ହତ୍ୟାକାଣ୍ଡ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର,ସେପ୍ଟେମ୍ବର ୧୯(ଓଡ଼ିଶା ଡ଼ଟ୍ କମ୍)- ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ହତ୍ୟା ଘଟଣା ଓ ଏହା ପରବର୍ତ୍ତି ହିଂସା କାଣ୍ଡ ତଦନ୍ତ ପାଇଁ ଜଷ୍ଟିସ ଏ.ଏସ ନାଇଡ଼ୁଙ୍କୁ କମିଶନ ଅଧ୍ୟକ୍ଷ ପରେ ସରକାର ଅବସ୍ଥାପିତ କରିଛନ୍ତି ।

ଏଘଟଣା ନେଇ ଭାରତୀୟ ଜନତା ପାଟି ନିଜର ପ୍ରତିକ୍ରୀୟା ପ୍ରକାଶ କରିଛି । ବିଜେପିର ବରିଷ୍ଠନେତା ବିଶ୍ୱଭୂଷଣ ହରିଚନ୍ଦନ କହିଛନ୍ତି ଯେ ସରକାର କନ୍ଧମାଳ ହତ୍ୟାକାଣ୍ଡର ପ୍ରକୃତ ରହସ୍ୟ ଖୋଲିବାକୁ ଚାହୁଁନାହାଁନ୍ତି ।

ଆଗରୁ ନିଯୁକ୍ତି ପାଇଥିବା କମିଶନଙ୍କ ଅବଧି ଆସନ୍ତା ୧୭ ତାରିଖରେ ସରିଯିବ ତେଣୁ ସରକାର ତରବରିଆ ଭାବେ ଶ୍ରୀ ନାଇଡୁଙ୍କୁ ତଦନ୍ତ ଭାର ଦେଇଛନ୍ତି । ସେ ଆଉଦୁଇଟି ଘଟଣାର ତଦନ୍ତ କରୁଛନ୍ତି ।

ଗ୍ରିନ ଟ୍ରିବ୍ୟୁନାଲର ଦାୟିତ୍ୱରେ ଅଛନ୍ତି । ଜଷ୍ଟିସ ନାଇଡୁ ସମ୍ପ୍ରତି ରାଉରକେଲା ମାଜିଷ୍ଟ୍ରେଟ ମାଡ଼ ଘଟଣାର ତଦନ୍ତ କରୁଛନ୍ତି । ଏଥିପାଇଁ ତାଙ୍କ ଉପରେ ଅଧିକ ଚାପ ପଡିବ । ତେଣୁ ତଦନ୍ତ ପ୍ରକ୍ରୀୟା ସମୟ ସାପେକ୍ଷ ହେବ ।

ଜଷ୍ଟିସ ମହାପାତ୍ରଙ୍କର ଗତ ମେ ୧୨ତାରିଖରେ ପରଲୋକ ହୋଇଯିବାରୁ ତଦନ୍ତ ପ୍ରକ୍ରିୟା ମଝିରେ ଅଟକି ରହିଛି । ସରକାର ଚାହିଁଥିଲେ ଜଷ୍ଟିସ ମହାପାତ୍ରଙ୍କ ମୃତ୍ୟୁର ଏକମାସପରେ ଜଷ୍ଟିସ ନାଇଡୁଙ୍କୁ ନିଯୁକ୍ତି ଦେଇପାରିଥାନ୍ତେ କିନ୍ତୁ ଏଥିରେ ସରକାର ଜାଣିଶୁଣି ଅବହେଳା କରିଛନ୍ତି ବୋଲି ହରିଚନ୍ଦନ ଅଭିଯୋଗ କରିଛନ୍ତି ।

ଜଷ୍ଟିସ ମହାପାତ୍ରଙ୍କର କମିଶନଙ୍କୁ ୫୫୭ଟି ସତ୍ୟପାଠ ମିଳିଥିବାବେଳେ ୬୫ଜଣ ସରକାରୀ ସାକ୍ଷୀଙ୍କ ସହ ୯୯ଜଣ ବେସରକାରୀ ସାକ୍ଷୀ ସେମାନଙ୍କର ସାକ୍ଷ ପ୍ରଦାନ କରିସାରିଛନ୍ତି । ଆଉ ୪୦ଜଣଙ୍କ ସାକ୍ଷ ପ୍ରଦାନ ବାକି ରହିଛି ।

ସୂଚାନା ଯୋଗ୍ୟ କି ୨୦୦୮ ମସିହାରେ କନ୍ଧମାଳର ଜଲେଶପଟା ଆଶ୍ରମରେ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ସହିତ ବାବା ଅମୃତାନନ୍ଦ, ମାତା ଭକ୍ତିମୟୀ, କିଶୋର ବାବା ଓ ପୁରଞ୍ଜନ ଗାଣ୍ଠିଙ୍କୁ ହତ୍ୟା କରାଯାଇଥିଲା ।

ଏହା ପରେ ପରେ ସେଠାରେ ଦଙ୍ଗା ସୃଷ୍ଟି ହୋଇଥିଲା । ରାଜ୍ୟ ସରକାର ଉଭୟ ଘଟଣାର ତଦନ୍ତ ପାଇଁ ସେହିବର୍ଷ ସେପ୍ଟେମ୍ବର ୩ ତାରିଖରେ ଜଷ୍ଟିସ ଶରତ ଚନ୍ଦ୍ର ମହାପାତ୍ରଙ୍କୁ ନେଇ ଜଣିକିଆ ତଦନ୍ତ କମିଶନ ଗଠନ କରିଥିଲେ ।

ଜଷ୍ଟିସ ମହାପାତ୍ର ଅକ୍ଟୋବର ୩୦ରେ ତଦନ୍ତ ଆରମ୍ଭ କରିଥିଲେ । କମିଶନ ୨୧୩ଟି ସିଟିଂ କରିଥିଲେ ଓ ୨୦୦୯ ଜୁନ ୩୦ତାରିଖରେ ସରକାରଙ୍କୁ ତାଙ୍କର ମଧ୍ୟବର୍ତ୍ତି କାଳୀନ ରିପୋର୍ଟ ପ୍ରଦାନ କରିଥିଲେ । ଇତିମଧ୍ୟରେ ଏହି କମିଶନଙ୍କ କାର୍ଯ୍ୟକାଳ ୮ଥର ବୃଦ୍ଧି କରାଯାଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଆସିକା, ଅଗଷ୍ଟ ୨୧ (ଓଡ଼ିଶା ଡ଼ଟ୍ କମ୍) ଗଂଜାମ ପୋଲିସ ଜିଲ୍ଲା ଗାଙ୍ଗପୁର ଥାନା ଅର୍ନ୍ତଗତ କେସପୁର ଶାସନ ଗ୍ରାମରେ ସୋମବାର ଅପରାହ୍ନରେ ପୂର୍ବ ଶତ୍ରୁତାକୁ କେନ୍ଦ୍ରକରି ଘଟିଥିବା ହତ୍ୟା ପରେ ଉତେଜନା ପ୍ରକାଶ ପାଇଛି ।

ସୋମବାର ଅପରାହ୍ନରେ ଏକ ଲୁନା ଗାଡିରେ ନିଜ ଗ୍ରାମରୁ ଧରାକୋଟ ବ୍ଲକର ଝରପାରି ପଞ୍ଚାୟତ ଅନ୍ତର୍ଗତ କେଶପୁରଶାସନ ଗ୍ରାମର ରାମହରି ପଣ୍ଡା (୫୦) ଓ ଗୌରହରି ନାୟକ ବାଲିସିରାକୁ କୌଣସି କାର୍ଯ୍ୟରେ ଆସି ପୁଣି ନିଜ ଗ୍ରାମକୁ ଫେରୁଥିଲେ ।

ନଣ୍ଡାଜୁଆଳି ଗ୍ରାମ ନିକଟରେ ଥିବା ଏକ କେନାଲ ପାଖରେ ପାଞ୍ଚରୁ ଉର୍ଦ୍ଦ୍ୱ ବ୍ୟକ୍ତି ଉଭୟଙ୍କୁ ଅଟକାଇ ଅତର୍କିତ ଆକ୍ରମଣ କରିଥିଲେ । ନିଜ ଜୀବନ ବଞ୍ଚାଇବା ପାଇଁ ଗାଡି ଛାଡି ଦୌଡିଥିଲେ ରାମହରି ଓ ଗୌରହରି ।

ଦୁର୍ବୃତ ମାନେ ଗୋଡାଇ ଗୋଡାଇ ଅତି ବୀଭତ୍ସ ଭାବେ ଉଭୟଙ୍କୁ ହତ୍ୟା କରିଥିଲେ । ଏ ସମ୍ପର୍କରେ ଖବର ପାଇ ଗୌରହରି ନାୟକଙ୍କ ବାପା ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଆସିକା ସରକାରୀ ଡାକ୍ତରଖାନାକୁ ଆଣିଥିଲେ । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ ।

ସୁଚନା ଯୋଗ୍ୟ ଯେ, ନିହତ ରାମହରି ଓ ଗୋର କଂଗ୍ରେସର ସମର୍ଥକ । ୩ ମାସତଳେ ଗାଁରେ ଏକ ଅଙ୍ଗନବାଡି କେନ୍ଦ୍ର ଗୃହ ନିମାଣକୁ ଗୌରଙ୍କର ପିତା ବିଦ୍ୟାଧର ନାୟକ ବିରୋଧ କରିବାରୁ ବିଜୟ ପାଢୀ, ପୁଅ କୈଳାସ ତାଙ୍କୁ ଆକ୍ରମଣ କରିଥିଲେ ।

ଏ ଘଟଣାକୁ ନେଇ ବିଦ୍ୟାଧର ଗାଙ୍ଗପୁର ଥାନାରେ ଏତଲା ଦେଇଥିଲେ । ଏହାପରେ ମଧ୍ୟ ବିଦ୍ୟାଧରକୁ ବାରମ୍ବାର ଧମକ ଦିଆ ଯାଉଥିଲା । ବିଦ୍ୟାଧର ଆସିକା ଅଦାଲତରେ ତାଙ୍କ ପରିବାରକୁ ସୁରକ୍ଷା ଯୋଗାଇ ବୋକୁ ନିବେଦନ ମଧ୍ୟ କରିଥିଲେ । ଏହି ଅଭାବନୀୟ ଘଟଣା ସମଗ୍ର ଜିଲାରେ ଆଲୋଡନ ଖେଳାଇ ଦେଇଛି ।ଏହି ଘଟଣା ପରେ କେଶପୁର ଶାସନ ଗ୍ରାମରେ ଉତେଜନା ପ୍ରକାଶ ପାଇଛି । ସେଠାରେ ପୋଲିସ ଡେରା ପକାଇଛନ୍ତି ।

ଓଡ଼ିଶା ଡ଼ଟ୍ କମ୍