ଢିଙ୍କିଆ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଜଗତସିଂହପୁର, ମାର୍ଚ୍ଚ ୩(ଓଡ଼ିଶା ଡ଼ଟ୍ କମ୍) ଜଗତସିଂହପୁର ଜିଲ୍ଲା କୁଜଙ୍ଗ ଅଞ୍ଚଳରେ କେତେକ ଦୁର୍ବୃତଙ୍କ ବୋମାମାଡ଼ରେ ଦୁଇ ଜଣ ଆହତ ହୋଇଥିବା ବେଳେ ଏନେଇ ଉତ୍ତେଜନା ପ୍ରକାଶ ପାଇଛି ।

ବିଭିନ୍ନ ଅପରାଧରେ ଜଡ଼ିତ ଜଣେ ପୋସ୍କୋ ବିରୋଧୀ ବ୍ୟକ୍ତିଙ୍କ ଗତକାଲି ରାତିରେ ଗିରଫ ପରେ ତାଙ୍କର ସମର୍ଥକମାନେ ପୋସ୍କୋ ସମର୍ଥକଙ୍କ ଘର ଉପରେ ବୋମାମାଡ଼ କରିଥିବା ଅଭିଯୋଗ ହୋଇଛି । ଏଥିରେ ଜଣେ ବାଳିକାଙ୍କ ସମେତ ଦୁଇ ଜଣ ଗଗୁରୁତର ଆହତ ହୋଇଛନ୍ତି ।

ଢିଙ୍କିଆ ଗ୍ରାମର ସଂପୃକ୍ତ ବ୍ୟକ୍ତି ଜୁଲୁ ବିଶ୍ୱାଳ ପୋସ୍କୋ ଆନ୍ଦୋଳନ ସମୟରେ ହିଂସାକାଣ୍ଡ, ଡ଼କାୟତି, ବୋମାମାଡ଼ ଭଳି ଘଟଣା ସଂପୃକ୍ତ ଥିବାରୁ ପୋଲିସ ତାକୁ ରାତିରେ ବୋସ୍କାଲିସ ପଏଣ୍ଟ ନିକଟରେ ଥିବା ଚିଙ୍ଗୁଡ଼ି ଘେରିରୁ ଗିରଫ କରିଥିଲା ।

ପୋସ୍କୋ ସପକ୍ଷବାଦୀ ମାଗୁ ସାମଲଙ୍କ ସୂଚନା ଅନୁଯାୟୀ ପୋଲିସ ବିଶ୍ୱାଳକୁ ଗିରଫ କରିଥିବା ଅନୁମାନ କରି ତାଙ୍କ ସମର୍ଥକମାନେ ସାମଲଙ୍କ ଘର ଉପରେ ବୋମାମାଡ଼ କରିଥିଲେ ।

ବୋମାମାଡ଼ରେ ଆହତ ସାମଲ ଏବଂ ତାଙ୍କ ଭଉଣୀଙ୍କୁ କୁଜଙ୍ଗ ଡ଼ାକ୍ତରଖାନାରେ ଭର୍ତି କରାଯାଇଛି । ଏହି ଘଟଣା ପରେ ପୋଲିସ ବିଭିନ୍ନ ସ୍ଥାନରେ ଚଢାଉ କରିଥିଲେ ମଧ୍ୟ ଅଭିଯୁକ୍ତଙ୍କୁ ଧରିବାରେ ସକ୍ଷମ ହୋଇପାରି ନାହିଁ ।

ପୋସ୍କୋ ବିରୋଧୀଙ୍କ ପାଇଁ ଢିଙ୍କିଆରେ ପୋଲିସ ପ୍ରବେଶ କରୁନଥିବାରୁ ବର୍ତମାନ ଏହି ଅଞ୍ଚଳରେ ଅପରାଧୀମାନେ ନିର୍ଭୟରେ ବୁଲୁଛନ୍ତି ବୋଲି ଲୋକମାନେ କହିଛନ୍ତି ।

ନିକଟରେ ହୋଇଥିବା ପଞ୍ଚାୟତୀ ନିର୍ବାଚନ ସମୟରେ ବାଲାଟ ବାକ୍ସ ଫିଙ୍ଗିବା ଘଟଣାରେ ସଂପୃକ୍ତ ଦଶ ଜଣ ଅପରାଧୀ ମଧ୍ୟ ଏହି ଗ୍ରାମରେ ଲୁଚି ରହିଥିବା ସେମାନେ କହିଛନ୍ତି ।

ଓଡ଼ିଶା ଡ଼ଟ୍ କମ୍

ଜଗତସିଂହପୁର, ଡ଼ିସେମ୍ବର ୧୫(ଓଡ଼ିଶା ଡ଼ଟ୍ କମ୍) ଶାନ୍ତିପୂର୍ଣ୍ଣ ଭାବରେ ଆନ୍ଦୋଳନ ଚଳାଇଥିବା ଲୋକଙ୍କ ଉପରେ ହୋଇଥିବା ଆକ୍ରମଣ ପ୍ରତିବାଦରେ ପୋସ୍କୋ ପ୍ରତିରୋଧ ସଂଗ୍ରାମ ସମିତି ପକ୍ଷରୁ ଗୁରୁବାର ମହାସମାବେଶର ଆୟୋଜନ କରାଯାଇଛି ।

ଢିଙ୍କିଆ ପଞ୍ଚାୟତର ପାଟଣା ଗ୍ରାମରେ ଅନୁଷ୍ଠିତ ଏହି ସମାବେଶରେ ବିଜେପି, ସିପିଆଇ, କଂଗ୍ରେସ ଦଳର ନେତାମାନେ ଯୋଗେଇ ପୋସ୍କୋ ପ୍ରକଳ୍ପ ବିରୋଧରେ ଆନ୍ଦୋଳନ ଜାରି ରଖିବାକୁ କହିଛନ୍ତି ।

ଗତକାଲି ହୋଇଥିବା ସଂଘର୍ଷ ଏବଂ ଏଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟଣାରେ ସେମାନେ ଇଡ଼୍କୋ କର୍ତୃପକ୍ଷ ଏବଂ ରାଜ୍ୟ ସରକାରଙ୍କୁ ଦାୟୀ କରିଛନ୍ତି ।

ସଂପୃକ୍ତ ଅଞ୍ଚଳରୁ ଏହି ପ୍ରକଳ୍ପ ସ୍ଥାନାନ୍ତର ନହେବା ପର୍ଯ୍ୟନ୍ତ ହିଂସା ଥମିବ ନାହିଁ । ସରକାର ଇଡ଼୍କୋ ମାଧ୍ୟମରେ ଢିଙ୍କିଆ ଏବଂ ଗୋବିନ୍ଦପୁର ସମେତ ଚାରୋଟି ପଞ୍ଚାୟତର ଗରିବ ଲୋକଙ୍କ ଜମି ଅଧିଗ୍ରହଣ କରିବାକୁ ଚାହୁଁଛନ୍ତି, ସମାବେଶରେ ଯୋଗଦେଇ ବିଜେପି ବିଧାୟକ କରେନ୍ଦ୍ର ମାଝୀ କହିଛନ୍ତି ।

ରାସ୍ତା ନିର୍ମାଣ କରିବା ପାଇଁ ସେମାନଙ୍କୁ ଏହି ଅଂଚଳକୁ ଆସିବାକୁ ଦିଆଯିବ ନାହିଁ ବୋଲି ସଂଗ୍ରାମ ସମିତି ସଂପାଦକ ଶିଶିର ମହାପାତ୍ର କହିଛନ୍ତି ।

ବିଜେପି ନେତା ନୟନ ମହାନ୍ତି, ଶ୍ରୀକାନ୍ତ ବ୍ରହ୍ମା, ଉପନ୍ଦ୍ରେ ବେହେରା, କଂଗ୍ରେସ ବିଧାୟକ ଦେବରାଜ
ଚାନ୍ଦ, ରାମକୃଷ୍ଣ କାଡ଼ାମ, ଦୁଷ୍ମନ୍ତ ନାୟକ, ସିପିଆଇ ନେତା ନାରାୟଣ ରେଡ୍ଡି ପ୍ରମୁଖ ସମାବେଶରେ ଯୋଗ ଦେଇଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍:ଅମରନାଥ ପରିଡ଼ା

ଜଗତସିଂହପୁର,ଡ଼ିସେମ୍ବର ୩(ଓଡ଼ିଶା ଡ଼ଟ୍ କମ୍) ପୋସ୍କୋ ବିରୋଧୀ ନେତା ଅଭୟ ସାହୁଙ୍କୁ ଗିରଫ କଲାପରେ ଜଗତସିଂହପୁର ଜିଲ୍ଲାରେ ପ୍ରକଳ୍ପ କାର୍ଯ୍ୟ ତ୍ୱରାନ୍ୱିତ କରିବା ଉଦ୍ଦେଶ୍ୟରେ ସଂପୃକ୍ତ ଅଂଚଳରେ ପ୍ରଶାସନ ଶୁକ୍ରବାର ପ୍ରାୟ ଚାରି ପ୍ଲାଟୁନ ଫୋର୍ସ ମୁତୟନ କରିଛନ୍ତି ।

ପୋଲିସ ବାହିନୀ ଢିଙ୍କିଆ ଅଂଚଳରେ ଫ୍ଲାଗମାର୍ଚ୍ଚ କରିଥିବା ବେଳେ ପ୍ରକଳ୍ପ ବିରୋଧୀମାନେ ପୋଲିସ, ପ୍ରଶାସନ ତଥା କଂପାନୀ ର କାହାକୁ ପ୍ରକଳ୍ପ ଅଂଚଳକୁ ପ୍ରବେଶ କରାଇ ନଦେବା ପାଇଁ ବିଭିନ୍ନ ସ୍ଥାନରେ କାଠ ବ୍ୟାରିକେଟ୍ ମାନ ନିର୍ମାଣ କରି ରାତିିଦିନ ପହରା ଦେବା ଆରମ୍ଭ କରିଛନ୍ତି ।

ଯଦି ପ୍ରକଳ୍ପ କାର୍ଯ୍ୟରେ ବାଧା ସୃଷ୍ଟି କରାଯାଏ ତେବେ ପୋଲିସ ବଳ ପ୍ରୟୋଗ କରିବାକୁ ବାଧ୍ୟ ହେବ
ବୋଲି ପ୍ରଶାସନ ଚେତାବନୀ ଦେଇଥିବା ବେଳେ ବିରୋଧୀ ଗ୍ରାମବାସୀ କୌଣସି ପରିସ୍ଥିତିରେ
ପୋସ୍କୋ କାର୍ଯ୍ୟ କରିବାକୁ ଦେବେ ନାହିଁ ବୋଲି କହିଛନ୍ତି ।

ସାହୁଙ୍କ ଗିରଫଦାରୀ ପରେ ସଂପୃକ୍ତ ଅଂଚଳରେ ଚାପା ଉତ୍ତେଜନା ଲାଗି ରହିଛି । ପ୍ରଶାସନ,ପୋଲିସ ଓ
ବିରୋଧୀ ଅଲଗା ଅଲଗା ସ୍ଥାନରେ ଘନଘନ ବୈଠକ କରୁଥିବା ପରିଲକ୍ଷିତ ହୋଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ଅମରନାଥ ପରିଡ଼ା

ଜଗତସିଂହପୁର, ଅକ୍ଟୋବର ୮(ଓଡ଼ିଶା ଡ଼ଟ୍ କମ୍) ବିଭିନ୍ନ ବିକାଶ ମୂଳକ କାର୍ଯ୍ୟ ଯୋଗୁଁ ବର୍ତ୍ତମାନ ପୋସ୍କୋ ପ୍ରସ୍ତାବିତ ଅଞ୍ଚଳରେ ପରିସ୍ଥିତି ସ୍ୱାଭାବିକ ଥିବା ବେଳେ ଉକ୍ତ ଅଞ୍ଚଳର ଲୋକମାନେ ଗତ ତିନି ବର୍ଷ ହେଲା ଡ଼ାକ ସେବାରୁ ବଞ୍ଚିତ ହୋଇଛନ୍ତି ।

ଡ଼ାକ ବିଭାଗର ଅବହେଳା ଓ ଅନିଚ୍ଛା ଯୋଗୁଁ ଢିଙ୍କିଆରେ ଏହି ସେବା ପାଇବାରୁ ଗ୍ରାମବାସୀ ବଞ୍ଚିତ ହୋଇଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି । ଏକମାତ୍ର ଡ଼ାକଘର ଢିଙ୍କିଆ, ତ୍ରିଲୋଚନପୁର ଏବଂ ଗୋବିନ୍ଦପୁର ଗ୍ରାମବାସୀଙ୍କ ଆବଶ୍ୟକତା ପୂରଣ କରୁଥିବା ବେଳେ ପୋସ୍କୋ ହିଂସା ଯୋଗୁଁ ଗତ ତିନି ବର୍ଷ ହେଲା ଏହା ବନ୍ଦ ହୋଇ ରହିଛି ।

ପୋସ୍କୋ ବିରୋଧୀଙ୍କ ବିରୋଧ ଯୋଗୁଁ ଗତ ଡ଼ିସେମ୍ବର ୨୦୦୭ ରୁ ଡ଼ାକ ସେବା ବନ୍ଦ ଥିବା ବିଭାଗ ପକ୍ଷରୁ କୁହାଯାଇଛି । ଉକ୍ତ ଡ଼ାକ ଘରର ପୋଷ୍ଟମାଷ୍ଟର ପୋସ୍କୋ ବିରୋଧୀ କାର୍ଯ୍ୟରେ ସଂପୃକ୍ତ ଥିବା ଅଭିଯୋଗ ହୋଇଥିବା ବେଳେ ତାଙ୍କ ବିରୁଦ୍ଧରେ ୧୫ରୁ ଅଧିକ ମାମଲା ରହିଛି ।

ତାଙ୍କ ବିରୁଦ୍ଧରେ ଜାମିନ ବୀହିନ ଗିରଫ ପରୱାନା ମଧ୍ୟ ଜାରି କରାଯାଇପୋଲିସ ପକ୍ଷରୁ ପଳାତକ ଘୋଷଣା କରାଯାଇଛି । ତାଙ୍କ ବିରୋଧରେ ବିଭିନ୍ନ ମାମଲା ଥିବାରୁ ଚାକିରିରୁ ତାଙ୍କୁ ନିଲମ୍ବିତ କରାଯାଇଛି । ଡ଼ାକ ବିଭାଗ ତାଙ୍କ ସ୍ଥାନରେ ଅନ୍ୟ ଜଣେ ବ୍ୟକ୍ତିଙ୍କୁ ଏହି ଡ଼ାକଘରେ ନିଯୁକ୍ତ କରିଥିଲା ।

କିନ୍ତୁ ପୋସ୍କୋ ବିରୋଧୀମାନେ ନିଲମ୍ବିତ ଅଧିକାରୀଙ୍କୁ ପୁନଃ ନିଯୁକ୍ତ କରିବାକୁ ଜିଦ୍ ଧରିବାରୁ ନବନିଯୁକ୍ତ ପୋଷ୍ଟ ମାଷ୍ଟର ଏଠାରେ ଯୋଗ ଦେଇପାରିଲେ ନାହିଁ । ବିରୋଧୀଙ୍କ ଦାବୀ ପୂରଣ କରିବାକୁ ସଂପୃକ୍ତ ବିଭାଗ ମନା କରିବୋରୁ ସେହି ଦିନ ଠାରୁ ଉକ୍ତ ଡ଼ାକଘର ବନ୍ଦ ହୋଇ ରହିଛି ।

ସଂପୃକ୍ତ ଅଞ୍ଚଳରେ ଡ଼ାକ ସେବା ବ୍ୟତୀତ ଅନ୍ୟ ସବୁ ଠିକ୍ ଠାକ୍ ଚାଲିଛି । ବିଭାଗୀୟ ଅଧିକାରୀଙ୍କ ଉଦାସୀନତା ଯୋଗୁଁ ଡ଼ାକଘର ବନ୍ଦ ରହିଛି ବୋଲି ଢିଙ୍କିଆ ସରପଞ୍ଚ ଶିଶିର ମହାପାତ୍ର କହିଛନ୍ତି ।

କୁଜଙ୍ଗ ଡ଼ାକଘର ଢିଙ୍କିଆ ଠାରୁ ଦଶ କିମି ଦୂରରେ ଥିବାରୁ ରକାରୀ ଚିଠିପତ୍ର, ମନିଅର୍ଡ଼ର, ପାର୍ସଲ ଇତ୍ୟାଦି ପାଇବା ପାଇଁ ଲୋକମାନେ ବହୁତ ଅସୁବିଧାର ସମ୍ମୁଖିନ ହେବା ସହ ବଞ୍ଚିତ ମଧ୍ୟ ହେଉଛନ୍ତି ।

ଏହି ଘଟଣା ବିଷୟରେ ଦିଲ୍ଲୀ ସ୍ଥିତ ବିଭାଗୀୟ ମହାନିଦେ୍ର୍ଧଶକଙ୍କୁ ଅବଗତ କରାଯାଇଛି । ଯଦି ପୋସ୍କୋ ବିରୋଧୀ ପ୍ରତିବାଦ ନକରିବେ ତେବେ ଜଣେ ନୂଆ ପୋଷ୍ଟ ମାଷ୍ଟରଙ୍କୁ ନିଯୁକ୍ତ କରି ଡ଼ାକଘର ପୁନଃ ଖୋଲାଯିବ ବୋଲି କଟକ ଡ଼ାକ ଅଧିକ୍ଷକ ସୁବାଷ ଚନ୍ଦ୍ର ବାରିକ କହିଛନ୍ତି ।

ଓଡିଶା ଡଟ୍ କମ୍