ଭିଜିଲାନ୍ସ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ଅଗଷ୍ଟ ୨୩ (ଓଡ଼ିଶା ଡ଼ଟ୍ କମ୍)-ପଶ୍ଚିମ ଓଡିଶାରେ ସାର ବ୍ୟାପକ କଳାବଜାରୀ ନଜରକୁ ଆସିବାପରେ ଭିଜିଲାନ୍ସ ୪ ଜଣ ବିଶିଷ୍ଟ ବ୍ୟବସାୟୀଙ୍କୁ ଗିରଫ କରି କୋର୍ଟ ଚାଲାଣ କରିଛି । ସେମାନଙ୍କ ଜାମିନ ନାମଂଜୁର ହେବାରୁ ୧୪ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇଦିଆ ଯାଇଛି ।

ରାଜ୍ୟରେ ସାର ଅଭାବ ଲାଗି ରହିଥିବା ବେଳେ ସାର କଳାବଜାରୀକୁ ନେଇ ମୁହାଁମୁହିଁ ସ୍ଥତିରେ କେନ୍ଦ୍ର ଓ ରାଜ୍ୟ । ସେଥିପାଇଁ ଓଡିଶା ଦୁର୍ନୀତି ନିବାରଣ ସଂସ୍ଥା ପକ୍ଷରୁ ଆରମ୍ଭ ଖୋଳତାଡକୁ ଜୋରଦାର କରାଯାଇଛି ।

ଭିଜିଲାନ୍ସର ୨୫ଟି ଟିମ୍ ଅଦ୍ୟାବିଧି ୪୦ରୁ ଉର୍ଦ୍ଧ ସ୍ଥାନରେ ଚଢାଉକରି ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃୟାରୀ ୬(ଓଡ଼ିଶା ଡ଼ଟ୍ କମ୍) ରୁଙ୍ଗଟା ମାଇନ୍ସର ବିଭିନ୍ନ ବେଆଇନ କାରବାର ନେଇ ଭିଜିଲାନ୍ସ ତଦନ୍ତ ଚାଲିଥିବା ବେଳେ ସୋମବାର ଏହାର କର୍ପୋରେଟ ଅଫିସ ଉପରେ ଆୟକର ବିଭାଗପକ୍ଷରୁ ଚଢ଼ଉ କରାଯାଇଛି ।

ଜାମ୍ସେପୁର ଆୟକର ବିଭାଗ ପକ୍ଷରୁ ଚଢ଼ାଉ ବେଳେ ସେଠାରୁ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଓ ସିଡ଼ି ଜବତ କରାଯାଇଛି । ଦେଶର ବିଭିନ୍ନ ସ୍ଥାନରେ ରୁଙ୍ଗଟାର ଅଫିସ ଉପରେ ଏକା ସଙ୍ଗରେ ଚଢ଼ାଉ କରାଯାଇଛି ।

କମ୍ପାନୀ ସିଲିଯୋଡା ଓ କାଲିମୋଡା ଲୁହାପଥର ଓ ମାଙ୍ଗାନିଜ୍ ଖଣିରୁ ବେଆଇନ ଭାବେ ଖନନ କରି ମାଙ୍ଗାନିଜ ବିକ୍ରି କରିଥିବା ପୂର୍ବରୁ ଭିଜିଲାନ୍ସ ପାଖରେ ପ୍ରମାଣ ରହିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଜାନୁୟାରୀ ୬(ଓଡ଼ିଶା ଡ଼ଟ୍ କମ୍) ଲାଂଚ ନେବାବେଳେ ଭିଜିଲାନ୍ସ ହାତରେ ଧରାପଡ଼ିବା ପରେ ନିମାପଡ଼ା ଥାନା ଅଧିକାରୀ ଫେରାର୍ ହୋଇଯାଇଥିବା ପୋଲିସ କହିଛି ।

ଜଣେ ବ୍ୟକ୍ତିଙ୍କ ଠାରୁ ପାଂଚ ହଜାର ଟଙ୍କା ଲାଂଚ ନେବାବେଳେ ଶୁକ୍ରବାର ଥାନା ଅଧିକାରୀ ବିମଳ ନାୟକଙ୍କୁ ଭୁବନେଶ୍ୱର ଭିଜିଲାନ୍ସର ଏକ ଦଳ ଗିରଫ କରିଥିଲା ।

ତେବେ ଏହି ଖବର ପ୍ରଚାରିତ ହେବା ପରେ ସ୍ଥାନୀୟ ଅଂଚଳର ଲୋକମାନେ ଥାନାରେ ପହଂଚି ଭିଜିଲାନ୍ସ ଅଧିକାରୀଙ୍କୁ ଠେଲାପେଲା କରିବା ସହ ନାୟକଙ୍କୁ ଛଡ଼ାଇ ନେଇଥିବା ଅଭିଯୋଗ ହୋଇଛି ।

ପରେ ଅଧିକାରୀମାନେ ନାୟକଙ୍କ ଘର ଉପରେ ଚଢାଉ କରି ଟଙ୍କା ଓ ସୁନା ଗହଣା ଜବତ କରିଥିଲେ । ଲୋକମାନେ ସେଠାରେ ମଧ୍ୟ ପହଂଚି ଜବତ ଟଙ୍କା ଓ ସୁନା ଲୁଟି ନେଇଥିବା ଜଣାପଡ଼ିଛି ।

ବର୍ତମାନ ସୁଦ୍ଧା ସଂପୃକ୍ତ ଥାନା ଅଧିକାରୀ ଫେରାର୍ ଥିବାବେଳେ ପୁରୀ ଆରକ୍ଷୀ ଅଧିକ୍ଷକ ଥାନାରେ ପହଂଚି ପରିସ୍ଥିତି ଅନୁଧ୍ୟାନ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

କଟକ, ଡ଼ିସେମ୍ବର ୧୭(ଓଡ଼ିଶା ଡ଼ଟ୍ କମ୍) ଆୟବର୍ହିଭୂତ ସଂପତି ଠୁଳ ଅଭିଯୋଗରେ ଶନିବାର ସ୍ଥାନୀୟ ଏକ ଅଦାଲତ ଜଣେ ଅବସରପ୍ରାପ୍ତ ଆଇପିଏସ୍ ଅଧିକାରୀଙ୍କୁ ତିନି ବର୍ଷ ଜେଲ ଦଣ୍ଡାଦେଶ କରିଛନ୍ତି ।

ହୋମଗାର୍ଡ଼ ଏବଂ ଅଗ୍ନିଶମ ବିଭାଗରେ କାର୍ଯ୍ୟକରୁଥିବା ବୈଦ୍ୟନାଥ ଜେନାଙ୍କୁ କଟକ ସ୍ୱତନ୍ତ୍ର ଭିଜିଲାନ୍ସ ଅଦାଲତ ବିଚାରପତି ଏବିଏସ୍ ନାଇଡ଼ୁ ଜେନାଙ୍କୁ ଦୋଷୀ ସାବ୍ୟସ୍ତ କରି ଏହି ଦଣ୍ଡାଦେଶ ସହ ଦୁଇ ଲକ୍ଷ ଟଙ୍କା ଜରିମାନା ଆଦେଶ କରିଛନ୍ତି ।

ଜରିମାନା ଅନାଦେୟ ଆଉ ଦୁଇ ମାସ ଦଣ୍ଡ ଭୋଗିବାକୁ ପଡ଼ିବ ବୋଲି ଅଦାଲତ ଦର୍ଶାଇଛନ୍ତି ।

୧୯୯୦ରେ ଜେନାଙ୍କ ବିରୁଦ୍ଧରେ ଆୟ ବର୍ହିଭୂତ ସଂପତି ଠୁଳ ଅଭିଯୋଗ ହୋଇଥିଲା ଏବଂ ପରେ ସେହିବର୍ଷ ଭିଜିଲାନ୍ସ ପକ୍ଷରୁ ତାଙ୍କ ବାସଭବନ ଉପରେ ଚଢାଉ କରାଯାଇଥିଲା ।

ଚଢାଉ ସମୟରେ ଅଧିକାରୀମାନେ ତାଙ୍କ ଠାରୁ ୩ଲକ୍ଷ ୭୮ ହଜାର ଟଙ୍କାର ସଂପତି ଜବତ କରିଥିଲେ । ସେଥିରୁ ୨ଲକ୍ଷ ୬୨ ହଜାର ଟଙ୍କାର ଆୟବର୍ହିଭୂତ ସଂପତି ଥିବା ଭିଜିଲାନ୍ସ ଜାଣିବାକୁ ପାଇଥିଲା ।

ଓଡ଼ିଶା ପୋଲିସ ସେବାର ଅଧିକାରୀ ଜେନା ୧୯୯୫ରେ ଭାରତୀୟ ପୋଲିସ ସେବାକୁ ପଦୋନ୍ନତି
ପାଇ ୨୦୦୦ରେ ଅବସର ଗ୍ରହଣ କରିଥିଲେ । ତେବେ ଅଦାଲତ ଆଜି ତାଙ୍କୁ ଜାମିନ ପ୍ରଦାନ କରିଛନ୍ତି ।

ଓଡ଼ିଶା ଡ଼ଟ୍ କମ୍

ଭୁବନେଶ୍ୱର, ନଭେମ୍ବର ୧୮(ଓଡ଼ିଶା ଡ଼ଟ୍ କମ୍) ଭିଜିଲାନ୍ସ ଚଢାଉ ଭୟ ଦେଖାଇ ଲାଞ୍ଚ ନେବା ବେଳେ ଧରାପଡ଼ିଥିବା ଜଣେ ବିଜେଡ଼ି ନେତାଙ୍କୁ ଶୁକ୍ରବାର ଦଳରୁ ବହିସ୍କାର କରାଯାଇଛି ।

ଜଗତସିଂହପୁର ଜିଲ୍ଲା ତିର୍ତୋଲ ବ୍ଲକ ବିଜେଡ଼ି ସଭାପତି ତଥା କଟକ କେନ୍ଦ୍ର ସମବାୟ ବ୍ୟାଙ୍କର ଅନ୍ୟତମ ନିର୍ଦ୍ଦେଶକ ଅଶ୍ୱିନୀ ଦାସଙ୍କୁ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବହିସ୍କାର କରିଛନ୍ତି ।

କଟକ ସ୍ଥିତ ସେସୁ କାର୍ଯ୍ୟାଳୟର ଯନ୍ତ୍ରୀ ପ୍ରଶାନ୍ତ କୁମାର ପଟ୍ଟନାୟକଙ୍କୁ ଭିଜିଲାନ୍ସ ଚଢାଉ ଭୟ ଦେଖାଇ ତାଙ୍କ ଠାରୁ ଲାଞ୍ଚ ନେବା ସମୟରେ ଗୁରୁବାର ଭିଜିଲାନ୍ସ ଅଧିକାରୀମାନେ ତାଙ୍କୁ ଧରିଥିଲେ ।

ସୂଚନାଯୋଗ୍ୟ ଯେ, ଅଶ୍ୱିନୀ ଗତ ୧୪ ତାରିଖରେ ପ୍ରଶାନ୍ତଙ୍କୁ ଫୋନ୍ କରି ତାଙ୍କ ଘରେ ଭିଜିଲାନ୍ସ ଚଢାଉ କରାଯିବ ଏବଂ ଏସଂକ୍ରାନ୍ତିୟ ଫାଇଲ ମୁଖ୍ୟମନ୍ତ୍ରୀଙ୍କ ପାଖରେ ଅଛି ବୋଲି କହିଥିଲେ । ଯଦି ଟଙ୍କା ଦିଅନ୍ତି ତେବେ ତାହା ବନ୍ଦ ହୋଇଯିବ ବୋଲି ସେ କହିଥିବା ସଂପୃକ୍ତ ଯନ୍ତ୍ରୀ ଅଭିଯୋଗ କରିଛନ୍ତି ।

ଭିଜିଲାନ୍ସ ଚଢାଉ ଧମକରେ ଡ଼ରିଯାଇ ପ୍ରଶାନ୍ତ ସେହିଦିନ ୫୦ ହଜାର ଟଙ୍କା ତାଙ୍କୁ ଦେଇଥିଲେ । କିନ୍ତୁ ଅତିକମ୍ ରେ ତିନି ଲକ୍ଷ ଟଙ୍କା ନେଲେ କୌଣସି କାମ ହେବ ନାହିଁ ବୋଲି ଅଶ୍ୱିନୀ କହିଥିଲେ । ପରେ ସନ୍ଦେହ ହେବାରୁ ପ୍ରଶାନ୍ତ କଟକ ଭିଜିଲାନ୍ସ କାର୍ଯ୍ୟାଳୟକୁ ଏସଂପର୍କରେ ଜଣାଇଥିଲେ ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ନଭେମ୍ବର ୪(ଓଡ଼ିଶା ଡ଼ଟ୍ କମ୍) ସରକାରୀ ଅର୍ଥ ହେରଫେର ଅଭିଯୋଗରେ ଭିଜିଲାନ୍ସ ରାଜ୍ୟ ଶିକ୍ଷା ଗବେଷଣା ଓ ତାଲିମ ପରିଷଦ(ଏସ୍ସିଇଆର୍ଟି)ର ପୂର୍ବତନ ନିର୍ଦ୍ଦେଶକ ସେବକ ତ୍ରିପାଠୀଙ୍କୁ ଗିରଫ କରିଥିବା ଜଣେ ଅଧିକାରୀ ଶୁକ୍ରବାର କହିଛନ୍ତି ।

ତାଙ୍କୁ ଶୁକ୍ରବାର ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯିବା ପରେ ଜାମିନ୍ ନାମଞ୍ଜୁର ହୋଇଯିବାରୁ ୧୧ ତାରିଖ ପର୍ଯ୍ୟନ୍ତ ବିଚାର ବିଭାଗ ହାଜତକୁ ପଠାଇଦିଆଯାଇଛି ।

ତ୍ରିପାଠୀ ସରକାରୀ ଅର୍ଥ ହେରଫେର କରିଥିବା ଅଭିଯୋଗ ହୋଇଥିଲା । ଏନେଇ ମାର୍ଚ୍ଚ ମାସରେ ଏକ କମିଟି ଘଟଣାର ତଦନ୍ତ କରି ସେବକଙ୍କ ଅର୍ଥ ଆତ୍ମସାତ ବିଷୟରେ ଭିଜିଲାନ୍ସକୁ ରିପୋର୍ଟ ଦେଇଥିଲା ।

ରିପୋର୍ଟକୁ ଆଧାର କରି ଅଗଷ୍ଟ ୧୫ ତାରିଖ ମଧ୍ୟରେ ଭିଜିଲାନ୍ସ କାରଣ ଦର୍ଶାଅ ନୋଟିସ୍ ଜାରି କରିଥିଲା । ତେବେ ସେବକଙ୍କ ଜବାବ୍ ରେ ଭିଜିଲାନ୍ସ ଅସନ୍ତୋଷ ପ୍ରକାଶ କରି ତାଙ୍କ ଘର ଉପରେ ଚଢଉ କରିଥିଲା ଏବଂ ସେ ୧୧ଲକ୍ଷ ଟଙ୍କା ଆତ୍ମସାତ କରିଥିବା ଜାଣିବାକୁ ପାଇଥିଲା ।

ଅର୍ଥ ଆତ୍ମସାତ ଅଭିଯୋଗ ହେବାପରେ ସେବକଙ୍କୁ ଉଚ୍ଚଶିକ୍ଷା ବିଭାଗକୁ ବଦଳି କରାଯାଇଥିଲା । ୨୦୦୬ରୁ ସେ ଏସ୍ସିଇଆର୍ଟିର ନିର୍ଦ୍ଦେଶକ ଦାୟିତ୍ୱରେ ଥିଲେ ।

ଓଡ଼ିଶା ଡ଼ଟ୍ କମ୍