ରାଜ୍ୟସରକାର

ଓଡ଼ିଶା ଡ଼ଟ୍ କମ୍ : ଶାନ୍ତନୁ ବିଶ୍ୱାଳ

ବରଗଡ଼, ଅଗଷ୍ଟ ୨୨ (ଓଡ଼ିଶା ଡ଼ଟ୍ କମ୍) -ସମବାୟ ଭିତ୍ତିରେ ପ୍ରତିଷ୍ଠିତ ରାଜ୍ୟର ଅନ୍ୟତମ ସର୍ବ ପୁରାତନ ଚିନି କାରଖାନା ରୂପେ ପ୍ରତିଷ୍ଠିତ ବରଗଡ଼ ସମବାୟ ଚିନି କାରଖାନା ସଂପ୍ରତି ଘୋର ଆର୍ଥିକ ସଙ୍କଟ ମଧ୍ୟରେ ଗତି କରୁଥିବା ଜଣାପଡ଼ିଛି ।

ଏହି କାରଣରୁ କାରଖାନାକୁ ଆଖୁ ଯୋଗାଇଥିବା ଚାଷୀ ମାନଙ୍କ ମଧ୍ୟରୁ ଅନେକେ ଏ ପର୍ଯ୍ୟନ୍ତ ସେମାନଙ୍କ ପାଉଣା ପାଇ ନଥିବା ଜଣାପଡ଼ିଛି । ଏଣୁ ଆଗାମୀଦିନରେ କାରଖାନାର ଭବିଷ୍ୟତ ନେଇ ଉଭୟ ଆଖୁଚାଷୀ ଓ କର୍ମଚାରୀ ସନ୍ଦିହାନ ହୋଇ ପଡ଼ିଛନ୍ତି ।

ଏଭଳି ଆଶା ଓ ଆଶଙ୍କା ମଧ୍ୟରେ ଗତି କରୁଥିବା ବରଗଡ଼ ସମବାୟ ଚିନି କାରଖାନା ପରିସରରେ ପରିଚାଳନା ନିର୍ଦ୍ଦେଶକ ପ୍ରସନ୍ନ କୁମାର ମିଶ୍ରଙ୍କ ଅଧ୍ୟକ୍ଷତାରେ କର୍ମଚାରୀ, ଆଖୁଚାଷୀ ଓ ପରିଚାଳନା କର୍ତୃପକ୍ଷଙ୍କ ମିଲିତ ବୈଠକ ଅନୁଷ୍ଠିତ ହୋଇଥିଲା ।

ଏଥିରେ ପରିଚାଳନା ନିର୍ଦ୍ଦେଶକ ଦର୍ଶାଇଥିଲେ ଯେ ଚଳିତ ବର୍ଷ କାରଖାନା ଅନ୍ୟୁନ୍ୟ ଏକ ଲକ୍ଷ ଟନ ଆଖୁ ନ ପେଡ଼ିଲେ କାରଖାନା ତାର ଅତ୍ୟନ୍ତ ଜରୁରୀ ଖର୍ଚ୍ଚ ତୁଲାଇ ପାରିବ ନାହିଁ ।

ଏଣୁ ସେ ଉଭୟ ଚାଷୀ ଓ କର୍ମଚାରୀଙ୍କ ସହଯୋଗ କାମନା କରିଥିଲେ । ମାତ୍ର ବରଗଡ଼ ଜିଲ୍ଳା ଆଖୁ ଚାଷୀ ସଂଘ ପାଲଟା ଯୁକ୍ତି କରିଥିଲେ ଯେ ଆଖୁ ଚାଷୀ ମାନେ କାରଖାନାକୁ ଯୋଗାଇଥିବା ଆଖୁର ପ୍ରାପ୍ୟ ଏ ପର୍ଯ୍ୟନ୍ତ ପାଇ ପାରି ନାହାନ୍ତି ।ଏଭଳି ପରିସ୍ଥିତିରେ ଆଖୁ ଚାଷ ପାଇଁ ଚାଷୀଙ୍କ ଆଗ୍ରହ ପ୍ରକାଶ ପାଉ ନାହିଁ ।

ପୁନଶ୍ଚ ରାଜ୍ୟ ସରକାର କାରଖାନାକୁ ଆବଶ୍ୟକୀୟ ଆର୍ଥିକ ସହାୟତା ନଦେଲେ କାରଖାନା ଚାଲିବାର କୌଣସି ଗ୍ୟାରେଣ୍ଟି ନାହିଁ । ସେଭଳି ପରିସ୍ଥିତିରେ ଯେଉଁ ଚାଷୀମାନେ ଆଖୁ ଚାଷ କରିଥିବେ ସେମାନଙ୍କର ଭବିଷ୍ୟତ କଣ ହେବ?

ଏଣୁ ରାଜ୍ୟ ସରକାର କାରଖାନାକୁ ଆର୍ଥିକ ସହାୟତା ପ୍ରଦାନ କରିବା ସହ କାରଖାନା ଚାଲିବାର ଗ୍ୟାରେଣ୍ଟି ଦେଲେ ଆଖୁଚାଷୀ ସଂଘ ସହଯୋଗର ହାତ ବଢ଼ାଇବାକୁ ପ୍ରସ୍ତୁତ ଅଛି ବୋଲି ସଂଘର ସଭାପତି ମନୋରଞ୍ଜନ ସାହୁ ପ୍ରକାଶ କରିଥିଲେ ।

ସେହିଭଳି ୨୦୧୧-୧୨ ଆର୍ଥିକ ବର୍ଷରେ କାରଖାନାକୁ ଆଖୁ ଯୋଗାଇଥିବା ଚାଷୀଙ୍କୁ ସେମାନଙ୍କର ବକେୟା ପ୍ରାପ୍ୟ ତଥା ଟନ ପିଛା ୨୫ ଟଙ୍କା ଲେଖାଏଁ ପରିବହନ ସବସିଡ଼ି ନୂଆଁଖାଇ ପୂର୍ବରୁ ପ୍ରଦାନ ସହ ସଠିକ ସମୟରେ ଉନ୍ନତ ମାନର ଆଖୁ ବିହନ, ରାସାୟନିକ ସାର ,କୀଟନାଶକ ଔଷଧ ଇତ୍ୟାଦି ଯୋଗାଇ କାରଖାନା କର୍ତୁପକ୍ଷ ଚାଷୀଙ୍କ ଆସ୍ଥାଭାଜନ ହେବାକୁ ଆଖୁ ଚାଷୀ ସଂଘ ପରାମର୍ଶ ଦେଇଥିଲା ।

ସେହିପରି ସମବାୟ ଚିନି କାରଖାନା କର୍ମଚାରୀ ସଂଘର କର୍ମକର୍ତା ମାନେ ମଧ୍ୟ ଅତଁମନ୍ତ୍ରୀ ପ୍ରସନ୍ନ ଆଚାର୍ଯ୍ୟଙ୍କୁ ସାକ୍ଷାତ କରି କାରଖାନାର ଦୁରାବସ୍ଥା ସମ୍ପର୍କରେ ଆଲୋଚନା କରିଥିବାର ସୂଚନା ଦେଇଥିଲେ ।

ଆଖୁଚାଷୀ କର୍ମଚାରୀ ଓ ପରିଚାଳନା ପରିଷଦର ସମନ୍ୱୟ କମିଟିର ଏହି ମିଳିତ ବୈଠକରେ କାରଖାନା ପକ୍ଷରୁ ପରିଚାଳନା ନିର୍ଦ୍ଦେଶକ ପ୍ରସନ୍ନ କୁମାର ମିଶ୍ର, ଲୋକ ସମ୍ପର୍କ ଅଧିକାରୀ ବିଜୟ କୁମାର ମହାନ୍ତି, ଆଖୁ ଉନ୍ନୟନ ଇନଚାର୍ଯ୍ୟ ଇଞ୍ଜିନିୟ ଟି.ଡ଼ି ଲୁଇଓ, ଭଟଲି ଜୋନାଲ ଅଧିକାରୀ ଆଦିତ୍ୟ ନାରାୟଣ ଭୋଇ, ଆଖୁଚାଷୀ ସଂଘର ସଭାପତି ମନୋରଞ୍ଜନ ସାହୁ, ସମ୍ପାଦକ ସୌରୀ ଚରଣ ବାରିକ, ମାର୍କଣ୍ଢ ସା, ବିଷ୍ଣୁ ପାତ୍ର, ପ୍ରହଲ୍ଳାଦ ପ୍ରଧାନ, ବୁଦ୍ଧଦେବ ନାୟକ ପ୍ରମୁଖ ଅଂଶ ଗ୍ରହଣ କରିଥିଲେ ।

ବୈଠକର ଅନ୍ତିମ ନିର୍ଣ୍ଣୟ କ୍ରମେ ଚଳିତ ବର୍ଷ ବରଗଡ଼ ଜିଲ୍ଳାରେ ବ୍ୟାପକ ଆଖୁ ଚାଷ କରିବା ସହ ଅଂଚଳର ଗର୍ବ ଓ ଗୌରବ ବୋଲାଯାଉଥିବା ଏକମାତ୍ର କାର୍ଯ୍ୟକ୍ଷମ ସରକାରୀ କାରଖାନାକୁ ଲାଭଜନକ ସଂସ୍ଥାରେ ପରିଣତ କରାଯିବା ନିମନ୍ତେ ମିଳିତ ପ୍ରୟାସ କରାଯିବ ।ଏଥି ସକାଶେ ସମନ୍ୱୟ କମିଟିର ଏକ ପ୍ରତିନିଧି ମଣ୍ଡଳ ରାଜ୍ୟସରକାରଙ୍କ ବିଭିନ୍ନ ବିଭାଗ ସହ ସମ୍ପର୍କ କରିବାକୁ ନିଷ୍ପତି ନିଆଯାଇଥିବା ଜଣାପଡ଼ିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଅଗଷ୍ଟ ୬(ଓଡ଼ିଶା ଡ଼ଟ୍ କମ୍) ଭୁବନେଶ୍ୱର ଉପକଣ୍ଠସ୍ଥ ସିଜୁଆ ଠାରେ ନିର୍ମାଣାଧୀନ ଅଖିଳ ଭାରତୀୟ ଆର୍ୟୁବିଜ୍ଞାନ ପ୍ରତିଷ୍ଠାନ (ଏମ୍ସ)ରେ ଛାତ୍ରଛାତ୍ରୀଙ୍କ ନାମ ଲେଖା ପ୍ରକ୍ରିୟା ଆରମ୍ଭ ହୋଇଛି ।

ଆସନ୍ତା ସେପ୍ଟେମ୍ବର ମାସ ଶେଷ ସୁଦ୍ଧା ଏଠାରେ ଡାକ୍ତରୀ ପାଠ୍ୟ କ୍ରମ ଆରମ୍ଭ ହେଉଛି । ଏନେଇ ବର୍ତ୍ତମାନ ଛାତ୍ରଛାତ୍ରୀମାନଙ୍କ ନାମଲେଖା ଆରମ୍ଭ ହୋଇଛି ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଦାମୋଦର ରାଉତ ସୋମବାର ଏକ ସମୀକ୍ଷା ବୈଠକରେ କହିଛନ୍ତି ।

ଚଳିତ ବର୍ଷ ୫୦ ଜଣ ଛାତ୍ରଛାତ୍ରୀ ନାମ ଲେଖାଇବେ । ଆଜି ସୁଦ୍ଧା ୮ ଜଣ ଛାତ୍ରଛାତ୍ରୀ ନାମ ଲେଖାଇ ସାରିଛନ୍ତି । ଏହି ପ୍ରତିଷ୍ଠାନ ପାଇଁ ପୂର୍ବରୁ ନିର୍ଦ୍ଦେଶକ ନିଯୁକ୍ତି ପାଇ କାର୍ଯ୍ୟରେ ଯୋଗଦେଇ ସାରିଛନ୍ତି । ବର୍ତମାନ ୨୪ ଜଣ ଫାକଲ୍ଟିଙ୍କୁ ନିଯୁକ୍ତି ଦିଆଯାଇଛି । ସେମାନଙ୍କ ମଧ୍ୟରୁ ୭ ଜଣ କାର୍ଯ୍ୟରେ ଯୋଗ ଦେଇଥିବା ବେଳେ ଅନ୍ୟମାନେ ଖୁବ୍ଶୀଘ୍ର ଯୋଗ ଦେବେ ବୋଲି ସେ କହିଛନ୍ତି ।

କର୍ମଚାରୀ ମାନଙ୍କ ବାସଗୃହ ଏବଂ ଛାତ୍ରଛାତ୍ରୀ ମାନଙ୍କ ପାଇଁ ହଷ୍ଟେଲ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇ ପାରି ନଥିବାରୁ କେନ୍ଦ୍ରସରକାରଙ୍କ ଅନୁରୋଧକ୍ରମେ ରାଜ୍ୟସରକାର ଏମାନଙ୍କ ପାଇଁ ବାସଗୃହ ଏବଂ ଛାତ୍ରଛାତ୍ରୀଙ୍କ ପାଇଁ ହଷ୍ଟେଲର ବ୍ୟବସ୍ଥା କରାଇଛନ୍ତି ।

ସ୍ୱାସ୍ଥ୍ୟ ବିଭାଗ ଏକ ସମସ୍ୟାବହୁଳ ବିଭାଗ । ଜନସାଧାରଣଙ୍କ ସିଧାସଳଖ ଭାବେ ଏହି ବିଭାଗ ସଂଯୁକ୍ତ । ଏଣୁ ସାଧାରଣ ଲୋକଙ୍କ ସମସ୍ୟା ପ୍ରତି ସଚେତନ ରହି ବିଭାଗରେ ସମସ୍ତ କାର୍ଯ୍ୟକୁ ତ୍ୱରାନ୍ୱିତ କରାଯିବା ଆବଶ୍ୟକ । ଅଯଥାରେ ବିଳମ୍ବ କରାଯିବା ଆଦୌ ଉଚିତ ନୁହେଁ । ତେଣୁ ପ୍ରତ୍ୟେକ କର୍ମଚାରୀ ପରସ୍ପର ବୁଝାମଣା ଏବଂ ନିଜନିଜର ।ଦାୟୀତ୍ୱକୁ ତୁଲାଇ ବିଭାଗର କ୍ଷତା ବୃଦ୍ଧି କରିବା ଉଚିତ ହେବ ବୋଲି ସେ ପରାମର୍ଶ ଦେଇଛନ୍ତି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମାର୍ଚ୍ଚ ୧୯(ଓଡ଼ିଶା ଡ଼ଟ୍ କମ୍) ଅପହୃତ ଦୁଇ ବିଦେଶୀ ପର୍ଯ୍ୟଟକଙ୍କ ମୁକ୍ତି ନେଇ୧୩ ଟି ଦାବି ସମ୍ବଳିତ ପତ୍ର ମାଓବାଦୀମାନେ ସୋମବାର ବିଭିନ୍ନ ଗଣମାଧ୍ୟମକୁ ପଠାଇଥିବା ବେଳେ ଏହା ଓଡ଼ିଶା ଡ଼ଟ୍ କମ୍ ର ମଧ୍ୟ ହସ୍ତଗତ ହୋଇଛି ।

ଏଥିରେ ଉଲ୍ଲେଖ କରାଯାଇଥିବା ଦାବି ଗୁଡ଼ିକ ହେଲା ।

୧. ଆଦିବାସୀ ଏକ ପର୍ଯ୍ୟଟନୀୟ ବସ୍ତୁ ନୁହେଁ ଓ ଏ ଅଞ୍ଚଳ ଏକ ପର୍ଯ୍ୟଟକଙ୍କ ପରିଦର୍ଶନୀୟ ଅଞ୍ଚଳ ନୁହେଁ । ଏହା ସ୍ପଷ୍ଟ ଭାବେ ଘୋଷଣା କରାଯାଉ ଓ ଏହାର ଖିଲାପକାରୀଙ୍କୁ ଗିରଫ କରାଯାଉ ।

୨. ଅପରେଶନ ଗ୍ରୀନହଣ୍ଟ ଦମନ ବନ୍ଦ କରାଯାଉ । ଆଗରୁ ଥିବା ଥାନା ବ୍ୟତୀତ ଆଭ୍ୟନ୍ତରୀଣ ଅଞ୍ଚଳରୁ ସବୁ ପୋଲିସ କ୍ୟାମ୍ପ ପ୍ରତ୍ୟାହାର କରାଯାଉ । ଜନଗଣଙ୍କ ସମସ୍ୟା ନେଇ ବିପ୍ଲବୀଙ୍କ ସହ ଆଲୋଚନାର ଉପଯୁକ୍ତ ପରିବେଶ ସୃଷ୍ଟି କରାଯାଉ ।

୩. ଓଡ଼ିଶାରେ ମାଓବାଦୀ ପାର୍ଟି ଓ ବିଭିନ୍ନ ଗଣ ସଂଗଠନ ଉପରେ ହୋଇଥିବା ନିଷେଧାଦେଶ ପ୍ରତ୍ୟାହାର କରାଯାଉ ।

୪. ଲଳିତ ହେୁରୀ, ଜୁନେଶ ବଡ଼ରଇତ, ପ୍ରଦୀପ ମାଝିଙ୍କ ସମେତ ବିଭିନ୍ନ ଲୋକଙ୍କୁ କରାଯାଇଥିବା ମିଛ ଗୁଳିବିନିମୟ ଓ ହାଜତ ନିର୍ଯାତନା ଜନିତ ହତ୍ୟା ଏବଂ ଆରତି ମାଝି ଗଣ ଧର୍ଷଣରେ ସଂପୃକ୍ତ ଜିଲ୍ଲା ଏସ୍ପି ଓ ପୋଲିସ କର୍ମଚାରୀଙ୍କୁ ହତ୍ୟା ବା ଧର୍ଷଣ ମାମଲାରେ ଜିରଫ କରାଯାଉ । ଆରତି ମାଝିଙ୍କୁ ନିର୍ଦୋଶରେ ଖଲାସ କରାଯାଉ ।

୫. ଆଶୁତୋଷ, କମଳାକାନ୍ତ ସେଠୀ, ସୁଜାତା, କିଶୋର ଜେନା, ପ୍ରତାପ, ମଞ୍ଜୁଲତା ସମେତ ନୟାଗଡ଼ ଅସ୍ତ୍ରାଗାର ଆକ୍ରମଣ ମାମଲାରେ ଗିରଫ ସବୁ ଲୋକଙ୍କୁ ଖଲାସ କରାଯାଉ ।

୬. କୋର୍ଟ ଦ୍ୱାରା ଖଲାସ ବ୍ୟକ୍ତିଙ୍କୁ ପୁଣି ନୂଆ ଅଭିଯୋଗ ଦ୍ୱାରା ଗିରଫ ବା ଜେଲ ମଧ୍ୟରେ ଅଟକ କରିବା ବନ୍ଦ କରାଯାଉ । ଏହି ପରିପ୍ରେକ୍ଷୀରେ ଶୁଭଶ୍ରୀ ଦାସ ଓ ରାୟଗଡ଼ାର ଲଳିତ ସମେତ ଅନ୍ୟ ସମସ୍ତ ପୁନଃ ଗିରଫ ବା ଅଟକ ବ୍ୟକ୍ତିଙ୍କୁ ବିନା ସର୍ତରେ ଖଲାସ କରାଯାଉ ।

୭. ଶତ୍ରୁଘ୍ନ ବିଶ୍ୱାଳ, ଉତମ, ଶେଖର, ସୁଦର୍ଶନ ମଣ୍ଡଳ, ରମେଶ ନାୟକ, ଲତା, ବିଜାଲ୍, ରତ୍ନା ସହରାୟଗଡ଼ା, ଗଜପତି, କନ୍ଧମାଳ, ଗଞ୍ଜାମ, ନୟାଗଡ଼, ସମ୍ବଲପୁର, ମୟୁରଭଞ୍ଜ ଓ କେନ୍ଦୁଝର ସମେତ ସମସ୍ତ ଜିଲ୍ଲାରେ ମାଓବାଦୀ ବନ୍ଦୀ ନିରିହ ଲୋକଙ୍କୁ ଖଲାସ କରାଯାଉ ।

୮. ଜୋଡ଼ିଆ, କଣ୍ଡା ଦୋରା ଅବା କୁଇ, ଗଉଡ଼ କୁଇ, କୁମ୍ଭାର କୁଇ, ସଅର, ଓଡ଼ିଆ କନ୍ଧ, ଖଇରା ସମେତ ବିଭିନ୍ନ ଆଦିବାସୀଙ୍କ ଆଦିବାସୀ ମାନ୍ୟତା କଟାନଯାଉ ଓ ମାନ୍ୟତା ମିଳିଥିବା ଲୋକଙ୍କୁ ମାନ୍ୟତା ମିଳୁ ।

୯. ଓଡ଼ିଶାର ପ୍ରତି ଅଞ୍ଚଳରେ ଗାଁକୁ ପିଇବା ପାଣି, ଜମିକୁ ଜଳ, ପ୍ରତି ପଞ୍ଚାୟତରେ ମାଗଣା ଡ଼ାକ୍ତରଖାନା, ହାଇସ୍କୁଲ ଯାଏଁ ମାଗଣା ଶିକ୍ଷା ବ୍ୟବସ୍ଥା ରହୁ ।

୧୦. ପୋସ୍କୋ, ବେଦାନ୍ତ, କଳିଙ୍ଗନଗର ସମେତ ସମସ୍ତ ବିସ୍ଥାପନ ବିରୋଧୀ ଆନ୍ଦୋଳନ ଉପରେ ପୋଲିସ ଦମନ ବନ୍ଦ ହେଉ । ଅଭୟ ସାହୁ, ନାରାୟଣ ରେଡ୍ଡି ସମେତ ସବୁ ବିସ୍ଥାପନ ବିରୋଧୀ ନେତା ଓ କର୍ମୀଙ୍କୁ ଖଲାସ କରାଯାଉ ।

୧୧. ଗଣନାଥ ପାତ୍ର, ଦାରିଙ୍ଗବାଡ଼ି ପୂର୍ବତନ ଚେୟାରମେନ୍ ଓ ସୋନପୁର ସରପଞ୍ଚଙ୍କ ସ୍ୱାମୀ, ନାଚିକା ଲିଙ୍ଗାର ଭାଇ ଓ ଦୁଇ ସ୍କୁଲ ଛାତ୍ରଙ୍କ ସମେତ ପୋଲିସ ପ୍ରତିଶୋଧ ପରାୟଣ ହୋଇ ଗିରଫ କରିଥିବା ବିଭିନ୍ନ ଗଣଆନ୍ଦୋଳନର ନେତା, ମନବିରୋଧୀ ନେତାଙ୍କୁ ଖଲାସ କରାଯାଉ ।

ନେତିଂପର, ଗୁଡ଼ାରି ଓ ନାରାୟଣପାଟଣା ଜମି ଆନ୍ଦୋଳନ ବିରୁଦ୍ଧରେ ଲଗାତାର ଚାଲିଥିବା କେଶ୍ ସବୁ ରଦ୍ଧ କରାଯାଉ । ଯାହା ନାମରେ ଅନୁରୂପ କେଶ୍ ଦିଆଯାଇଛି ତାହା ପ୍ରତ୍ୟାହାର ହେଉ ଏବଂ ସେମାନଙ୍କୁ ଖଲାସ କରାଯାଉ ।

୧୨. ଚାପ ଓ ଧମକ ଦ୍ୱାରାକୋର୍ଟରେ ମିଛ ବୟାନ ଦେଇ ଆତ୍ମସମର୍ପଣର ଓ ବିପ୍ଲବୀ ଆନ୍ଦୋଳନ ବିରୁଦ୍ଧରେ କଭର୍ଟ ତିଆରିର ସବୁ ମିଛ ସରକାରୀ ନାଟକର ନିରପେକ୍ଷ ତଦନ୍ତ ହେଉ । ଆତ୍ମସମର୍ପଣ ପରେ ପୋଲିସ ଦ୍ୱାରା ଆହାତ ଭାଙ୍ଗିଥିବା ସଙ୍ଗୀତା ପ୍ରଧାନଙ୍କୁ ବର୍ଷବର୍ଷ ଧରି କେନ୍ଦୁଝର ପୋଲିସ ନଜରବନ୍ଦୀ କରି ରଖିବା ଘଟଣାର ସ୍ୱାଧୀନ ସଂସ୍ଥା ଦ୍ୱାରା ତଦନ୍ତ କରି ଉପଯୁକ୍ତ ପଦକ୍ଷେପ ନିଆଯାଉ ।

୧୩. ମାଲକାନଗିରି ଜିଲ୍ଲାପାଳ ବନ୍ଦୀ ବେଳେ ସରକାର ମାନିଥିବା ସବୁ ଦାବି ପୂରଣ କରୁ । ସିପିଆଇ ମାଓବାଦୀ ଓଡ଼ିଶା ରାଜ୍ୟ ସାଂଗଠନିକ କମିଟି ସଚିବ ସୁନୀଲଙ୍କ ଦସ୍ତଖତରେ ଏହି ଦାବିପତ୍ର ଆସିଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ମାର୍ଚ୍ଚ ୧୯(ଓଡ଼ିଶା ଡ଼ଟ୍ କମ୍) ଗତ ପାଞ୍ଚଦିନ ତଳେ ମାଓବାଦୀଙ୍କ ଦ୍ୱାରା ଅପହୃତ ଦୁଇ ଇଟାଲୀୟ ପର୍ଯ୍ୟଟକଙ୍କ ମୁକ୍ତି ପାଇଁ ସରକାରୀ ସ୍ତରରେ ଉଦ୍ୟମ ଜାରି ରହିଥିବା ଜଣେ ଅଧିକାରୀ ସୋମବାର କହିଛନ୍ତି ।

ଗତ ୧୪ ତାରିଖରେ ଅପହୃତ ହୋଇଥିବା ୫୪ ବର୍ଷୀୟ ବାସୁସ୍କୋ ପାଓଲୋ ଓ ୬୧ ବର୍ଷ ବୟସ୍କ କ୍ଲାଉଡ଼ିଓ କୋଲାଞ୍ଜେଲୋଙ୍କ ନିରାପଦ ମୁକ୍ତି ପାଇଁ ସରକାର ସମସ୍ତ ପ୍ରକାର ଆବଶ୍ୟକୀୟ ପଦକ୍ଷେପ ଗ୍ରହଣ କରୁଛନ୍ତି ବୋଲି ଗୃହ ସଚିବ ଉପେନ୍ଦ୍ର ନାଥ ବେହେରା କହିଛନ୍ତି ।

ଶନିବାର ରାତିରେ ଏହି ଅପହରଣ ଘଟଣା ଲୋକଲୋଚନକୁ ଆସିଥିଲା ।

ପରିସ୍ଥିତିର ମୁକାବିଲା ପାଇଁ ବରିଷ୍ଠ ପୋଲିସ ଅଧିକାରୀ ଏବଂ ପ୍ରଶାସନିକ ଅଧିକାରୀମାନେ ରବିବାର ଓ ସୋମବାର ଦୁଇଦିନ ଧରି ବିଭିନ୍ନ ପର୍ଯ୍ୟାୟରେ ଆଲୋଚନା ଚଳାଇଛନ୍ତି ।

ବର୍ତମାନ ପର୍ଯ୍ୟନ୍ତ ଆମେ ମାଓବାଦୀଙ୍କ ଠାରୁ କୌଣସି ପ୍ରକାର ତଥ୍ୟ ପାଇ ନାହୁଁ, ବେହେରା କହିଛନ୍ତି ।

ଅପହୃତଙ୍କୁ ଠାବ କରିବା ପାଇଁ କୌଣସି ପ୍ରକାର ସର୍ଚ୍ଚ ଅପରେଶନ ଚଳାଇଛନ୍ତି ନା କୁମ୍ବିଂ ଅପରେଶନ ବନ୍ଦ କରିବା ପାଇଁ ଯୋଜନା ଅଛି ବୋଲି ପଚାରିବାରୁ , “ଏ ବିଷୟରେ କିଛି କହିବାକୁ ମୁଁ ଅସମର୍ଥ” ସେ କହିଛନ୍ତି ।

ମାଓବାଦୀଙ୍କ ସହ କଥା ହେବାକୁ ସରକାର ସବୁବେଳେ ପ୍ରସ୍ତୁତ ଅଛନ୍ତି । ଅପହରଣକାରୀମାନେ ସରକାରଙ୍କ ସହ ଯୋଗାଯୋଗ କରନ୍ତୁ ବୋଲି ରବିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାକ ନିବେଦନ କରିଥିଲେ ।

ଦୁଇ ଇଟାଲୀୟ ପର୍ଯ୍ୟଟକଙ୍କୁ ଶନିବାର କନ୍ଧମାଳ ଓ ଗଞ୍ଜାମ ଜିଲ୍ଲା ସୀମାରୁ ଅପହରଣ କରାଯାଇଥିବା ସରକାରଙ୍କ ପକ୍ଷରୁ ପୂର୍ବରୁ କୁହାଯାଇଥିଲା ।

ତେବେ ଏହି ପର୍ଯ୍ୟଟକଙ୍କ ସହ ଯାଇଥିବା ଦୁଇ ଜଣ ପ୍ରତ୍ୟକ୍ଷଦର୍ଶୀଙ୍କ ବୟାନ ପରେ ଘଟଣା ସଂପର୍କରେ
ସମସ୍ତ ତଥ୍ୟ ଜଣାପଡ଼ିଥିଲା ।

ବାସୁସ୍କୋ ପାଓଲୋ ଓ କ୍ଲାଉଡ଼ିଓ କୋଲାଞ୍ଜେଲୋ ପୁରୀର ସନ୍ତୋଷ ମହାରଣା ଏବଂ କାର୍ତିକ ପରିଡ଼ାଙ୍କ ସହ ଗତ ୧୨ ତାରିଖରେ ଚାରିଦିନ ପାଇଁ କନ୍ଧମାଳ ଯାଇଥିଲେ ।

୧୪ ତାରିଖ ସକାଳେ ସେମାନେ ସମସ୍ତେ ନିକଟସ୍ଥ କ୍ଷୁଦ୍ର ନଦୀ କୂଳରେ ବସିଥିବା ବେଳେ ଛଅ ଜଣ ଲୋକ ବନ୍ଧୁକ ଧରି ସେଠାରେ ପହଞ୍ଚିଥିଲେ । ଏହି ଲୋକମାନେ ସେମାନଙ୍କ ହାତ ବାନ୍ଧି ଦେବା ସହ ଆଖିରେ କପଡ଼ା ବାନ୍ଧି ଜଙ୍ଗଲ ମଧ୍ୟକୁ ନେଇଯାଇଥିଲେ ।

କିନ୍ତୁ ମାଓବାଦୀମାନେ ଗତ ୧୬ ତାରିଖରେ କାର୍ତିକ ଏବଂ ସନ୍ତୋଷଙ୍କୁ ମୁକ୍ତ କରିଦେଇଥିବା ବେଳେ ଇଟାଲୀୟ ପର୍ଯ୍ୟଟକ ଦ୍ଵୟଙ୍କୁ ଅଟକ ରଖିଥିଲେ ।

ପ୍ରତ୍ୟକ୍ଷଦର୍ଶୀଙ୍କ ବୟାନ ରେକର୍ଡ଼ କରାଯାଇ ଅପହରଣକାରୀଙ୍କ ବିରୁଦ୍ଧରେ ମାମଲା ରୁଜୁ କରାଯାଇଛି ବୋଲି ପୁରୀ ଜିଲ୍ଲା ପୋଲିସ ମୁଖ୍ୟ ଅନୂପ ସାହୁ କହିଛନ୍ତି ।

ପର୍ଯ୍ୟଟକମାନେ ନଦୀ କୂଳରେ କେତେକ ଆଦିବାସୀ ମହିଳାଙ୍କ ଫଟୋ ଉଠାଇ ଥିବା ବେଳେ ସେମାନଙ୍କୁ ଅପହରଣ କରାଯାଇଥିବା ଉଲ୍ଲେଖ କରି ରବିବାର ମାଓନେତା ସବ୍ୟସାଚୀ ପଣ୍ଡା ସ୍ଥାନୀୟ ଗଣମାଧ୍ୟମକୁ ଅଡ଼ିଓ ସିଡ଼ି ପଠାଇଥିଲେ ।

ସରକାର ମାଓ ବିରୋଧୀ ଅଭିଯାନ ଏବଂ କୁମ୍ବିଂ ଅପରେଶନ ବନ୍ଦ କରିବା ସହ ସେମାନଙ୍କର ଦାବି ପୂରଣ କରିବାକୁ ମାଓବାଦୀମାନେ ଦାବି କରିଛନ୍ତି ।

ଆଭ୍ୟନ୍ତରୀଣ ଅଞ୍ଚଳକୁ ପର୍ଯ୍ୟଟକଙ୍କୁ ଯିବା ପାଇଁ ଅନୁମତି ଦେବାକୁ ଟୁର ଅପରେଟରମାନେ ପ୍ରଶାସନକୁ ଲାଞ୍ଚ ଦେଉଥିବା ବିଷୟରେ ଆମ ପାଖରେ ଯଥେଷ୍ଟ ପ୍ରମାଣ କରହିଛି ବୋଲି ଏହି ମାଓନେତା କହିଛନ୍ତି ।

ଅପହୃତଙ୍କ ନିରାପଦ ମୁକ୍ତି ପାଇଁ ସେମାନେ ସରକାରଙ୍କ ନିକଟରେ ୧୩ଟି ଦାବି ଉପସ୍ଥାପନ କରିଛନ୍ତି । ମାଓ ବିରୋଧୀ ଅଭିଯାନ ବନ୍ଦ ସହ ପୋଲିସ ହେପାଜତରେ ମୃତ୍ୟୁ ବରଣ କରିଥିବା ମାଓ ସମର୍ଥକଙ୍କ ପରିବାରକୁ କ୍ଷତିପୂରଣ ଏବଂ ପ୍ରାୟ ଛଅ ଶହ ବନ୍ଦୀଙ୍କୁ ମୁକ୍ତ କରିବାକୁ ସେମାନେ ଦାବି କରିଛନ୍ତି ।

ପୋସ୍କୋ ଓ ବେଦାନ୍ତ ସମେତ ଅନ୍ୟ ପ୍ରକଳ୍ପର ବିରୁଦ୍ଧରେ ସ୍ୱର ଉଠାଇ ଗିରଫ ହୋଇଥିବା ବିସ୍ଥାପନ
ବିରୋଧୀ ନେତା ମାନଙ୍କୁ ମୁକ୍ତ କରିବାକୁ ମଧ୍ୟ ସେମାନେ ଦାବି କରିଛନ୍ତି ।

ରାଜ୍ୟରେ ପ୍ରଥମ ଥର ପାଇଁ ମାଓବାଦୀମାନେ ବିଦେଶୀ ପର୍ଯ୍ୟଟକଙ୍କୁ ଅପହରଣ କରିଛନ୍ତି ।

ଓଡ଼ିଶା ଡ଼ଟ୍ କମ୍