ଓଡ଼ିଶା ଡ଼ଟ୍ କମ୍ ସମ୍ବାଦଦାତା
କଟକ, ଅପ୍ରେଲ ୨(ଓଡ଼ିଶାଡ୍ଟ୍ କମ୍) କଟକ ବାରବାଟୀ ଷ୍ଟାଡ଼ିୟମ୍ ପରିସରରେ ବିଶ୍ୱର ଶ୍ରେଷ୍ଠ ବ୍ୟାଟ୍ସମ୍ୟାନ୍ ସଚିନ୍ ତେନ୍ଦୁଲକରଙ୍କ ନାମରେ ନାମିତ ନବନିର୍ମିତ ମିନି ଇନ୍ଡୋର ହଲ୍ ଉ୍ଘାଟିତ ହୋଇଯାଇଛି ।
ମୋଟ୍ ୧୬ କୋଟି ଟଙ୍କା ବ୍ୟୟରେ ନିର୍ମିତ ଏହି ଅତ୍ୟାଧୁନିକ ଶୀତତାପ ନିୟନ୍ତ୍ରିତ ଇନ୍ଡୋର ହଲ୍ ପାଇଁ ବିସିସିଆଇ ୮ କୋଟି ଟଙ୍କା ଓ ଓସିଏ ୮ କୋଟି ଟଙ୍କା ପ୍ରଦାନ କରିଛି । ରବିବାର ଉତ୍କଳ ଦିବସ ଅବସରରେ ଏହା ଉ୍ଘାଟିତ ହୋଇଛି ।
ବର୍ଷାଦିନେ ଖେଳାଳିଙ୍କ ଅଭ୍ୟାସ ବାଧାପ୍ରାପ୍ତ ହେଉଥିବା ବେଳେ ଏହା ନିର୍ମାଣ ହେବା ପରେ ଏବେ ଖେଳାଳିମାନେ ବର୍ଷସାରା ଅଭ୍ୟାସ କରିପାରିବେ ।
ଏହାବ୍ୟତୀତ ବାସ୍କେଟ୍ ବଲ୍, ଭଲିବଲ୍, ବ୍ୟାଡ଼ମିନ୍ଟନ୍, ଟେବୁଲଟେନିସ ଓ ଅନ୍ୟାନ୍ୟ ଇନ୍ଡୋର ଗେମ୍ ଏଠାରେ ଖେଳାଯାଇ ପାରିବ ।
ଚାରି ମହଲା ବିଶିଷ୍ଟ ଏହି ହଲ୍ ସଂପୂର୍ଣ୍ଣ ଶୀତତାପ ନିୟନ୍ତ୍ରିତ ରହିଥିବା ବେଳେ ଭିତରର ଦୈର୍ଘ୍ୟ ୮୫ ଫୁଟ୍ ଓ ଚଉଡ଼ା ୬୫ ଫୁଟ୍ ରହିଛି । ଚଟାଣରୁ ଛାତର ଉଚ୍ଚତା ୪୦ ଫୁଟ୍ ଥିବା ବେଳେ ଛାତର ଉପର ଭାଗରେ ଫାଇବର କାଚ ଲଗାଯାଇଛି ।
ଖେଳାଳି ମାନଙ୍କ ଅଭ୍ୟାସକୁ ରେକର୍ଡ଼ିଂ କରିବା ପାଇଁ ହଲ୍ ର ଉଭୟ ପାଶ୍ୱର୍ରେ କ୍ୟାମେରା ଲଗାଯାଇଛି । ଗତ ମାସ ୧୬ରେ ଏସିଆ କପ୍ ରେ ସଚିନ ୧୦୦ ତମ ଆନ୍ତର୍ଜାତିକ ଶତକ ହାସଲ କରିବା ପରେ ତାଙ୍କୁ ସମ୍ମାନ ଜଣାଇ ଏହି ମିନି ଇନ୍ଡୋର ହଲ୍ କୁ ତାଙ୍କ ନାମରେ ନାମିତ କରିବା ପାଇଁ ନିଷ୍ପତି ନିଆଯାଇଥିଲା ।
ଓଡ଼ିଶା ଡ଼ଟ୍ କମ୍
