ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ନୂଆଦିଲ୍ଲୀ, ନଭେମ୍ବର ୧୦(ଓଡ଼ିଶା ଡ଼ଟ୍ କମ୍) ନୂଆଦିଲ୍ଲୀ ସ୍ଥିତ ଇଣ୍ଡିଆ ଗେଟ୍ରେ ଗୁରୁବାର ସେଠାରେ ରହୁଥିବା ଓଡ଼ିଆମାନେ ଏକତ୍ରିତ ହୋଇ ବୋଇତ ବନ୍ଦାଣ ଉତ୍ସବ ପାଳନ କରିଛନ୍ତି ।
ଗତ ୧୫ ବର୍ଷ ଧରି ଳିତ ଲୋକଙ୍କ ପାଇଁ କାର୍ଯ୍ୟକରି ଆସୁଥିବା ବାଲ ଜାଗୃତି ସଂଘ ପକ୍ଷରୁ ଓଡ଼ିଶାର ପାରମ୍ପରିକ ଡ଼ଙ୍ଗା ଭସା ଏବଂ ବୋଇତ ବନ୍ଦାଣ ଉତ୍ସବ ପାଳନ କରାଯାଇଛି ।
ଭୋର ସକାଳୁ ହୃଷୀକେଶ ପାଣିଗ୍ରାହୀ ଶଂଖ ଧ୍ୱନୀ ଓ ବେଦ ପାଠ କରିବା ପରେ ଉତ୍ସବ ଆରମ୍ଭ କରାଯାଇଥିଲା । କାର୍ତିକ ମାସର ପୂର୍ଣ୍ଣମୀଦିନ ଓଡ଼ିଆ ସାଧବ ପୁଅମାନେ ବେପାର ବଣିଜ କରିବାକୁ ସାତ ଦରିଆପାରି ହୋଇଯାଉଥିଲେ, ଏହି ପରମ୍ପରାକୁ ମନେପକାଇବା ପାଇଁ ବୋଇତ ବନ୍ଦାଣ ଉତ୍ସବ ପାଳନ କରାଯାଇଥାଏ ।
ଏହିଦିନ ରାଧା କୃଷ୍ଣଙ୍କ ରାଷ ପୂର୍ଣ୍ଣିମା ଉତ୍ସବ ମଧ୍ୟ ସଂଘ ପକ୍ଷରୁ ପାଳନ କରାଯାଇଥାଏ ବୋଲି ବୋଇତ ବନ୍ଦାଣ ଉତ୍ସବର ଅଧ୍ୟକ୍ଷ ତଥା ସଂଘର ସଭାପତି ଗୋବର୍ଦ୍ଧନ ଧଳ କହିଛନ୍ତି ।
ଏହି ଆଧ୍ୟାତ୍ମିକ କାର୍ଯ୍ୟ ଅବସରରେ କସ୍ତୁରୀ ପଟ୍ଟନାୟକଙ୍କ ସଂକଳ୍ପ ଗୃପର କଳାକାରମାନେ ଓଡ଼ିଶୀ ନୃତ୍ୟ ପରିବେଷଣ କରିଥିବା ବେଳେ ଗୁରୁ ହରିନାରାୟଣ ଓଡ଼ିଶୀ ଭଜନ ପରିବେଷଣ କରିଥିଲେ ।
ସାଧବ ମାନଙ୍କ ନୌବାଣିଜ୍ୟ ପରମ୍ପରା ଅନୁଯାୟୀ ସଂଘ ପକ୍ଷରୁ ସୁସଜ୍ଜିତ ଡ଼ଙ୍ଗା ଭସାଣିର ଆୟୋଜନ କରାଯାଇଥିଲା ଏବଂ ଲୋକମାନେ ଏଥିରେ ବସିଥିଲେ ।
ସାଂସଦ ବୈଷ୍ଣବ ପରିଡ଼ା, ଅମରେନ୍ଦ୍ର ଖଟୁଆ, ସୂର୍ଯ୍ୟମଣି ଖୁନ୍ଟିଆ, ଏନ୍.କେ.ସାହୁ, ଶ୍ରୀଦେବ ନନ୍ଦ, ଅରୁଣ କୁମାର ରଥ, ଜି.ଏସ୍.ପଟ୍ଟନାୟକ, ମୋନିକା ଦ।ଶ, ପି.କେ.ହୋତା, ପି.କେ.ମହାପାତ୍ର ଏବଂ ତୁଷାର ମହାପାତ୍ର ପ୍ରମୁଖ ଉତ୍ସବରେ ଯୋଗ ଦେଇଥିଲେ ।
ଓଡ଼ିଶା ଡ଼ଟ୍ କମ୍
