ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ରାୟଗଡ଼ା, ଜାନୁୟାରୀ ୬(ଓଡ଼ିଶା ଡ଼ଟ୍ କମ୍) ରାୟଗଡ଼ା ସହରରେ ଥିବା ଏକ ଧାନ କଳରୁ ସାଧାରଣ ବଂଟନ ବ୍ୟବସ୍ଥା(ପିଡ଼ିଏସ୍) ପାଇଁ ଥିବା ୨୫୦ କ୍ୱିନ୍ଟାଲ ଚାଉଳ ଜବତ କରିଥିବା ପୋଲିସ ଶୁକ୍ରବାର କହିଛି ।
ପୋଲିସର ଏକ ସ୍ୱତନ୍ତ୍ର ଦଳ ଗୁରୁବାର ଭେଙ୍କଟଲକ୍ଷ୍ମୀ ଧାନକଳ ଉପରେ ଚଢାଉ କରି ଏହି ଚାଉଳ ଜବତ କରିବା ସହ ଷ୍ଟୋର ରୁମ୍ରେ ବେଆଇନ ଭାବେ ଗଚ୍ଛିତ ଥିବା ୯୦୦ ବସ୍ତା ଧାନ ଓ ଟ୍ରକ୍ରେ ଥିବା ୧୫୦ ବସ୍ତା ଧାନ ଜବତ କରିଥିବା ଜଣେ ଅଧିକାରୀ କହିଛନ୍ତି ।
ଚଢାଉ ସମୟରେ ଧାନକଳର ମାଲିକ ଭି.ନାରାୟଣ ମୂର୍ତି ପୋଲିସକୁ ୮୦ ହଜାର ଟଙ୍କା ଲାଂଚ ଯାଚିଥିଲେ । ପରେ ଉକ୍ତ ଲାଂଚ ଟଙ୍କା ମଧ୍ୟ ପୋଲିସ ଜବତ କରିଥିଲା ।
ଅତ୍ୟାବଶ୍ୟକ ସାମଗ୍ରୀ ଆଇନ ଅନୁଯାୟୀ ତାଙ୍କ ବିରୁଦ୍ଧରେ ମାମଲା ରୁଜୁ କରାଯାଇଥିବା ଅଧିକାରୀ ଜଣକ କହିଛନ୍ତି ।
ଓଡ଼ିଶା ଡ଼ଟ୍ କମ୍
