ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ମାର୍ଚ୍ଚ ୨୧(ଓଡ଼ିଶା ଡ଼ଟ୍ କମ୍) ପର୍ଯ୍ୟଟକଙ୍କ ମୁକ୍ତି ପାଇଁ ରାଜ୍ୟ ସରକାର ଦେଇଥିବା ପ୍ରସ୍ତାବ ଅନୁଯାୟୀ ମାଓବାଦୀମାନେ ପୁଣି ଦୁଇ ନୂଆ ମଧ୍ୟସ୍ଥିଙ୍କ ନାମ ଦେଇଛନ୍ତି ।
ଏହି ପ୍ରସ୍ତାବ ଅନୁଯାୟୀ ସେମାନେ ମଙ୍ଗଳବାର ରାତିରେ ପ୍ରଫୁଲ୍ଲ ସାମନ୍ତରା ଏବଂ ବିଡ଼ି ଶର୍ମାଙ୍କ ନାମ ଦେଇଥିବା ବେଳେ ସମୟସୀମାକୁ ମଧ୍ୟ ବୁଧବାର ସଂଧ୍ୟା ପର୍ଯ୍ୟନ୍ତ ବୃଦ୍ଧି କରିଛନ୍ତି ।
ମଧ୍ୟସ୍ଥତା ପାଇଁ ମାଓନେତା ନାରାୟଣ ସାନ୍ୟାଲ, ଦଣ୍ଡପାଣି ମହାନ୍ତି ଓ ବିଶ୍ୱପ୍ରିୟ କାନୁନ୍ଗୋଙ୍କ ନାମ ପୂର୍ବରୁ ମାଓବାଦୀମାନେ ସୁପାରିସ କରିଥିଲେ । ସାନ୍ୟାଲ ଏବଂ ବିଶ୍ୱପ୍ରିୟଙ୍କ ମଧ୍ୟସ୍ଥତାକୁ ସରକାର ଗ୍ରହଣ ନକରି ନୂଆ ମଧ୍ୟସ୍ଥିଙ୍କ ନାମ ସୁପାରିଶ ପାଇଁ ପ୍ରସ୍ତାବ ଦେଇଥିଲେ ।
ସାନ୍ୟାଲ ବର୍ତମାନ ଛତିଶଗଡ଼ ଜେଲରେ ଆଜୀବନ କାରାଦଣ୍ଡ ଭୋଗୁଥିବାରୁ ସେ ମଧ୍ୟସ୍ଥତା କରିବା ସମ୍ଭବ ନୁହେଁ ଏବଂ କାନୁନ୍ଗୋ ମାଓବାଦୀଙ୍କ ପକ୍ଷରୁ ମଧ୍ୟସ୍ଥତା କରିବାକୁ ରାଜି ନୁହନ୍ତି ବୋଲି ଗଣମାଧ୍ୟମ ରିପୋର୍ଟରୁ ଜଣାଯାଇଛି ବୋଲି ମଙ୍ଗଳବାର ମୁଖ୍ୟମନ୍ତ୍ରୀ ବିଧାନସଭାରେ କହିଥିଲେ ।
ତେବେ ସରକାରଙ୍କ ପକ୍ଷରୁ ପଞ୍ଚାୟତିରାଜ ସଚିବ, ଗୃହ ସଚିବ ଏବଂ ଆଦିବାସୀ କଲ୍ୟାଣ ବିଭାଗ ସଚିବ ମଧ୍ୟସ୍ଥତା କରିବେ ବୋଲି କୁହାଯାଇଛି ।
ଓଡ଼ିଶା ଡ଼ଟ୍ କମ୍
