ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ସୋର, ଜାନୁୟାରୀ ୧୦(ଓଡ଼ିଶା ଡ଼ଟ୍ କମ୍) ବାଲେଶ୍ୱର ଜିଲ୍ଲା ସୋର ପୌର ପରିଷର ଅନ୍ତର୍ଗତ କେତେକ ଗ୍ରାମର ବିଡ଼ି ଶ୍ରମିକମାନେ ସରକାରଙ୍କ ଦ୍ୱାରାକାର୍ଯ୍ୟକାରୀ ବିଭିନ୍ନ ଯୋଜନାରୁ ବଂଚିତ ହେଉଛନ୍ତି ।
ପାରମହଲା, ପଠାଣମହଲା, କାଶୀପୁର, ଖପରାନାଳ, ଛତ୍ରପୁର, କାଜିମହଲା, ହାଡ଼ିମହଲା, ଇଟୁଆ
ପ୍ରଭୃତି ଗ୍ରାମରେ ପ୍ରାୟ ପଂଚ ଶହରୁ ଉଦ୍ଧ୍ୱର୍ ଲୋକ ବିଡ଼ି ଶ୍ରମିକ ଭାବେ କାର୍ଯ୍ୟ କରନ୍ତି ।
ଏମାନଙ୍କ ମଧ୍ୟରେ ମହିଳାଙ୍କ ସଂଖ୍ୟା ଅଧିକ ହୋଇଥିବା ବେଳେ ସରକାରଙ୍କ ବିଭିନ୍ନ ଯୋଜନାର
ସୁଫଳ ସେମାନଙ୍କ ନିକଟରେ ପହଂଚିପାରୁ ନାହିଁ । ଫଳରେ ଶ୍ରମିକମାନେ ବିଭିନ୍ନ ସମସ୍ୟା ମଧ୍ୟରେ
ଜୀବନ ବିତାଉଛନ୍ତି ।
ଏକ ହଜାର ବିଡ଼ି ପ୍ରସ୍ତୁତ କଲେ ଏମାନେ ପାରିଶ୍ରମିକ ବାବଦକୁ ମାତ୍ର ତିରିଶ ଟଙ୍କା ପାଇଥାନ୍ତି । ଜଣେ ଶ୍ରମିକ ଗୋଟିଏଦିନରେ ସର୍ବାଧିକ ଏକ ହଜାର ବିଡ଼ିରୁ ଅଧିକ ତିଆରି କରିପାରନ୍ତି ନାହିଁ ।
ତେଣୁ ଜଣେ ଶ୍ରମିକଦିନସାରା ମାତ୍ର ତିରିଶ ଟଙ୍କା ରୋଜଗାର କରିବାକୁ ସକ୍ଷମ ହୋଇଥାଏ । କାରଣ ପ୍ରଥମେ କେନ୍ଦୁପତ୍ରକୁ ବିଡ଼ି ଆକାରରେ କାଟିବା ପରେ ସେଥିରେ ତମାଖୁ ଦେଇ ମୋଡ଼ି ସୂତାରେ ବାନ୍ଧି ବଣ୍ଡଲ କରାଯାଏ ।
ପ୍ରତି ବଣ୍ଡଲରେ ୨୫ଟି ବିଡ଼ି ରହିଥାଏ । ତମାଖୁରେ କାମ କରୁଥିବାରୁ ଶ୍ରମିକ ମାନଙ୍କ ସ୍ୱାସ୍ଥ୍ୟ ପାଇଁ ତାହା କ୍ଷତିକାରକ ହୋଇଥିବାରୁ ସେମାନଙ୍କୁ ସରକାର ସ୍ୱାସ୍ଥ୍ୟ ସେବା ଯୋଗାଇବାର ନିୟମ ରହିଛି । ତେବେ ଏହି ଶ୍ରମିକମାନେ ସ୍ୱାସ୍ଥ୍ୟସେବା ପାଇବାରେ ମୁଖ୍ୟ ପ୍ରତିବନ୍ଧକ ସୃଷ୍ଟି କରିଛି କାର୍ଡ଼ ।
୧୯୯୮ରେ ବିଡ଼ି ଶ୍ରମିକ ମାନଙ୍କୁ ଚିହ୍ନଟ କରିବା ପାଇଁ ଭାରତ ସରକାରଙ୍କ ପକ୍ଷରୁ ଲେବର
ୱେଲଫୟାର ଅର୍ଗାନାଇଜେସନ, ଭୁବନେଶ୍ୱର ରିଜନ, ଓଡ଼ିଶା ଦ୍ୱାରାିଆଯାଇଥିବା ପରିଚୟପତ୍ର ନବୀକରଣ କରାଯାଇନାହିଁ କିମ୍ବା ନୂତନ କାର୍ଡ଼ ପ୍ରଦାନ କରାଯାଇନାହିଁ ।
ତେଣୁ ନୂଆ ଏବଂ ପୁରୁଣା କାର୍ଡ଼ଧାରୀ ଉଭୟେ ଏହି ସ୍ୱାସ୍ଥ୍ୟ ସେବା ପାଇବାରୁ ବଂଚିତ ହେଉଛନ୍ତି । କାର୍ଡ଼ ନବୀକରଣ ଏବଂ ନୂଆକାର୍ଡ଼ କରାଇ ଦେବାର ପ୍ରତିଶୃତି ଦେଇ ବିଭିନ୍ନ ଲୋକ ଶ୍ରମିକ ମାନଙ୍କ ଠାରୁ ଜଣ ପିଛା ୨୫୦ରୁ ୩୦୦ଟଙ୍କା ନେଇଯିବା ପରେ ସେମାନଙ୍କର ଦେଖା ମିଳିନଥାଏ ବୋଲି ଶ୍ରମିକ ମାନେ ଅଭିଯୋଗ କରିଛନ୍ତି ।
ବୁଡ଼ିଗଲା ଲୋକ କୁଟାଖିଅକୁ ଭରଷା କଲାଭଳି ଗରିବ ଶ୍ରମିକ ମାନେ କାର୍ଡ଼ଖଣ୍ଡିଏ ପାଇବା ଆଶାରେ ଠକ ଲାଲ୍ ମାନଙ୍କ ଶିକାର ହେଉଛନ୍ତି । ତେବେ ସେମାନେ କାହାକୁ କିଛି କହିନପାରି ଚୁପ୍ ରହିଥାନ୍ତି ।
ଏହା ବ୍ୟତୀତ ଗରିବ ଶ୍ରମିକ ମାନଙ୍କ ପାଇଁ କୌଣସି ବୀମା ଯୋଜନା କିମ୍ବା ଋଣର ସୁବିଧା ଯୋଗାଇ ଦିଆଯାଉନଥିବା ସେମାନେ ଅଭିଯୋଗ କରିଛନ୍ତି ।
ଓଡ଼ିଶା ଡ଼ଟ୍ କମ୍
