ଭୁବନେଶ୍ଵର, ଜୁନ ୧ (ଓଡିଶା ଡଟ କମ) ରାଜ୍ୟରେ କେତେକ ବ୍ବ୍ୟବସାୟିକ ସଂସ୍ଥା ନିଜର କଳ କାରଖାନା ପାଇଁ ନଦୀ ଜଳ ବ୍ୟବହାର କରି ନିୟମିତ ଜଳ ଟିକସ ଦେଉନଥିବା ସୂଚନା ଅଧିକାର ଆଇନ ବଳରେ ହସ୍ତଗତ ହୋଇଥିବା ତଥ୍ୟ ରୁ ଜଣ ପଡିଛି ।
ଯାହା ଫଳରେ ରାଜ୍ୟର ବ୍ୟାପକ ରାଜସ୍ୱ ହାନୀ ହେଉଛି । ଏଭଳି ଏକ ମାମଲା ଏବେ ଜାତୀୟ ମାନବାଧିକାର କମିଶନଙ୍କ ନିକଟରେ ପହଂଚିଛି ।
କମିଶନ ଏହା ଉପରେ ଉଦବେଗ ପ୍ରକାଶ କରିବା ସହିତ ଏହି ପ୍ରସଙ୍ଗରେ ସରକାର କି ପଦକ୍ଷେପ ଗ୍ରହଣ କରିଛନ୍ତି, ତାହା ଚାରି ସପ୍ତାହ ମଧ୍ୟରେ ଜଣାଇବାକୁ ମୁଖ୍ୟ ଶାସନ ସଚିବ ଓ ଜଳ ସମ୍ପଦ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି ।
୨୦୧୦ରୁ ୨୦୧୭ ମଧ୍ୟରେ ୨୮୭ଟି କମ୍ପାନୀ ଜଳ ଟିକସ ଦେଇନଥିବା ବେଳେ ବିଭାଗୀୟ ଅଧିକାରୀମାନେ କୌଣସି କାର୍ଯ୍ୟାନୁଷ୍ଠାନ କରୁନଥିବା ଦର୍ଶାଇ ମାନବାଧିକାର କର୍ମୀ ଶ୍ରୀ ଅଖଣ୍ଡ ଏନଏଚଆରସିଙ୍କ ନିକଟରେ ପିଟିସନ୍ ଦାୟର କରିଥିଲେ ।
୨୦୧୭ ସୁଦ୍ଧା ଏହି କମ୍ପାନୀଗୁଡିକ ଉପରେ ୩୪୦୦ କୋଟି ଟଙ୍କାରୁ ଅଧିକ ବାକି ପଡିଛି ।
ସୁଧ ହିସାବ କଲେ ଏହା ପାଖାପାଖି ୫ ହଜାର କୋଟିକୁ ଛୁଇଁବ ।
“ଅଫିସର, ଇଂଜିନିୟର ଓ କମ୍ପାନୀ ଅଧିକାରୀଙ୍କ ଅସାଧୁ ମେଂଟ ଯୋଗୁଁ ଉଦ୍ଦେଶ୍ୟମୂଳକ ଭାବେ ଏହି ଅର୍ଥ ଆଦାୟ ହେଉନାହିଁ” ବୋଲି ସେ ଅଭିଯୋଗ କରିଛନ୍ତି ।
ସରକାରୀ ତଥ୍ୟ ଅନୁସାରେ ନାଲକୋ (ଅନୁଗୁଳ) ଉପରେ ୬୫୫ କୋଟି, ଜୟପୁର ସେବା ପେପର ମିଲ୍ ଉପରେ ୪୪୩ କୋଟି, ଚୌଦାରରେ ଥିବା ବାଲାରପୁର ଇଣ୍ଡଷ୍ଟ୍ରି ଉପରେ ୨୫୫ କୋଟି, ଦକ୍ଷିଣ ପୂର୍ବ ରେଳବାଇ,ଝରସୁଗୁଡା ଉପରେ ୨୧୧ କୋଟି, ନାଲକୋ ଦାମନଯୋଡି ଉପରେ ୧୪୭ କୋଟି, ବ୍ରଜରାଜନଗର ଓରିଏଂଟ୍ ପେପର ମିଲ ଉପରେ ୧୨୯ କୋଟି,
ଯୋଡା ଟାଟା ଷ୍ଟିଲ୍ ଉପରେ ୯୩ କୋଟି, ଶ୍ୟାମ ଡିଆରଆଇ ପ୍ରାଲି ଉପରେ ୬୨ କୋଟି, ଭୂଷଣ ଲିମିଟେଡ୍ ଉପରେ ୫୦ କୋଟି, ଆରତି ଷ୍ଟିଲ୍ ଉପରେ ୪୦ କୋଟି, ବେଲପାହାଡ ଟାଟା ରିଫ୍ରାକ୍ଟୋରିଜ୍ ଉପରେ ୩୯ କୋଟି, ଜିନ୍ଦଲ ଷ୍ଟିଲ୍ ଏଣ୍ଡ ପାୱାର ଉପରେ ୩୯ କୋଟି ଟଙ୍କା ବର୍ଷ ବର୍ଷ ଧରି ବାକି ପଡିଛି ।
କିଛି ମୁଖ୍ୟ କମ୍ପାନୀ ଉପରେ ବାକି ପଡିଥିବା ଟଙ୍କ।ର ବିବରଣୀ
କମ୍ପାନୀ ନାମ ବାକି ପଡିଥିବା ଜଳ ଟିକସ କୋଟି ଟଙ୍କାରେ (୩୧ ଡିସେମ୍ବର, ୨୦୧୭ ସୁଦ୍ଧା) କେବେ ଠାରୁ ବାକି ପଡିଛି
ହଜାର ହଜାର କୋଟି ଟଙ୍କା ବାକି ପଡିବା ଫଳରେ ଅନେକ ବିକାଶମୂଳକ କାର୍ଯ୍ୟ ହୋଇପାରୁନାହିଁ । ତେଣୁ ଏହା ମାନବାଧିକାରକୁ ଉଲଂଘନ କରୁଛି । ତେଣୁ ଏହି ପ୍ରସଙ୍ଗରେ ତୁରନ୍ତ କାର୍ଯାନୁଷ୍ଠାନ ପାଇଁ କମିଶନଙ୍କ ନିକଟରେ ଅଖଣ୍ଡ ନିବେଦନ କରିଥିଲେ ।
କମିଶନ ପିଟିସନର ଶୁଣାଣୀକରି ଜଳ ଟିକସ ଆଦାୟ ପାଇଁ କାହିଁକି ପଦକ୍ଷେପ ନିଆଯାଇନାହିଁ, ତାହା ଉପରେ ଜବାବ ରଖିବାକୁ ମୁଖ୍ୟ ଶାସନ ସଚିବ ଓ ଜଳ ସମ୍ପଦ ସଟିବଙ୍କୁ ନିର୍ଦ୍ଦେଶ ଦେଇଛନ୍ତି ।
ସେହିପରି ଏପରି ଏକ ଗୁରୁତ୍ୱପୂର୍ଣ ବିଷୟ ଉପରେ ରାଜ୍ୟ ମାନବାଧିକାର କମିଶନ କିଛି ନିର୍ଦ୍ଦେଶ ଦେଇଥିଲେ ତାହାର କପି ଜାତୀୟ କମିଶନଙ୍କ ପଠାଇବାକୁ ମଧ୍ୟ ଓଏଚଆରସି ସଚିବଙ୍କୁ କୁହାଯାଇଛି । ଦୁଇ ଅଧିକାରୀ ଠିକ୍ ସମୟରେ ରିପୋର୍ଟ ଦାଖ ନ କଲେ ସେମାନଙ୍କୁ ବ୍ୟକ୍ତିଗତ ହାଜିରା କରାଯିବ ବୋଲି କମିଶନଙ୍କ ନିର୍ଦ୍ଦେଶନାମାରେ କୁହାଯାଛି ।
