ଓଡ଼ିଶା ଡ଼ଟ୍ କମ୍ ସମ୍ବ।ଦ ଦାତା
ପୁରୀ, ମଇ ୭(ଓଡ଼ିଶା ଡ଼ଟ୍ କମ୍) ପୁରୀ ସ୍ଥିତ ଏମାର ମଠରୁ ଉଦ୍ଧାର କରାଯାଇଥିବା ରୂପା ଇଟାକୁ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଶନିବାର କଡ଼ା ସୁରକ୍ଷା ମଧ୍ୟରେ ଜିଲ୍ଲା ପୋଲିସ ଅସ୍ତ୍ରାଗାରକୁ ସ୍ଥାନାନ୍ତର କରାଯାଇଛି ।
ଏସ୍ପିଙ୍କ ତତ୍ତ୍ୱାବଧାନରେ ମଠ ପରିସରରେ ଥିବା ଦୁଇଟି କୋଠରୀର ସିଲ୍ ଖୋଲାଯାଇ ପ୍ରାୟ ନବେ କୋଟି ଟଙ୍କାର ରୂପା ଇଟା, ଅନ୍ୟ ରୂପା ସାମଗ୍ରୀ ଓ ସୁନା ଅଳଙ୍କାରକୁ ଅସ୍ତ୍ରାଗାର ମଧ୍ୟରେ ଗଚ୍ଛିତ ରଖାଯାଇଛି ।
ଏହି ସମୟରେ ମାଜିଷ୍ଟ୍ରେଟ, ମଠ ପରିଚାଳନା କମିଟି ସଦସ୍ୟ ଓ ବରିଷ୍ଠ ପୋଲିସ ଅଧିକାରୀମାନେ ଉପସ୍ଥିତ ଥିଲେ । ଚାରି ପ୍ଲାଟୁନ୍ ସୁରକ୍ଷା କର୍ମଚାରୀ ଏବଂ ତିନି ଜଣ ଡିଏସ୍ପିଙ୍କ ଉପସ୍ଥିତିରେ ଦୁଇଟି ଭ୍ୟାନରେ ଶ୍ରମିକମାନେ ଏହି ରୁପାଇଟା ନେଇ ରଖିଥିଲେ । ପୂର୍ବରୁ ମଠ ଅଞ୍ଚଳ, ବଣିଆପଟିକୁ ସିଲ୍ କରିିଆଯାଇଥିବା ବେଳେ ସମସ୍ତ ଦୋକାନ ବଜାର ବନ୍ଦ ରହିଥିଲା ।
ମଠର ମରାମତି ସମୟରେ ଶ୍ରମିକମାନେ ରୂପା ଇଟାର ସନ୍ଧାନ ପାଇବା ସହ ଆଠ ଖଣ୍ଡ ରୁପାଇଟା ଚୋରିକରି ନେଇଯାଇଥିଲେ । ଏହି ଘଟଣାରେ ପୋଲିସ ଢେଙ୍କାନାଳରୁ ଦୁଇ ଜଣ ଶ୍ରମିକଙ୍କୁ ଗିରଫ କରିଥିଲା ।
ପରେ ଫେବୃଆରୀ ୨୬ ରେ ଏମାର ମଠର ଏକ ବନ୍ଦ କୋଠରୀରୁ ତିନୋଟି କାଠବାକ୍ସରୁ ଗୋଟିକ ୩୦ ରୁ୪୦ କେଜି ଓଜନର ପ୍ରାୟ ୫୨୨ଟି ଇଟା ଜବତ ହେବାପରେ ପୋଲିସ ମଠ ମହନ୍ତଙ୍କ ଚାଲିଚଳନ ଉପରେ ତୀକ୍ଷ୍ଣ ଦୃଷ୍ଟି ରଖିଥିଲା ଓ ମହନ୍ତଙ୍କ ସହ ଅନ୍ୟ ଛଅ ଜଣଙ୍କୁ ଗିରଫ କରିଥିଲା ।
ମହନ୍ତଙ୍କୁ ଗିରଫ କରାଯିବା ପରେ ଦେବୋତ୍ତର ବିଭାଗ ଗୋପାଳ ରାମାନୁଜ ଦ।ସଙ୍କୁ ମହନ୍ତ ପଦବୀରୁ ନିଲମ୍ବିତ କରିବା ସହିତ ଏକ ପାଞ୍ଚ ଜଣିଆ ପରିଚାଳନା କମିଟି ନିଯୁକ୍ତ କରିଥିଲେ ।
ଉଦ୍ଧାର କରାଯାଇଥିବା ରୂପାଇଟା ମଠ ପରିସରରେ ରଖିବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ରୁପାଇଟା ମଠ ପରିସରରେ ରଖାଯିବା ସୁରକ୍ଷିତ ନୁହେଁ ବୋଲି ସରକାରଙ୍କ ପକ୍ଷରୁ ଯୁକ୍ତି ଦର୍ଶାଯାଇଥିଲା । ହାଇକୋର୍ଟ ଏହି ଯୁକ୍ତି ଗ୍ରହଣ କରିବା ସହ କଡ଼ା ସୁରକ୍ଷା ମଧ୍ୟରେ ରୂପାଇଟାକୁ ପୁରୀ ଜିଲ୍ଲା ଅସ୍ତ୍ରାଗାରରେ ରଖିବାକୁ ନିର୍ଦ୍ଦେଶ ଦେଇଥିଲେ ।
ଓଡ଼ିଶା ଡ଼ଟ୍ କମ୍
