ନବରଙ୍ଗପୁର

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ନବରଙ୍ଗପୁର,ସେପ୍ଟେମ୍ବର ୨୩(ଓଡ଼ିଶା ଡ଼ଟ୍ କମ୍)-ସେପ୍ଟେମ୍ବର ୨୪ ତାରିଖ ନବରଙ୍ଗପୁର ଜିଲ୍ଲା ତଥା ରାଜ୍ୟ ଇତିହାସରେ ଯୋଡି ହୋଇଥିଲା କଳଙ୍କିତ ଫର୍ଦ୍ଧ ।

ସ୍ପଷ୍ଟ ଦିବାଲୋକରେ ନିଜ ସମର୍ଥକଙ୍କ ଗହଣରେ ଅଞ୍ଚଳବାସୀଙ୍କ ସାମନାରେ ରକ୍ତରଞ୍ଜିତ ହେଲା ଗୋନା ହାଟପଦା । ଅଜଣା ର୍ଦୁବୃତଙ୍କ ଗୁଳିରେ ସବୁଦିନ ପାଇଁ ଆଖିବୁଜିଦେଲେ ଉମରକୋଟ ତତ୍କାଳୀନ ବିଧାୟକ ଜଗବନ୍ଧୁ ମାଝୀ ।

ରାଇଘର ଠାରୁ ୧୨ କିମି ଦୂର ଗୋନାହାଟପଦାରେ ଜଙ୍ଗଲ ଜମିପଟ୍ଟା କାର୍ଯ୍ୟକ୍ରମରେ ଯୋଗଦେଇଥିଲେ ବାରଙ୍ଗପଦରର ୬୭ ଜଣ, ଅଞ୍ଚଳାର ୬୭ ଜଣ ଓ ଚିଙ୍ଗଡାନଟର ୨୯ ଜଣ ହିତାଧିକାରୀ ଏବଂ ଏମାନଙ୍କ ସହିତ ତିନିଶହରୁ ଚାରିଶହ ଅଧିବାସୀ ।

ମାତ୍ର ୬ ଜଣଙ୍କୁ ପଟ୍ଟାପ୍ରଦାନ ସରିଥିବା ବେଳେ ୩ ଜଣ ଅଚିହ୍ନା ଯୁବକ ଗୋଟିଏ ବାଇକରେ ଆସି ବିଧାୟକଙ୍କ ଅଙ୍ଗରକ୍ଷୀ ପିଙ୍କୁ ପାତ୍ରଙ୍କୁ ଗୁଳି କରିବାପରେ ତାଙ୍କ ସର୍ଭିସ ପିସ୍ତଲରୁ ବିଧାୟକ ଜଗବନ୍ଧୁଙ୍କୁ ଗୁଳିକରି ଆଖି ପିଛୁଳାକେ ଅର୍ନ୍ତଦ୍ଧାନ ହୋଇ ଯାଇଥିଲେ ।

୨୦୧୧ ସେପ୍ଟେମ୍ବର ୨୫ ତାରିଖରେ ନିହତ ବିଧାୟକ ଜଗବନ୍ଧୁଙ୍କ ଅନ୍ତିମ ଯାତ୍ରାରେ ଯୋଗଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ତାଙ୍କର ବହୁମନ୍ତ୍ରୀ,ସାଂସଦ ।

କ୍ରାଇମବ୍ରାଞ୍ଚ ଦୀର୍ଘଦିନ ତଦନ୍ତ ପରେ ଜଣେ ସନ୍ଦିଗ୍ଧର ସ୍କେଚଜାରି କରିବା ସହ ୨ ହାର୍ଡକୋର ମାଓବାଦୀଙ୍କ ନାମରେ ଜାମିନ ବିହୀନ ଗିରଫ ପରୱାନା ଜାରିହୋଇ ତଦନ୍ତ ଫାଇଲ ସାମୟିକ ବନ୍ଦ ରହିଥିଲା ।

୨୦୧୧ ନଭେମ୍ବର ୩୦ରେ ବହୁଚର୍ଚ୍ଚିତ ଉମରକୋଟ ଉପନିର୍ବାଚନରେ ଜଗବନ୍ଧୁଙ୍କ ସହଯୋଗୀ ସୁବାସ ଗଣ୍ଡ ୨୧ ହଜାରରୁ ଉର୍ଦ୍ଧ ଭୋଟ ବ୍ୟବଧାନରେ ବିଜୟୀ ହୋଇଥିଲେ ।

୧୧ମାସପରେ ଜଗବନ୍ଧୁଙ୍କ ହତ୍ୟା ଘଟଣା ପୁଣି ନାଟକୀୟ ମୋଡ ନେବାସହ ରାଜ୍ୟବାସୀଙ୍କ ଅତୀତ ସ୍ମୃତିକୁ ଉଜ୍ଜିବିତ କରିଥିଲା ।

ଗତ ୩୧ ତାରିଖ ରାତି ୧୦ଟାରେ ଜଗବନ୍ଧୁଙ୍କ ମା ଗୌରୀମଣୀ ଉମରକୋଟ ଥାନାରେ ତାଙ୍କ ପୁଅ ହତ୍ୟାକାଣ୍ଡ ପଛରେ ସହଯୋଗୀ ତଥା ବର୍ତ୍ତମାନର ବିଧାୟକ ସୁବାସ ଗଣ୍ଡ ହାତଥିବା ଅଭିଯୋଗକରି ସୁବାସ ଓ ବି.ବୁଜିରାଓଙ୍କ ନାମରେ ଏତଲା ଦାଏର କଲେ ।

ଏବେ ବହୁ ପ୍ରଶ୍ନ ସାଧାରଣରେ ଉଙ୍କି ମାରୁତିବା ବେଳେ ତଦନ୍ତକାରୀ କ୍ରାଇମବ୍ରାଞ୍ଚ ହତ୍ୟାକାଣ୍ଡର ପ୍ରକୃତ ରହସ୍ୟ ଉନ୍ମୋଚନ କରିପାରି ନାହିାଁ କିମ୍ବା ହତ୍ୟାକାରୀଙ୍କୁ ଗିରଫ କରାଯାଇନାହିଁ । ମାଓବାଦୀଙ୍କୁ ଦାୟୀ କରିଚୁପ୍ ବସିଛି କ୍ରାଇମବ୍ରାଞ୍ଚ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ସେପ୍ଟେମ୍ବର ୧୭(ଓଡ଼ିଶା ଡ଼ଟ୍ କମ୍)-ନବରଙ୍ଗପୁର ଜିଲ୍ଲାର ବିଭିନ୍ନ ସ୍ଥାନରେ ଗତ ଜୁଲାଇ ମାସ ୨୭ ତାରିଖରୁ ଆଜି ପର୍ଯ୍ୟନ୍ତ ମୋଟ ୨୭୧ ଜଣ ଝାଡାବାନ୍ତିରେ ଆକ୍ରାନ୍ତ ହୋଇଛନ୍ତି । ସେମାନଙ୍କ ମଧ୍ୟରୁ ୬ ଜଣ ମୃତ୍ୟୁ ବରଣ କରିଛନ୍ତି ।

ଏ ସଂପର୍କରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡାଃ ଦାମୋଦର ରାଉତ ସମୀକ୍ଷା କରି କହିଛନ୍ତି ଯେ ଅଗଷ୍ଟ ମାସରେ ଜିଲ୍ଲାରେ ୪ ଜଣଙ୍କର ମୃତ୍ୟୁ ହୋଇଥିବା ବେଳେ ଚଳିତ ମାସରେ ୨ ଜଣଙ୍କର ମୃତ୍ୟୁ ଘଟିଛି ।

ସେଥିରୁ ଚନ୍ଦାହାଣ୍ଡି ବ୍ଲକରେ ୨ ଜଣ , ଝରିଗାଁ ବ୍ଲକରେ ୩ ଜଣ ଏବଂ ଉମରକୋଟ ବ୍ଲକରେ ଜଣଙ୍କର ମୃତ୍ୟୁ ହୋଇଥିବା ସମୀକ୍ଷାରୁ ପ୍ରକାଶ । ଏହି ଜିଲ୍ଲାର ଉମରକୋଟ, ଚନ୍ଦାହାଣ୍ଡି, କୋସମଗୁମୁଡା ଏବଂ ଝରିଗାଁ ବ୍ଲକ୍ ରେ ୭୧ ଟି ଗ୍ରାମରେ ଲୋକମାନେ ପ୍ରଭାବିତ ହେଉଥିବା ବେଳେ ଅନ୍ୟାନ୍ୟ ଅଞ୍ଚଳରେ ମଧ୍ୟ କାଁ ଭାଁ ଲୋକମାନେ ଆକ୍ରାନ୍ତ ହେଉଛନ୍ତି ।

ଏହି ଜିଲ୍ଲାର କୌଣସି ସ୍ଥାନରେ କଲେରା ବା ହଇଜା ମହାମାରୀ ରୂପ ନେଇନାହିଁ ପରିସ୍ଥିତିକୁ ଦୃଷ୍ଟିରେ ରଖି ଜନସ୍ୱାସ୍ଥ୍ୟ ନିର୍ଦ୍ଦେଶକ ଏକ ଡାକ୍ତରୀଳ ସହିତ ସଂପୃକ୍ତ ଅଞ୍ଚଳ ଗସ୍ତକରୁଛନ୍ତି ଏବଂ ଏମ୍.କେ.ସି.ଜି ମେଡିକାଲ କଲେଜ ଓ ହସପିଟାଲରୁ ଡାକ୍ତରୀ ଦଳ ବିଭିନ୍ନ ପ୍ରଭାବିତ ଅଞ୍ଚଳରେ ମୁତୟନ ହୋଇଛନ୍ତି ।

ଆକ୍ରାନ୍ତଙ୍କୁ ତୁରନ୍ତ ଆବଶ୍ୟକୀୟ ଚିକିତ୍ସା ସେବା ଯୋଗାଇ ଦେବା ପାଇଁ ସମସ୍ତ ପ୍ରକାର ପଦକ୍ଷେପ ଗ୍ରହଣ କରାଯାଇଛି ଏବଂ ଯଥେଷ୍ଟ ପରିମାଣର ଆବଶ୍ୟକ ଔଷଧ , ଓ.ଆର୍.ଏସ୍ , ହାଲୋଜେନ ବଟିକା ଏବଂ ସାଲାଇନ ଆଦି ମହଜୁଦ ରହିଛି ।

ବର୍ତ୍ତମାନ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣାଧୀନ ରହିଛି ଏବଂ ପରିସ୍ଥିତି ଉପରେ ସତର୍କ ଦୃଷ୍ଟି ରଖା ଯାଇଛି । ରାତ୍ରୀ କାଳୀନ ତଦାରଖ ବ୍ୟବସ୍ଥାକୁ କଡାକଡି କରାଯାଇଛି । ଜିଲ୍ଲାରେ ଖାଲିଥିବା ଡାକ୍ତର ପଦବି ପୁରଣ ପାଇଁ ପଦକ୍ଷେପ ଗ୍ରହଣ କରାଯାଉଛି ।

ତେବେ ଚନ୍ଦାହାଣ୍ଡି ବ୍ଲକର ଫଟାମୁଣ୍ଡା , ଗୋଧିପାଣି ଏବଂ ସିମେଳିପାଣି ଓ ଝରିଗାଁ ବ୍ଲକର କୁନିନାଳ ଗ୍ରାମରେ ପାଣି ଓ କେତେକ ଆକ୍ରାନ୍ତଙ୍କ ମଳ ନମୂନାରେ ଭିବ୍ରୋ କଲେରା ଜୀବାଣୁ ଥିବା ପରୀକ୍ଷାରୁ ଜଣା ପଡିବା ପରେ ପ୍ରତିଶେଧକ ଓ ତାରଖ ବ୍ୟବସ୍ଥାକୁ ଅଧିକ ତ୍ୱରାନ୍ନିତ କରାଯିବା ସହିତ ଲୋକମାନଙ୍କୁ ସ୍ୱାସ୍ଥ୍ୟ ସଚେତନ କରିବା ନିମନ୍ତେ ସ୍ୱାସ୍ଥ୍ୟ ଶିକ୍ଷା ସୂଚନା କାର୍ଯ୍ୟକ୍ରମକୁ ବ୍ୟାପକ କରାଯାଇଛି ।

ଜିଲ୍ଲା ପ୍ରଶାସନ ତରଫରୁ ପରିସ୍ଥିତି ଉପରେ ମଧ୍ୟ ସତର୍କ ଦୃଷ୍ଟି ରଖାଯାଇଛି ଆବଶ୍ୟକତା ଅନୁଯାୟି ପଦକ୍ଷେପ ନିଆଯାଇଛି । ଏ ପର୍ଯ୍ୟନ୍ତ କଲେରା ବା ହଇଜା କୌଣସି ସ୍ଥାନରେ ମହାମାରୀ ରୂପ ନେଇ ନାହିଁ କିମ୍ବା ହଇଜାରେ ଆକ୍ରାନ୍ତ ହୋଇ କେହି ମୃତ୍ୟୁ ବରଣ କରିନାହାଁନ୍ତି ।

ତେବେ ଚଳିତ ବର୍ଷ ଜାନୁୟାରୀ ମାସରୁ ଏ ପର୍ଯ୍ୟନ୍ତ ଝରିଗାଁ , କୋସମଗୁଡା ଏବଂ ଚନ୍ଦାହାଣ୍ଡି ବ୍ଲକରେ ମୋଟ ୬୧ ଜଣଙ୍କର ଅନ୍ୟାନ୍ୟ କାରଣରୁ ମୃତ୍ୟୁ ହୋଇଛି । ସେମାନଙ୍କ ମୃତ୍ୟୁ କଲେରା ବା ଡାଏରିଆ ଯୋଗୁ ହୋଇଥିବା ଯାହା ଅଭିଯୋଗ ହେଉଛି ତାହା ଆଦୌ ସତ୍ୟ ନୁହେଁ ।

କାରଣ ସେମାନେ ବାର୍ଦ୍ଧକ୍ୟ ଜନିତ , ରେନାଲ ଫେଲିୟୋର , ହୃ୍ଦଘାତ , ରକ୍ତବାନ୍ତି ଆଦି ବିଭିନ୍ନ କାରଣରୁ ମୃତ୍ୟୁ ବରଣ କରିଛନ୍ତି । ସ୍ୱାସ୍ଥ୍ୟ ନିର୍ଦ୍ଦେଶାଳୟ ନିୟନ୍ତ୍ରଣ କକ୍ଷରୁ ପରିସ୍ଥିତି ଉପରେ ସତର୍କ ଦୃଷ୍ଟି ରଖାଯାଇ ପ୍ରତିଶେଧକ ଏବଂ ଚିକିତ୍ସା ବ୍ୟବସ୍ଥାକୁ ତ୍ୱରାନ୍ନିତ କରାଯାଉଛି ।

ତେବେ ପରିସ୍ଥିତି ସମ୍ପୂର୍ଣ୍ଣ ସ୍ୱଭାବିକ ହେବା ପର୍ଯ୍ୟନ୍ତ ଗ୍ରହଣ କରାଯାଇଥିବା ସମସ୍ତ ପ୍ରକାର ପଦକ୍ଷେପକୁ ବଜାୟ ରଖିବା ସହିତ ତଦାରଖ ବ୍ୟବସ୍ଥାକୁ ଅଧିକ କଡାକଡି କରିବାକୁ ସ୍ୱାସ୍ଥ୍ୟମନ୍ତ୍ରୀ ଡାଃ ରାଉତ ନିର୍ଦେଶ ଦେଇଛନ୍ତି ।

ସଚିବାଳୟଠାରେ ଅନୁଷ୍ଠିତ ଉକ୍ତ ସମୀକ୍ଷା ବୈଠକରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ କମିଶନର ତଥା ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏବଂ ସ୍ୱାସ୍ଥ୍ୟସେବା ନିର୍ଦ୍ଦେଶକ ଡାଃ ତ୍ରିବିକ୍ରମ ପଣ୍ଡାଙ୍କ ସମେତ ଅନ୍ୟାନ୍ୟ ବିଭାଗୀୟ ପାଧିକାରୀମାନେ ଯୋଗ ଦେଇଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍:ରାକେଶ ଗୁପ୍ତା

ଉମରକୋଟ, ନଭେମ୍ବର୩୦(ଓଡ଼ିଶା ଡ଼ଟ୍ କମ୍) ବୁଧବାର ନବରଙ୍ଗପୁର ଜିଲ୍ଲାର ଉମରକୋଟ  ବିଧାନସଭା ମଣ୍ଡଳୀ ଉପନିର୍ବାଚନ ଶାନ୍ତି ଶୃଙ୍ଖଳାର ସହ ସମାପ୍ତ ହୋଇଥିବା ବେଳେ ,ପ୍ରାୟ ୭୨ପ୍ରତିଶତ ଭୋଟର ନିଜର ମତଦାନ ସାବ୍ୟସ୍ତ କରିଥିବା ଜିଲ୍ଲାପାଳ ଶିବବ୍ରତ ଦ।ଶ କହିଛନ୍ତି ।

ନିର୍ବାଚନ ତାରିଖର କିଛିିନ ପୂର୍ବରୁ କେତେକ ମାଓବାଦୀ ଧମକ ପୋଷ୍ଟର ଦେଖିବାକୁ ମିଳିଥିବା ସତ୍ୱେ ବ୍ୟାପକ ଉତ୍ସାହ ଓ ଉଦ୍ଦୀପନାର ସହ ମହିଳା ଓ ପୁରୁଷ ଭୋଟରମାନେ ନିର୍ଧାରିତ ସମୟ ପୂର୍ବରୁ ସ୍ଥାନୀୟ ଭୋଟ କେନ୍ଦ୍ର ସାମନାରେ ଧାଡ଼ିରେ ଛିଡ଼ା ହୋଇଥିଲେ ।

ନକ୍ସଲ ଭୟ ଦୂର ପାଇଁ ବିଭିନ୍ନ ସମ୍ବେଦନାପୂର୍ଣ୍ଣ ସ୍ଥାନମାନଙ୍କରେ ବ୍ୟାପକ ପୋଲିସ ମୁତୟନ କରାଯାଇଥିଲା । ବହୁ ଭୋଟର ଇଭିଏମ୍ ମେସିନ ର ବ୍ୟବହାର ଜାଣିନଥିବାରୁ ନିର୍ବାଚନ କାର୍ଯ୍ୟରେ ନିୟୋଜିତ କର୍ମଚାରୀ ତାଙ୍କୁ ଉକ୍ତ ମେସିନର ବ୍ୟବହାର ସଂପର୍କରେ ବୁଝାଇଥିଲେ ।

ଅପରାହ୍ଣ ଚାରିଟା ଭୋଟ ଗ୍ରହଣର ଶେଷ ସମୟ ଥିବା ସତ୍ୱେ ବିଳମ୍ବରେ କେତେକ ମତଦାନ କେନ୍ଦ୍ରକୁ ବହୁ ସଂଖ୍ୟାରେ ଭୋଟର ଆସିଥିବା ଯୋଗୁଁ ସେଠାରେ ମତଦାନ ସମୟସୀମା ବଢାଯାଇଥିଲା ଜିଲ୍ଲା ପୋଲିସ ମୁଖ୍ୟ ନିତି ଶେଖର ଓଡ଼ିଶା ଡ଼ଟ୍ କମ୍ କୁ କହିଛନ୍ତି ।

ଶାନ୍ତି ଶୃଂଖଳାର ସହ ଭୋଟ ଦାନ ସରିବା ପରେ ବିଜେପି ,ବିଜେଡ଼ି ଓ କଂଗ୍ରେସର ଯଥାକ୍ରମେ ଧର୍ମୁ ଗଣ୍ଡ ସୁବାଷ ଗଣ୍ଡ ଏବଂ ଜୀତେନ୍ଦ୍ର ଗଣ୍ଡ ଙ୍କର ଭାଗ୍ୟ ଭୋଟ ବାକ୍ସ ଭିତରେ ବନ୍ଦ ହୋଇ ରହିଛି । ଆସନ୍ତା ଡ଼ିସେମ୍ବର ୪ ତାରିଖରେ ଭୋଟ୍ ଗଣତି ହେବ ।

ବିଜେଡ଼ି ବିଧାୟକ ଜଗବନ୍ଧୁ ମାଝୀଙ୍କ ହତ୍ୟା ପରେ ଏହି ବିଧାନସଭା ଆସନ ଖାଲି ହୋଇଥିବାରୁ ଏହି ଉପନିର୍ବାଚନ ଅନୁଷ୍ଠିତ ହୋଇଥିଲା ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୨୪(ଓଡ଼ିଶା ଡ଼ଟ୍ କମ୍) ନବରଙ୍ଗପୁର ଜିଲ୍ଲା ଉମରକୋଟ ଉପ ନିର୍ବାଚନ ପାଇଁ ଆସନ୍ତା ୩୦ ତାରିଖଦିନ ସବୈତନିକ ଛୁଟି ଦିବସ ରୂପେ ବିବେଚନା କରିବାକୁ ସରକାର ନିଷ୍ପତି ନେଇଛନ୍ତି ।

ଓଡ଼ିଶା ଶିଳ୍ପ ସଂସ୍ଥା ଛୁଟି ଦିବସ ଅଧିନିୟମ ଏବଂ ଲୋକ ପ୍ରତିନିଧି ଅଧିନିୟମ ଅନୁଯାୟୀ ଉମରକୋଟ ବିଧାନସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ସମସ୍ତ ଶିଳ୍ପ ସଂସ୍ଥା, ଦୋକାନ ଓ ବ୍ୟବସାୟିକ ପ୍ରତିଷ୍ଠାନର ମାଲିକମାନେ ସେମାନଙ୍କ ଅନୁଷ୍ଠାନରେ କାର୍ଯ୍ୟ କରୁଥିବା କର୍ମଚାରୀଙ୍କ ପାଇଁ ଏହିଦିନ ସବୈତନିକ ଛୁଟି ଦିବସ ଭାବେ ବିବେଚନା କରିବେ ।

ଏହି ଆଦେଶନାମା ବଳରେ ସଂପୃକ୍ତ ବିଧାନସଭା ନିର୍ବାଚନ ମଣ୍ଡଳୀର ଯେଉଁ ଭୋଟଦାର୍ତାମାନେ ବାହାରେ ଶ୍ରମିକ ଭାବେ କାର୍ଯ୍ୟରତ ଥିବେ ସେମାନେ ସଂପୃକ୍ତ ଦିବସକୁ ସବୈତନିକ ଛୁଟି ଦିବସ ରୂପେ ଉପଲବ୍ଧ କରିବା ପାଇଁ ହକ୍ ଦାର ହେବେ ବୋଲି ଏକ ପ୍ରେସ ବିଜ୍ଞପ୍ତିରେ କୁହାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ନବରଙ୍ଗପୁର, ନଭେମ୍ବର ୧୨(ଓଡ଼ିଶା ଡ଼ଟ୍ କମ୍) ନବରଙ୍ଗପୁର ଜିଲ୍ଲା ଉମରକୋଟ ବିଧାନସଭା ଉପ
ନିର୍ବାଚନ ପାଇଁ ଶନିବାର ପ୍ରାର୍ଥୀପତ୍ର ଦାଖଲର ଶେଷଦିନରେ ତିନି ଜଣ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଛନ୍ତି ।

ବିଜେପି ପ୍ରାର୍ଥୀ ଧର୍ମୁ ଗଣ୍ଡ, କଳିଙ୍ଗସେନାର ବୁଟା ଭତ୍ରା ଓ ସ୍ୱାଧୀନ ପ୍ରାର୍ଥୀ ଧନୁରାମ ଗଣ୍ଡ ଅତିରିକ୍ତ ଜିଲ୍ଲାପାଳତଥା ବିଧାନସଭା ରିଟର୍ଣ୍ଣିଂ ଅଫିସରଙ୍କ ନିକଟରେ ପ୍ରାର୍ଥୀପତ୍ର ଦାଖଲ କରିଛନ୍ତି ।

ବିଜୁ ଜନତା ଦଳର ପ୍ରାର୍ଥୀ ଭାବେ ପୂର୍ବତନ ବିଧାୟକ ଜଗବନ୍ଧୁ ମାଝିଙ୍କ ସହଯୋଗୀ ସୁବାସ ଗଣ୍ଡ ଏବଂ
କଂଗ୍ରେସ ଦଳର ପ୍ରାର୍ଥୀ ଜିତେନ୍ଦ୍ର ନାଥ ଗଣ୍ଡ ଗତକାଲି ପ୍ରାର୍ଥୀପତ୍ର ଦାଖଲ କରିଥିଲେ ।

ଦୁର୍ବୃତ୍ତଙ୍କ ଗୁଳିମାଡ଼ରେ ବିଧାୟକ ଜଗବନ୍ଧୁ ମାଝୀଙ୍କ ମୃତ୍ୟୁ ପରେ ଏହି ଆସନ ଖାଲି ପଡ଼ିଥିଲା । ଆସନ୍ତା ୩୦ ତାରିଖରେ ଏହି ଆସନ ପାଇଁ ଭୋଟ୍ ଗ୍ରହଣ ହେବ ।

ଓଡ଼ିଶା ଡ଼ଟ୍ କମ୍