ଓଡ଼ିଶା ଡ଼ଟ୍ କମ୍ ସମ୍ବ।।ତା
ଭୁବନେଶ୍ୱର, ମଇ ୧୦(ଓଡ଼ିଶା ଡ଼ଟ୍ କମ୍) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱାଧିନ ରାଜ୍ୟ ମନ୍ତ୍ରୀମଣ୍ଡଳରେ ମଙ୍ଗଳବାର ଅଦଳବଦଳ କରାଯାଇଥିବା ବେଳେ ପାଞ୍ଚଜଣ ନୂଆ ମନ୍ତ୍ରୀ ଶପଥ ଗ୍ରହଣ କରିଛନ୍ତି ।
ରାଜଭବନରେ ଆୟୋଜିତ ଏକ ଉତ୍ସବରେ ରାଜ୍ୟପାଳ ମୂରଲୀଧର ଚନ୍ଦ୍ରକାନ୍ତ ଭଣ୍ଡାରେ ଏହି ମନ୍ତ୍ରୀ ମାନଙ୍କୁ ଶପଥପାଠ କରାଇଛନ୍ତି ।
ପୁରୀ ବିଧାୟକ ତଥା ପୂର୍ବତନ ବାଚସ୍ପତି ମହେଶ୍ୱର ମହାନ୍ତି, ପିପିଲି ବିଧାୟକ ପ୍ରଦୀପ ମହାରଥି, ସୋନପୁର ବିଧାୟକ ନିରଞ୍ଜନ ପୂଜାରୀ, ଚିକିଟି ବିଧାୟିକା ଉଷା ଦେଵୀ, ରାୟଗଡ଼ା ବିଧାୟକ ତଥା ପୂର୍ବତନ ଉପବାଚସ୍ପତି ଲାଲବିହାରୀ ହିମିରିକା ଶପଥ ଗ୍ରହଣ କରିଛନ୍ତି ।
ସେହିପରି ହସ୍ତତନ୍ତ ଓ ବୟନଶିଳ୍ପ ବିଭାଗ ରାଷ୍ଟ୍ରମନ୍ତ୍ରୀ ଥିବା ଅଞ୍ଜଳି ବେହେରା କ୍ୟାବିନେଟ୍ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ।
ମହେଶ୍ୱର ମହାନ୍ତି ପୁରୀ ନିର୍ବାଚନ ମଣ୍ଡଳୀରୁ ୧୯୯୫-୨୦୦୦, ୨୦୦୦-୨୦୦୪, ୨୦୦୪-୨୦୦୯ ଓ ୨୦୦୯ରୁ ବର୍ତ୍ତମାନ ପର୍ଯ୍ୟନ୍ତ ଚାରିଥର ବିଧାୟକ ହୋଇଥିବା ବେଳେ ୨୦୦୪ରୁ ୨୦୦୮ ପର୍ଯ୍ୟନ୍ତ ବିଧାନସଭା ବାଚସ୍ପତି ଭାବେ କାର୍ଯ୍ୟ କରିଥିଲେ ।
ପ୍ରଦୀପ ମହାରଥି ପିପିଲିରୁ ୧୯୮୫-୯୦, ୯୦-୯୫, ୨୦୦୦-୦୪, ୦୪-୦୯ ଓ ୨୦୦୯ରୁ ବର୍ତ୍ତମାନ ପର୍ଯ୍ୟନ୍ତ ପାଞ୍ଚଥର ବିଧାୟକ ହୋଇଥିବା ବେଳେ ୨୦୦୦ରୁ୨୦୦୪ ପର୍ଯ୍ୟନ୍ତ ସରକାରୀ ଦଳ ମୁଖ୍ୟ ସଚେତକ ଭାବେ କାର୍ଯ୍ୟ କରିଥିଲେ ।
ସେହିପରି ଲାଲବିହାରୀ ହିମିରିକା ରାୟଗଡ଼ାରୁ ୨୦୦୦-୦୪ ଓ ୨୦୦୯ରୁ ବର୍ତ୍ତମାନ ପର୍ଯ୍ୟନ୍ତ ଦୁଇ ଥର ବିଧାୟକ ହୋଇଥିବା ବେଳେ ଉଷା ଦେବୀ ଚିକିଟିରୁ ୧୯୯୦-୯୫, ୨୦୦୦-୨୦୦୪, ୨୦୦୪ ୨୦୦୯ ଓ ୨୦୦୯ରୁ ବର୍ତ୍ତମାନ ପର୍ଯ୍ୟନ୍ତ ଚାରିଥର ବିଧାୟିକା ଭାବେ ନିର୍ବାଚିତ ହୋଇଛନ୍ତି ।
ନିରଞ୍ଜନ ପୂଜାରୀ ୨୦୦୦ରୁ ୨୦୦୪ ଓ ୨୦୦୪ରୁ ୨୦୦୯ ପର୍ଯ୍ୟନ୍ତ ବିନିକା ନିର୍ବାଚନ ମଣ୍ଡଳୀରୁ ଓ ୨୦୦୯ରେ ସୋନପୁର ବିଧାୟକ ଭାବେ ନିର୍ବାଚିତ ହୋଇଛନ୍ତି ।
ଓଡ଼ିଶା ଡ଼ଟ୍ କମ୍
