ଓଡ଼ିଶା ଡ଼ଟ୍ କମ୍ସମ୍ବାଦଦାତା
ଭୁବନେଶ୍ୱର, ଫେବୃୟାରୀ ୧୫(ଓଡ଼ିଶା ଡ଼ଟ୍ କମ୍) ରାଜ୍ୟରେ ମଧ୍ୟାହ୍ନ ଭୋଜନ କାର୍ଯ୍ୟକ୍ରମରେ ଶିଶୁ ମାନଙ୍କୁ ନିମ୍ନ ମାନର ଡ଼ାଲି ଦିଆଯାଉଥିବା ଅଭିଯୋଗ ହେବା ପରେ ମଙ୍ଗଳବାର ରାଜ୍ୟ ମାନବାଧିକାର କମିଶନ ମହିଳା ଓ ଶିଶୁ ବିକାଶ ବିଭାଗ ସଚିବଙ୍କ ଠାରୁ ରିପୋର୍ଟ ତଲବ କରିଛନ୍ତି ।
ଅଭିଯୋଗ ସଂପର୍କରେ ଦଶ ଦିନ ମଧ୍ୟରେ ରିପୋର୍ଟ ଦେବା ପାଇଁ ସରକାରଙ୍କୁ କୁହାଯାଇଥିବା କମିଶନ ଅଧ୍ୟକ୍ଷ ଆର୍.କେ ପାତ୍ର କହିଛନ୍ତି । ବର୍ତ୍ତମାନ ଯି ଏହି ଡ଼ାଲି ଯୋଗାଣ ହେଉଛି ତେବେ ତୁରନ୍ତ ଏହାକୁ ପରିବର୍ତ୍ତନ କରିବାକୁ ସରକାରଙ୍କୁ କୁହାଯାଇଥିବା ସେ ସାମ୍ବାଦିକ ମାନଙ୍କୁ କହିଛନ୍ତି ।
ବିଭିନ୍ନ ସରକାରୀ ଯୋଜନାରେ ମହିଳା ଓ ଶିଶୁ ମାନଙ୍କୁ ଦିଆଯାଉଥିବା ଡ଼ାଲି ଯୋଗାଣରେ ଅନିୟମିତତା ହୋଇଥିବା ଗତ ମାସ ଭିଜିଲାନ୍ସ ବିଭାଗ ଜାଣିବା ପରେ ଏହି ଘଟଣା ଲୋକଲୋଚନକୁ ଆସିଥିଲା ।
ଏହି ଦୁର୍ନୀତିରେ ଗତ ୫ ତାରିଖରେ ମହିଳା ଓ ଶିଶୁ ବିକାଶ ବିଭାଗ ମନ୍ତ୍ରୀ ପ୍ରମିଳା ମଲ୍ଲିକ ଇସ୍ତଫା ଦେଇଥିବା ବେଳେ ତିନି ଜଣ ବରିଷ୍ଠ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ତେବେ ଯେଉଁମାନେ ନିମ୍ନ ମାନର ଡ଼ାଲି ଯୋଗାଇଛନ୍ତି ସେମାନଙ୍କ ବିରୁଦ୍ଧରେ ଫୌଜାରୀ ମାମଲା ରୁଜୁ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି ।
ନିମ୍ନ ମାନର ଡ଼ାଲି ଖାଇଥିବା ଶିଶୁ ଓ ମହିଳା ମାନଙ୍କ ସ୍ୱାସ୍ଥ୍ୟ ପରୀକ୍ଷା କରିବା ପାଇଁ ଗତ ୧୦ ତାରିଖରେ ବିରୋଧୀ ଭାରତୀୟ ଜନତା ପାର୍ଟି(ବିଜେପି)କମିଶନଙ୍କ ଦ୍ୱାରସ୍ଥ ହୋଇଥିଲା ।
ଓଡିଶା ଡଟ୍ କମ୍
