ଶିକ୍ଷା

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କଟକ,୩୦(ଓଡ଼ିଶା ଡ଼ଟ୍ କମ୍) ମାଧ୍ୟମିକ ଶିକ୍ଷା ପରିଷଦ ଦ୍ୱାରାପରିଚାଳିତ ମ୍ୟାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ଫଳ ଆସନ୍ତା ନଭେମ୍ବର ୨ ତାରିଖରେ ପ୍ରକାଶ ପାଇବ ବୋଲି ପରିଷଦ ପକ୍ଷରୁ କୁହାଯାଇଛି ।

କଟକ ସମେତ ୪ଟି ଆଞ୍ଚଳିକ କେନ୍ଦ୍ରରେ ପରୀକ୍ଷା ଫଳ ଏକାସାଙ୍ଗେ ପ୍ରକାଶ ପାଇବ । ପୂର୍ବାହ୍ନ ୧୦ଟା ସମୟରେ ପରୀକ୍ଷା ଫଳ ପୁସ୍ତିକା ମିଳିବା ସହ ୱେବ୍ ସାଇଟ୍ ରେ ଉପଲବ୍ଧ ହେବ ।

ସେହିପରି ଇଣ୍ଟରନେଟ୍ ରୁ ମଧ୍ୟ ପରୀକ୍ଷାର୍ଥିୀମାନେ ପରୀକ୍ଷାଫଳ ଜାଣିପାରିବେ । ଚଳିତ ମାସ ୧୬ ତାରିଖରେ ରାଜ୍ୟର ୨୫୪ଟି ପରୀକ୍ଷା କେନ୍ଦ୍ରରେ ସପ୍ଲିମେଣ୍ଟାରୀ ଅନୁଷ୍ଠିତ ହୋଇଥିଲା ।

ଏଥିରେ ୪୩ ହଜାର ୪୫୨ଜଣ ରେଗୁଲାର ଏବଂ ୧୩ ହଜାର ୫୭୦ ଜଣ ଏକ୍ସ-ରେଗୁଲାର ପରୀକ୍ଷାର୍ଥୀ ପରୀକ୍ଷା ଦେଇଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅକ୍ଟୋବର ୨୮(ଓଡ଼ିଶା ଡ଼ଟ୍ କମ୍) ଟାଟା ଷ୍ଟିଲ ଓ ପଠାଣି ସାମନ୍ତ ପ୍ଲାନେଟୋରିୟମର ମିଳିତ ସହଯୋଗରେ ଆସନ୍ତା ଡ଼ିସେମ୍ବର ୧୨ରେ ଯୁବ ଜ୍ୟୋତିର୍ବିଜ୍ଞାନୀ ପ୍ରତିଭା ଅନ୍ୱେଷଣ ପ୍ରତିଯୋଗିତା ଅନୁଷ୍ଠିତ ହେବ ।

ଭୁବନେଶ୍ୱର ସ୍ଥିତ ପଠାଣିସାମନ୍ତ ପ୍ଲାନେଟୋରିୟମରେ ୧୨ ଓ ୧୩ ତାରିଖ ଦୁଇଦିନ ଏହି ପ୍ରତିଯୋଗିତା ଅନୁଷ୍ଠିତ ହେବ । ବିଭିନ୍ନ ଜିଲ୍ଲାର ପ୍ରତିଯୋଗିମାନେ ରାଜ୍ୟସ୍ତରରେ ଶ୍ରେଷ୍ଠ ୨୦ଟି ସ୍ଥାନ ପାଇଁ ସେମାନଙ୍କ ମଧ୍ୟରେ ପ୍ରତିଦ୍ଵନ୍ଦିତା କରିବେ ।

ସମସ୍ତ ଜିଲ୍ଲାର ପ୍ରାୟ ଏକ ହଜାରରୁ ଉଦ୍ଧ୍ୱ ପ୍ରତିଯୋଗିଙ୍କ ମଧ୍ୟରୁ ଜେନେରାଲ ସ୍ତରୀୟ ପ୍ରତିଯୋଗିତାରେ ଉର୍ତ୍ତୀଣ୍ଡ ୧୨୦ ଛାତ୍ରଛାତ୍ରୀଙ୍କୁ ଭୁବନେଶ୍ୱରରେ ଅନୁଷ୍ଠିତ ହେବାକୁ ଥିବା ରାଜ୍ୟସ୍ତରୀୟ ପ୍ରତିଯୋଗିତାକୁ ଆମନ୍ତ୍ରଣ କରାଯାଇଛି ।

ବଲାଙ୍ଗୀର, ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର , କେନ୍ଦୁଝର, ଗଞ୍ଜାମ, ନବରଙ୍ଗପୁର, କୋରାପୁଟ, ଜଗତସିଂହପୁର, କଟକ, ଅନୁଗୁଳ, ପୁରୀ, ଯାଜପୁର ଆଦି ଜିଲ୍ଲାର ଛାତ୍ରଛାତ୍ରୀମାନେ ରାଜ୍ୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରିବେ । ଚଳିତ ବର୍ଷ ପ୍ରତିଯୋଗିତା ପାଇଁ “ମୋ କଳ୍ପନାର ମହାକାଶଯାନ” ବିଷୟବସ୍ତୁ ରଖାଯାଇଛି ।

ଅଷ୍ଟମରୁ ଦଶମ ଶ୍ରେଣୀରେ ପଢୁଥିବା ରାଜ୍ୟର ସମସ୍ତ ସ୍କୁଲର ଛାତ୍ରଛତ୍ରୀଙ୍କ ପାଇଁ ସାତୋଟି ଜୋନ୍ ରେ ଦୁଇଟି ପର୍ଯ୍ୟାୟରେ ପ୍ରତିଯୋଗିତା ଅନୁଷ୍ଠିତ ହୋଇଥିଲା । ବିଶେଷଜ୍ଞ ମାନଙ୍କୁ ନେଇ ଗଠିତ ଏକ ଟିମ୍ ପ୍ରତିଯୋଗି ମାନଙ୍କର ମଡ଼େଲ ଗୁଡ଼ିକର ମୁଲ୍ୟାୟନ କରିବେ ଏବଂ ପଠାଣି ସାମନ୍ତଙ୍କ ଜନ୍ମବାର୍ଷିକୀରେ ଶ୍ରେଷ୍ଠ ୨୦ ଜଣଙ୍କୁ ସମ୍ମାନୀତ କରାଯିବ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅକ୍ଟୋବର ୨୩(ଓଡ଼ିଶା ଡ଼ଟ୍ କମ୍) ଶିଶୁଙ୍କ ଅଧିକାର ପାଇଁ ବିଭିନ୍ନ ଆଇନ ପ୍ରଣୟନ ହୋଇଥିଲେ ମଧ୍ୟ ପ୍ରଶାସନିକ ଇଚ୍ଛା ଶକ୍ତିର ଅଭାବ ଯୋଗୁଁ ବର୍ତ୍ତମାନ ମଧ୍ୟ ଅଧିକାଂଶ ଶିଶୁ ନିଜ ଅଧିକାରରୁ ବଞ୍ଚିତ ହେଉଛନ୍ତି ଏବଂ ଏଥିରେ ଅଧିକ ସଚେତନତା ଆବଶ୍ୟକ ବୋଲି ଏକ ଆଲୋଚନାଚକ୍ରରେ ମତପ୍ରକାଶ ପାଇଛି ।

ରାଜ୍ୟ ସ୍ତରୀୟ ଗଣମାଧ୍ୟମ ପ୍ରତିନିଧିଙ୍କ ସହ ସାମାଜିକ ବିକାଶ ପ୍ରକ୍ରିୟାରୁ ବଞ୍ଚିତ ଓ ଅବହେଳିତ ଶିଶୁଙ୍କ ଉପରେ ଶନିବାର ଭୁବନେଶ୍ୱରରେ ଶିଶୁଙ୍କ ଉପରେ କାର୍ଯ୍ୟ କରୁଥିବା ସ୍ୱେଚ୍ଛାସେବୀ ଅନୁଷ୍ଠାନ ପକ୍ଷରୁ ଅନୁଷ୍ଠିତ ଆଲୋଚନା ଚକ୍ରରେ ଅଂଶଗ୍ରହଣ କରି ବିଭିନ୍ନ ଗଣମାଧ୍ୟମର ପ୍ରତିନିଧିମାନେ ମତବ୍ୟକ୍ତ କରିଛନ୍ତି ।

ସର୍ବେକ୍ଷଣ ଅନୁଯାୟୀ ଦେଶରେ ଥିବା ଲୋକଙ୍କ ସଂଖ୍ୟା ଠାରୁ ୪୦ ପ୍ରତିଶତ ଶିଶୁ । ଏମାନଙ୍କ ମଧ୍ୟରୁ ଅଧିକାଂଶ ଶିଶୁ ସାମାଜିକ କ୍ଷେତ୍ରରେ ଅବହେଳିତ ହୋଇ ବିକାଶ ପ୍ରକ୍ରିୟାରୁ ବଞ୍ଚିତ ହେଉଛନ୍ତି ।

ରାଜ୍ୟରେ ଶିଶୁ ମାନଙ୍କର ଶିକ୍ଷାର ବିକାଶ ତଥା ଗୁଣାତ୍ମକ ଶିକ୍ଷାର ପ୍ରଚଳନ ପାଇଁ ସରକାର ଶିକ୍ଷା ଅଧିକାର ଆଇନ କାର୍ଯ୍ୟକାରୀ କରିଥିଲେ ମଧ୍ୟ ସ୍କୁଲ ଗୁଡ଼ିକରେ ଛାତ୍ରଛାତ୍ରୀଙ୍କ ଠାରୁ ପ୍ରବେଶିକା ଫି ଆଦାୟ କରାଯାଉଛି, ସେମାନେ କହିଛନ୍ତି ।

ଏହାଦ୍ୱାରାଅଧିକାଂଶ ପିଲା ଅଧାରୁ ପାଠ ଛାଡ଼ୁଛନ୍ତି ଏବଂ ଏନେଇ ସରକାରଙ୍କ ପକ୍ଷରୁ ଉଚିତ୍ ପକ୍ଷେପ ଗ୍ରହଣ କରାଯାଉନାହିଁ । ଶିଶୁ ମାନଙ୍କୁ ଶିକ୍ଷା ଓ ସ୍ୱାସ୍ଥ୍ୟରେ ସୁରକ୍ଷା ମିଳିବା ସହିତ ସେମାନଙ୍କ ମୌଳିକଅଧିକାରର ସଦୁପଯୋଗ କରାଗଲେ ଜଣେ ଶିଶୁ ସୁରକ୍ଷିତ ବୋଲି ଜାଣିବା, ସେମାନେ କହିଛନ୍ତି ।

ସାମ୍ବାଦିକ ସୁରେନ୍ଦ୍ର ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଆଲୋଚନା ଚକ୍ରରେ ଦି ହିନ୍ଦୁର ପ୍ରଫୁଲ୍ଲ ଦାସ, ଆଇଏଏନ୍ଏସ୍ ର ଯତୀନ୍ଦ୍ର ଦାଶ, ଦି ହିନ୍ଦୁସ୍ତାନ ଟାଇମ୍ସର ପ୍ରିୟ ରଂଜନ ସାହୁ, ଷ୍ଟେଟସ୍ମ୍ୟାନର କେ.ରବି, ଉକ୍ତଳ ବିଶ୍ୱବିଦ୍ୟାଳୟର ଅଧ୍ୟାପିକା ନବନୀତା ରଥ, ପିକକ୍ର ସଂପାଦକ ରଂଜନ ମହାନ୍ତି ଏବଂ ସିସିଡ଼ବ୍ଲୁଡ଼ିର ସଂପାଦକ ସାଶିବ ସ୍ୱାଇଁ ପ୍ରମୁଖ ଯୋଗ ଦେଇଥିଲେ ।

ଓଡ଼ିଶା ଡ଼ଟ୍ କମ୍