ଅର୍ଥ-ବ୍ୟବସାୟ

ଗୋ-ମହିଷାଦୀ ପ୍ରଜନନ ନୀତିରେ ଦେଶୀ ଗାଈଙ୍କ ବିକାଶ ଉପରେ ଗୁରୁତ୍ଵ

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ଅକ୍ଟୋବର ୨ (ଓଡିଶା ଡଟ କମ) ରାଜ୍ୟ କ୍ୟାବିନେଟର ମଞ୍ଜୁରୀ ପାଇଥିବା ଗୋ-ମହିଷାଦୀ ପ୍ରଜନନ ନୀତି ୨୦୧୫ରେ ପ୍ରସିଦ୍ଧ ଭାରତୀୟ ପ୍ରଜାତିର ଷଣ୍ଢ ମାନଙ୍କର ଶୁକ୍ର ବ୍ୟବହାର କରି ଓଡିଶାରେ ଦେଶୀ ଗାଈଙ୍କର ଗୁଣାତ୍ମକ କ୍ରମବିକାଶ କରାଯିବା ଓ ଗୋ ପାଳନ ଉଦ୍ୟୋଗକୁ କିପରି ଏକ ଲାଭ ଜଣକ ବ୍ୟବସାୟରେ ପରିଣତ କରାଯାଇପାରିବ ସେ ଦିଗରେ ଗୁରୁତ୍ଵ ଦିଆଯାଇଥିବା ବିଭାଗୀୟ ସଚିବ ଶୁକ୍ରବାର କହିଛନ୍ତି ।

binjharpur cow
ବିଂଝାରପୁର ଗାଈ

ରାଜ୍ୟର ଗୋ-ମହିଷାଦୀ ମାନଙ୍କର ଅନୁବଂଶୀୟ ଗୁଣର ଉନ୍ନତି ପାଇଁ ଉଦ୍ଦିଷ୍ଟ ଏହି ନୀତିରେ ଆଧୁନିକ ପ୍ରଜନନ କୌଶଳ ଏବଂ ପ୍ରଯୁକ୍ତି ବିଜ୍ଞାନ ସହାୟତାରେ ରାଜ୍ୟରେ ଦୁଗ୍ଧ ଉତ୍ପାଦନ ବୃଦ୍ଧି କରିବା ଲକ୍ଷ ରକ୍ଷା ଯାଇଥିବା ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ ସଚିବ ବିଷ୍ଣୁପଦ ସେଠୀ ଓଡିଶା ଡଟ କମକୁ କହିଛନ୍ତି ।

ଯେଉଁ ଅଞ୍ଚଳରେ ପ୍ରାଣୀ ଚିକିତ୍ସା ସେବା ଓ ଦୁଗ୍ଧ ସମବାୟ ସମିତି ମାଧ୍ୟମରେ କ୍ଷୀର ବିକ୍ରିବଟା ପାଇଁ ସୁବିଧା ନଥିବ ସେହି ସ୍ଥଳରେ ଭାରତୀୟ ପ୍ରଜାତି ଯଥା ଗିର, ସାହିୱାଲ, ଥାରପାରକର, ବିଞ୍ଝାରପୁରୀ, ହରିୟାଣା ଓ ଲାଲ ସିନ୍ଧି ପ୍ରଭୁତି ଷଣ୍ଢ ମାନଙ୍କର ଶୁକ୍ର ବ୍ୟବହାର କରି ଦେଶୀ ଗାଈଙ୍କର ଗୁଣାତ୍ମକ କ୍ରମବିକାଶ କରାଯିବ ବୋଲି ସେ କହିଛନ୍ତି।

ଠିକ ସେହି ପରି ଚାଷୀମାନଙ୍କର ଚାହିଦାକୁ ଅଗ୍ରାଧିକାର ଦିଆଯାଇ କୃତ୍ରିମ ପ୍ରଜନନ କାର୍ଯକ୍ରମକୁ ତ୍ଵରାନ୍ୱିତ କରାଯିବ । ପ୍ରାଣୀ ଚିକିତ୍ସା ସେବା ଓ ଦୁଗ୍ଧ ସମବାୟ ସମିତି ମାଧ୍ୟମରେ କ୍ଷୀର ବିକ୍ରି ବଟା ପାଇଁ ସୁବିଧା ଥିବା ଅଞ୍ଚଳରେ ଜର୍ସି ଓ ହଲଷ୍ଟିନ ପ୍ରଜାତିର ଷଣ୍ଢ ମାନଙ୍କର ଶୁକ୍ର ବ୍ୟବହାର କରି ଶଙ୍କରୀ କରଣ ମାଧ୍ୟମରେ ଦେଶୀ ଗାଈଙ୍କର ଗୁଣାତ୍ମକ ଉନ୍ନତି କରାଯିବ ।

ରାଜ୍ୟରେ ଦେଖାଯାଉଥିବା ଜାତୀୟ ସ୍ତରୀୟ ମାନ୍ୟତା ପ୍ରାପ୍ତ ଗାଈ ଯଥା ବିଞ୍ଝାରପୁରୀ, ଘୁମୁସୁରୀ, ଖରିୟାର ଓ ମୋଟୁ ଏବଂ ମଇଁଷି ଯଥା ଚିଲିକା ଓ କଳାହାଣ୍ଡି ପ୍ରଭୁତି ପ୍ରଜାତିଙ୍କର ସଂରକ୍ଷଣ ଓ ଉନ୍ନତି କରଣ ନିମନ୍ତେ ସେମାନଙ୍କର ପ୍ରାନ୍ତରରେ ସ୍ଵତନ୍ତ୍ର ଯୋଜନା କାର୍ଯ୍ୟକାରୀ କରାଯିବ ବୋଲି ସେ ସୂଚନା ଦେଇଛନ୍ତି ।

ଏଥିରେ ସରକାରୀ ଅନୁଷ୍ଠାନ ସଙ୍ଗେ ସଙ୍ଗେ ସ୍ଵେଚ୍ଛାସେବୀ ଓ ବେସରକାରୀ ସଂସ୍ଥା ଗୁଡିକଙ୍କର ମିଳିତ ଉଦ୍ୟମରେ ଗୋ ପ୍ରଜାତି ସଂରକ୍ଷଣ ଯୋଜନାକୁ ରୂପାୟନ କରାଯିବ । ଠିକ ସେହି ପରି ରାଜ୍ୟରେ ଗୋସମ୍ପଦର ଉନ୍ନତି ନିମନ୍ତେ କ୍ଷେତ୍ର ଭିତ୍ତିକ ଅନୁସନ୍ଧାନ କାର୍ଯ୍ୟକ୍ରମ ଜରିଆରେ ସେମାନଙ୍କ ଉତ୍ପାଦନ କ୍ଷମତାକୁ ନିୟମିତ ଭାବେ ଅନୁଧ୍ୟାନ କରାଯିବ ।

ଶଙ୍କରୀକରଣ ପାଇଁ ବ୍ୟବହାର କରାଯାଉଥିବା ଷଣ୍ଢ ମାନଙ୍କର ପ୍ରଜନନ କ୍ଷମତା ନିର୍ଦ୍ଧାରଣ ସକାସେ ଶଙ୍କରୀକରଣରୁ ଜନ୍ମିତ ବାଛୁରୀ ମାନଙ୍କ ଉତ୍ପାଦନ କ୍ଷମତାକୁ ଆକଳନ କରାଯିବ। ଉନ୍ନତ ମାନର ପ୍ରଜନନ କ୍ଷମ ଷଣ୍ଢ ସୃଷ୍ଟି କରିବା ପାଇଁ ଉଚ୍ଚ କ୍ଷମତା ସମ୍ପନ୍ନ ଗାଈ ମାନଙ୍କୁ ଚିହ୍ନଟ କରାଯିବ ଓ ସେମାନଙ୍କ ଠାରୁ ସୀକୃତି ପ୍ରାପ୍ତ ଶୁକ୍ର ବ୍ୟବହାର କରାଯାଇ ଶଙ୍କର ଅଣ୍ଡିରା ବାଛୁରୀ ଚୟନ କରି ପ୍ରଜନନ ଷଣ୍ଢ ଭାବେ ବ୍ୟବହାର କରାଯିବ ବୋଲି ସେ କହିଛନ୍ତି ।

ବିଭାଗୀୟ ସଚିବ ବିଷ୍ଣୁପଦ ସେଠୀ
ବିଭାଗୀୟ ସଚିବ ବିଷ୍ଣୁପଦ ସେଠୀ

ନିୟମିତ ତଥ୍ୟ ସଂଗ୍ରହ ଓ ବିଶ୍ଳେଷଣ ନିମନ୍ତେ ଜାତୀୟ ଗୋ ବିକାଶ ପ୍ରତିଷ୍ଠାନ ଦ୍ଵାରା ପ୍ରସ୍ତୁତ ସଫ୍ଟୱେର ବ୍ୟବହାର କରାଯିବ । ରାଜ୍ୟରେ ଦେଖାଯାଉଥିବା ଦେଶୀ ମଇଁଷି ମାନଙ୍କର ଗୁଣାତ୍ମକ କ୍ରମ ବିକାଶ ପାଇଁ ମୁରା ପ୍ରଜାତିର ଷଣ୍ଢଙ୍କୁ ବ୍ୟବହାର କରାଯିବ ।

ପ୍ରଜନନ ମାଧ୍ୟମରେ ଅଧିକ ସଫଳତା ପାଇବା ପାଇଁ ଗାଈର ଉତ୍ତମ ସ୍ୱାସ୍ଥ୍ୟ ପ୍ରତି ଯତ୍ନବାନ ହେବା ନିମନ୍ତେ ଚାଷୀ ମାନଙ୍କୁ ସୁଷମ ଖାଦ୍ୟ, ସାଧାରଣ ପରିଚାଳନା ଓ ସ୍ୱାସ୍ଥ୍ୟ ରକ୍ଷା ସମ୍ବନ୍ଧରେ ପ୍ରଶିକ୍ଷଣ ଦିଆଯିବାପାଇଁ ଏହି ନୀତିରେ ବ୍ୟବସ୍ଥା କରାଯାଇଥିବା ସେ କହିଛନ୍ତି ।

ରାଜ୍ୟର ଭୌଗୋଳିକ ସ୍ଥିତିକୁ ଅନୁଧ୍ୟାନ କରି ସ୍ଥଳ ବିଶେଷରେ ଧାତବ ଲବଣର ଅଭାବକୁ ପୂରଣ କରିବା ପାଇଁ ଧାତବ ଲବଣ ବ୍ୟବହାର ପାଇଁ ବ୍ୟବସ୍ଥା କରାଯିବ ।ପ୍ରଜନନ ପାଇଁ ବ୍ୟବହୃତ ଆବଶ୍ୟକୀୟ ଭିତ୍ତିଭୂମି ଯଥା ହିମିକୃତ ଶୁକ୍ର ଭଣ୍ଡାର, ବାଛୁରୀ ପାଳନ କେନ୍ଦ୍ର, ଗାଈ ଫାର୍ମ, ତରଳ ଯବକ୍ଷାରଜାନ ବଣ୍ଟନ ବ୍ୟବସ୍ଥା ଓ ଜିଲ୍ଲା ସ୍ତରୀୟ ଶୁକ୍ର ଭଣ୍ଡ।ର ଇତ୍ୟାଦି ପ୍ରତିଷ୍ଠାନ ଗୁଡିକ ଓଡିଶା ପ୍ରାଣୀ ସମ୍ପଦ ବିକାଶ ସମିତିର ନିୟନ୍ତ୍ରଣ ରେ ପରିଚାଳିତ ହେବ ।

ରାଜ୍ୟର ଉପାନ୍ତ ଅଞ୍ଚଳରେ ଉତ୍କଳ ଗୋ ମଙ୍ଗଳ ସମିତି ମାଧ୍ୟମରେ ଉନ୍ନତ ଦେଶୀ ପ୍ରଜାତିର ଷଣ୍ଢ ପାଳନ କରି ଗୋ-ମହିଷାଦୀଙ୍କର ପ୍ରାକୃତିକ ପ୍ରଜନନ ପାଇଁ ଷଣ୍ଢ ଯୋଗାଇ ଦିଆଯିବ । ଉକ୍ତ ପ୍ରଜନନ ନୀତିକୁ ସଫଳ ରୂପେ ରୂପାୟନ ପାଇଁ ଓଡିଶା ପ୍ରାଣୀ ସମ୍ପଦ ବିକାଶ ସମିତି ମୁଖ୍ୟ କାର୍ଯ୍ୟକାରିଣୀ ସଂସ୍ଥା ଭାବେ ଘୋଷଣା କରାଯାଇଛି ।

ରାଜ୍ୟରେ ଗୋ-ମହିଷାଦୀ ପ୍ରଜନନ ସେବାକୁ ସଂଗଠିତ କରିବା ସମିତିର ମୂଳ ଉଦ୍ଦେଶ୍ୟ ହେବ ବୋଲି ସେ ସୂଚନା ଦେଇଛନ୍ତି । ଏଠାରେ ଉଲ୍ଲେଖଯୋଗ୍ୟ ଯେ ରାଜ୍ୟରେ ଗୋ-ମହିଷାଦୀଙ୍କ ସଂଖ୍ୟା ଏକ କୋଟି ତେଇଶ ଲକ୍ଷ୍ ରହିଥିବା ବେଳେ ସେମଧ୍ୟରୁ ଦେଶୀ ପ୍ରଜାତିଙ୍କ ସଂଖ୍ୟା ପ୍ରାୟ ଏକ କୋଟି ।

ଓଡିଶା ଡଟ କମ

Leave a Reply

This site uses Akismet to reduce spam. Learn how your comment data is processed.