Connecting Odias
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ଏପ୍ରିଲ ୧୧ (ଓଡିଶା ଡଟ କମ) ସୋମବାର ୪୫.୮ ଡିଗ୍ରୀ ସେଲସିଅସ ପଞ୍ଜୀକୃତ କରି ଭୁବନେଶ୍ଵର ଗରମରେ ଏପ୍ରିଲ ମାସର ସର୍ବକାଳୀନ ରେକର୍ଡକୁ ଭାଙ୍ଗିଛି ।
ପୂର୍ବରୁ ଏପ୍ରିଲ ୨୩ , ୧୯୮୫ ରେ ରାଜଧାନୀ ରେ ସର୍ବୋଛ ତାପମାତ୍ରା ୪୫ ଡିଗ୍ରୀ ରେକର୍ଡ କରଯାଇଥିଲା। ଚଳିତ ଗ୍ରୀଷ୍ମ ରେ ଏ ପର୍ଯ୍ୟନ୍ତ ୧୬ ଜଣ ଅଂଶୁଘାତ ଜନିତ ମୃତ୍ୟୁ ବରଣ କରିଥିବା ଅଭିଯୋଗ ହୋଇଛି ।
ଓଡିଶା ଡଟ କମ
ଓଡିଶା ଡଟ କମ: କପିଳାସ ଭୂୟାଁ
ସିନିସିଙ୍ଗ, ଅକ୍ଟୋବର ୧୦ (ଓଡିଶା ଡଟକମ ) ନିଜର ଭାଗ୍ୟକୁ ବର୍ଷା ହାତରେ ଟେକିଦେଇ ବାରମ୍ବାର ମରୁଡିର ସମ୍ମୁଖୀନ ହେଉଥିବା ଓଡିଶାର ଏକ ଆଦିବାସୀ ଗ୍ରାମର ବାସିନ୍ଦା ନିକଟରେ ଥିବା ଝରଣା ପାଣିର ସୁବିନିଯୋଗ କରି ନିଜ ଜଳା କଷ୍ଟ ଦୂର କରିପାରିଥିବା ବେଳେ ଅନ୍ୟମାନଙ୍କ ପାଇଁ ସୃଷ୍ଟି କରିଛନ୍ତି ଅନନ୍ୟ ଉଦାହରଣ ।
ବଣ ଜଙ୍ଗଲ ଘେରରେ ରହିଥିବା ଗଜପତି ଜିଲ୍ଲାର ଆର ଉଦୟଗିରି ବ୍ଲକ୍ ର ଅବାରସିଙ୍ଗ ପଞ୍ଚାୟତର ଏହି ଗ୍ରାମ ହେଉଛି ସିନିସିଙ୍ଗ । ଇସାରା ନାମକ ଏକ ସ୍ଵେଚ୍ଛାସେବୀ ଅନୁଷ୍ଠାନର ସହାୟତାରେ ଗ୍ରାମର ୩୬ ସଉରା ଆଦିବାସୀ ପରିବାରର ଏହି ଆର୍ଥିକ ଉନ୍ନତି ହୋଇଥିବା ଗ୍ରାମବାସୀ ମାନେ କହିଛନ୍ତି ।
ମହେଶ୍ଵର ପୂଜାରୀ, ବୟସ ୭୩ ବର୍ଷ । ସ୍ତ୍ରୀ ଶକୁନ୍ତଳା, ତାଙ୍କ ବୟସ ୬୦ ବର୍ଷ। ସାଥିରେ ରହନ୍ତି ଦୁଇ ଝିଅ ଚମ୍ପୁଲତା ଓ ରତ୍ନମଣି, ଏବଂ ଏକ ମାତ୍ର ପୁଅ ରମାକାନ୍ତ । ଏମାନଙ୍କୁ ନେଇ ମହେଶ୍ଵରଙ୍କର ପାଞ୍ଚ ପ୍ରାଣୀର ସଂସାର। ଚବିଶି ବର୍ଷର ବଡ ଝିଅ ଚମ୍ପୁଲତା, ଦି’ ବର୍ଷ ତଳେ ବିଭା ହୋଇ ଯାଇଥିଲା ଯେ ଶିକ୍ଷକତା କରୁଥିବା ସ୍ଵାମୀ ସହ ତା’ର ନପଡିବାରୁ ଏବେ ଆସି ବାପଘରେ ରହୁଛି। ସ୍ଵାମୀ ସହ ଛାଡପତ୍ର କେସ ଲଢିବାକୁ ନିୟମିତ ଜିଲ୍ଲା ସଦର ମହକୁମା ପାରଳାଖେମୁଣ୍ଡିକୁ ଯା’ଆସ କରୁଛି।
ପୁଅ ରମାକାନ୍ତର ବୟସ ଅଠର ବର୍ଷ ଓ ଚତୁର୍ଥ ଶ୍ରେଣୀ ପର୍ଯନ୍ତ ପଢିଛି। ପାଠ ପଢିଲାନି କି ଭେଣ୍ଡା ପୁଅ ହେଇକି ବି ବାପାକୁ କାମ ଧନ୍ଦାରେ ସାହାଯ୍ୟ କରୁ ନଥିବାରୁ ଏବେ ବି ମହେଶ୍ଵରଙ୍କୁ ହାଡଭଙ୍ଗା ଖଟଣି ଖଟିବାକୁ ପଡୁଛି। ୧୪ ବର୍ଷର ସାନଝିଅ ରତ୍ନମଣି କିନ୍ତୁ ପାଠରେ ଭଲ କରୁଛି ଓ ସ୍ଥାନୀୟ ଆଶ୍ରମ ବିଦ୍ୟାଳୟରେ ଦଶମ ଶ୍ରେଣୀରେ ପଢୁଛି।
ତିନି ବର୍ଷ ତଳେ ମହେଶ୍ଵରଙ୍କ ଆର୍ଥିକ ଅବସ୍ଥା ଦୟନୀୟ ଥିଲା । ଦାରିଦ୍ର୍ୟ ଓ ବାର୍ଦ୍ଧକ୍ୟ ଦ୍ଵାରା ସେ ଆକ୍ରାନ୍ତ ହୋଇ ରହିଥିଲେ। ନିଜର ଦେଢ ଏକର ଜମି ଥିଲେ ସୁଦ୍ଧା ସେ ଆବଶ୍ୟକ ପାଣି ଅଭାବରୁ ଚାଷ ବାସ ଭଲ ଭାବରେ କରିପାରୁନଥିଲେ । ଗାଁର ଅନ୍ୟ ମାନଙ୍କ ପରି ପର୍ବତର ଗଡାଣିରେ ଜଙ୍ଗଲ ସଫା କରି ସେ ବଗଡ ବା ପୋଡୁଚାଷ କରୁଥିଲେ।
ବଗଡରେ ମାଣ୍ଡିଆ, ସୁଆଁ ବା ଜହ୍ନା ପରି ଅଳ୍ପ ପାଣି ଦରକାର କରୁଥିବା ଶସ୍ୟ ଚାଷ କରୁଥିଲେ। ସେଥିରୁ ଯାହା ଅମଳ ହେଉଥିଲା ପାଞ୍ଚ ପ୍ରାଣୀ କୁଟୁମ୍ବ ପାଇଁ ତାହା ନିଅଣ୍ଟ ହେଉଥିଲା। ଯଦି ବର୍ଷା ହେଉ ନଥିଲା ତେବେ ବଗଡ ବି ପୋଡି ଯାଉଥିଲା। ସେତେବେଳେ ଅନ୍ୟ ଗ୍ରାମବାସୀଙ୍କ ପରି ସେ ମଧ୍ୟ ନିଜ ପୋଡା ଭାଗ୍ୟକୁ ଦୋଷ ଦେଉଥିଲେ।
ତିନି ପଟେ ପର୍ବତ ଘେର ଭିତରେ ରହିଥିବା ଏହି ପଥୁରିଆ ଗାଁରେ ପାଣିର ସବୁବେଳେ ଅଭାବ ରହିଥିଲା ଗାଁ ତଳକୁ ଥିବା ପାଣିଖିଆ ନାଳରେ ପର୍ବତ ଉପରୁ ଆସୁଥିବା ପାଣି ଭୂଇଁରେ ସବୁବେଳେ ନଷ୍ଟ ହୋଇ ଯାଉଥିଲା ।
ଦୁବୁଦୁବା ଓ କେରଣ୍ଡା ସହ ଏହି ନାଳରେ ବର୍ଷା ଚାରିମାସ ପାଣି ମିଲୁଥିଲା କିନ୍ତୁ ଏହି ପାଣି କେବଳ ଗାଈଗୋରୁ ଓ ମଣିଷଙ୍କ ପିଇବା ସହ ଗାଧୁଆ ପାଧୁଆ ଓ ବାସନ ମଜାରେ ଶେଷ ହୋଇଯାଉଥିଲା । ଖରାଦିନେ ଏହି ଜଳ ଉତ୍ସ ସମ୍ପୂର୍ଣ ଶୁଖିଯାଉଥିଲା ।
ଖାଲି ମହେଶ୍ଵର ନୁହନ୍ତି, ଗାଁର ପ୍ରାୟ ସବୁଲୋକେ ବଡ କଷ୍ଟରେ ଜଙ୍ଗଲଜାତ ପଦାର୍ଥ ସଂଗ୍ରହ କରି ବିକୁଥିଲେ, ନଚେତ କୁଲି କାମ କରିବାକୁ ବାହାରକୁ ଯାଉଥିଲେ – ଆଊ ଯାହାକିଛି ସେଥିରୁ ଆୟ ହେଉଥିଲା ସେଥିରେ କଷ୍ଟେମଷ୍ଟେ ଗୁଜୁରାଣ ମେଣ୍ଟଉଥିଲେ।
ତେବେ ମହେଶ୍ଵରଙ୍କ ପାଇଁ ଖରା ଚାରିମାସ ଭାରି କଷ୍ଟକର ହେଉଥିଲା। ସକାଳୁ ଘରୁ ବାହାରିପଡି ଆଖପାଖ ଗାଁ ଗୁଡିକୁ ଚାଲି ଯାଉଥିଲେ। କାହା କାହା ଘରେ ଯଦି କାହାର ଦେହ ଖରାପ କଥା ଶୁଣୁଥିଲେ ତେବେ ସେ ଘରେ ପହଞ୍ଚି ତୁଟୁକା ତୁଟୁକୀ ଔଷଧ ଦେଉଥିଲେ।
ଯାହା ଘରକୁ ଯାଉଥିଲେ ସେଠାରେ ତାଙ୍କୁ ଓଳିଏ ଖାଇବାକୁ ମିଳି ଯାଉଥିଲା। ସେତକ ଖାଇ ସେଇଠି ଟିକେ ବିଶ୍ରାମ ନେଇ ଖରା ତେଜ କମିଲା ପରେ ଘରକୁ ଫେରୁଥିଲେ। ଆର ଓଳିକ କେଉଁଠାରୁ ଖାଇବାକୁ ମିଳିବ, କି ସ୍ତ୍ରୀ ପିଲାଛୁଆ କଣ ଖାଇ ଜୀବନ ଜୀଇଁବେ ତାଙ୍କୁ ଜଣା ନଥିଲା।
ଜୀବନ କଷ୍ଟେମଷ୍ଟେ ଜୀଇଁବା ଅପେକ୍ଷା ମହେଶ୍ଵରଙ୍କ ପାଇଁ ଅନ୍ୟ କୌଣସି ଉପାୟ ନଥିଲା।
ଏବେ କିନ୍ତୁ ସମୟ ବଦଳିଛି । ବାପଅଜା ଅମଳରୁ ଥିବା ଦେଢ ଏକର ଜମି ସହ ଏବେ ଜଙ୍ଗଲ ସଂରକ୍ଷଣ ନିୟମ ଅନୁସାରେ ସରକାର ଦେଇଥିବା ଆଉ ଦୁଇ ଏକର ଜମିରେ ମହେଶ୍ଵର ଧାନ, ମକା, ମାଣ୍ଡିଆ, ସୁଆଁ, ଅମୃତଭଣ୍ଡା, କନ୍ଦମୂଳ ଆଦି ଫସଲ ଓ ପନିପରିବା ବର୍ଷକୁ ତିନି ତିନିଥର ଅମଳ କରି ସେ ଏବେ ବେଶ ସ୍ଵାଚ୍ଛନ୍ଦ୍ୟରେ ଚଳି ପାରୁଛନ୍ତି। ସ୍ତ୍ରୀ ଶକୁନ୍ତଳା ଓ ବେଳେବେଳେ ହାତରେ ସମୟ ଥିଲେ ଝିଅ ଚମ୍ପୁଲତା ବିଲ କାମରେ ମହେଶ୍ଵରଙ୍କୁ ସାହାଯ୍ୟ କରୁଛନ୍ତି ।
ମହେଶ୍ଵରଙ୍କ ଚାଲି ଚଳନକୁ ଦେଖିଲେ ଲାଗିବ ତାଙ୍କୁ ହୁଏତ ଅଧିକରୁ ଅଧିକ ୬୫ ବର୍ଷ ହେଇଥିବ। ଏହାର କାରଣ ତାଙ୍କ ଚେହେରାରେ ଏବେ ଏକ ଯୁବ ସୁଲଭ ଚଞ୍ଚଳତା। ମହେଶ୍ଵରଙ୍କ ପରି ଗ୍ରାମର ସବୁ ବାସିନ୍ଦାଙ୍କ ମୁହଁରେ ଏବେ ହସ ଓ ଏହା ସମ୍ଭବ ହୋଇଛି ଝରଣା ପାଣିର ସୁବିନିଯୋଗ ଦ୍ଵାରା ଓ ଏହି ସୁବିନିଯୋଗର ରାସ୍ତା ଦେଖାଇଛନ୍ତି ‘ଇସାରା’ ସଂସ୍ଥାର ମୁଖ୍ୟ ରବୀନ୍ଦ୍ରନାଥ ପାତ୍ର ।
ପାତ୍ର ଗାଁକୁ ଆସି ଲୋକମାନଙ୍କ ସୁବିଧା ଅସୁବିଧା କଥା ଆଲୋଚନାବେଳେ ଜାଣିବାକୁ ପାଇଲେ ଯେ ପାଣି ହେଉଛି ଗାଁ ର ମୁଖ୍ୟ ସମସ୍ୟା । ସେ ପଚାରି ବୁଝିଲେ ଗାଁ ଉପରେ ପର୍ବତ କନ୍ଦରରେ କୌଣସି ଚିରସ୍ରୋତା ଝରଣାର ଉତ୍ସ ଅଛିକି? ଗାଁ ଲୋକେ ହଁ କହିଲେ, କିନ୍ତୁ ତା ଦ୍ଵାରା ସମସ୍ୟାର କେମିତି ସମାଧାନ ହେବ ବୁଝି ପାରିଲେ ନାହିଁ।
ରବୀନ୍ଦ୍ର ପୁଣି ଲୋକମାନଙ୍କୁ ବୁଝାଇଲେ ଯେ ମେ ମାସର ମୁଣ୍ଡଫଟା ଖରାଦିନେ ପର୍ବତ ଉପରେ ଯେଉଁ ଝରରେ ପାଣି ଥିବ ତାହା ହିଁ ଚିରସ୍ରୋତା ଝରଣାର ଉତ୍ସ, ଓ ସେଠାରୁ ପାଣି ଗାଁ ମୁଣ୍ଡକୁ ଆଣିଲେ ହିଁ ଲୋକଙ୍କ ଜଳ କଷ୍ଟ ଦୂର ହେଇପାରିବ। କିନ୍ତୁ ପର୍ବତ ଉପରୁ ଗାଁ ମୁଣ୍ଡକୁ ପାଣି ଆସିବ କେମିତି?
ରବୀନ୍ଦ୍ର ଓ ତାଙ୍କ ସାଥିଙ୍କ ସହ ଗାଁର କେତେଜଣ ଲୋକ ପର୍ବତ ଉପରେ ଖୋଜି ଖୋଜି ଗୋଟିଏ ଚିରସ୍ରୋତା ଝରଣା ଠାବ କଲେ। କିନ୍ତୁ ତାହା ଗାଁ ଠାରୁ ପର୍ବତର ଦୁଇ କିଲୋମିଟର ଉପରେ ଥିଲା।
ପର୍ବତ ଉପରୁ ପାଇପ ଦ୍ଵାରା ଡାଇଭରସନ ବେସଡ ଇରିଗେସନ ସିଷ୍ଟମ ଦ୍ଵାରା ଗାଁକୁ ପାଣି ଆଣିବା ବିଷୟ ରବୀନ୍ଦ୍ରଙ୍କୁ ଜଣାଥିଲା। ଏହି ପ୍ରଣାଳୀ ଅନୁଯାୟୀ ମାଧ୍ୟାକର୍ଷଣ ଶକ୍ତି ପ୍ରଭାବରେ ଜଳର ନିମ୍ନମୁଖୀ ପ୍ରବାହ ଧାରା ଦ୍ଵାରା ବିଦ୍ୟୁତ ଶକ୍ତି ବ୍ୟବହାର ନକରି ପାଇପ ଦ୍ଵାରା ଜଳ ପ୍ରବାହ କରା ଯାଇପାରେ।
କିନ୍ତୁ ପର୍ବତ ଉପରୁ ଗାଁ ମୁଣ୍ଡ ପର୍ଯ୍ୟନ୍ତ ପାଇପ ଲାଇନ ବିଛେଇବା ପାଇଁ ଖର୍ଚ କେଉଁଠୁ ଆସିବ?
ସେଥିପାଇଁ ରବୀନ୍ଦ୍ର ନିଜ ସଂସ୍ଥା ପକ୍ଷରୁ କଲିକତା ସ୍ଥିତ ମେନୋନାଇଟ ସେଣ୍ଟ୍ରାଲ କମିଟି (ଏମସିସି) ସହ ଯୋଗାଯୋଗ କଲେ । ସମସ୍ତ ପ୍ରାଣୀଙ୍କ ସର୍ବନିମ୍ନ ଆବଶ୍ୟକତା ତୁଲାଇବାକୁ ପ୍ରକୃତି କୋଳରେ ଯଥେଷ୍ଟ ସମ୍ପଦ ରହିଥିବା କଥାରେ ବିଶ୍ଵାସ ରଖୁଥିବା ଏହି ସଂସ୍ଥା ଦରକାର ମୁତାବକ ପାଇପ ଓ ଲୁହାଛଡ, ସିମେଣ୍ଟ, ଗୋଡିବାଲି, ଇତ୍ୟାଦି କଞ୍ଚାମାଲ ଯୋଗାଇ ଦେବ ବୋଲି ପ୍ରତିଶୃତି ଦେଲା।
ତେବେ ଏହା ଯଥେଷ୍ଟ ନଥିଲା। ତେଣୁ ଏହି କାର୍ଯ୍ୟ ପାଇଁ ଶ୍ରମିକ ମଜୁରି କେଉଁଠାରୁ ଆସିବ ବୋଲି ସମସ୍ତେ ଚିନ୍ତାରେ ପଡିଲେ। ଗାଁ ସଭାରେ କଥା ପଡିଲା। ଗାଁ ଲୋକଙ୍କ ଉପକାର ପାଇଁ, ଜଳ କଷ୍ଟ ଦୂର କରିବା ପାଇଁ ଗାଁ ଲୋକେ ବିନା ପାରିଶ୍ରମିକରେ ଶ୍ରମଦାନ କଲେ କାମଟି ହୋଇ ପାରିବ ବୋଲି ମହେଶ୍ଵର ପୂଜାରୀଙ୍କ ନେତୃତ୍ଵରେ ସମସ୍ତେ ସହମତ ହେଲେ। ପ୍ରାୟ ଦୁଇ ମାସର ପରିଶ୍ରମ ପରେ ସତକୁ ସତ ଗାଁ ନିକଟକୁ ପାଣି ଆସିଗଲା। ଲୋକଙ୍କ ଖୁସି କହିଲେ ନସରେ, ମହେଶ୍ଵରଙ୍କର ମଧ୍ୟ।
ଗାଁକୁ ପାଣି ଆସିଲାନି ତ ବରଂ ମହେଶ୍ଵରଙ୍କ ଦେହରେ ଶତସିଂହର ବଳ ଆସିଗଲା। କାଳ ବିଳମ୍ବ ନକରି ମହେଶ୍ଵର ଓ ସ୍ତ୍ରୀ ଶକୁନ୍ତଳା ମିଶି ତାଙ୍କ ଜମିରୁ ପଥର କାଢି ଜମି ତିଆରି କଲେ। ଜମିରୁ ବାହାରୁଥିବା ପଥରକୁ ଜମି ଚାରିପଟେ ବାନ୍ଧି ବର୍ଷାଦିନେ ଜମି ଯେମିତି ଧୋଇ ହେଇ ନଯିବ ତାହାର ବ୍ୟବସ୍ଥା କଲେ। କମ୍ପୋଷ୍ଟ ଖତ ପକେଇ ଜମିକୁ ଚାଷ ଉପଯୋଗୀ କରାଇଲେ। ତା’ପରେ ମହେଶ୍ଵର ତାଙ୍କ ଜମିରେ ପାଞ୍ଚ ଫସଲ କରିବା ଆରମ୍ଭ କରିଦେଲେ।
ଏବେ ପ୍ରତିବର୍ଷ ମହେଶ୍ଵର ତାଙ୍କ ଜମିରେ ଧାନ, ମକା, କାନ୍ଦୁଲ, ମାଣ୍ଡିଆ, କନ୍ଦମୂଳ ତଥା ବାଇଗଣ, ଫୁଲ କୋବି, ବନ୍ଧା କୋବି, ଓଲ କୋବି, ମରିଚ, କଖାରୁ ଆଦି ପନିପରିବା ଫଳାଉଛନ୍ତି।
ପନିପରିବା ଖାଇବା ଯେଉଁ ଆଦିବାସୀ ଗାଁରେ ଦିନେ ସାତ ସପନ ଥିଲା, ସେହି ଗାଁରେ ଆଜି ମହେଶ୍ଵର ନିଯ ବାଡିର ପନିପରିବା ଖାଇବା ସହ ବନ୍ଧୁବାନ୍ଧବଙ୍କୁ କିଛି କିଛି ଦେବା ପରେ ବଜାରରେ ବିକ୍ରି କରି ବେଶ ଭଲ ଦି’ ପଇସା ଉପାର୍ଜନ କରି ପାରୁଛନ୍ତି। ଏହା ଛଡା ସେ ତାଙ୍କ ଜମିରେ ଆମ୍ବ ୨୫ ଗଛ, ଅମୃତଭଣ୍ଡା ଛ’ ଗଛ, ଏବଂ କଦଳୀ ପଚିଶି ଗଛ ମଧ୍ୟ ଲଗେଇଛନ୍ତି।
ସେଥିରୁ କିଛି କିଛି ଆୟ ମଧ୍ୟ ଆରମ୍ଭ ହେଲାଣି।
ଏବେ ମହେଶ୍ଵରଙ୍କ ହାତରେ ପ୍ରାୟ ଟଙ୍କା ପଚିଶି ହଜାର ପର୍ଯ୍ୟନ୍ତ ସଞ୍ଚୟ ମଧ୍ୟ ରହିଛି। ଆଗରୁ ଦାରିଦ୍ର୍ୟ ସୀମାରେଖା ତଳେ, ଅର୍ଥାତ ବିପିଏଲ ତାଲିକାରେ ଥିବା ମହେଶ୍ଵରଙ୍କ ନାଁ କଟି ଯାଇ ବର୍ତ୍ତମାନ ଦାରିଦ୍ର୍ୟ ସୀମାରେଖା ଉପରେ, ଅର୍ଥାତ ଏପିଏଲ ତାଲିକାରେ ସାମିଲ ହୋଇଛି । ଏହା କ’ଣ କିଛି କମ ଗୌରବର କଥା ?
ଓଡିଶା ଡଟ କମ
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ସେପ୍ଟେମ୍ବର ୩୦ (ଓଡିଶା ଡଟ କମ) ନଦୀରେ ମୂର୍ତ୍ତି ବିସର୍ଜନ ଦ୍ଵାରା ପ୍ରଦୂଷଣ ହେଉଥିବାରୁ ସେଥିପାଇଁ କୁତ୍ରିମ ପୋଖରୀ ବ୍ୟବହାର କରିବା ପାଇଁ କେନ୍ଦ୍ର ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ରାଜ୍ୟମାନଙ୍କ ପାଇଁ ଏକ ନିର୍ଦ୍ଦେଶାନାମା ଜାରିକରିଛନ୍ତି ।
ଏହି ନିର୍ଦ୍ଦେଶାନାମା ଆଧାରରେ ରାଜ୍ୟ ପ୍ରଦୁଷଣ ନିୟନ୍ତ୍ରଣ ବୋର୍ଡ (ଏସପିସିବି ) ପ୍ରତ୍ୟେକ ପୌରସଂସ୍ଥାକୁ ଆବଶ୍ୟକୀୟ ପଦକ୍ଷେପ ନେବାପାଇଁ ପରାମର୍ଶ ଦେଇଛି ।
ଭୁବନେଶ୍ଵର ମ୍ୟୁନିସିପାଲିଟି ତରଫରୁ ଦୟାନଦୀ ଓ କୁଆଖାଇ ନଦୀ କୂଳରେ ଓ ଟଙ୍କପାଣି ରୋଡ୍ ନିକଟରେ କୁତ୍ରିମ ପୋଖରୀ ଖୋଳିବାକୁ ସ୍ଥାନ ଚିହ୍ନଟ କରିଛି । ସେହିପରି କଟକରେ କାଠଯୋଡି ଓ ମହାନଦୀ କୂଳରେ କୁତ୍ରିମ ପୋଖରୀ ଖୋଳାଯାଇ ବିସର୍ଜନ କରାଯିବାପାଇଁ ନିଷ୍ପତି ହୋଇଛି ।
ମଙ୍ଗଳବାର ସଚିବାଳୟଠାରେ ଗୃହ ବିଭାଗ ସଚିବ ଅସିତ ତ୍ରିପାଠୀ ଙ୍କ ଧ୍ୟକ୍ଷତାରେ ଏ ସମ୍ପର୍କରେ ଏକ ବୈଠକ ଅନୁଷ୍ଠିତ ହୋଇଥିଲା । ସିପିସିବି ଜାରି କରିଥିବା ଗାଇଡ୍ ଲାଇନ୍କୁ କଡାକଡି ଭାବେ ରାଜ୍ୟରେ ପାଳନ କରାଯିବ ବୋଲି ଏହି ବୈଠକରେ ନିଷ୍ପତି ହୋଇଥିଲା । ତୁରନ୍ତ ସ୍ଥାନ ଚିହ୍ନଟକରି ପୋଖରୀ ଖୋଳା କାମ ଆରମ୍ଭ କରିବା ପାଇଁ ଭୁବନେଶ୍ବର ଓ କଟକ ମହାନଗର ନିଗମ କମିଶନର ମାନଙ୍କୁ ନିର୍ଦ୍ଦେଶ ଦିଆଯାଇଥିଲା ।
ଦ୍ଵେତ ନଗରୀର ପୋଲିସ କମିଶନର ଏନେଇ ପୂଜା କମିଟି ମାନଙ୍କ ସହିତ ଆଲୋଚନା କରି ପଦକ୍ଷେପ ନେବେ ।ସେପଟେ କୁତ୍ରିମ ପୋଖରୀ ୧୦୦ ଫୁଟ ଲମ୍ବ ଓ ୨୦ ଫୁଟ ଓସାର ହେବା ଆବଶ୍ୟକ ବୋଲି ଗାଇଡ୍ ଲାଇନରେ କୁହାଯାଇଛି । ପୋଖରୀରେ ଏକ ଜାଲ ବିଛାଯିବ । ବିସର୍ଜନର ଏକ ଘଣ୍ଟା ପରେ ମୂର୍ତ୍ତିକୁ ପୋଖରୀରୁ ବାହାର କରି ଅନ୍ୟତ୍ର ରଖାଯିବ । ଗାଇଡ୍ ଲାଇନର ଉଲଙ୍ଘନକଲେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ପ୍ରକାଶଥାଉକି , ନଦୀ ବା ପୋଖରୀରେ ମୂର୍ତ୍ତି ବିସର୍ଜନ ଜଳ ପ୍ରଦୂଷଣର ଏକ ପ୍ରମୁଖ କାରଣ । ମୂର୍ତ୍ତି ପ୍ରସ୍ତୁତିରେ ବ୍ୟବହାର ହେଉଥିବା ବିଭିନ୍ନ ରାସାୟନିକ ରଙ୍ଗ ,ଜିଙ୍କ ଓ ସୀସା ଭଳି ଦ୍ରାବକ ଜଳ ପ୍ରଦୂଷଣ କରିଥାଏ ।
ଏହି ପ୍ରଦୂଷିତ ଜଳକୁ ସ୍ଥାନୀୟ ଲୋକମାନେ ପାନୀୟ ଜଳ ଭାବେ ବ୍ୟବହାର କରିବା ଦ୍ଵାରା ବିଭିନ୍ନ ରୋଗରେ ଆକ୍ରାନ୍ତ ହୋଇଥାନ୍ତି । ଏଥିରେ ଗାଧୋଇଲେ ବିଭିନ୍ମ ଚର୍ମ ରୋଗ ହେବାର ସମ୍ଭାବନା ମଧ୍ୟ ରହିଛି । ଏହାଦ୍ଵାରା ଜୀବଜନ୍ତୁ ମାନେ ମଧ୍ୟ ପ୍ରଭାବିତ ହୋଇଥାନ୍ତି ।
ଓଡିଶା ଡଟ କମ
ଓଡିଶା ଡଟ କମ ସଂବାଦ ଦାତା
ଭୁବନେଶ୍ଵର, ସେପ୍ଟେମ୍ବର ୨୭ (ଓଡିଶା ଡଟ କମ) ସୁନାମୀ ଆସିଲେ କିପରି ତାର ମୁକାବିଲା କରାଯିବ ସେ ସମ୍ପର୍କରେ ଉପକୂଳ ଓଡିଶାର ବିଭିନ୍ନ ଜିଲ୍ଲାରେ ରାଜ୍ୟର ବିପର୍ଯ୍ୟୟ ପ୍ରଶମନ ବିଭାଗ ଶନିବାର ମକ ଡ୍ରିଲ ର ଆୟୋଜନ କରିଥିଲା ।
ସମୁଦ୍ର ଠାରୁ ଦେଢ କିମି ଦୂର ମଧ୍ୟରେ ରହିଥିବା ବାଲେଶ୍ଵର, ଭଦ୍ରକ, କେନ୍ଦ୍ରାପଡା, ଜଗତ୍ସିଂହପୁର,ପୁରୀ ଓ ଗଞ୍ଜାମ ଜିଲ୍ଲାର ୨୨ଟି ବ୍ଲକ ରେ ହୋଇଥିବା ଏହି ମକ୍ ଡ୍ରିଲରେ ଜାତୀୟ ଓ ରାଜ୍ୟ ବିପର୍ଯ୍ୟୟ ପ୍ରଶମନ ବଳ, ଅଗ୍ନିଶମ ବିଭାଗ କର୍ମଚାରୀ ଓ ସ୍ଵତନ୍ତ୍ର ରିଲିଫ କମିଶନର କାର୍ଯ୍ୟ।ଳୟ ଅଧିକାରୀ ସମେତ ବହୁ କର୍ମଚାରୀ ଅଂଶ ଗ୍ରହଣ କରିଥିଲେ ।
ପ୍ରଥମେ ରାଜ୍ୟ ଆପାତକାଳିନ ଅପରେସନ ସେଣ୍ଟର ,ଇଣ୍ଡିଆନ ସେଣ୍ଟର ଫର ଓସେନ ଇନଫରମେସନ ସର୍ଭିସେସ୍ ବା ଇନ୍କଏସ ସଂସ୍ଥା ବିପର୍ଯ୍ୟୟ ସମ୍ପର୍କିତ ବୁଲେଟିନ ଜାରି କରିଥି
ଲେ ।
ଏହି ବୁଲେଟିନ ସଙ୍ଗେସଙ୍ଗେ ସଂପୃକ୍ତ ଜିଲ୍ଲାର ଜିଲ୍ଲାପାଳ ମାନଙ୍କ ପାଖକୁ ପଠାଯାଇଥିଲା ।
ସତର୍କତା ଅବଲମ୍ବନ କରିବାପାଇଁ ଓ ପ୍ରଭାବିତ ଲୋକଙ୍କୁ ଅନ୍ୟସ୍ଥାନକୁ ନେଇଯିବାପାଇଁ ଇନ୍କଏସ୍ ପକ୍ଷରୁ ପ୍ରାୟ ୬ ଟି ଏଲର୍ଟ ବା ୱାରନିଂ ମ୍ୟାସେଜ୍ ପଠାଯାଇଥିଲା ଯାହା ଜିଲ୍ଲାପାଳଙ୍କ ପାଖକୁ ତୁରନ୍ତ ପଠାଯାଇଥିଲା ।
୧୯୯୯ ମସିହାରେ ଓଡିଶା ଭୟଙ୍କର ମହାବାତ୍ୟାର ସମ୍ମୁଖୀନ ହୋଇଥିଲା। କେବଳ ଜଗତସିଂହପୁର ଜିଲ୍ଲାରେ ପ୍ରାୟ ୮୦୯୦ ଜଣ ଲୋକ ପ୍ରାଣ ହରାଇଥିଲେ । ଏହା ପରଠାରୁ ସରକାର ବାତ୍ୟା ଓ ସୁନାମୀ ଆସିଲେ କିପରି ତାର ମୁକାବିଲା କରାଯିବ ସେ ସମ୍ପର୍କରେ ପ୍ରତିବର୍ଷ ବ୍ୟାପକ ପ୍ରସ୍ତୁତି କରିଥାନ୍ତି ।
ଓଡିଶା ଡଟ କମ
ଅନେକ ବ୍ୟଥା ଅନେକ ଭାଷଣ ଗଛ ପାଇଁ । ଗଛ ସବୁ କାଟିଦେଲେ , ଖୁବ ଗରମ ପୃଥିବୀରେ ବଢିଗଲା, ଜଳବାୟୁ ପରିବର୍ତନ ହୋଇଗଲା …..ଜଙ୍ଗଲ ସଫା ହୋଇଗଲା … ବର୍ଷା କମିଗଲା …..ଚାଷ ଜମି ନଷ୍ଟ ହୋଇଗଲା ….ଆଦିବାସି ଲୋକ ତାର ଜୀବିକା ହରାଇଲା…ଏମିତି ଅନେକ କଥା ।
ପୁଣି ତାପରେ ଚାଲେ ସେଲିବ୍ରିଟି ଙ୍କୁ ନେଇ ,ନେତା ଙ୍କୁ ନେଇ ,ନହେଲେ ପ୍ରଭାବଶାଳି ଲୋକଙ୍କୁ ନେଇ ଗଛ ଲଗା । କେଉଁ ପ୍ରଭାବଶାଳି ଲୋକଙ୍କ ବଗିଚା ରେ ,ପୁଣି କେଉଁ ପାର୍କରେ … ନେତା ମନ୍ତ୍ରୀ ବା ପ୍ରଭାବଶାଳି ଲୋକ ଗଛ ନଲଗାଇଲେ ଗଛ ଟି କଣ ଜନ୍ମ ନେଇ ପାରିବ ?
ଗଛ ଟି ଦେଖୁଥାଏ ଗଲାସନ ସେଇଠି ଗଛ ଲାଗିଥିଲା । ଏ ବର୍ଷ ପୁଣିଥରେ ତାକୁ ସଫା କରି ସେଇଠି ଗଛ ଲଗାଇବା ପାଇଁ ପ୍ରସ୍ତୁତି ଆରମ୍ବ ହୋଇଯାଏ । କଥାରେ କଥାରେ କିନ୍ତୁ ଆମେ ଜଙ୍ଗଲ ସ୍ତୃଷ୍ଟି କରିବାର ମିଛ ପ୍ରତିଶ୍ରୁତି କୁ ନିରୀହ ଶିଶୁ ଗଛଟି ଶୁଣୁଥାଏ , ଭାବୁଥାଏ ଏମାନେ କେତେ ମିଛ ଖୋଳ ପିନ୍ଧା ବୁଦ୍ଧିଆ ମଣିଷ ସତେ । ବୁଦ୍ଧି ଅଛି ବୋଲି ଗଛ ର ଜନ୍ମ ଆଊ ମରଣ ତାରି ହାତରେ …..କିଛି କହିପାରେନି ଗଛଟି ।
କାହାକୁ କହିବ ,ତାର ଜନ୍ମ ଖୁବ ଜାକଜମକରେ ପାଳନ ହୁଏ । ଖାଇବା ପିଇବା ,ଫୋଟୋ ଉଠା, ଟି.ଭି ରେ ଦେଖା,ଭାଷଣ ଏମିତି ଅନେକ କଥା , ମଣିଷ ଛୁଆଟିଏ ଜନ୍ମ ହେଲେବି ଏତେ ପାଳନ ତ ହୁଏ ନାହିଁ ।
କିନ୍ତୁ ମଣିଷ ଛୁଆଟିଏ ଯିଏ ରାସ୍ତା କଡରେ ଜନ୍ମ ହୁଏ ତାକୁ ଯେମିତି କିଏ ନାଳରେ ତ ,ରେଳ ଲାଇନ କଡରେ ଫୋପାଡି ଦିଅନ୍ତି ସେମିତି ଏ ଗଛାଟି ର ଅବସ୍ତା ସେଇଆ ….ଖାଲି ଟିକେ ଫରକ ହୁଏ ବେଳେ ବେଳେ ବିଧାନ ସଭା ଥିଲେ ନହେଲେ କେବେ କେବେ କିଏ ଚିତ୍କାର କରନ୍ତି ସରକାରଙ୍କ ପାଈଁ ଆଜି ଶିଶୁ ବିକ୍ରି ହେଲା ,କନ୍ୟା ଶିଶୁ କୁ ହତ୍ୟା କରାଗଲା ।
ଯଦି କିଏ ଧରା ପଡେ ଖୋଳ ତାଡରେ ତାହାଲେ ପୁଲିସ ହାତରେ ବନ୍ଧା ହୁଏ । ତାପରେ କୋର୍ଟ କଚେରୀ । ଗଛ ଟି ପ୍ରଶ୍ନ କରୁ ଥାଏ ତାକୁବିତ ହତ୍ୟା କରାଯାଉଛି ଦିନର ଆଲୋକରେ ପୁଣି କେତେବେଳେ ରାତିର ଅନ୍ଧାରରେ ତାଙ୍କ ପାଇଁ କଣ କିଛି ଦଣ୍ଡ ନ।ହିଁ ? ଏ ଖୋଲାପିନ୍ଧା ହତ୍ୟାକାରୀ ମାନେ କଣ ଏମିତି ବୁଲୁଥିବେ ବିନା ଦଣ୍ଡରେ ……
ସମସ୍ତେ ଭାବନ୍ତି ଗଛ ର ଜୀବନ ଏମିତି କୁହାଯାଉଛି …. କିନ୍ତୁ ଥରେ ତାକୁ ଦେଖିଲେ ଜାଣିବେ । ସେ ବି ମଣିଷ ଭଳି ଜୀବନ ଟିଏ । ରାତିରେ ସେ ବି ସୁଏ … ସକାଳ ହେଲେ ଆପେ ଆପେ ଉଠିଯାଏ । କିନ୍ତୁ ଏ ମଣିଷ କେତେବେଳେ ସେ ରାତିରେ ସୋଇଥିବାବେଳେ ତାକୁ ହତ୍ୟା କରେ ,ପୁଣି କେତେ ବେଳେ ଦିବା ଆଲୋକରେ ।
ଏ ହତ୍ୟାକ।ରି କୁ ଦଣ୍ଡ କାହିଁ ? ମଣିଷର ଟିକେ ଆଘାତ ଲାଗିଲେ କୋର୍ଟ କଚେରୀ କିନ୍ତୁ ଗଛକୁ ମାରି ଆମେ ପୃଥିବୀକୁ ଶେଷ କରିବାକୁ ବସିଲୁଣି କିନ୍ତୁ କେବେ ନ୍ୟାୟ ମିଳିବ ଗଛକୁ….. କିଏ ଏ ଉତର ଦେବ ଗଛଟି ଚାହିଁ ବସିଛି ।
ଅନୁରାଧା ମହାନ୍ତି
ପୋଖରିପୁଟ, ଭୁବନେଶ୍ଵର
Email- [email protected]
ଓଡିଶା ଡଟ କମ ସଂବାଦ ଦାତା
ଭୁବନେଶ୍ୱର, ଅଗଷ୍ଟ ୧୪ (ଓଡିଶା ଡଟ କମ) ରାଜ୍ୟରେ ମାଛ ଉତ୍ପାଦନ ଓ ରପ୍ତାନି ବୃଦ୍ଧି ତଥା ଏହି କ୍ଷେତ୍ରର ସାମଗ୍ରିକ ବିକାଶର ଲକ୍ଷ୍ୟ ରଖି ଓଡିଶା ସରକାର ଗୁରୁବାର ଏକ ନୂତନ ମତ୍ସ୍ୟ ନୀତି ଘୋଷଣା କରିଛନ୍ତି ।
ମତ୍ସ୍ୟ କ୍ଷେତ୍ରର ବିକାଶ ପାଇଁ ଏକ ସ୍ଵତନ୍ତ୍ର ନୀତି ପ୍ରଣୟନ କରିବାରେ ଓଡିଶା ହେଉଛି ଦେଶର ପ୍ରଥମ ରାଜ୍ୟ।ମୁଖ୍ୟମନ୍ତ୍ରୀ ନବୀନ ପଟନାୟକଙ୍କ ଅଧ୍ୟକ୍ଷତାରେ ଗୁରୁବାର ଅନୁଷ୍ଠିତ କ୍ୟାବିନେଟ ଏହି ନୀତିକୁ ଆନୁଷ୍ଠାନିକ ଭାବେ ମଞ୍ଜୁରୀ ଦେଇଛନ୍ତି ।
ଓଡିଶା ମତ୍ସ୍ୟନୀତି-୨୦୧୫ ଅନୁସାରେ ସରକାର ୨୦୨୦ ବର୍ଷ ସୁଦ୍ଧା ବାର୍ଷିକ ୭.୧୫ ଲକ୍ଷ ଟନ ମତ୍ସ୍ୟ ଉତ୍ପାଦନ ଲକ୍ଷ୍ୟ ରଖିଥିବା ବେଳେ ଏହି କ୍ଷେତ୍ରରେ ଅଧିକ ଦୁଇ ଲକ୍ଷ୍ୟ ଲୋକଙ୍କ ପାଇଁ ଅବସର ସୃଷ୍ଟି ହେବ ବୋଲି ଦର୍ଶାଇଛନ୍ତି ।
ରାଜ୍ୟର ମାଛ ଉତ୍ପାଦନ ହେଉଥିବା ନଦୀ, ନାଳ, ପୋଖରୀ ଓ ସମୁଦ୍ରରେ କେତେ ମାଛ ଅଛନ୍ତି ଓ ସେଠାରୁ କିପରି ଅଧିକ ମାଛ ଉତ୍ପାଦନ ହୋଇପାରିବ ସେ ଦିଗରେ ସରକାର ବିଭିନ୍ନ ପଦକ୍ଷେପ ନେବେ ବୋଲି ବିଭାଗୀୟ ସଚିବ ବିଷ୍ଣୁପଦ ସେଠୀ କହିଛନ୍ତି ।
ଯେଉଁ ସ୍ଥାନରେ ମାଛ ଉତ୍ପାଦନ ହେଉନାହିଁ ସେହି ଜଳ ଉତ୍ସ ଗୁଡିକର ବିକାଶ ପାଇଁ ମଧ୍ୟ ସରକାର ପଦକ୍ଷେପ ନେବେ ବୋଲି ସେ କହିଛନ୍ତି ।
ବର୍ତମାନ ରାଜ୍ୟରେ ବାର୍ଷିକ ହାରାହାରି ୪.୧୩ ଲକ୍ଷ ଟନ ମାଛ ଉତ୍ପାଦନ ହେଉଛି । କେବଳ ସମୁଦ୍ରରୁ ଉତ୍ପାଦିତ ମାଛର ପରିମାଣ ହେଉଛି ୧.୨୦ ରୁ ୧.୩୦ ଲକ୍ଷ ଟନ । ସାମୁଦ୍ରିକ ଭିତ୍ତିଭୂମିର ବିକାଶ ସହ ମତ୍ସ୍ୟଜୀବୀଙ୍କୁ ଆବଶ୍ୟକୀୟ ପ୍ରୋତ୍ସାହନ ଯୋଗାଇ ଦିଆଗଲେ ଏହାର ପରିମାଣ ଯଥେଷ୍ଟ ବୃଦ୍ଧି ପାଇବା ବୋଲି ସେ କହିଛନ୍ତି ।
ରାଜ୍ୟରେ ରହିଥିବା ୧୧ ଲକ୍ଷ୍ୟ ମତ୍ସ୍ୟଜୀବୀଙ୍କୁ ବୀମା ଭୁକ୍ତ କରିବା, ସେମାନଙ୍କୁ ଆବଶ୍ୟକୀୟ ବୈଷୟିକ ତାଲିମ ଦେବା ଓ ବନ୍ୟା, ବାତ୍ୟା ଓ ଅନ୍ୟ ପ୍ରାକୃତିକ ବିପତ୍ତି ସମୟରେ ସେମାନେ ଯେପରି ସୁରକ୍ଷିତ ରହନ୍ତି ସେ ସମ୍ପର୍କିତ ସୂଚନା ତାଙ୍କୁ ପ୍ରଦାନ କରିବା ଆଦି ପଦକ୍ଷେପ ଦ୍ଵାରା ସରକାରଙ୍କ ଏହି ଲକ୍ଷ୍ୟ ପୂରଣ ହୋଇପାରିବ ବୋଲି ସେ କହିଛନ୍ତି ।
ଏଠାରେ ଉଲ୍ଲେଖ ଯୋଗ୍ୟ ଯେ ରାଜ୍ୟରେ ବାର୍ଷିକ ୩.୩୫ ଲକ୍ଷ ଟନ ମାଛ ଆବଶ୍ୟକ ଥିବା ବେଳେ ଉତ୍ପାଦନ ହେଉଛି ୪.୬୭ ଲକ୍ଷ ଟନ ।ଏହି ବଳକା ୧.୧୦ ଲକ୍ଷ ମେଟ୍ରିକ ଟନ ମାଛ ଆଫଗାନିସ୍ତାନ, ଜାପାନ, ଇଣ୍ଡୋନେସିଆ ଆଦି ଦେଶକୁ ରତ୍ପାନୀ କରାଯାଉଛି ।
ରାଜ୍ୟରେ ଜଣ ପିଛା ମାଛ ଖାଇବା ପରିମାଣ ୨୦୧୩ – ୧୪ ଓ ୨୦୧୨-୧୩ରେ ହାରାହାରି ୯.୧୩ କେଜି ରହିଥିବା ବେଳେ ୨୦୧୪-୧୫ରେ ଏହା ୯.୪୦ କେଜିକୁ ବୃଦ୍ଧି ପାଇଛି । ଜାତୀୟ ସ୍ତରରେ ମୁଣ୍ଡ ପିଛା ବାର୍ଷିକ ମାଛ ଖାଇବା ପରିମାଣ ହେଉଛି ୯.୮ କିଲୋଗ୍ରାମ ।
ଓଡିଶା ଡଟ କମ
ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ଵର,୧ ଅଗଷ୍ଟ (ଓଡିଶା ଡଟ୍ କମ୍): ଉପରମୁଣ୍ଡରେ ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ବୈତରଣୀ, ବ୍ରାହ୍ମଣୀ, ବୁଢାବଳଙ୍ଗ ଓ ସୁବର୍ଣ୍ଣରେଖା ନଦୀରେ ହୋଇଥିବା ବନ୍ୟା ପରିସ୍ଥିତିରେ ଏବେ ସୁଧାର ଆସିଛି ।
ଜଳ ସମ୍ପଦ ସଚିବ ପ୍ରଦୀପ ଜେନାଙ୍କ ସୂଚନା ଅନୁସାରେ ଯାଜପୁର ଜିଲ୍ଲାର ଗଣେଷପୁରଠାରେ ଓ ବାଲେଶ୍ଵର ଜିଲ୍ଲାର ଭୋଗରାଇ ବ୍ଲକ୍କର ଦହମୁଣ୍ଡାଠାରେ ସୃଷ୍ଟି ହୋଇଥିବା ଘାଇର ମରାମତି କାର୍ଯ୍ୟ ସମ୍ପନ୍ନ ହୋଇଛି ।
ଠିକ ସେହି ପରି ଯାଜପୁର, କେନ୍ଦ୍ରପଡା, ବାରିପଦା, ବାଲେଶ୍ଵର ଓ ରାଜ୍ୟର ଅନ୍ୟ କେତକ ଅଞ୍ଚଳ ଏବେବି ଜଳ ମଗ୍ନ ଥିବା ବେଳେ ପରିସ୍ଥିତି ନିୟନ୍ତ୍ରଣାଧିନ ଥିବା ସେ କହିଛନ୍ତି ।
ସୂଚନାଯୋଗ୍ୟ, ବାଲେଶ୍ଵର ଜିଲ୍ଲାର ବସ୍ତା, ବାଲିଆପାଳ, ଭୋଗରାଇ, ଜଳେଶ୍ୱର ସମେତ ପ୍ରାୟ ୧୭ଟି ପଞ୍ଚାୟତର ୫୦ଟି ଗାଁରେ, ଭଦ୍ରକ ଜିଲ୍ଲାର ୩୫ଟି ପଞ୍ଚାୟତର ୧୫୦ଟି ଗାଁରେ ଓ କେନ୍ଦ୍ରପଡା ଜିଲ୍ଲାର ଆଳି, ରାଜକନିକା ଓ ପଟ୍ଟାମୁଣ୍ଡାର ବ୍ଲକ ଏବେ ବି ଜଳ ଘେରର ରହିଥିବା ବେଳେ ଶହ ଶହ ଏକର ଚାଷ ଜମି ବୁଡି ଯାଇଛି।
ଜଳ ଘେରରେ ଥିବା ଲୋକମାନେ ଯୋଗାଯୋଗ ପାଇଁ ଡଙ୍ଗା ଉପରେ ନିର୍ଭର କରିଥିବା ବେଳେ ପ୍ରଶାସନ ପକ୍ଷରୁ ରିଲିଫ୍ ତଥା ଖାଦ୍ୟ ସାମଗ୍ରୀ ପହଞ୍ଚି ପାରି ନଥିବା ସେମାନେ ଅଭିଯୋଗ କରିଛନ୍ତି ।
ଓଡିଶା ଡଟ୍ କମ୍
ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ଵର ,୩୦ ଜୁଲାଇ (ଓଡିଶା ଡଟ୍ କମ୍): ଉତ୍ତର-ପଶ୍ଚିମ ବଙ୍ଗୋପସାଗରରେ ସୃଷ୍ଟି ଲଘୁଚାପ ଏକ ଝଡ ବାତ୍ୟାରେ ପରିଣତ ହୋଇଥିବାରୁ ଏହାର ପ୍ରଭାବରେ ରାଜ୍ୟର କେତେକ ସ୍ଥାନରେ ପ୍ରବଳ ରୁ ଅତି ପ୍ରବଳ ବର୍ଷ ହୋଇପାରେ ବୋଲି ସ୍ଥାନୀୟ ପାଣିପାଗ ଅଫିସ ଗୁରୁବାର କହିଛି ।
“କୋମେନ୍” ନାଁରେ ନାମିତ ଏହି ଝଡ ବାତ୍ୟା ସନ୍ଧ୍ୟାରେ ବାଂଲାଦେଶ ଅତିକ୍ରମ କରିବାର ସମ୍ଭାବନା ରହିଥିବା ଏହି ଅଫିସ କହିଛି ।
ଏହାର ପ୍ରଭାବରେ ଉପକୂଳ ଓଡିଶାର କେତେକ ଅଞ୍ଚଳ ସମେତ ମୟୂରଭଞ୍ଜ ଜିଲ୍ଲାରେ ମଧ୍ୟ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଠିକ ସେହି ପରି ଘଣ୍ଟା ପ୍ରତି ୫୦-୭୦ କିଲୋମିଟର ବେଗରେ ପବନ ବହିବାର ମଧ୍ୟ ସମ୍ଭାବନା ରହିଥିବାରୁ ମତ୍ସ୍ୟଜୀବୀଙ୍କୁ
ସମୁନ୍ଦର ଭିତରକୁ ନ ଯିବା ପାଇଁ କୂହା ଯାଇଛି ।
ଓଡିଶା ଡଟ କମ
ଉତ୍ତର-ପଶ୍ଚିମ, ଉପକୂଳ ଓଡ଼ିଶାରେ ବନ୍ୟା, ଶତାଧିକ ସ୍ଥାନାନ୍ତର
ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ଵର ,୨୯ ଜୁଲାଇ (ଓଡିଶା ଡଟ୍ କମ୍): ଉପରମୁଣ୍ଡରେ ଲଗାଣ ବର୍ଷାଯୋଗୁଁ ବୈତରଣୀ, ବ୍ରାହ୍ମଣୀ, ବୁଢାବଳଙ୍ଗ ଓ ସୁବର୍ଣ୍ଣରେଖା ନଦୀରେ ଜଳ ବିପଦ ସଙ୍କେତ ଉପରେ ପ୍ରବାହିତ ହେଉଥିବାରୁ ଉତ୍ତର-ପଶ୍ଚିମ ଓ ଉପକୂଳ ଓଡ଼ିଶାର କେତେକ ସ୍ଥାନରେ ବନ୍ୟା ହୋଇଛି ଫଳରେ ଶତାଧିକ ଲୋକଙ୍କୁ ପ୍ରଶାସନ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଛି ।
ମିଳିଥିବା ସୂଚନା ମୁତାବକ ଯାଜପୁର, ଭଦ୍ରକ, ବାଲେଶ୍ଵର ଓ ମୟୂରଭଞ୍ଜ ଜିଲ୍ଲାର କିଛି ଅଞ୍ଚଳ ଏବେ ବନ୍ୟାଜଳ ଘେରରେ ।
ବୁଧବାର ସକାଳ ସୁଦ୍ଧା ବୈତରଣୀ ନଦୀରେ ବନ୍ୟାଜଳ ବିପଦ ସଙ୍କେତ ଉପରେ ପ୍ରବାହିତ ହେଉଥିବା ହେତୁ ଯାଜପୁର ଜିଲ୍ଲାର ଗଣେଷପୁରଠାରେ ଘାଇ ସୃଷ୍ଟି ହୋଇଛି ।
ଏହି ଘାଇ ଯୋଗୁଁ ଯେପରି ଯାଜପୁର ସହରରେ ପାଣି ନ ପଶେ ସେଥିପାଇଁ ଯୁଦ୍ଧକାଳୀନ ଭିତିରେ ଏହାର ମରାମତି କାର୍ଯ୍ୟ ଆରମ୍ଭ କରାଯାଇଥିବା ବୁଧବାର ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ସଚିବାଳୟଠାରେ ଅନୁଷ୍ଠିତ ବୈଠକରେ ସୂଚନା ଦିଆଯାଇଛି।
ସେହିପରି ବୁଢାବଳଙ୍ଗ ନଦୀରେ ବନ୍ୟା ଯୋଗୁଁ ବାରିପଦା ସହର ଓ ସାରକଣା ଅଞ୍ଚଳର କିଛି ସ୍ଥାନ ପ୍ରଭାବିତ ହୋଇଥିବାରୁ ସେହି ଅଞ୍ଚଳରେ ରହୁଥିବା ଲୋକମାନଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯିବା ସହ ସେମାନଙ୍କୁ ରିଲିଫ ଯୋଗାଇ ଦିଆଯାଉଥିବା ବୈଠକର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
ସୁବର୍ଣ୍ଣରେଖାରେ ବନ୍ୟା ଯୋଗୁଁ ବାଲେଶ୍ଵର ଜିଲ୍ଲାର ଭୋଗରାଇ ବ୍ଲକ୍କର ଦହମୁଣ୍ଡାଠାରେ ଘାଇ ସୃଷ୍ଟି ହୋଇ ମନନଗର ଅଞ୍ଚଳରେ ବନ୍ୟାଜଳ ପ୍ରବେଶ କରିଛି।
ସୁବର୍ଣ୍ଣରେଖାର ବନ୍ୟା ପରିସ୍ଥିତିକୁ ସାମ୍ନାରେ ରଖି ମୁଖ୍ୟମନ୍ତ୍ରୀ ଘାଇଟିର ମରାମତି କରିବା, ବାଲିଆପାଳ, ଭୋଗରାଇ ଓ ବସ୍ତା ଅଞ୍ଚଳରେ ସତର୍କ ଦୃଷ୍ଟି ରଖିବା ସହ ବାଲେଶ୍ଵର ଜିଲ୍ଲାକୁ ଏକ ଓଡ୍ରାଫ ଟିମ ପଠାଇବା ପାଇଁ ନିର୍ଦ୍ଦେଶ ଦେଇଛନ୍ତି।
ବୈତରଣୀ ନଦୀରେ ବନ୍ୟା ସୃଷ୍ଟି ହେବା ଯୋଗୁଁ ବୁଧବାର ରେଙ୍ଗାଲି ଡ୍ୟାମରୁ ଯେଉଁ ବନ୍ୟାଜଳ ଛଡ଼ା ଯିବାର ନିଷ୍ପତିକୁ ଗୋଟେ ଦିନ ପାଇଁ ଘୁଞ୍ଚାଇ ଦିଆଯାଇଛି।
ଉତ୍ତର ପଶ୍ଚିମ ବଙ୍ଗୋପସାଗରରେ ଲଘୁଚାପ ସୃଷ୍ଟି ହୋଇ କ୍ରମଶଃ ଏହା ଗଭୀର ଲଘୁଚାପରେ ପରିଣତ ହେବାରୁ ଏହାର ପ୍ରଭାବରେ ଉପକୂଳ ଓଡ଼ିଶା ସମେତ ରାଜ୍ୟର କେତକ ସ୍ଥାନରେ ଆସନ୍ତା ୨୪ ଘଣ୍ଟା ମଧ୍ୟରେ ବର୍ଷା ହୋଇପାରେ ବୋଲି ଆଞ୍ଚଳିକ ପାଣିପାଗ ପକ୍ଷରୁ ସୁଚନା ମିଳିଛି।
ଓଡିଶା ଡଟ୍ କମ୍
ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ୱର,୨୪ ଜୁଲାଇ (ଓଡିଶା ଡଟ୍ କମ୍): ଗତ ଜୁଲାଇ ୨୨ ତାରିଖ ସୁଦ୍ଧା ପୁରୀ ଓ ଜଗତସିଂହପୁର ଜିଲ୍ଲାରେ ୬ ପ୍ରତିଶତ କମ୍ ବର୍ଷା ହୋଇଥିବାରୁ ଏହି ଜିଲ୍ଲାରେ କୃଷିର ଅଗ୍ରଗତି ପାଇଁ ବିଭିନ୍ନ ପଦକ୍ଷେପ ନେବାପାଇଁ ଗୁରୁବାର ସଚିବାଳୟରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଏକ ଉଚ୍ଚସ୍ତରୀୟ ବୈଠକରେ ନିଷ୍ପତି ନିଆଯାଇଛି ।
ଉକ୍ତ ଜିଲ୍ଲା ମାନଙ୍କରେ ଫସଲର ସୁରକ୍ଷା ପାଇଁ କେନାଲ ଗୁଡିକର ପୁନରୁଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତିରେ କରିବା ଓ ଅଚଳ ଉଠା ଜଳ ସେଚନ ଗୁଡିକୁ କାର୍ଯ୍ୟକ୍ଷମ କରିବା ପାଇଁ ମୁଖ୍ୟମନ୍ତ୍ରୀ ଜଳସେଚନ ବିଭାଗକୁ ନିର୍ଦ୍ଦେଶ ଦେଇଛନ୍ତି।
ବର୍ଷାଭାବ ଜନିତ ପରିସ୍ଥିତି ତଥା ପ୍ରାକୃତିକ ବିପତ୍ତିର ମୁକାବିଲା ପାଇଁ କୃଷି ବିଭାଗ ପକ୍ଷରୁ ପ୍ରସ୍ତୁତ ଚାରି ସୂତ୍ରୀ କାର୍ଯ୍ୟକ୍ରମ ସମ୍ପର୍କରେ ବିସ୍ତୃତ ଆଲୋଚନା କରି ତଦନୁଯାୟୀ ଆବଶ୍ୟକ ସ୍ଥଳେ ଚାଷୀକୁ ମଧ୍ୟମ ଓ ସ୍ୱଳ୍ପ ସମୟରେ ହୋଇ ପାରୁଥିବା ଧାନ ବିହନ ଯୋଗାଣ ଏବଂ ଡାଲି ତୈଳବୀଜ ଶସ୍ୟ ଓ ପନିପରିବା ବିହନ ଯୋଗାଣ ପାଇଁ ବ୍ୟବସ୍ଥା କରାଯାଇଛି ।
ସେହିପରି ଜମି ଗୁଡିକୁ ଜଳଯୋଗାଣ କରିବା ପାଇଁ ଉଠା ଜଳ ସେଚନ ପଏଣ୍ଟ ଗୁଡିକରେ ବିଦ୍ୟୁତୀକରଣ, ଅଚଳ ଉଠା ଜଳ ସେଚନ ପଏଣ୍ଟ ଗୁଡିକର ପୁନରୁଦ୍ଧାର ଓ ମରାମତି ସହିତ ଜଳନିଧି ଓ ଅନ୍ୟ ଯୋଜନା ମାନଙ୍କରେ ଜଳ ସେଚନ କ୍ଷମତା ବୃଦ୍ଧି କରିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି ।
ଏହା ସହିତ ଚାଷୀ ମାନଙ୍କୁ ପାଣିପାଗ, ଫସଲ ଓ ବୀମା ସମ୍ପର୍କରେ ନିୟମିତ ସୂଚନା ଦିଆଯିବା ଉପରେ ମଧ୍ୟ ଗୁରୁତ୍ଵ ଦିଆଯାଇଛି ।
ବୈଠକରେ କୃଷି, ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ମନ୍ତ୍ରୀ ଶ୍ରୀ ପ୍ରଦୀପ ମହାରଥୀ, ମୁଖ୍ୟ ଶାସନ ସଚିବ, ଅର୍ଥ ବିଭାଗର ଅତିରିକ୍ତ ମୁଖ୍ୟ ସଚିବ, ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ସଚିବ, କୃଷି ବିଭାଗର ପ୍ରମୁଖ ସଚିବ, ଜଳସଂପଦ ବିଭାଗର ପ୍ରମୁଖ ସଚିବ, ଶକ୍ତି ସଚିବ ଏବଂ କୃଷି ବିଭାଗର ବରିଷ୍ଠ ପଦାଧିକାରୀ ମାନେ ଉପସ୍ଥିତ ଥିଲେ।
ଓଡିଶା ଡଟ୍ କମ୍
Enter your account data and we will send you a link to reset your password.
Here you'll find all collections you've created before.