଶ ଦେବା ସହ ଦୁର୍ବଳ ନଦୀବନ୍ଧର ସୁଦୃଢୀକରଣ ଓ ସମସ୍ତ ଘାଇର ମରାମତି କରିବାପାଇଁ ଜଳସମ୍ପଦ ବିଭାଗକୁ ସେ କହିଛନ୍ତି।
ସେହିପରି ବନ୍ୟା ସମୟରେ ଉଦ୍ଧାର ଓ ରିଲିଫ କାର୍ଯ୍ୟ ପାଇଁ ଓଡ୍ରାଫ ଓ ଅଗ୍ନିଶମ ସେବାସଂସ୍ଥାକୁ ପ୍ରସ୍ତୁତ ରଖିବାପାଇଁ ସେ ନିର୍ଦ୍ଦେଶ ଦେଇଛନ୍ତି ।
ଏହି ବୈଠକରେ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ଶ୍ରୀ ବିଜୟଶ୍ରୀ ରାଉତରାୟ, ସମବାୟ ମନ୍ତ୍ରୀ ଡଃ ଦାମୋଦର ରାଉତ, ଅର୍ଥମନ୍ତ୍ରୀ ଶ୍ରୀ ପ୍ରଦୀପ କୁମାର ଅମାତ୍, ବିରୋଧୀ ଦଳ ନେତା ଶ୍ରୀ ନରସିଂହ ମିଶ୍ର, ବିଭିନ୍ନ ବିଭଗର ମନ୍ତ୍ରୀ, ସାସଂଦ, ବିଧାୟକ, ମୁଖ୍ୟଶାସନ ସଚିବ, ଉନ୍ନୟନ କମିଶନର ଏବଂ ବିଭିନ୍ନ ବିଭଗର ପ୍ରମୁଖ ଶାସନ ସଚିବ ଓ ସଚିବ ମାନେ ଉପସ୍ଥିତ ଥିଲେ।
ଓଡିଶା ଡଟ୍ କମ୍
Leave a Reply