ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ଅପ୍ରେଲ ୯(ଓଡ଼ିଶା ଡ଼ଟ୍ କମ୍) ୨୦୧୪ ସୁଦ୍ଧା ରାଜ୍ୟର ସମସ୍ତ ପଞ୍ଚାୟତକୁ ବିଶୁଦ୍ଧ ପାଇପ ପାଣି ଯୋଗାଇ ଦେବା ପାଇଁ ସୋମବାର ଏକ ଉଚ୍ଚସ୍ତରୀୟ ବୈଠକରେ ନିଷ୍ପତି ଗ୍ରହଣ କରାଯାଇଛି ।
ଏଥିପାଇଁ ଏକ ବିସ୍ତୃତ କାର୍ଯ୍ୟ ଯୋଜନା ପ୍ରସ୍ତୁତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗ୍ରାମ୍ୟ ଉନ୍ନୟନ ବିଭାଗକୁ ନିର୍ଦ୍ଦେଶ ଦେଇଛନ୍ତି । ବର୍ତମାନ ରାଜ୍ୟର ୬୨୩୬ ଗ୍ରାମ ପଞ୍ଚାୟତ ମଧ୍ୟରୁ ୨୫୭୭ଟିର ମୁଖ୍ୟାଳୟରେ ପାଇପ ପାଣି ସଂଯୋଗ ନାହିଁ ।
ସେହିପରି ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଣ କାର୍ଯ୍ୟକ୍ରମକୁ ବ୍ୟାପକ କରିବା ଏବଂ ପ୍ରତ୍ୟେକ ଘରକୁ ପାଣି ପହଞ୍ଚାଇବା ଉପରେ ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଛନ୍ତି ।
ଫେବୃୟାରୀ ସୁଦ୍ଧା ରାଜ୍ୟର ୧,୪୧,୯୨୮ଟି ପଡ଼ାରେ ଗୋଟିଏ ଲେଖାଏଁ ନଳକୂପର ବ୍ୟବସ୍ଥା କରାଯାଇଥିବା ବେଳେ ବର୍ତମାନ ସୁଦ୍ଧା ୪୦ ପ୍ରତି ନଳକୂପ ଏବଂ ପାଇପ ଜଳ ଯୋଗାଣ ପ୍ରକଳ୍ପ ନିୟମିତ ଯାଞ୍ଚ ଚାଲିଛି ବୋଲି ବୈଠକରେ କୁହାଯାଇଛି ।
ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଜଳ କ୍ଳିଷ୍ଟ ସହରରେ ୧୩୨ଟି ଟ୍ୟାଙ୍କର ମୁତୟନ କରାଯାଇଥିବା ବେଳେ ଆବଶ୍ୟକତା ଦେଖି ଅଧିକ ସଂଖ୍ୟକ ଟ୍ୟାଙ୍କର ମୁତୟନ ପାଇଁ ଜିଲ୍ଲାପାଳ ମାନଙ୍କୁ କୁହାଯାଇଛି ।
ବ୍ଲକ ଗୁଡ଼ିକରେ ପାନୀୟ ଜଳ ଯୋଗାଣ ପ୍ରକଳ୍ପ ଓ ନଳକୂପ ଗୁଡ଼ିକର ମରାମତି କାର୍ଯ୍ୟ ତ୍ୱରାନ୍ୱିତ କରିବା ପାଇଁ ୨୭୧ଟି ବ୍ଲକରେ ଜଣେ ଲେଖାଏଁ ଅତିରିକ୍ତ ଯନ୍ତ୍ରୀଙ୍କୁ ମୁତୟନ କରାଯାଇଛି ଏବଂ ଅବଶିଷ୍ଟ ବ୍ଲକରେ ଆସନ୍ତା ଏକ ମାସ ମଧ୍ୟରେ ଏହା କରାଯିବ ବୋଲି କୁହାଯାଇଛି ।
ଓଡ଼ିଶା ଡ଼ଟ୍ କମ୍
