କଂଗ୍ରେସ ବିଧାୟକ

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୨୦(ଓଡିଶା ଡଟ୍ କମ୍)-ଗତ ୧୨ ତାରିଖରେ ବିଧାନସଭାରୁ ନିଲମ୍ବିତ ହୋଇଥିବା କଣ୍ଟାବଞ୍ଝିର କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ସାତ ଦିନପରେ ଗୁରୁବାର ଦିନ ଗୃହକୁ ଫେରିଛନ୍ତି ।

ପ୍ରଶ୍ନ କାଳରେ ଶ୍ରୀ ସାଲୁଜା ପାଟିରେ ଧଳା କପଡା ବାନ୍ଧି ଜୟ ବଲାଙ୍ଗୀର,ଆମର ଦାବି ଲୋୟର ସୁକତେଲ ଲୋଖା ଥିବା ବ୍ୟାନରକୁ ନିଜ ଆସନରେ ଠିଆ ହୋଇ ପଦର୍ଶିତ କରିଥିଲେ ।

ପ୍ରଶ୍ନୋତର କାଳ ଶେଷ ପର୍ଯ୍ୟନ୍ତ ସେ ନିଜ ଆସନରେ ଠିଆ ହୋଇ ରହିଥିଲେ । ପ୍ରଶ୍ନୋତର କାଳରେ ବାଚସ୍ପତି ପ୍ରଦୀପ କୁମାର ଅମାତ ବିଜେଡି ବିଧାୟକ ପ୍ରଦୀପ ମହାରଥୀଙ୍କୁ ଧ୍ୟାନ ଆକର୍ଷଣକାରୀ ନୋଟିସ୍ ରେ କହିବାକୁ ଡାକିଥିଲେ ।

ଏହା ପ୍ରତିବାଦରେ କଂଗ୍ରେସ ବିଧାୟକ ସୁରେନ୍ଦ୍ର ସିଂ ଭୋଇ,ନବ କିଶୋର ଦାସ,ଦେବୀ ପ୍ରସାଦ ଚାନ୍ଦ ପ୍ରମୁଖ ଗୃହର ମଧ୍ୟଭାଗକୁ ଆସି ବିଧାୟକ ଶ୍ରୀ ସାଲୁଜାଙ୍କୁ କହିବାକୁ ସୁଯୋଗ ଦେବାପାଇଁ ଦାବି କରିଥିଲେ ।

ବାଚସ୍ପତି ଶ୍ରୀ ମହାରଥୀଙ୍କ ପରେ କହିବାକୁ ସୁଯୋଗ ଦିଆଯିବ ବୋଲି କହିବା ପରେ ସଦସ୍ୟମାନେ ନିଜ ନିଜ ଆସନକୁ ଫେରିଥିଲେ । ସାଲୁଜା କହିଲେ ମନ୍ତ୍ରୀମାନେ ଗୃହକୁ ବିଭ୍ରାନ୍ତ କରୁଛନ୍ତି । ଗୋଟିଏ ପ୍ରଶ୍ନର ଉତର ମାସକ ତଳେ ଯାହା ଥିଲା ପରବର୍ତୀ ସମୟରେ ତାହା ବଦଳି ଯାଉଛି । ଆଲୋଚନା ପାଇଁ ସୁଯୋଗ ମିଳୁ ନାହିଁ ।

ବୋକଚାବୁହା ନୁହେଁ ବୁଚୁକାବୁହା କହିଥିଲି । ମାତ୍ର ମୋତେ ଦଣ୍ଡ ମିଳିଲା । ହେଲେ ଯେଉଁମାନେ ବୋକଚାବୁହା କହିଲେ ସେମାନେ ଖସିଗଲେ । ତାଙ୍କୁ ଗୃହରୁ ୭ଦିନ ପାଇଁ ନିଲମ୍ବିତ କରାଯିବା ନେଇ ସେ ଦୁଃଖିତ ନୁହଁନ୍ତି ।

କାରଣ ସେ ବଲାଙ୍ଗୀରର କଥିତ ଭାଷାକୁ ଅନ୍ୟମାନେ କହୁଛନ୍ତି ବୋଲି କହି ଉଲ୍ଲେଖ କରିଥିଲେ । ତାଙ୍କ ନିଲମ୍ବନ ପାଇଁ ସେ ଓ କଣ୍ଟାବଞ୍ଝି ବାସୀଙ୍କ ପକ୍ଷରୁ ଧନ୍ୟବାଦ ଜଣାଇଛନ୍ତି ବୋଲି ସାଲୁଜା କହିଥିଲେ ।

ଓଡିଶା ଡଟ୍ କମ୍

ଓଡିଶା ଡଟ୍କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୫(ଓଡିଶା ଡଟ୍ କମ୍)-ବିରୋଧୀଦଳ ସଦସ୍ୟଙ୍କ ଅନୁପସ୍ଥିତିରେ ଗୋଟିଏ ପରେ ଗୋଟିଏ ବିଲ ପାସ୍ ହେଉଛି । ବିରୋଧୀ ଦଳଙ୍କ ପକ୍ଷରୁ ଦିଆଯାଉଥିବା ମୁଲତବୀ ପ୍ରସ୍ତାବକୁ ବାଚସ୍ପତି ଗ୍ରହଣ କରୁନାହାଁନ୍ତି । ଶନିବାର ଦିନ ଏଭଳି ଅଭିଯୋଗର ଏକ ଲମ୍ବାତାଲିକା ନେଇ ବିଧାନସଭାରୁ ସିଧାସଳଖ ରାଜଭବନ ଯାଇଥିଲେ ବିରୋଧୀ କଂଗ୍ରେସ ଦଳର ବିଧାୟକମାନେ । ରାଜ୍ୟପାଳଙ୍କୁ ଭେଟି ଗୃହରେ ଯାହା ଚାଲିଛି ସେ ସଂପର୍କରେ ଅବଗତ କରାଇଥିଲେ ।

ସେମାନେ କହିଥିଲେ ଗତ ୧୨ ତାରିଖ ଅପରାହ୍ନରେ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜାଙ୍କ ନିଲମ୍ବନ ଘୋଷଣାପରେ କଂଗ୍ରେସ ବିଧାୟକ କକ୍ଷ ତ୍ୟାଗ କରିଥିଲେ ।

ଠିକ୍ ସେହି ସମୟରେ ସରକାର ବିନା ଆଲୋଚନାରେ ଚାରୋଟି ଗୁରୁତ୍ୱପୂର୍ଣ୍ଣ ବିଲ ପାସ କରାଇ ନେଇଥିଲେ । ଗୃହର ବିବରଣୀ ମଗାଇ ଅନୁଧ୍ୟାନ କରିବାସହ ସେହି ବିଲ୍ ର ସାନି ଆଲୋଚନା ପାଇଁ ରାଜ୍ୟପାଳଙ୍କ ନିକଟରେ ଦାବି ଜଣାଇଛି କଂଗ୍ରେସ ।

ବିରୋଧୀଦଳ ନେତା ଭୂପିନ୍ଦର ସିଂହ କହିଛନ୍ତି ଏହା ଗୃହରବିଧି । ଆଇନରେ ଅଛି । ପରମ୍ପରା ଭାବରେ ମଧ୍ୟ ଆମେ ସବୁକିଛି ଆଲୋଚନା କରୁଛୁ ସେଇଟାରୁ ଆଜି ଆମକୁ କିପରି ବଞ୍ଚିତ କରାଯାଇଛି । ଆମେ ଆସିଛୁ ଆଲୋଚନା କରିବା ପାଇଁ,ଆଲୋଚନା ନକରି ସରକାର କିଭଳି ଏସବୁ କାର୍ଯ୍ୟକରୁଛନ୍ତି । ଏହା ଅଗଣତାନ୍ତ୍ରୀକ କାର୍ଯ୍ୟ । ଏହା ଉପରେ ମାନ୍ୟବର ରାଜ୍ୟପାଳଙ୍କୁ ଆମେ ଜଣାଇଛୁ ।

ବିରୋଧଦଳ ମୁଖ୍ୟସଚେତକ ପ୍ରସାଦ ହରିଚନ୍ଦନ କହିଛନ୍ତି ସରକାର ଜବରଦସ୍ତ କରି ଘରୋଇ କଂପାନୀଙ୍କ ସ୍ୱାର୍ଥରେ ଏସବୁ କରୁଛନ୍ତି । ତାଙ୍କର ସଂଖ୍ୟା ଗରିଷ୍ଠତା ଅଛିବୋଲି ଆଲୋଚନା କରିବେ ନାହିଁ କି ତାଙ୍କ ଦଳର ସଦସ୍ୟମାନଙ୍କୁ ମଧ୍ୟ ଆଲୋଚନା କରିବାକୁ ଦେଉ ନାହାଁନ୍ତି ।

ଅଧଘଣ୍ଟାରେ ବିଲ୍ ପାସ କରାଇ ନେଉଛନ୍ତି । କଂଗ୍ରେସର ଦାବୀକୁ ଯୁକ୍ତିଯୁକ୍ତ ଦର୍ଶାଇଛନ୍ତି ବିଜେପି ବିଧାୟକ ଦଳର ନେତା କନକ ବର୍ଦ୍ଧନ ସିଂହଦେଓ । ସେ କହିଛନ୍ତି ଏଭଳି କଲେ ସରକାର ନ୍ୟାୟାଳୟକୁ ଟଣାହେବାର ଆଶଙ୍କା ରହିଛି ।

ସଂସଦୀୟ ବ୍ୟାପାରମନ୍ତ୍ରୀ କଳ୍ପତରୁ ଦାସ କହିଛନ୍ତି ଗୃହରେ ବିରୋଧୀଙ୍କୁ ସବୁ ପ୍ରକାର ସହଯୋଗ ଯୋଗାଇ ଦିଆଯାଉଛି । ହେଲେ ବିଲ୍ ଉପରେ ଚର୍ଚ୍ଚାହେବାବେଳେ କଂଗ୍ରେସ ସଦସ୍ୟ ଯଦି ଅନୁପସ୍ଥିତ ରହିବେ ତେବେ ସେଥିପାଇଁ ଶାସକ ଦଳ କଣ କରିପାରିବେ ।

କଂଗ୍ରେସ ସଦସ୍ୟ ଯେତେକି ସମୟ ମାଗିଛନ୍ତି ଯେଉଁ ବିଲ ପାଇଁ ସେତିକି ସମୟ ଦିଆଯାଇଛି ଆଲୋଚନା ପାଇଁ । ତାଙ୍କ କଥା ଅନୁସାରେ ସମୟ ସ୍ଥିର ହୋଇଛି । ମଲତବୀ ଆଲୋଚନା ପ୍ରତ୍ୟେକ ଦିନ ହେବା ବାଧ୍ୟତାମୂଳକ ନୁହେଁ ବୋଲି ମନ୍ତ୍ରୀ କହିଛନ୍ତି ।

ଓଡିଶା ଡଟ୍ କମ୍

ଓଡିଶା ଡଟ୍ କମ୍ ସମ୍ବାଦଦାତା

ଭୁବନେଶ୍ୱର,ଡିସେମ୍ବର ୧୩(ଓଡିଶା ଡଟ୍ କମ୍)-ବାଚସ୍ପତିଙ୍କ ପ୍ରତି ଆପତିଜନକ ମନ୍ତବ୍ୟ ଦେଇଥିବାରୁ କଣ୍ଟାବାଞ୍ଜିର କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜାଙ୍କୁ ବିଧାନସଭାରୁ ସାତଦିନ ପାଇଁ ନିଲମ୍ବିତ କରାଯାଇଛି । ଏହାର ପ୍ରତିବାଦରେ ବିରୋଧି କଂଗ୍ରେସ କକ୍ଷତ୍ୟାଗ କରିଛି ।

ବୁଧବାର ଦିନ ଶୂନ୍ୟକାଳରେ ଆକ୍ଷେପଜନିତ ବିବାଦ ଆପାତତଃ ତୁଟିଯାଇଥିଲେ ମଧ୍ୟ ଅପରାହ୍ଣ ଅଧିବେଶନରେ ମୁଲତବି ପ୍ରସ୍ତାବ ଉପରେ ଦୁଇଘଣ୍ଟିଆ ଆଲୋଚନା ହୋଇଥିଲା । ଏହି ସମୟରେ ଶାସକ ଦଳର ମୁଖ୍ୟସଚେତକ ପୁନର୍ବାର ସାଲୁଜାଙ୍କ ପ୍ରସଙ୍ଗ ଉଠାଇଥିଲେ ।

ଗଣତାନ୍ତ୍ରିକ ବିଧିବ୍ୟବସ୍ଥା ପ୍ରତି ସମ୍ମାନ ରଖି ଦୁଃଖ ପ୍ରକାଶ ନକରିବାରୁ ତାଙ୍କୁ ନିଲମ୍ବନ କରିବା ଦାବିରେ ପ୍ରଭାତ ତ୍ରିପାଠୀ ଏକ ପ୍ରସ୍ତାବ ଆଣିଥିଲେ । ପ୍ରସ୍ତାବକୁ ଗହଣକରି ସନ୍ଧ୍ୟା ୬ଟା ୧୫ରେ ବାଚସ୍ପତି ସାଲୁଜାଙ୍କୁ ନିଲମ୍ବିତ ଆଦେଶ ଶୁଣାଇଥିଲେ ଓ ଗୃହ ଛାଡ଼ିବାକୁ ନିଦେ୍ର୍ଧଶ ଦେଇଥିଲେ ।

ଶୂନ୍ୟକାଳରେ କିଏ ପ୍ରଥମେ କହିବେ ସେ ନେଇ ବାଦାନୁବାଦ ସୃଷ୍ଟି ହୋଇଥିବାବେଳେ ଏହାକୁ ନେଇ ବିରୋଧୀ ଦଳ ସଦସ୍ୟ ସନ୍ତୋଷ ସିଂହ ସାଲୁଜା ବାଚସ୍ପତିଙ୍କ ପ୍ରତି ଅନୁଚିତ ଶବ୍ଦ ପ୍ରୟୋଗ କରିଥିଲେ ।

ଗୃହର ଓ ବାଚସ୍ପତିଙ୍କର ପଦମର୍ଯ୍ୟାଦା ଦୃଷ୍ଟିରୁ ଦଳମତ ନିର୍ବିଶେଷରେ ସମସ୍ତେ ଏହାର ପ୍ରତିବାଦ କରିବା ସହିତ ସାଲୁଜା କ୍ଷମା ମାଗିବାକୁ ଦାବି କରିଥିଲେ । ବିରୋଧୀ ଦଳ ନେତା ଓ ମୁଖ୍ୟ ସଚେତକ ଏ ନେଇ ଦୁଃଖ ପ୍ରକାଶ କରିବାରେ ଦୀର୍ଘ ସମୟଧରି ଚାଲିଥିବା ବିବାଦର ଅବସାନ ଘଟିଥିଲା ।

ବିରୋଧୀ ଦଳ ନେତା ସାଧାରଣତଃ ଶୂନ୍ୟକାଳରେ ଆଲୋଚନା ଆରମ୍ଭ କରିବାର ପରମ୍ପରା ଚଳିଆସିଥିବାବେଳେ ତାଙ୍କ ଅନୁପସ୍ଥିତିରେ ବାଚସ୍ପତି ଶାସକ ଦଳର ଉପମୁଖ୍ୟ ସଚେତକ ସଞ୍ଜୟ ଦାସବର୍ମାଙ୍କୁ ତାଙ୍କର ବକ୍ତବ୍ୟ ରଖିବାକୁ ଡାକିଥିଲେ ।

ବିରୋଧୀ ଦଳର ମୁଖ୍ୟ ସଚେତକ ପ୍ରସାଦ ହରିଚନ୍ଦନ କାହିଁକି ପରାମ୍ପରା ଭଙ୍ଗହେଲା ବୋଲି ପଚାରିବା ସହ ଜଣେ ସରକାରୀ ସଦସ୍ୟଙ୍କୁ ଡାକିବା ନେଇ ବୈଧାନିକ ପ୍ରଶ୍ନ ଉଠାଇଥିଲେ ।

ଏହି ସମୟରେ ସନ୍ତୋଷ ସିଂହ ସାଲୁଜା ବାଚସ୍ପତିଙ୍କ ଦୃଷ୍ଟି ଅକର୍ଷଣକରି ତାଙ୍କୁ ଆଲୋଚନାର ସୁଯୋଗରୁ ବଞ୍ଚିତ କରାଯାଉଛି ବୋଲି ଅଭିଯୋଗ କରିଥିଲେ । ବାଚସ୍ପତି ପାତରଅନ୍ତର କରୁଛନ୍ତି ଓ ବିଜେଡ଼ି ସଦସ୍ୟ ଭଳି କାମ କରୁଛନ୍ତି । ସେ ବିଜେଡିର ‘ବୋକଚାବୁହା’ ବୋଲି ସାଲୁଜା ଆକ୍ଷେପ କରିଥିଲେ । ଶାସକ ଦଳର ସଦସ୍ୟମାନେ ତତକ୍ଷଣାତ ଏଥିରେ ହସ୍ତକ୍ଷେପ କରିଥିଲେ ।

ପ୍ରଦୀପ ମହାରଥୀ ସାଲୁଜା ଗୃହକୁ ଜୋତା ମାରିଛନ୍ତି, ଏହା ଅତ୍ୟନ୍ତ ଲଜ୍ଜାଜନକ ବୋଲି ମତଦେଇ ପ୍ରୟୋଗ କରିଥିବା ଅପଶବ୍ଦ ପ୍ରତ୍ୟାହରର ସହ କ୍ଷମା ମାଗିବାକୁ ପରାମର୍ଶ ଦେଇଥିଲେ ।

ରାଜସ୍ୱମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଏଥିରେ ହସ୍ତକ୍ଷେପକରି ସରକାରୀ ଦଳର ସଦସ୍ୟଙ୍କୁ ପ୍ରଥମେ ଡାକିବାରେ କିଛି ଅସୁବିଧା ନାହିଁ ବୋଲି ମନ୍ତବ୍ୟ ଦେଇଥିଲେ ।

ବିରୋଧୀ ଦଳ ନେତା ଭୂପିନ୍ଦର ସିଂହ ଅନେକ ସମୟରେ ବିରୋଧୀ ଦଳର ସଦସ୍ୟଙ୍କୁ ମତ ରଖିବାର ସୁଯୋଗ ମିଳୁନଥିବା ନେଇ କ୍ଷୋଭ ପ୍ରକାଶ କରିଥିଲେ । ତେବେ ସାଲୁଜାଙ୍କ ମନ୍ତବ୍ୟ ନେଇ ଦଳ ପକ୍ଷରୁ ସେ ଦୁଃଖ ପ୍ରକାଶ କରିଥିଲେ । ତାଙ୍କ ସହିତ ପ୍ରସାଦ ହରିଚନ୍ଦନ ମଧ୍ୟ ଏ ନେଇ ଦୁଃଖ ପ୍ରକାଶ କରିଥିଲେ ।

ଓଡିଶା ଡଟ୍ କମ୍