ଓଡିଶା ଡଟ୍ କମ୍ ସମ୍ବାଦଦାତା
ଭୁବନେଶ୍ଵର, ଜୁନ ୪ (ଓଡିଶା ଡଟ୍ କମ୍):ମାତୃଭାଷାର ସମୃଦ୍ଧି ପାଇଁ ସମସ୍ତଙ୍କର କର୍ତ୍ତବ୍ୟ ରହିଛି ବୋଲି ସମବାୟ ଓ ଅବକାରୀ ମନ୍ତ୍ରୀ ଡ଼ା ଦାମୋଦର ରାଉତ ରବିବାର ସ୍ଥାନୀୟ ଜୟଦେବଭବନ ଠାରେ ଅନୁଷ୍ଠିତ ହୋଇଥିବା ନିଖିଳ ଓଡ଼ିଶା ପ୍ରଗତିଶୀଳ ଲେଖକ ମହାସଂଘର ପଞ୍ଚଦଶତମ ବାର୍ଷିକୋତ୍ସବରେ ଯୋଗ ଦେଇ ମତ ପ୍ରକାଶ କରିଛନ୍ତି।
ହୀନମନ୍ୟତା ଓ ପରଶ୍ରୀକାତରତା ଆମକୁ ଗ୍ରାସ କରିଛି । ଉପେନ୍ଦ୍ର ଭଞ୍ଜ ଓ ଗଙ୍ଗାଧର ମେହେରଙ୍କ କାଳଜୟୀ ସାହିତ୍ୟ ସୃଷ୍ଟି କରିଥିବା ଭାଷା ଆଜି ବିଲୟ ହେବାକୁ ଯାଉଛି । ସ୍ୱତନ୍ତ୍ର ପ୍ରଦେଶ ଗଠନ ହେବାର ୮୦ବର୍ଷ ବିତି ଯାଇଥିଲେ ହେଁ ଓଡ଼ିଆଜାତି ମାଗିଖିଆ ଜାତିରେ ପରିଣତ ହୋଇଛି । ଅତୀତକୁ ପସୋରି ବର୍ତ୍ତମାନର ସମୀକ୍ଷା ନ କରି ଭବିଷ୍ୟତ କାର୍ଯ୍ୟପନ୍ଥା ପାଇଁ ଅଗ୍ରସର ହେବା ଅନୁଚିତ୍ , ବୋଲି ସେ କହିଛନ୍ତି।
ମାତୃଭାଷାର ସମୃଦ୍ଧି ପାଇଁ ସବୁ ସ୍ତରରେ ଉଦ୍ୟମର ଅଭାବ ରହିଛି । ଏପରିକି ଶାସନରେ ଥିବା ଲୋକମାନେ ଓଡ଼ିଆ ଭାଷା ଜାଣନ୍ତି ନାହିଁ । ଓଡ଼ିଆ ଭାଷାର ଶ୍ରେଷ୍ଠ କୃତୀଗୁଡ଼ିକ ଅନୁବାଦ ହେବାରେ ଅବହେଳା କରାଯାଉଛି । ତେଣୁ ମାତୃଭାଷାର ସମୃଦ୍ଧି ପାଇଁ ସମସ୍ତଙ୍କର କର୍ତ୍ତବ୍ୟ ରହିଛି ବୋଲି ମୁଖ୍ୟ ଅତିଥି ଭାବେ ଯୋଗ ଦେଇ ରାଉତ ଉପରୋକ୍ତ ମତ ଦେଇଛନ୍ତି ।
ଓଡ଼ିଶା ସାହିତ୍ୟ ଏକାଡେମୀର ସଭାପତି ତଥା ‘ସମୟ’ର ସଂପାଦକ ସାତକଡ଼ି ହୋତା ଉଦଘାଟକ ରୂପେ ଯୋଗଦେଇ କହିଲେ ଯେ, ସାହିତ୍ୟ ସମାଜର ଦର୍ପଣ ସଦୃଶ । ସାହିତ୍ୟକୁ ଆଗକୁ ନେବା ପାଇଁ ସମସ୍ତଙ୍କ ପ୍ରଚେଷ୍ଟା ଏକାନ୍ତ ଅପରିହାର୍ଯ୍ୟ । ଶାରଳା ଦାସ, ଜଗନ୍ନାଥ ଦାସ ଓ ପଞ୍ଚସଖାମାନେ ଯେଉଁ ସାହିତ୍ୟ ସୃଷ୍ଟି କରିଥିଲେ, ତାକୁ ଆଜି ଓଡ଼ିଆମାନେ ଭୁଲିଯିବାକୁ ବସିଲେଣି ।
ସବୁ ମୂଳରେ ହେଉଛି ମାତୃଭାଷା । ମାତୃଭାଷାକୁ ଭୁଲିଗଲେ ଜାତିକୁ ଲୋକେ ଭୁଲଯିବେ ବୋଲି ସେ କହିଥିଲେ । ରାଜ୍ୟସଭା ସାଂସଦ ବୈଷ୍ଣବ ଚରଣ ପରିଡ଼ା ଉତ୍ସବରେ ଅଧ୍ୟକ୍ଷତା କରି କହିଲେ ଯେ ସାହିତ୍ୟିକ ଓ ଲୋକମାନେ ହେଉଛନ୍ତି ସମାଜର ପ୍ରକୃତି ପ୍ରତିନିଧି । ଭାଷା ହେଉଛି ସାହିତ୍ୟ ସଂସ୍କୃତିର ବାହାକ । ଲେଖକମାନେ ହିଁ ଗୋଟିଏ ଜାତିର ଆଶା ଆକାଂକ୍ଷା ଓ ସ୍ୱପ୍ନକୁ ଭାଷା ମାଧ୍ୟମରେ ପ୍ରକାଶ କରିଥାନ୍ତି ।
ଆଜି ଓଡ଼ିଶାରେ ଓଡ଼ିଆ ଭାଷାର ସର୍ବତ୍ର ବ୍ୟବହାର କମିଯିବା ହେତୁ ଓଡ଼ିଆ ଭାଷା ସଙ୍କଟର ସମ୍ମୁଖୀନ ହେଉଛି । ଦିନ ଥିଲା, ଓଡ଼ିଆ ଭାଷାକୁ ସଙ୍କଟରୁ ରକ୍ଷା କରିବା ପାଇଁ ଫକୀର ମୋହନ, ଗଙ୍ଗାଧର ମେହେର, ରାଧାନାଥ ରାୟ ଓ ଗୌରୀଶଙ୍କର ରାୟଙ୍କ ଭଳି ଲେଖକମାନେ ଭାଷା ଆନ୍ଦୋଳନର ନେତୃତ୍ୱ ନେଇଥିଲେ । ଆଜି ଓଡ଼ିଆ ଭାଷା ସଙ୍କଟର ସମ୍ମୁଖୀନ । ଏହାକୁ ରକ୍ଷା କରିବା ପାଇଁ ଓଡ଼ିଶାରେ ପୁଣି ଭାଷା ଆନ୍ଦୋଳନ ଆରମ୍ଭ ହୋଇଛି ।
ଓଡ଼ିଆ ଭାଷାରେ ପ୍ରଶାସନ, କୋର୍ଟ କଚେରୀ, ଶିକ୍ଷା ଆଦି କ୍ଷେତ୍ରରେ ବ୍ୟାପକ ବ୍ୟବହାର କରିବା ଦାବି କରି ଓଡ଼ିଶାର ବିଭିନ୍ନ ପ୍ରାନ୍ତରରୁ ଲକ୍ଷେ ପୋଷ୍ଟକାର୍ଡ଼ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଦାନ କରିବା ପାଇଁ ସ୍ଥିର ହୋଇଛି । କଥାରେ, ଲେଖିବାରେ ଓ ପ୍ରଚଳନରେ ଓଡ଼ିଆ ଭାଷା ବଦଳୁଛି । ମାତୃଭାଷା ଯେପର୍ଯ୍ୟନ୍ତ ଜୀବନର ଭାଷା ନ ହୋଇଛି, ସେହି ଭାଷା ବଞ୍ଚିପାରିବ ନାହିଁ ।
ତେଣୁ ସରକାରୀସ୍ତରରେ ଓଡ଼ିଆ ଭାଷା ପ୍ରଚଳନ ଦାବୀରେ ଅସାନ୍ତା ବିଧାନସଭା ଅଧିବେଶନ କାଳରେ ପାଞ୍ଚ ହଜାର ସାହିତ୍ୟିକ, ଲେଖକ ଓ ସାମ୍ବାଦିକମାନଙ୍କୁ ନେଇ ବିଧାନସଭା ଆଗରେ ଧାରଣା ଦେବାକୁ ନିଷ୍ପତ୍ତି ହୋଇଛି
ବୋଲି ଶ୍ରୀ ପରିଡ଼ା କହିଥିଲେ ।
ରାଷ୍ଟ୍ରୀୟ ସାମ୍ବାଦିକ କଲ୍ୟାଣ ବୋର୍ଡର ଉପାଧ୍ୟକ୍ଷ ପ୍ରଦ୍ୟୁମ୍ନ କୁମାର ମହାନ୍ତି ଏବଂ ନୂଆପଡ଼ା ଜିଲ୍ଲାର ବିଜେଡ଼ି ସଭାପତି ତଥା ବରିଷ୍ଠ ଆଇନଜୀବୀ ପ୍ରସନ୍ନ ପାଢୀ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ଉଦବୋଧନ ଦେଇଥିଲେ । ପ୍ରାରମ୍ଭରେ ମହାସଂଘର ଉପସଭାପତି ଡଃ ବୈରାଗୀ ପଟ୍ଟନାୟକ ଅତିଥିମାନଙ୍କ ପରିଚୟ ପ୍ରଦାନ ଓ ସ୍ୱାଗତ ଭାଷଣ ଦେଇଥିଲା ବେଳେ ସଂପାଦକ କଣ୍ଡୁରୀ ଚରଣ ଦାସ ବିବରଣୀ ପାଠ କରିଥିଲେ ।
ଏହି ଅବସରରେ କବି କିଶୋର ଚନ୍ଦ୍ର ମହାପାତ୍ରଙ୍କୁ ‘ବିଭୂଦତ୍ତ ସ୍ମୃତି ସମ୍ମାନ’, କବି ହାଡ଼ିବନ୍ଧୁ ମହାଖୁଡ଼ଙ୍କୁ ‘ଏକାଦଶୀ ପ୍ରସାଦ ବୋଇତାଇ ସ୍ମୃତି ସମ୍ମାନ’, କବି ରାମଲାଲ ପଣ୍ଡାଙ୍କୁ ‘ନରସିଂହ ନନ୍ଦ ସ୍ମୃତି ସମ୍ମାନ’, କବି ଅଧ୍ୟାପିକା ସୌଦାମିନୀ ବେହେରାଙ୍କୁ ‘କାବ୍ୟଭାରତୀ ସୁନ୍ଦରମଣି ପଟ୍ଟନାୟକ ସ୍ମୃତି ସମ୍ମାନ’ ଓ ‘ଆପ୍ଟେକ୍’ର ପରିଚାଳନା ନିର୍ଦ୍ଦେଶକ ଶୁକଦେବ ପରିଡ଼ାଙ୍କୁ ସମାଜସେବା ପାଇଁ ସମ୍ମାନିତ କରାଯାଇଥିଲା ।
ଦୈନିକ ଊର୍ଦ୍ଧୁ ସମ୍ବାଦପତ୍ର ‘ଅଖ୍ବାରନାମା’ର ସାମ୍ବାଦିକ ଶେଖ୍ ରିୟାଜ୍ ମହମ୍ମଦଙ୍କୁ ‘ନାରଦ ସମ୍ମାନ’, ହୃଦୟକୃଷ୍ଣ ସାମନ୍ତରାୟଙ୍କୁ ‘ଗୋପବନ୍ଧୁ ସେବା ସମ୍ମାନ’, ଡଃ. ନୀଳାଦ୍ରି ବିହାରୀ ମିଶ୍ରଙ୍କୁ ‘ଶ୍ରେଷ୍ଠ ପରିବେଶବିତ ସମ୍ମାନ’, ସନ୍ତୋଷ କୁମାର ନାୟକଙ୍କୁ ‘ଯୁବ ପ୍ରତିଭା ସମ୍ମାନ’, ପ୍ରଭାକର ମହାପାତ୍ରଙ୍କୁ ‘ଜ୍ୟୋତିର୍ବିଦ୍ ପଠାଣି ସାମନ୍ତ ସମ୍ମାନ’, କବି ଜୟକୃଷ୍ଣ ସାହୁ, ଶମ୍ଭୁନାଥ ଦାଶ, ଦାମୋଦର ସେନାପତି, ସୁରେନ୍ଦ୍ର କୁମାର ଜେନା, ଦିଲୀପ କୁମାର ତ୍ରିପାଠୀ, ସନତ କୁମାର ଭୋଇ, ଶଙ୍କର୍ଷଣ ସ୍ୱାଇଁ, ଡଃ ଚିତ୍ତରଂଜନ ଭୋଇ ଓ କୁମାରୀ ସୃଜନା ସୌରଭା ପ୍ରମୁଖ ୨୦ଜଣଙ୍କୁ ମାନପତ୍ର, ଉପଢୌକନ ଓ ପୁଷ୍ପଗୁଚ୍ଛ ଦିଆଯାଇ ମୁଖ୍ୟଅତିଥି ମନ୍ତ୍ରୀ ଡା. ରାଉତ ସମ୍ବର୍ଦ୍ଧିତ କରିଥିଲେ ।
ଲେଖକ ମହାସଂଘ ପକ୍ଷରୁ ସ୍ମରଣିକା ଉନ୍ମୋଚନ କରାଯିବା ସହିତ ଶରତ ଚନ୍ଦ୍ର ସାମନ୍ତଙ୍କ ‘ଅପଶ୍ରୁତି ମୁହୂର୍ତ୍ତ’ ପୁସ୍ତକ ଉନ୍ମୋଚିତ ହୋଇଥିଲା । ପ୍ରାରମ୍ଭରେ ଲଳିତକଳା ପୀଠର ନୃତ୍ୟଗୁରୁ ମମତା ଶତପଥୀଙ୍କ ନେତୃତ୍ୱରେ ଓଡ଼ିଶୀ ନୃତ୍ୟ ଓ ଫୋକ୍ ଡ୍ୟାନ୍ସ ପରିବେଷଣ କରାଯାଇଥିବା ବେଳେ ଶ୍ରୀତମ୍ ଦାସଙ୍କ ଆଧୁନିକ ନୃତ୍ୟ ପରିବେଷଣ ସମସ୍ତଙ୍କୁ ବେଶ୍ ଆକର୍ଷିତ କରିଥିଲା ।
କବି ପର୍ଶୁରାମ ଦ୍ୱିବେଦୀ ଓ ମନୋରଂଜନ ନନ୍ଦଙ୍କ ଆବାହକତ୍ୱରେ ଏହି କବିତା ପାଠୋତ୍ସବରେ ଚମକଚାନ୍ଦିନୀ ଦାଶ, ସୂର୍ଯ୍ୟ ମହାନ୍ତି, ମିନତୀ ମିଶ୍ର, ବାମଦେବ ସ୍ୱାଇଁ ଓ ଗୋଲକ ବିହାରୀ ନାୟକ ସଂଯୋଜନା କରିଥିଲେ । ଏଥିରେ ୫୨ଜଣ କବି ତାଙ୍କର ସ୍ୱରଚିତ କବିତା ପାଠ କରିଥିଲେ । ଶେଷରେ ସାମ୍ବାଦିକ ପ୍ରଦ୍ୟୁମ୍ନ କୁମାର ମହାନ୍ତି ଧନ୍ୟବାଦ ଅର୍ପଣ କରିଥିଲେ ।
ଓଡିଶା ଡଟ କମ