ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଜଗତସିଂହପୁର, ଫେବୃୟାରୀ ୧୫(ଓଡ଼ିଶା ଡ଼ଟ୍ କମ୍) ସରକାରୀ ପେନ୍ସନ୍ ଗ୍ରହଣ ନକରି ୯୧ ବର୍ଷ ବୟସରେ ପଦାର୍ପଣ କରିଛନ୍ତି ଜଗତସିଂହପୁର ଜିଲ୍ଲାର ସ୍ୱାଧୀନତା ସଂଗ୍ରାମୀ ବୃନ୍ଦାବନ ଦାସ ।
ତେବେ ଅଧିକ ବୟସ ଯୋଗୁଁ ବର୍ତମାନ କେତେକ ଗ୍ରାମବାସୀ ଏବଂ ପିଲାମାନେ ତାଙ୍କର ଯତ୍ନ
ନେଉଥିବା ଏହି ସ୍ୱାଧୀନତା ସଂଗ୍ରାମୀ କହିଛନ୍ତି ।
୯୧ ବର୍ଷ ବୟସରେ ପଦାର୍ପଣ କରିଥିଲେ ମଧ୍ୟ ବର୍ତମାନ ସେ ସ୍ୱାଧୀନତା ସଂଗ୍ରାମ କଥା ମନେପକାଉଛନ୍ତି । ନବକୃଷ୍ଣ ଚୌଧୁରୀ, ମାଳତୀ ଦେବୀ, ସୁରେନ୍ଦ୍ର ଦ୍ଵିବେଦୀ ଏବଂ ନିତ୍ୟାନନ୍ଦ କାନୁନ୍ଗୋଙ୍କ ଭଳି ବହୁ ବିଶିଷ୍ଟ ବ୍ୟକ୍ତି ତାଙ୍କ ଘରେ ଏକତ୍ରିତ ହେଉଥିଲେ ।
“ମୁଁ ସ୍ୱାଧୀନତା ସଂଗ୍ରାମୀ ହୋଇ ମଧ୍ୟ ପେନ୍ସନ୍ ଗ୍ରହଣ କରୁନାହିଁ । ଅଧିକ ବୟସ ଯୋଗୁଁ ବର୍ତମାନ କେତେକ ଗ୍ରାମବାସୀ ଏବଂ ପିଲାମାନେ ମୋର ଯତ୍ନ ନେଉଛନ୍ତି” ବୃନ୍ଦାବନ କହିଛନ୍ତି ।
ଜେଲ୍ ରୁ ବାହାରିବା ପରେ ୧୯୪୦ରେ ଗୁଜୁରାଟର ସାବରମତି ଆଶ୍ରମକୁ ଯାଇ ସେଠାରେ ଦୀର୍ଘ ଦୁଇ ବର୍ଷ ରହିଥିଲି ଏବଂ ଓଡ଼ିଶାର ଏକମାତ୍ର ସ୍ୱାଧୀନତା ସଂଗ୍ରାମୀ ଭାବେ ଗାନ୍ଧୀଜୀଙ୍କ ସହ କାମ କରିଥିଲି, ସେ କହିଛନ୍ତି ।
୧୯୪୨ରେ ଗାନ୍ଧୀଜୀ ଭାରତ ଛାଡ଼ ଆନ୍ଦୋଳନ ଡ଼ାକରା ଦେଇଥିଲେ ଏବଂ ଓଡ଼ିଶାରେ କାମ କରିବାକୁ ମତେ କହିଥିଲେ । ଏହାପରେ ମୁଁ ଆଶ୍ରମ ଛାଡ଼ି ଓଡ଼ିଶା ଆସିଥିଲି, ସେ କହିଛନ୍ତି ।
ମୃତ୍ୟୁ ପୂର୍ବରୁ ଆଉ ଥରେ ସାବରମତି ଆଶ୍ରମ ଯିବାକୁ ଇଚ୍ଛା ରହିଛି କିନ୍ତୁ ଆର୍ଥିକ ଅବସ୍ଥା ଏବଂ ସ୍ୱାସ୍ଥ୍ୟବସ୍ଥା ଠିକ୍ ନଥିବାରୁ ଏହା ସମ୍ଭବ ହୋଇପାରୁ ନାହିଁ ବୋଲି କହନ୍ତି ବୃନ୍ଦାବନ ।
“ମୁଁ ପେନ୍ସନ୍ ପାଇଁ କେବେ ଦାବି କରି ନାହିଁ । ନିଃସ୍ୱାର୍ଥପରତା ଉପରେ ବିଶ୍ୱାସ କରେ । ଗାନ୍ଧୀଜୀଙ୍କ ଆଦର୍ଶ ମାର୍ଗରେ ଚାଲିଛି ଓ ବର୍ତମାନ ମଧ୍ୟ ଖଦି ପିନ୍ଧୁଛି” ସେ କହିଛନ୍ତି ।
ଏହି ସଂଗ୍ରାମର କୌଣସି ମୂଲ୍ୟ ନାହିଁ କିମ୍ବା ଏହା ବଳରେ କିଛି ପାଇବାକୁ ଆଶା ନାହିଁ । ଦେଶରୁ ବିଦେଶୀଙ୍କୁ ହଟାଇବା ପାଇଁ ସେମାନଙ୍କ ସହ ଲଢେଇ କରି ୧୯୩୯ ଏବଂ ୧୯୪୨ରେ କାରାବରଣ କରିଛି, ସେ କହିଛନ୍ତି ।
ଓଡ଼ିଶାରେ ପ୍ରାୟ ପାଞ୍ଚ ଶହ ନକଲି ସ୍ୱାଧୀନତା ସଂଗ୍ରାମୀ ପେନ୍ସନ୍ ପାଉଛନ୍ତି । ସରକାର ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ୍ ବୋଲି ସେ କହିଛନ୍ତି ।
୬୫ ବର୍ଷ ତଳେ ସଂଗ୍ରାମ କରି ବ୍ରିଟିଶ ମାନଙ୍କୁ ଦେଶରୁ ତଡ଼ିବାରେ ସଫଳ ହୋଇଥିବା ବୃନ୍ଦାବନ ସ୍ୱାଧୀନ ଭାରତରେ ବର୍ତମାନର ପ୍ରଶାସନିକ ବାବୁ ଏବଂ ଅଧିକାରୀଙ୍କ କାର୍ଯ୍ୟକଳାପ ନେଇ କ୍ଷୋଭ ପ୍ରକାଶ କରିଛନ୍ତି ।
ଗାଁ ରାସ୍ତା ମରାମତି ଏବଂ ପିଇବା ପାଣି ପାଇଁ ବାରମ୍ବାର ଅଧିକାରୀ ମାନଙ୍କୁ କହିଥିଲେ ମଧ୍ୟ କୌଣସି ସୁଫଳ ମିଳିନଥିବା ସେ କହିଛନ୍ତି ।
ସ୍ୱାଧୀନତା ସଂଗ୍ରାମରେ ତାଙ୍କର ଭୂମିକା ପାଇଁ ନିକଟରେ ଏକ କାର୍ଯ୍ୟକ୍ରମରେ ଗ୍ରାମବାସୀମାନେ ବୃନ୍ଦାବନଙ୍କୁ ସମ୍ବର୍ଦ୍ଧିତ କରିଛନ୍ତି ।
ଓଡ଼ିଶା ଡ଼ଟ୍ କମ୍
