ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ୬ ଅଗଷ୍ଟ (ଓଡିଶା ଡଟ କମ) ପ୍ରଥମଥର ପାଇଁ ରାଜ୍ୟରେ ଲୋକାଭିମୁଖି ସାମ୍ବାଦିକତାକୁ ଆବଶ୍ୟକ ଗୁରୁତ୍ୱ ପ୍ରଦାନ ପୂର୍ବକ କିଛି ସାମ୍ବାଦିକ ତଥା ପ୍ରତିବଦ୍ଧ ସମାଜସେବୀଙ୍କ ଦ୍ୱାରା ଓଡିଶା ମିଡିଆ ଆୱାର୍ଡର ପରିକଳ୍ପନା କରାଯାଇଛି ।
ଲୋକଙ୍କ ସମସ୍ୟାକୁ ବିଭିନ୍ନ ଗଣମାଧ୍ୟମ ଜରିଆରେ ରିପୋର୍ଟ ଏବଂ କାର୍ଯ୍ୟକ୍ରମ ମାଧ୍ୟମରେ ଲୋକଲୋଚନକୁ ଆଣିବା ସହ ସେଗୁଡ଼ିକର ସମାଧାନ ପାଇଁ ପ୍ରୟାସ କରିଥିବା ସାମ୍ବାଦିକ ଏବଂ ଗଣମାଧ୍ୟମ ସଦସ୍ୟଙ୍କୁ ସମ୍ମାନିତ ଏବଂ ଉତ୍ସାହିତ କରିବା ଏହାର ଲକ୍ଷ୍ୟ ।
ଗତ ଫେବୃଆରୀ ୫ ତାରିଖରୁ ଓଡିଶା ମିଡିଆ ଆୱାର୍ଡ ପାଇଁ ମନୋନୟନପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇ ଏଥି ମଧ୍ୟରେ ମନୋନୟନ ପ୍ରକ୍ରିୟା ଶେଷ ହେବା ସଂଗେ ସଂଗେ ସମ୍ମାନିତ ପ୍ରତିଭା ମାନଙ୍କର ନାମ ଘୋଷଣା ହୋଇଛି । ଶ୍ରେଷ୍ଠ ସଂପାଦକ, ସ୍ତମ୍ଭକାର, କାର୍ଟୁନିଷ୍ଟ୍, ରେଡିଓ ଓ ଟେଲିଭିଜନ କାର୍ଯ୍ୟକ୍ରମ, ଡକ୍ୟୁମେଂଟାରୀ, ଗଣ ଯୋଗାଯୋଗ ଶିକ୍ଷାନୁଷ୍ଠାନ ସହ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିବା ସାମ୍ବାଦିକ, ଉପସ୍ଥାପକ/ ଉପସ୍ଥାପିକା ଏବଂ ଅନୁଷ୍ଠାନମାନଙ୍କୁ ଏଥିରେ ସମ୍ମାନିତ କରାଯିବ ।
ଓଡିଶା ମିଡିଆ ଆୱାର୍ଡର ଚୟନ ନିମନ୍ତେ ରାଜ୍ୟରେ ଗଣମାଧ୍ୟମ ସହ ବିଭିନ୍ନ ସାମାଜିକ କ୍ଷେତ୍ରରେ ସୁନାମ ପାଇଥିବା ବ୍ୟକ୍ତି ବିଶେଷଙ୍କୁ ନେଇ ଏକ ଚୟନ କମିଟି ଗଠନ କରାଯାଇଥିଲା । ବିଭିନ୍ନ ସ୍ତରରେ ସାଧାରଣ ପାଠକ ପାଠିକା/ ଦର୍ଶକ ମାନଙ୍କର ମତାମତକୁ ଭିତ୍ତି କରି ୧୭ଟି ବର୍ଗରେ ୧୮ଜଣ ବ୍ୟକ୍ତିଙ୍କୁ ସମ୍ମାନିତ କରାଯିବ ।
ଆସନ୍ତା ଅଗଷ୍ଟ ୮ ତାରିଖ ଅପରାହ୍ଣରେ ଭୁବନେଶ୍ୱର ଜୟଦେବ ଭବନଠାରେ ଏହି ସମ୍ମାନ ପ୍ରଦାନ ସମାରୋହ ଆୟୋଜିତ ହେବ । କାର୍ଯ୍ୟକ୍ରମର ପ୍ରଥମ ପର୍ଯ୍ୟାୟରେ ‘ସାମ୍ବାଦିକତା ଏବେ ଅଧିକ ସାମାଜିକ ସକ୍ରିୟ କି?’ସଂପର୍କୀୟ ଆଲୋଚନାଚକ୍ର ପରେ ସମ୍ମାନ ପ୍ରଦାନ ସମାରୋହ ଆୟୋଜିତ ହେବ ।
ବରିଷ୍ଠ ସାମ୍ବାଦିକ ଚନ୍ଦ୍ର ମିଶ୍ରଙ୍କ ପରିଚାଳନାରେ ଏହି କାର୍ଯ୍ୟକ୍ରମରେ ୟୁନେସ୍କୋ, ୟୁନିସେଫ୍, ବିଶ୍ୱ ବେତାର ପ୍ରସାରକ ମହାସଂଘ, ଆକ୍ସନ ଏଡ୍ , ସେମକା ପରି ବିଭିନ୍ନ ଅନ୍ତର୍ଜାତୀୟ ସଂସ୍ଥାର ପ୍ରତିନିଧିଙ୍କ ସହ ଦେଶର ବିଭିନ୍ନ ପ୍ରାନ୍ତରୁ ବରିଷ୍ଠ ସାମ୍ବାଦିକ ଓ ସାମାଜିକ କର୍ମୀ ଯୋଗ ଦେବାର କାର୍ଯ୍ୟକ୍ରମ ରହିଛି ।
ଚଳିତ ବର୍ଷର ଓଡିଶା ମିଡିଆ ଆୱାର୍ଡ ପାଇବା ପାଇଁ ଯୋଗ୍ୟ ବିବେଚିତ ବ୍ୟକ୍ତି, କାର୍ଯ୍ୟକ୍ରମ ଓ ସଂସ୍ଥା ମାନେ ହେଲେ, ତଥାଗତ ଶତପଥୀ-ସଂପାଦକ, ସୈାମ୍ୟରଂଜନ ପଟ୍ଟନାୟକ-ପ୍ରେରଣାଦାୟୀ ମିଡିଆ ଉଦ୍ୟୋଗୀ, ହରପ୍ରସାଦ ଦାସ- ସ୍ତମ୍ଭକାର, କିଶୋର ରଥ- କାର୍ଟୁନିଷ୍ଟ, ତୋ ଅଗଣାର ତୁଳସୀ ମୁଁ (ସାର୍ଥକ ଟିଭି)-ଶ୍ରେଷ୍ଠ କାହାଣୀ ଚିତ୍ର, ସତ୍ୟର ସାମ୍ନା (ଜୀ କଳିଙ୍ଗ) – ଶ୍ରେଷ୍ଠ ବାସ୍ତବାଶ୍ରୟୀ କାର୍ଯ୍ୟକ୍ରମ, ଆପଣ ଏକା ନୁହନ୍ତି (ଓଡିଶା ଟିଭି)- ଅଭିନବ କାର୍ଯ୍ୟକ୍ରମ, ସ୍ୱୟଂପ୍ରକାଶ ମହାପାତ୍ର- ସଂବାଦ ପାଠକ, ମୋ ପସନ୍ଦ(ଆକାଶବାଣୀ, କଟକ)-ଲୋକପ୍ରିୟ ବେତାର କାର୍ଯ୍ୟକ୍ରମ, ଦରିଆ ପାରିର କଥା (ଓଡିଆ ରେଡିଓ)- ଅଭିନବ ବେତାର କାର୍ଯ୍ୟକ୍ରମ, ଆର.ଜେ. ସଂଗ୍ରାମ-ବେତାର ଉପସ୍ଥାପକ, ଦିଲ୍ଲିପ ସୁବୁଦ୍ଧି- ସାମ୍ବାଦିକ (ଜନ ସମସ୍ୟା),ବାସୁଦେବ ମହାପାତ୍ର-ସାମ୍ବାଦିକ (ପରିବେଶ), ଯତୀନ୍ଦ୍ର ଦାଶ-ସାମ୍ବାଦିକ (ବିକାଶଧର୍ମୀ) , ରୋଜାଲିନ ପ୍ରଧାନ (କୋଣାର୍କ) ଓ ଅମିତାଭ ପାତ୍ର (ବରଗଡ)-ଗ୍ରାମାଞ୍ଚଳ ସାମ୍ବାଦିକତା, ଭାରତୀୟ ଜନସଂଚାର ସଂସ୍ଥାନ, ଢେଙ୍କାନାଳ- ମିଡିଆ ଶିକ୍ଷାନୁଷ୍ଠାନ, ସମରେନ୍ଦ୍ର ଦାସ-ବୃତ୍ତଚିତ୍ର ।
ଭାରତୀୟ ଗୋଷ୍ଠୀ ବେତାର ମହାସଂଘ, ୟଙ୍ଗ ଇଣ୍ଡିଆ, ଆକ୍ସନ ଏଡ୍ ପ୍ରଭୃତି ସଂଗଠନ ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ ଯୋଗଦେଇ ଏହାକୁ ସଫଳ କରିବାକୁ ଆୟୋଜକ ମାନଙ୍କ ତରଫରୁ ବରିଷ୍ଠ ସମାଜକର୍ମୀ ତଥା ସାମ୍ବାଦିକ ଏନ୍. ଏ. ଶାହା ଅନସାରୀ ଅନୁରୋଧ କରିଛନ୍ତି ।
ଓଡିଶା ଡଟ କମ
