ବିଧାୟକଙ୍କ ବାସଭବନରୁ ଛଅ ଅପରାଧି ଗିରଫ

ଓଡ଼ିଶା ଡ଼ଟ୍ କମ୍ ସମ୍ବାଦଦାତା

ଭୁବନେଶ୍ୱର, ଫେବୃୟାରୀ ୧(ଓଡ଼ିଶା ଡ଼ଟ୍ କମ୍) ରାଜଧାନୀ ଭୁବନେଶ୍ୱରରେ ଜଣେ କଂଗ୍ରେସ ବିଧାୟକଙ୍କ ବାସଭବନରୁ ମଙ୍ଗଳବାର ଛଅ ଜଣ ଅପରାଧିଙ୍କୁ ଗିରଫ କରିଥିବା ପୋଲିସ କହିଛି ।

କୌଣସି ସୂତ୍ରରୁ ଖବର ପାଇ ପୋଲିସ ବିଧାୟକ ରମେଶ ଜେନା ରହୁଥିବା ଏକ ଆପାର୍ଟମେଣ୍ଟରେ ଚଢାଉ କରିଥିଲା । ଏହି ସମୟରେ ଅପରାଧିମାନେ ପୋଲିସ ଉପରକୁ ଗୁଳି ଚଳାଇଥିଲେ ଓ ପରେ ପୋଲିସ ସେମାନଙ୍କୁ ଗିରଫ କରିବାରେ ସଫଳ ହୋଇଥିଲା, ପୋଲିସ କମିଶନର ବିଜୟ ଶର୍ମା କହିଛନ୍ତି ।

ଗୁଳିମାଡ଼ରେ କେହି ଆହତ ହୋଇନାହାନ୍ତି । ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ ଏହି ଅପରାଧିମାନେ ଖୋଲାଖୋଲି ବିଧାୟକଙ୍କ ଘରକୁ ଆସୁଥିଲେ, ସେ କହିଛନ୍ତି ।

ତାଙ୍କୁ ଆକ୍ରମଣ କରିବା ପାଇଁ ଉଦ୍ୟମ ହୋଇନଥିଲା ଓ ସେ କୌଣସି ଅପରାଧିଙ୍କୁ ଜାଣି ନାହାନ୍ତି ବୋଲି ଜେନା ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ସାଦା ପୋଷାକଧାରୀ ପୋଲିସଙ୍କୁ ଦେଖି ଅପରାଧି ଆସିଥିବା ସନ୍ଦେହରେ ତାଙ୍କ ସୁରକ୍ଷାକର୍ମୀ ଗୁଳି ଚଳାଇଥିବା ସେ କହିଛନ୍ତି ।

ଗଞ୍ଜାମ ଜିଲ୍ଲା ସାନଖେମୁଣ୍ଡି ବିଧାୟକ ଜେନା ପୂର୍ବରୁ ଏକ ହତ୍ୟା ମାମଲାରେ ଜାମିନରେ ଅଛନ୍ତି । ବିଧାୟକଙ୍କ ସମେତ ତାଙ୍କ ବ୍ୟକ୍ତିଗତ ସୁରକ୍ଷା କର୍ମୀଙ୍କ ବିରୋଧରେ ପୋଲିସ ମାମଲା ରୁଜୁ କରିଛି ।

ଓଡିଶା ଡଟ୍ କମ୍