ପୁସ୍ତକ ସମୀକ୍ଷା: BEYOND FEELINGS

BEYOND FEELINGS
Poet: Bishnupada Sethi
Publisher: Universe, Inch Bloomington, America

Where shall I go” (2005) ଏବଂ My world of words‘ (2010) -ପରେ ‘Beyond Feeling‘ (2012) ପ୍ରଶାସକ କବି ବିଷ୍ଣୁପଦ ସେଠୀଙ୍କ ତୃତୀୟ ଇଂରାଜୀ କବିତା ସଙ୍କଳନ , ଯାହା ଆମେରିକାରୁ ପ୍ରକାଶିତ ।

ଛଅସ୍ତରୀଟି କବିତାକୁ ନେଇ ସଙ୍କଳିତ ଏହି ପୁସ୍ତକର ଶୀର୍ଷକ କବିତା ‘Beyond feelings‘ ସଙ୍କଳନଟିର ପ୍ରଥମ କବିତା ।

କବି ମାତୃଗର୍ଭକୁ ଘରର ଏକ ଆର୍କିଟାଇପ୍ ଭାବେ ଉପସ୍ଥାପନ କରିଛନ୍ତି । ତାହା ଏତେ ଅନ୍ତରଙ୍ଗତା ସତ୍ବେ ଏବେ ତାଙ୍କ ଭାବଭୂମିର ପରିସୀମା ବାହାରେ ରହିଥିବାରୁ ତାଙ୍କୁ ବ୍ୟଥିତ କରିଛି ।

ତେବେ ବାପାଙ୍କ ନିରାପଦ ବାହୁବେଷ୍ଟନୀ ସେଇ “ଘର’ର ଏକ ସଂପ୍ରସାରଣ ଭାବେ ପ୍ରକୀର୍ତିତ ହୋଇଛି । ଅନ୍ତରଙ୍ଗ ଅନୁଭବର ପ୍ରତୀକଭାବେ ଘର ଏବେ ତାଙ୍କ ପାଇଁ ଅପହଂଚ ହୋଇ ରହିଯାଇଛି ।

‘Alien’ କବିତାରେ ନିଜ ଗାଁ ଭିଟାମାଟି ର ସହରୀ ପରିବର୍ତନ ତାକୁ କବିଙ୍କଠାରେ ଅଚିହ୍ନା କରିଦେଇଛି । ତେଣୁ ସେ ଘର ହେଉ ବା ଘର ପାଇଁ ଅନ୍ୱେଷଣ, କବିଙ୍କ ସାରସ୍ୱତ ଚେତନାରେ ତାହା ଦୃଢ଼ଭାବେ ଆସୀନ । ଘରଠୁଁ ଦୂରେଇ ବି ସେ ଯେଉଁଠି /ଯେଉଁ ପରିସ୍ଥିତିରେ ଅଛନ୍ତି ତାକୁ ଘରଭାବେ ଗଢ଼ିବାର ଉଦାର ପ୍ରବଣତା ଏଇ ଅନ୍ୱେଷଣର ଫଳଶୃତି ।

I make a new homne, Each time I change my place (changing homes) ଅନୁଭୂତି ଓ ଅନୁଭବ ପାଇଁ ଆବେଗମୟ ଉତ୍କଣ୍ଠା Climbing up କବିତାର ଥିମ୍ ।

ବିଷ୍ଣୁପଦ ସେଠୀ

ପର୍ବତ ଆରୋହଣର କଷ୍ଟ ପାଇ ହୁଏତ ଆରୋହୀ ଏକ ଶୂନ୍ୟତାବୋଧ ନେଇ ଏ ଆରୋହଣର ଔଚିତ୍ୟ ସମ୍ବନ୍ଧରେ ନିଜକୁ ପ୍ରଶ୍ନ କରିପାରେ । ମାତ୍ର ଆରୋହଣ କଷ୍ଟ ବିନା ଯେ ଏ ଅନୁଭବ ଦୁଷ୍ପ୍ରାପ୍ୟ ଏହା କବିଙ୍କୁ ସେଭଳି କଷ୍ଟ ସ୍ୱୀକାର ପାଇଁ ଅନୁପ୍ରେରଣା ଦେଇଛି, ଯାହା ‘Geraldଙ୍କ wander thirst’ କବିତାକୁ ମନେ ପକାଇ ଦିଏ । ଅନୁଭୂତି ପାଇଁ ପାଗଳାମି ହିଁ ସବୁ ଯାତ୍ରା, ସବୁ ସର୍ଜ୍ଜନାର ପ୍ରେରଣା ଭୂମି ।

ଶୈଶବକୁ ନେଇ ରଚିତ କବିତା ମାନଙ୍କରେ ଶୈଶବ ଖାଲି ନିଷ୍ପାପପଣ ନୁହେଁ, ବରଂ ଏକ ପର୍ଯ୍ୟାୟ ଯେଉଁଠି ଜୀବନ-ଜିଜ୍ଞାସା ଅପ୍ରଭାବିତ ଓ ମୌଳିକ ପ୍ରଶ୍ନ ମାଧ୍ୟମରେ ଶବ୍ଦାୟିତ । ବୟସ୍କ ମୂଲ୍ୟବୋଧକୁ ନେଇ ଦିଆଯାଉଥିବା ଉତ୍ତର ସେ ଜିଜ୍ଞାସାକୁ କେବେ ବୁଝାଇ ପାରେନା । ଏହି ଥିମ୍ କୁ ନେଇ ‘Querry of my little daughter’ କବିତା ।

ହାତ ଖଣ୍ଡିଆ ଭୀକାରୁଣୀକୁ ଦେଖି କୁନି ଝିଅଟିର ପ୍ରଶ୍ନ : ତା ଯତ୍ନ ପାଇଁ ତା’ର ନିଜର ବୋଲି କେହି ଅଛନ୍ତି ତ? ବାପାଙ୍କ ଉତ୍ତର, ଭଗବାନ ଅଛନ୍ତି, ତାକୁ ନିଶ୍ଚୟ ସାହାଯ୍ୟ କରୁଥିବେ । ଝିଅର ପ୍ରଶ୍ନ : ଯଦି ଭଗବାନ ଅଛନ୍ତି ସେ ତା’ର ହାତ ଯୋଡ଼ିକ କାହିଁକି ନେଇଗଲେ, ଯାହାଥିଲେ ଝିଅଟି କେଡ଼େ ସୁବିଧାରେ ଚଳନ୍ତା । ବାପା ନିରୁତ୍ତର ।

ମିଲଟନ ସିନା ପାରାଡ଼ାଇଜ୍ ଲଷ୍ଟରେ ଲେଖିଥିଲେ -‘to justify the ways of god go man’ ଠିକ୍ ସେମିତି ‘My children the sea’ କବିତାରେ ଶିଶୁଟି ଦ୍ୱାରା ବହୁ ଯତ୍ନରେ ନିର୍ମିତ ବାଲି ଘରକୁ ସମୁଦ୍ର ଢ଼େଉ ଭାଙ୍ଗିଦେଲେ ବୟସ୍କମାନେ ଶକ୍ତିଶାଳୀ ସମୁଦ୍ର ତା’ ସହିତ ଖେଳୁଛି ବୋଲି କହି ସାନ୍ତ୍ୱନା ଦିଅନ୍ତି ସିନା ମାତ୍ର ଶିଶୁ ମନରେ Shakespearଙ୍କ King Lear ନାଟକରେ ଈଶ୍ୱରଙ୍କ ବିରୋଧରେ ଥିବା ସେଇ ଅଭିଯୋଗ ପ୍ରତିଧ୍ୱନିତ : As flies to wanton boys; So are we to gods, they kill us for their spot;

ସଙ୍କଳନର ଶେଷ କବିତା My last Paperboat’ ଯେଉଁଠି ଜର୍ମାନ ଦାର୍ଶନିକ Nietzsche ଈଶ୍ୱରଙ୍କ ମୃତ୍ୟୁ ଘୋଷଣା କଲାଭଳି କବି ନିଜ ନିରୀହତା ମୃତ୍ୟୁର ଉଦଘୋଷଣା କରନ୍ତି:

‘I failed to remember the time
when I spotted making them
though there have been rains
years after years since then;

କବିତା ମାନଙ୍କରେ ଦୃଶ୍ୟ, ଚରିତ୍ର, ଘଟଣା ଓ ବର୍ଣ୍ଣନା ପାଇଁ କବି ନିଜକୁ ଏମିତି ଏକ ସ୍ଥିତିରେ ରଖିଛନ୍ତି ଯାହା ନିରୀକ୍ଷକର ଦୂରତ୍ୱ ସହିତ ଅନୁଭବୀର ସଂପୃକ୍ତିକୁ ସମନ୍ୱିତ କରିଛି ।

ଭାଷା ଓ ଭାବର ସରଳତା, ନିବିଡ଼ତା, ସାଙ୍ଗୀତିକତା, ପ୍ରବହମାନତା ଓ ସର୍ବୋପରି କବିତା ମାନଙ୍କ କଳେବରର କ୍ଷୁଦ୍ରତା ବିଷ୍ଣୁ ସେଠୀଙ୍କ କାବ୍ୟକୃତିର ହଲମାର୍କ ଯାହା ପାଠକଙ୍କ କବିତାବୋଧକୁ ସିଧା ସଳଖ ସମ୍ବୋଧିତ କରି ସ୍ପର୍ଶ କରେ । ଉଉତ୍ତରଣ କାମନା କରୁଛି ।

ସମୀକ୍ଷକ: ରବିନାରାୟଣ ଦାଶ
ପୂର୍ବତନ ସଭାପତି, ଫକୀରମୋହନ ସାହିତ୍ୟ ପରିଷଦ, ବାଲେଶ୍ୱର

ଓଡିଶା ଡଟ କମ :

This website uses cookies.