ଓଡିଶା ନ୍ୟୁଜ/ Odisha News
ଧର୍ମ

ନୂଆ ଦିଅଁଙ୍କୁ ରଥରେ ଦର୍ଶନ କଲେ ଲକ୍ଷାଧିକ ଭକ୍ତ

ଓଡିଶା ଡଟ କମ ସଂବାଦ ଦାତା

ପୁରୀ, ଜୁଲାଇ ୧୯ (ଓଡିଶା ଡଟ କମ) ଚଳିତ ଶତାବ୍ଦୀର ପ୍ରଥମ ନବ କଳେବର ଯାତ୍ରା ଶନିବାର ପୁରୀରେ ଅନୁଷ୍ଠିତ ହୋଇଥିବା ବେଳେ ତିନି ଠାକୁରଙ୍କୁ ରଥରେ ଦର୍ଶନ କରିଛନ୍ତି ପ୍ରାୟ ପନ୍ଦର ଲକ୍ଷରୁ ଊର୍ଦ୍ଧ୍ଵ ଭକ୍ତ ଓ ଶ୍ରଦ୍ଧାଳୁ ।

ନିର୍ଦ୍ଧାରିତ ସମୟର ପ୍ରାୟ ଅଧ ଘଣ୍ଟା ପୂର୍ବରୁ ସମ୍ପନ୍ନ ହୋଇଥିଲା ଶ୍ରୀବିଗ୍ରହଙ୍କର ସମସ୍ତ ରୀତିନୀତି । ତା’ପରେ ଶ୍ରୀମନ୍ଦିରର ସିଂହଦ୍ଵାର ସମ୍ମୁଖରେ ସୁସଜ୍ଜିତ ହୋଇରହିଥିବା ରଥ ଉପରକୁ ଚତୁର୍ଦ୍ଧା ମୂର୍ତ୍ତିଙ୍କୁ ଧାଡି ପହଣ୍ଡି କରି ଅଣାଯାଇଥିଲା ।

Mumbai-ratha jatra

ନବୀ ମୁମ୍ବାଇର ଖରଘରରେ ଆୟୋଜିତ ରଥ ଯାତ୍ରା
ନବୀ ମୁମ୍ବାଇର ଖରଘରରେ ଆୟୋଜିତ ରଥ ଯାତ୍ରା

ପ୍ରଥମେ ଶ୍ରୀ ସୁଦର୍ଶନଙ୍କୁ ରଥାରୂଢ କରାଯିବାପରେ ଶ୍ରୀ ବଳଭଦ୍ରଙ୍କୁ ତାଳଧ୍ଵଜ ରଥରେ, ଦେବୀ ସୁଭଦ୍ରାଙ୍କୁ ଦେବଦଳନ ବା ଦର୍ପଦଳନ ରଥରେ ଓ ଶେଷରେ ଶ୍ରୀ ଜଗନ୍ନାଥଙ୍କୁ ନନ୍ଦିଘୋଷ ରଥରେ ବିଜେ କରିଥିଲେ ।

ଅନ୍ୟ ରୀତିନୀତି ସମ୍ପନ୍ନ ହେବା ପରେ ଗଜପତିଙ୍କ ଦ୍ଵାରା ତିନିରଥର ଛେରା ପହଁରା କରଯାଇ ରଥଟଣା ଆରମ୍ଭ ହୋଇଥିଲା ।ଶ୍ରୀବିଗ୍ରହଙ୍କୁ ରଥାରୂଢ କରାଯିବପରେ ରଥ ସମ୍ମୁଖରେ ବନାଟି ଖେଳ ଓ ଗୋଟିପୁଅ ନୃତ୍ୟର ମନମୁଗ୍ଧକର ଦୃଶ୍ୟ ମଧ୍ୟ ଦେଖିବାକୁ ମିଳିଥିଲା।

ଶ୍ରୀବିଗ୍ରହଙ୍କୁ ନବକଳେବର ବେଶରେ ରଥଉପରେ ଦର୍ଶନ କରିବା ପାଇଁ ଦେଶ ବିଦେଶରୁ ଆସିଥିବା ବହୁ ଓଡିଆ ଓ ବିଦେଶୀ ଭକ୍ତ ତିନି ଠାକୁରଙ୍କୁ ରଥ ଉପରେ ଦେଖି ଭାବ ବିହ୍ଵଳ ହୋଇପଡିଥିଲେ ।

ତେବେ ସମସ୍ତ ରୀତିନୀତି ସୁରୁଖୁରୁରେ ସମ୍ପର୍ଣ ହୋଇଥିବା ବେଳେ, ବିଭିନ୍ନ ଅଘଟଣରେ ଦୁଇ ଜଣ ମହିଳାଙ୍କ ସମେତ ଚାରିଜଣଙ୍କ ମୃତ୍ୟୁ ଘଟିଛି । ପହଣ୍ଡି, ଓ ଅନ୍ୟାନ୍ୟ ରୀତିନୀତି ନିର୍ଧାରିତ ସମୟର ଯଥେଷ୍ଟ ପୂର୍ବରୁ ଆରମ୍ଭ ହୋଇଥିଲେ ସୁଦ୍ଧା ବଳଭଦ୍ରଙ୍କ ରଥ ବ୍ୟତୀତ ଅନ୍ୟରଥ ଗୁଣ୍ଡିଚା ମନ୍ଦିରକୁ ପହଞ୍ଚିପାରି ନଥିଲା ।

ଦେବୀ ସୁଭଦ୍ରାଙ୍କ ଦର୍ପଦଳନ ରଥ ବଡ଼ଶଙ୍ଖ ନିକଟରେ ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ମାଜଣା ଜାଗା ନିକଟରେ ଅଟକି ରହିଛି । ରବିବାର ଏହି ଦୁଇରଥ ପୁଣି ଟଣାଯିବ ।

ରଥଟଣା ସମୟରେ ଅଣନିଶ୍ଵାସୀ ହୋଇ ଜଣେ ମହିଳାଙ୍କର ମୃତ୍ୟୁ ହୋଇଥିବା ବେଳେ ଛାତରୁ ପଡି ପାଞ୍ଚ ଜଣ ସାମାନ୍ୟ ଆହତ ହୋଇଥିବା ସୂଚନା ମିଳିଛି। ଠିକ ସେହି ପରି ଟ୍ରେନରେ କଟି ଦୁଇଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଏକ ଦୁର୍ଘଟଣାରେ ଜଣକର ମୃତ୍ୟୁ ଘଟିଛି ।

ଓଡିଶା ଡଟ କମ

Leave a Reply

This site uses Akismet to reduce spam. Learn how your comment data is processed.