ଧର୍ମ

ନବ କଳେବର ଘୋଷ ଯାତ୍ରା ପାଇଁ ପୁରୀ ଲୋକାରଣ୍ୟ

ଓଡିଶା ଡଟ୍ କମ୍ ସମ୍ବାଦଦାତା

ପୁରୀ,୧୮ ଜୁଲାଇ (ଓଡିଶା ଡଟ୍ କମ୍): ନବକଳେବର ଘୋଷ ଯାତ୍ରା ଦେଖିବା ପାଇଁ ଶନିବାର ପୁରୀରେ ଲକ୍ଷ ଲକ୍ଷ ଭକ୍ତ ପହଞ୍ଚିଛନ୍ତି ।

ସକାଳୁ ସମସ୍ତ ରୀତି ନୀତି ଆରମ୍ଭ ହୋଇଥିବା ବେଳେ, କୋହଲା ପାଗ ଯୋଗୁଁ ଅପରାହ୍ନ ସୁଦ୍ଧା ଭକ୍ତଙ୍କ ସଂଖ୍ୟା ବଢିବାର ସମ୍ଭାବନା ଥିବା ଦୃଷ୍ଟିରୁ ପ୍ରଶାନ ଓ ପୁଲିସ ତରଫରୁ ବ୍ୟାପକ ପଦକ୍ଷେପ ନିଆଯାଇଛି ।

ଶୁକ୍ରବାର ଶ୍ରୀମନ୍ଦିରରେ ଶ୍ରୀବିଗ୍ରହଙ୍କ ନବଯୌବନ ଓ ନେତ୍ରୋତ୍ସବ ଦର୍ଶନ ନୀତି ସୁରୁଖୁରୁରେ ସମ୍ପନ୍ନ ହୋଇଛି । ପ୍ରାତଃ ସମୟରୁ ଶ୍ରୀମନ୍ଦିରରେ ଚାଲିଥିବା ମହାପ୍ରଭୁଙ୍କର ଚକା ଅପସର,
ମଙ୍ଗଳ ଆଳତୀ, ମଇଲମ, ଅବକାଶ, ଦଶାବତାର ବାହୁଡ଼ା ବିଜେ, ଦଇତାପତି ସର୍ବାଙ୍ଗ ଏବଂ ଜନ୍ମ ବନ୍ଦାପନା ଆଦି ନୀତି ସଂପନ୍ନ ହୋଇସାରିଛି ।

ପୂର୍ବରୁ ନିର୍ଦ୍ଧାରଣ କରାଯାଇଥିବା ସମୟାନୁଯାୟୀ ଚତୁର୍ଦ୍ଧାମୂର୍ତ୍ତି ନୂଆ ରୂପରେ ଉଭା ହେବା ପରେ ବଡ ମହାସ୍ନାନ ଶେଷାନ୍ତେ ଖେଚୁଡ଼ି ଭୋଗ ଲାଗି ହେବା ଏବଂ ରଥଖଳାକୁ ଆଜ୍ଞାମାଳ ଆସିବା ପରେ ଭୋଗମଣ୍ଡପରେ ମଧ୍ୟାହ୍ନ ଧୂପ ଓ ସଂଧ୍ୟାଧୂପ ଆଦି ଶ୍ରୀଜିଉଙ୍କର ନୀତି କରଯାଇଥିଲା ।

ରଥଖଳାକୁ ଶ୍ରୀବିଗ୍ରହଙ୍କ ଆଜ୍ଞାମାଳ ଆସିବା ପରେ ରଥକୁ ଦକ୍ଷିଣ ମୋଡ଼ କରଯାଇଥିଲା। ଏହା ପରେ ବଡଦାଣ୍ଡରେ ଘଣ୍ଟ ମୃଦଙ୍ଗ ବଜାଇ ଗୋଟେ ପରେ ଗୋଟେ ତିନି ରଥକୁ ଶ୍ରୀମନ୍ଦିରର ସିଂହଦ୍ୱାର ସମ୍ମୁଖକୁ ଟାଣିଟାଣି ନିଆଯାଇଥିଲା।

ହାଇକୋର୍ଟ ଙ୍କ ନିର୍ଦ୍ଦେଶ କ୍ରମେ ନେତ୍ରୋତ୍ସବ ଦର୍ଶନ ବାରଣ କରାଯାଇଥିବାରୁ ଭକ୍ତମାନଙ୍କ ନିରାଶ ହୋଇଥିଲେ ତେବେ ତିନି ରଥକୁ ଦେଖି ସେମାନେ ଉଲ୍ଲସିତ ହୋଇଥିଲେ ।

ଯେଉଁ ସେବାୟତମାନେ ଶ୍ରୀଜିଉଙ୍କର ରୀତିନୀତି ସହ ସମ୍ପୃକ୍ତ କେବଳ ସେହି ସେବାୟତଙ୍କ ବ୍ୟତୀତ ଅନ୍ୟ କୌଣସି ବ୍ୟକ୍ତି ବା ସେବାୟତଙ୍କ ପରିବାର ବର୍ଗ ବା

ପ୍ରଶାସନିକ ଅଧିକାରୀମାନେ ମନ୍ଦିର ଭିତରକୁ ପ୍ରବେଶ କରିପାରିବେ ନାହିଁ ବୋଲି ହାଇକୋର୍ଟ କହିଛନ୍ତି ।

ଏତଦବ୍ୟତୀତ ଶ୍ରୀମନ୍ଦିରର ପ୍ରବେଶ ଏବଂ ପ୍ରସ୍ଥାନ ପଥରେ ସିସିଟିଭି କ୍ୟାମେରା ଲଗାଇବା ଓ ଏଥିରେ ଉତ୍ତୋଳିତ ଫୁଟେଜକୁ କାର୍ଯ୍ୟକ୍ରମ ଶେଷ ପରେ କୋର୍ଟ ରେ ଦାଖଲ କରିବା ପାଇଁ ଅଦାଲତ ନିର୍ଦ୍ଦେଶ ଦେଇଛନ୍ତି।

ପୁରୀ ସମେତ ରାଜ୍ୟର ଅନ୍ୟାନ୍ୟ ସ୍ଥାନରେ ମଧ୍ୟ ଶ୍ରୀବିଗ୍ରହଙ୍କର ନବଯୌବନ ଦର୍ଶନ ରୀତିନୀତି ଶେଷ ହୋଇଛି ।

ଓଡିଶା ଡଟ୍ କମ୍

Leave a Reply

This site uses Akismet to reduce spam. Learn how your comment data is processed.