ଓଡ଼ିଶା ଡ଼ଟ୍ କମ୍ ସମ୍ବ।ଦଦାତା
ନୂଆଦିଲ୍ଲୀ, ମଇ ୧୨(ଓଡ଼ିଶା ଡ଼ଟ୍ କମ୍) କେନ୍ଦ୍ରୀୟ ଲୋକସେବା ଆୟୋଗ(ୟୁପିଏସ୍ସି) ଦ୍ୱାରା ପରିଚାଳିତ ୨୦୧୦ ବର୍ଷର ସିଭିଲ ସର୍ଭିସ ପରୀକ୍ଷାରେ ଓଡ଼ିଶାର ଶ୍ୱେତା ମହାନ୍ତି ସର୍ବଭାରତୀୟ ସ୍ତରରେ ଦ୍ୱିତୀୟ ସ୍ଥାନ ହାସଲ କରିଛନ୍ତି ।
ବୁଧବାର ଏହି ପରୀକ୍ଷା ଫଳ ପ୍ରକାଶ ପାଇଥିବା ବେଳେ ମାଡ଼୍ରାସର ଆଇନ ଛାତ୍ରୀ ଏସ୍.ଦିବ୍ୟର୍ଶିନୀ ପ୍ରଥମ ଏବଂ ହାଇଦ୍ରାବାଦ ରହୁଥିବା ଓଡ଼ିଶାର କମ୍ପ୍ୟୁଟର ଇଂଜିନିୟର ଛାତ୍ରୀ ଶ୍ୱେତା ଦ୍ୱିତୀୟ ସ୍ଥାନରେ ରହିଛନ୍ତି ।
ଦିବ୍ୟର୍ଶିନୀ ଦ୍ୱିତୀୟ ଥର ପାଇଁ ଏହି ପରୀକ୍ଷା ଦେଇଥିବା ବେଳେ ଶ୍ୱେତା ତୃତୀୟ ଥର ପାଇଁ ପରୀକ୍ଷା ଦେଇଥିଲେ ।
୧୯୭୯ ବ୍ୟାଚ୍ ଆନ୍ଧ୍ରପ୍ରଶେ କ୍ୟାଡ଼ରର ଆଇଏଏସ୍ ଅଫିସର ପ୍ରସନ୍ନ କୁମାର ମହାନ୍ତିଙ୍କ ଝିଅ ଶ୍ୱେତାପ୍ରଥମ ଥର ଏହି ପରୀକ୍ଷା ଦେଇ ଅକୃତ କାର୍ଯ୍ୟ ହୋଇଥିବା ବେଳେ ୨୦୦୭ରେ ଦ୍ୱିତୀୟ ଥର ପରୀକ୍ଷା ଦେଇ ଭାରତୀୟ ରାଜସ୍ୱ ସେବା(ଆଇଆର୍ଏସ୍) ପାଇଥିଲେ । ସେ ବର୍ତ୍ତମାନ ପଶ୍ଚିମବଙ୍ଗର ସିଲିଗୁଡ଼ିରେ କାର୍ଯ୍ୟ କରୁଛନ୍ତି ।
ଶ୍ୱେତାଙ୍କ ସ୍ୱାମୀ ରଜତ ସାଇନି ମଧ୍ୟ ୨୦୦୭ ବ୍ୟାଚ୍ର ଜଣେ ଆଇଏଏସ୍ ଅଫିସର ।
“”ପରୀକ୍ଷା ଫଳ ଜାଣି ମୁଁ ବହୁତ ଖୁସି, ବହୁତ ଦିନରୁ ଏହା ମୋର ସ୍ୱପ୍ନ ଥିଲା । ବାପା ମୋ ପାଇଁ ରୋଲ ମଡ଼େଲ ଓ ମୁଁ ତାଙ୍କ ପାଙ୍କ ଅନୁସରଣ କରି ସମାଜ ପାଇଁ କାର୍ଯ୍ୟ କରିବି” ସେ କହିଛନ୍ତି ।
ସଫଳତା ପଛରେ ପରିବାର, ଶାଶୁଘର ଲୋକ ତଥା ମୋ ସ୍ୱାମୀଙ୍କ ହାତ ରହିଛି ବୋଲି ସେ କହିଛନ୍ତି । ପରୀକ୍ଷା ପାଇଁ ସେ ସାଧାରଣ ପ୍ରଶାସନ ଏବଂ ଏନ୍ଥ୍ରୋପଲୋଜିକୁ ମୁଖ୍ୟ ବିଷୟ ଭାବେ ନେଇଥିଲେ ।
ପରୀକ୍ଷା ପାଇଁ ୫ଲକ୍ଷ ୪୭ ହଜାର ୬୯୮ ଜଣ ପ୍ରାର୍ଥୀ ଆବେଦନ କରିଥିଲେ ଓ ସେମାନଙ୍କ ମଧ୍ୟରୁ ୨ ଲକ୍ଷ ୬୯ ହଜାର ୩୬ ଜଣ ଗତ ୨୦୧୦ ମଇ ୨୩ରେ ଅନୁଷ୍ଠିତ ପ୍ରିଲିମିନାରୀ ପରୀକ୍ଷାରେ ଅଂଶଗ୍ରହଣ କରିଥିଲେ ।
ଓଡ଼ିଶା ଡ଼ଟ୍ କମ୍
