ବଜାରରେ ଓମଫେଡ଼ର ନୂଆ ପ୍ରିମିୟମ କ୍ଷୀର

ଓଡିଶା ଡଟ କମ ସଂବାଦ ଦାତା

ଭୁବନେଶ୍ଵର, ଅକ୍ଟୋବର ୨୭ (ଓଡିଶା ଡଟ କମ) ଲକ୍ଷ୍ମୀପୂଜା ଅବସରରେ ଓଡିଶା ରାଜ୍ୟ ସମବାୟ ଦୁଗ୍ଧ ଉତ୍ପାଦକ ମହାସଂଘ ଲିମିଟେଡ (ଓମଫେଡ) ମଙ୍ଗଳବାର ରାଜ୍ୟରେ ନିଜର ଲକ୍ଷାଧିକ ଗ୍ରାହକକୁ ଭେଟି ଦେଇଛି ପ୍ରିମିୟମ କ୍ଷୀର ନାମରେ ଅଧିକ ଲହୁଣୀଯୁକ୍ତ ଓ ଅଧିକ ପୃଷ୍ଟିକର ଏକ ନୂଆ ଉତ୍ପାଦ ।
ଛବି ସୌଜନ୍ୟ : ଓମଫେଡର ଫେସବୁକ ପୃଷ୍ଠା

ପ୍ରତି ୫୦୦ ମିଲି ଲିଟର ଏହି ନୂଆ ପ୍ରିମିୟମ କ୍ଷୀର ପ୍ୟାକେଟର ଦାମ ଉଣେଇଶ ଟଙ୍କା ରଖା ଯାଇଥିବା ବେଳେ ଏହା  ପ୍ରାରମ୍ଭିକ ଭାବେ ଭୁବନେଶ୍ଵର, କଟକ, ପୁରୀ, ଖୋର୍ଦ୍ଧା, ନିମାପଡା, ଜଟଣୀ ଓ ନିଆଳିରେ ଉପଲବ୍ଧ ହୋଇଛି  ।

ପରବର୍ତ୍ତୀ ସମୟରେ ରାଜ୍ୟର ଅନ୍ୟସ୍ଥାନରେ ଗ୍ରାହକ ମାନେ ଏହି ଉତ୍ପାଦକୁ ପାଇପାରିବେ ବୋଲି ଓମଫେଡ ଜେନେରାଲ ମ୍ୟାନେଜର ବସନ୍ତ ମିଶ୍ର କହିଛନ୍ତି ।

ଗ୍ରାହକଙ୍କ ଚାହିଦାକୁ ଆଖି ଆଗରେ ରଖି  ବଜାରରେ ଉପଲବ୍ଧ କ୍ଷୀର ଅପେକ୍ଷା ଏହି ପ୍ରିମିଅମ କ୍ଷୀରରେ ଲହୁଣୀ ଓ ପୃଷ୍ଟିସାର ଭରପୁର ମାତ୍ରାରେ ରହିଥିବା ସେ କହିଛନ୍ତି।

ପ୍ରତି ୫୦୦ ମିଲି ଲିଟର କ୍ଷୀରରେ ୩.୫ ପ୍ରତିଶତ ଫ୍ୟାଟ ରହିଥିବା ବେଳେ ନଅ ପ୍ରତିଶତ ଏସଏନଏଫ ( ସଲିଡ  ନଟ ଫେଟ ) ରହିଥିବା ସେ କହିଛନ୍ତି। ଏହି କ୍ଷୀର ବଜାରରେ ମିଳୁଥିବା କ୍ଷୀର ଅପେକ୍ଷା ବହଳିଆ ରହିବ ବୋଲି ସେ କହିଛନ୍ତି।

ଦୁଗ୍ଧ ଜାତ ସାମଗ୍ରୀ ଉତ୍ପାଦନରେ ସର୍ବଦା ଅଗ୍ରଣୀ ଭୂମିକା ଗ୍ରହଣ କରିଆସିଥିବା ରାଜ୍ୟର ଦୁଗ୍ଧ ଚାଷୀଙ୍କ ଏହି ସର୍ବୋଛ ସମବାୟ ସଂସ୍ଥା ଗତ କେତେ ମାସ ମଧ୍ୟରେ ନିଜର ଉତ୍ପାଦର ପରିସର ବଢାଇବା ପାଇଁ ଓ ଉପଭୋକ୍ତାଙ୍କ ହୃଦୟ ଜିଣିବା ପାଇଁ  ଅନେକ ଗୁଡିଏ ନୁଆ ପଦକ୍ଷେପ ନେଇଥିବା ପରିଲକ୍ଷିତ ହୋଇଛି ।

ଏହାର ଉତ୍ପାଦ ମାନଙ୍କର ନୁଆ ପ୍ୟାକେଜିଙ୍ଗ, ଯୁବ ପିଢୀଙ୍କ ସମେତ ସମାଜର ବିଭିନ୍ନ ବର୍ଗର ଲୋକଙ୍କୁ ଆକୃଷ୍ଟ କରିବା ପାଇଁ ରାଜଧାନୀରେ ଅନଲାଇନ ବିକ୍ରିର ବ୍ୟବସ୍ଥା ତଥା ସହରର ପ୍ରମୁଖ ସ୍ଥାନ ମାନଙ୍କରେ ଆଇସକ୍ରିମ ପାର୍ଲର ମାନ ଖୋଲିଛି ।

ସୋସିଆଲ ନେଟୱାର୍କରେ ନିଜର ଉପସ୍ଥିତି ଜାହିର କରିବା ଉଦ୍ଦେଶ୍ୟରେ ଏହି ସଂସ୍ଥା ଚାରି ମାସ ତଳେ ଆରମ୍ଭ କରିଥିବା ଏକ ସ୍ଵତନ୍ତ୍ର ଫେସବୁକ ପେଜ ବା ପୃଷ୍ଠାକୁ ପ୍ରାୟ ୩୭ ହଜାର ଲୋକ ଲାଇକ କରିଥିବାରୁ ଯୁବ ଗ୍ରାହକଙ୍କ ସହ ଓମଫେଡ ସମ୍ପର୍କ ବୃଦ୍ଧି କରିବାରେ ସଫଳ ହୋଇଛି ।

ନିକଟ ଭବିଷ୍ୟତରେ ରାଜଧାନୀରେ ଆଉ ଦଶଟି ଆଇସକ୍ରିମ ପାର୍ଲର ଖୋଲିବା ପାଇଁ ସରକାର ସହାୟତା ଯୋଗାଇଦେବେ ବୋଲି ଓମଫେଡ ପରିଚାଳନା ନିର୍ଦ୍ଦେଶକ ତଥା ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ ର ସଚିବ ବିଷ୍ଣୁପଦ ସେଠୀ କହିଛନ୍ତି।

ନିକଟ ଭବିଷ୍ୟତରେ ଓମଫେଡ ରସଗୋଲା ଓ ଗୁଲାବ ଜାମୁନ ମଧ୍ୟ ବିକ୍ରୟ ଆରମ୍ଭ କରିବା ବୋଲି ସେ କହିଛନ୍ତି ।  ଏଠାରେ ଉଲ୍ଲେଖଯୋଗ୍ୟ ଯେ ସେଠୀଙ୍କ ନିରବଚ୍ଛିନ୍ନ ଉଦ୍ୟମ ଯୋଗୁଁ ଓମଫେଡ ଜନସାଧାରଣଙ୍କ ଅଧିକ ବିଶ୍ଵାସଭଜନ ହୋଇପାରିଛି ।

ଓଡିଶା ଡଟ କମ
ନିଉଜ ଡେସ୍କ :

This website uses cookies.