ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ମାର୍ଚ୍ଚ ୩୧(ଓଡ଼ିଶା ଡ଼ଟ୍ କମ୍) ବରଗଡ଼ରେ ଏକ ବୃହତ୍ ହସ୍ତତନ୍ତ ପୁଞ୍ଜ ପ୍ରତିଷ୍ଠା କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର କେନ୍ଦ୍ର ବୟନଶିଳ୍ପ ମନ୍ତ୍ରୀ ଆନନ୍ଦ ଶର୍ମାଙ୍କୁ ପ୍ରସ୍ତାବ ଦେଇଛନ୍ତି ।
ବୁଣାକାର ମାନଙ୍କୁ ହସ୍ତତନ୍ତ ବସ୍ତ୍ରର ବିକ୍ରୟ ଉପରେ ପୂର୍ବରୁ ଦିଆଯାଉଥିବା ଦଶ ପ୍ରତିଶତ ରିହାତି ପୂନର୍ବାର ଲାଗୁ କରିବାକୁ ସେ କହିଛନ୍ତି । ଏହା ହସ୍ତତନ୍ତ ବସ୍ତ୍ର ବ୍ୟବସାୟରେ ଉନ୍ନତି ଆଣିବା ସହିତ ବୁଣାକାର ମାନଙ୍କୁ ନିୟମିତ କାମ ମିଳିବାରେ ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ସେହିପରି ଜାତୀୟ ଫ୍ୟାସନ ଟେକ୍ନୋଲୋଜି ସଂସ୍ଥାରେ ଚଳିତ ଶିକ୍ଷା ବର୍ଷରୁ ଫେସନ ଡ଼ିଜାଇନ ଓ ଆସେସୋରି ଡ଼ିଜାଇନ ନାମକଦୁଇଟି ନୂତନ ପାଠ୍ୟକ୍ରମ ଆରମ୍ଭ କରିବାକୁ ମଧ୍ୟ ପ୍ରସ୍ତାବ ଦିଆଯାଇଛି ।
ଏହାସହ ଅନୁଗୁଳ ଠାରେ ଏକ ଆଲୁମିନିୟମ ପାର୍କ ପ୍ରତିଷ୍ଠାରେ କେନ୍ଦ୍ର ସରକାର ସହାୟତା ଦେବା, ଆପାରେଲ ପାର୍କ ନିର୍ମାଣ, ସାମୁ୍ରିକ ରପ୍ତାନୀକାରୀ ମାନଙ୍କୁ ସହାୟତା ପାଇଁ ପାରାଦ୍ବୀପ ଠାରେ ଭିତ୍ତିଭୂମି ସୁବିଧା ନିର୍ମାଣ ସଂପର୍କରେ ଶର୍ମାଙ୍କୁ ଅବଗତ କରାଯାଇଛି ।
ଓଡ଼ିଶା ଗସ୍ତରେ ଆସିଥିବା ଶର୍ମା ସଚିବାଳୟରେ ମୁଖ୍ୟମନ୍ତ୍ରୀଙ୍କ ସହ ହସ୍ତତନ୍ତ ଓ ବୟନଶିଳ୍ପ କାର୍ଯ୍ୟକ୍ରମ ସଂପର୍କରେ ଆଲୋଚନା କରିଛନ୍ତି ।
ଓଡ଼ିଶା ଡ଼ଟ୍ କମ୍
