ସ୍ୱାସ୍ଥ୍ୟ

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ଜାନୁୟାରୀ ୨୫(ଓଡ଼ିଶା ଡ଼ଟ୍ କମ୍) ରାଜ୍ୟରେ ବିପିଏଲ୍ ପରିବାର ଗୁଡ଼ିକୁ ବର୍ଷକୁ ୩୦ ହଜାର ଟଙ୍କାର ସ୍ୱାସ୍ଥ୍ୟ ବୀମାର୍ଭୁକ୍ତ କରିବା ପାଇଁ ସରକାର ନିଷ୍ପତ୍ତି ଗ୍ରହଣ କରିଛନ୍ତି ।

ବିପିଏଲ୍ ପରିବାରକୁ ଚିକିତ୍ସା କ୍ଷେତ୍ରରେ ସହାୟତା ଦେବା ପାଇଁ କେନ୍ଦ୍ର ସରକାର ଏହି ଯୋଜନା ପ୍ରଣୟନ କରିଛନ୍ତି । ଏମ୍ ଏନ୍ଆର୍ଇଜିଏ ଯୋଜନା ହିତାଧିକାରୀ ଓ ନିର୍ମାଣ ଶ୍ରମିକଙ୍କୁ ମଧ୍ୟ ଏହି ସୁବିଧା ମିଳିବ ।

ଏହି ଯୋଜନାରେ ଅର୍ନ୍ତଭୁକ୍ତ ହେବା ପାଇଁ ପ୍ରତି ବିପିଏଲ୍ ପରିବାରକୁ ପଞ୍ଜିକୃତ କରିବାକୁ ୩୦ ଟଙ୍କା ଦେଇ ବାୟୋ ମେଟ୍ରିକ କାର୍ଡ଼ ସଂଗ୍ରହ କରିବାକୁ ପଡ଼ିବ ।

ପ୍ରିମିୟମ ବାବଦରେ ସରକାର ପ୍ରତ୍ୟେକ ପରିବାର ପିଛା ୪୮୦ ଟଙ୍କା ପ୍ରଦାନ କରିବେ ଓ ହୀତାଧିକାରୀ ନିଜେ କିମ୍ବା ପରିବାରର ୫ ଜଣ ସଦସ୍ୟ ବର୍ଷକୁ ୩୦ ହଜାର ଟଙ୍କାର ବୀମା ସୁବିଧା ପାଇପାରିବେ ।

ବୀମାଭୁକ୍ତ ବିପିଏଲ୍ ପରିବାର ରାଜ୍ୟର ୪୩୫ଟି ସରକାରୀ ଓ ୧୨ଟି ବେସରକାରୀ ଡ଼ାକ୍ତାଖାନାରେ ଚିକିତ୍ସିତ ହୋଇପାରିବେ । ସ୍ୱାସ୍ଥ୍ୟବୀମା କାର୍ଡ଼ ବଣ୍ଟନରେ ସ୍ୱଚ୍ଛତା ଆଣିବା ପାଇଁ ପଞ୍ଚାୟତ ସ୍ତରରେ ସଂପ୍ରସାରଣ ଅଧିକାରୀଙ୍କୁ ଏହି କାର୍ଯ୍ୟରେ ସାମିଲ କରିବାକୁ ନିଷ୍ପତ୍ତି ହୋଇଛି ।

ଓଡ଼ିଶା ଡ଼ଟ୍ କମ୍

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ନଭେମ୍ବର ୨୬(ଓଡ଼ିଶା ଡ଼ଟ୍ କମ୍) ଘରୋଇ ଓ ସରକାରୀ ଭାଗିଦାରୀରେ କେନ୍ଦୁଝର ଜିଲ୍ଲାରେ ଏକ ମେଡ଼ିକାଲ କଲେଜ ଓ ହସ୍ପିଟାଲ ପ୍ରତିଷ୍ଠା ପାଇଁ ଶୁକ୍ରବାର ବୁଝାମଣାପତ୍ର ସ୍ୱାକ୍ଷର ହୋଇଛି ।

ଏନେଇ ରାଜ୍ୟ ସରକାର ଏବଂ ସହଯୋଗ ହେଲଥ କେୟାର ଆଣ୍ଡ ରିସର୍ଚ୍ଚ ଫାଉଣ୍ଡେସନ ମଧ୍ୟରେ ଏହି ବୁଝାମଣା ପତ୍ର ସ୍ୱାକ୍ଷର ହୋଇଛି । ଦୁଇ ବର୍ଷ ମଧ୍ୟରେ ଏହି କାର୍ଯ୍ୟ ଶେଷ କରିବାକୁ ଉକ୍ତ ସଂସ୍ଥା ଲକ୍ଷ୍ୟ ରଖିଛି ବୋଲି ଏହାର ଅଧ୍ୟକ୍ଷ ସୁଗ୍ରିବ ସିଂ କହିଛନ୍ତି ।

କଲେଜ ପାଇଁ ସରକାର ୨୦ ଏକର ଜମି ସହ ଦଶ କୋଟି ଟଙ୍କା ଯୋଗାଇ ଦେବେ । ୧୦୦ ଆସନ ବିଶିଷ୍ଟ ମେଡ଼ିକାଲ କଲେଜ, ୧୦୦ ଆସନ ବିଶିଷ୍ଟ ଡ଼େଣ୍ଟାଲ କଲେଜ ସହ ୨୦ ଆସନ ବିଶିଷ୍ଟ ନର୍ସିଂ ସ୍କୁଲ ଓ ୧୦୦ ଆସନ ବିଶିଷ୍ଟ ପାରା ମେଡ଼ିକାଲ ଇନଷ୍ଟିଚ୍ୟୁଟ କରାଯିବ, ସେ କହିଛନ୍ତି ।

୨୧୦ କୋଟି ଟଙ୍କା ବ୍ୟୟରେ ହେବାକୁ ଥିବା ଏହି ମେଡ଼ିକାଲ କଲେଜରେ ଫାଉଣ୍ଡେସନ ଦୁଇ ଶହ କୋଟି ଟଙ୍କା ଖର୍ଚ୍ଚ କରିବ । ଏଥିପାଇଁ ପାଣ୍ଠି ବିଭିନ୍ନ ଫୋରମରୁ ଯୋଗାଡ଼ କରାଯିବ ବୋଲି ସେ କହିଛନ୍ତି ।

ଘରୋଇ ସରକାରୀ ଭାଗିଦାରୀରେ ରାଜ୍ୟରେ ଅଧିକରୁ ଅଧିକ ମେଡ଼ିକାଲ କଲେଜ କରାଯିବ ବୋଲି ଏହି ଅବସରରେ ସ୍ୱାସ୍ଥ୍ୟମନ୍ତ୍ରୀ ପ୍ରସନ୍ନ ଆଚାର୍ଯ୍ୟ କହିଛନ୍ତି ।

ରାଉରକେଲା ଓ କଳାହାଣ୍ଡି ଠାରେ ମେଡ଼ିକାଲ କଲେଜ ପ୍ରତିଷ୍ଠା ପାଇଁ ଆନୁସଙ୍ଗିକ ବ୍ୟବସ୍ଥା ହୋଇସାରିଥିବା ବେଳେ ମହାନଦୀ କୋଲଫିଲ୍ଡ(ଏମ୍ସିଏଲ୍) ତାଳଚେର ଠାରେ ଏକ ମେଡ଼ିକାଲ କଲେଜ ପ୍ରତିଷ୍ଠା କରିବ ବୋଲି ସେ କହିଛନ୍ତି ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ନଭେମ୍ବର ୩(ଓଡ଼ିଶା ଡ଼ଟ୍ କମ୍) ରାସ୍ତା ଦୁର୍ଘଟଣାର ସମ୍ମୁଖିନ ହେଉଥିବା ଲୋକଙ୍କୁ ତୁରନ୍ତ ଆଶୁ ଚିକିତ୍ସା ତଥା ସହାୟତା ଯୋଗାଇ ଦେବାପାଇଁ ସ୍ଥାନୀୟ ଆୟୁଷ ଡ଼ାକ୍ତରଖାନା ପକ୍ଷରୁ ଏକ ଆଠ ଜଣିଆ ମଟରସାଇକେଲ ବାହିନୀ ଗଠନ କରାଯାଇଛି ।

ଦୁର୍ଘଟଣା ଖବର ପାଇବା ମାତ୍ରେ ସେମାନେ ତୁରନ୍ତ ସେଠାରେ ପହଞ୍ଚି ପ୍ରାଥମିକ ଚିକିତ୍ସା ଆରମ୍ଭ କରିପାରିବେ । ଏହାଦ୍ୱାରା ଦୁର୍ଘଟଣାଗ୍ରସ୍ତ ହେଉଥିବା ଲୋକଙ୍କ ମଧ୍ୟରୁ ବହୁ ଲୋକଙ୍କ ପ୍ରାଣ ବଞ୍ଚାଇ ହେବ ବୋଲି ଏକ ସାମ୍ବାଦିକ ସମ୍ମିଳନୀରେ ଡ଼ାକ୍ତରଖାନାର ମୁଖ୍ୟ କାର୍ଯ୍ୟନିର୍ବାହୀ ଅଶୋକ ଆଚାର୍ଯ୍ୟ କହିଛନ୍ତି ।

ଏହି ବାହିନୀର ସଦସ୍ୟମାନେ ପୂର୍ବତନ ସାମରିକ କର୍ମଚାରୀ ଏବଂ ଦୁର୍ଘଟଣାଗ୍ରସ୍ତ ଲୋକଙ୍କୁ ଆଶୁ ଚିକିତ୍ସା ଯୋଗାଇବାରେ ଉଚ୍ଚ ପ୍ରଶିକ୍ଷିତ । ରାଜଧାନୀର ୨୦ କିମି ମଧ୍ୟରେ ସେମାନଙ୍କ କର୍ମକ୍ଷେତ୍ର ହେବ ।

କଟକ ଭୁବନେଶ୍ୱର ରାସ୍ତାର ପାହାଳ ଠାରୁ ଭୁବନେଶ୍ୱର-ଖୋର୍ଦ୍ଧା ରାସ୍ତାର ତମାଣ୍ଡୋ ପର୍ଯ୍ୟନ୍ତ ରାସ୍ତା ଏବେ ମରଣଯନ୍ତା ପାଲଟିଛି । ଏହି ରାସ୍ତାରେ ୨୦୦୯ରେ ଦୁର୍ଘଟଣାରେ ୨୨୦୦ ଲୋକ ପ୍ରାଣ ହରାଇଥିବା ବେଳେ ୨୦୧୦ ସେପ୍ଟେମ୍ବର ପର୍ଯ୍ୟନ୍ତ ୧୬୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି, ସେ କହିଛନ୍ତି ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ : ବାଉରୀବନ୍ଧୁ ମହାରଣା

ଭୁବନେଶ୍ୱର, ନଭେମ୍ବର ୪(ଓଡ଼ିଶା ଡ଼ଟ୍ କମ୍) ରାଜ୍ୟରେ ଦେଖାଦେଇଥିବା ହଇଜା ଭଳି ମହାମାରୀ ରୋଗର ନିରାକରଣ ପାଇଁ ଆସନ୍ତା ଏକ ମାସ ମଧ୍ୟରେ ଯୋଜନା କାର୍ଯ୍ୟକାରୀ କରିବା ପାଇଁ ସରକାର ନିଷ୍ପତ୍ତି ନେଇଛନ୍ତି ।

ହଇଜା ରୋଗ ବ୍ୟାପୀବାର କାରଣକୁ ନେଇ ଗୁରୁବାର ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସ୍ୱାସ୍ଥ୍ୟ ବିଭାଗ ସଚିବ, ଗ୍ରାମ୍ୟ ଉନ୍ନୟନ ବିଭାଗ ସଚିବ, ପୂର୍ତ୍ତ ବିଭାଗ ସଚିବ ପ୍ରମୁଖ ଯୋଗ ଦେଇଥିଲେ ।

ଏହି ରୋଗର କାରଣ ମୁଖ୍ୟତଃ ଗମନା ଗମନର ଅସୁବିଧା ଏବଂ ପାନୀୟ ଜଳ ହୋଇଥିବାରୁ ଏହାର ନିରାକରଣ ନିମନ୍ତେ ନିଷ୍ପତ୍ତି ନିଆଯାଇଛି । ହଇଜା ପ୍ରବଣ ଜିଲ୍ଲା ଗୁଡ଼ିକର ଗମନାଗମନ ଏବଂ ପାନୀୟ ଜଳ ବ୍ୟବସ୍ଥାର ଆକ୍ସନ ପ୍ଲାନ ତୁରନ୍ତ ପ୍ରସ୍ତୁତ କରିବାକୁ ମୁଖ୍ୟ ଶାସନ ସଚିବ ଜିଲ୍ଲାପାଳ ମାନଙ୍କୁ ନିଦେ୍ର୍ଧଶ ଦେଇଛନ୍ତି ।

ଯେଉଁ ଗ୍ରାମ ବା ଜନବସତି ପାଇଁ ସଂଯୋଗୀକରଣ ରାସ୍ତା ନାହିଁ ସେହି ଗ୍ରାମ ଗୁଡ଼ିକ ପାଇଁ କିପରି ରାସ୍ତା ନିର୍ମାଣ ହୋଇପାରିବ ତାହାର ନକ୍ସା ପ୍ରସ୍ତୁତ ଏବଂ ବ୍ୟୟ ବରାର ଆକଳନ କରିବାକୁ କୁହାଯାଇଛି ।

ସଂପୃକ୍ତ ଜିଲ୍ଲା ଦାୟୀତ୍ୱରେ ଥିବା ନିର୍ବାହୀ ଯନ୍ତ୍ରୀଙ୍କୁ ଏହି ଦାୟୀତ୍ୱ ଦେବା ପାଇଁ ସେ କହିଥିଲେ । ଏହାବ୍ୟତୀତ ସ୍ୱାସ୍ଥ୍ୟସେବା ଅପହଞ୍ଚ ଗ୍ରାମ ଗୁଡ଼ିକରେ ଆଶା କର୍ମୀ ନିଯୁକ୍ତିକୁ ଚିକିତ୍ସିତ କରାଯିବ ଓ ଏକ୍ଷେତ୍ରରେ ନିଯୁକ୍ତି ସର୍ତ୍ତାବଳୀ ଦବା ନିୟମକୁ କୋହଳ କରାଯିବ । ଅନ୍ୟୁନ ଦୁଇ ଶହ ଲୋକ ଥିବା ଜନବସତିରେ ଆଶା କର୍ମୀ ନିଯୁକ୍ତି ପାଇବେ ।

ଓଡିଶା ଡଟ୍ କମ୍

ଓଡ଼ିଶା ଡ଼ଟ୍ କମ୍ ସମ୍ବାଦ ଦାତା

ଭୁବନେଶ୍ୱର, ସେପ୍ଟେମ୍ବର ୩(ଓଡ଼ିଶା ଡ଼ଟ୍ କମ୍) ସ୍ୱାଇନ ଫ୍ଲୁରେ ପୁଣି ତିନି ଜଣଙ୍କ ମୃତ୍ୟୁ ହୋଇଥିବା ବେଳେ ରାଜ୍ୟରେ ମୃତକଙ୍କ ସଂଖ୍ୟା ୨୨କୁ ବୃଦ୍ଧି ପାଇଥିବା ଶୁକ୍ରବାର ଜଣେ ଅଧିକାରୀ କହିଛନ୍ତି ।

ରାଜଧାନୀ ଭୁବନେଶ୍ୱର ସ୍ଥିତ ଦୁଇଟି ଘରୋଇ ଡ଼ାକ୍ତରଖାନାରେ ଆଜି ଏହି ରୋଗୀଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଦୁଇ ଜଣ ଶିଶୁ ଓ ଜଣେ ବୃଦ୍ଧ ଅଛନ୍ତି ।

ଶିଶୁ ଦୁଇ ଜଣ ଗତ ୩୦ ତାରିଖରେ ଡ଼ାକ୍ତରଖାନାରେ ଭର୍ତ୍ତି ହୋଇଥିବା ବେଳେ ବୃଦ୍ଧ ଜଣକ ଗତ ୧୨ ତାରିଖରୁ କଳିଙ୍ଗ ହସ୍ପିଟାଲରେ ଚିକିତ୍ସିତ ହେଉଥିଲେ । ବର୍ତ୍ତମାନ ରାଜ୍ୟରେ ଏହି ରୋଗରେ ଆକ୍ରାନ୍ତଙ୍କ ସଂଖ୍ୟା ୮୭ ରେ ପହଞ୍ଚିଛି ।

ଓଡିଶା ଡଟ୍ କମ୍