ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର,ଅପ୍ରେଲ ୧୨(ଓଡ଼ିଶା ଡ଼ଟ୍ କମ୍) ରାଜ୍ୟର ଅନୁସୂଚିତ ଜନଜାତି ଉପଯୋଜନା ଅନ୍ତର୍ଗତ ଗାଁରେ ବାସ କରୁଥିବା ସମସ୍ତ ଭୂମିହୀନ ଆଦିବାସୀ ପରିବାରଙ୍କୁ ଅଗ୍ରାଧିକାର ଭିତ୍ତିରେ ଜମି ଯୋଗାଇ ଦେବା ପାଇଁ ନିଷ୍ପତି ଗ୍ରହଣ କରାଯାଇଛି ।
୧୧୮ଟି ବ୍ଳକର ୧୭,୯୭୪ଟି ଗ୍ରାମରେ ବାସ କରୁଥିବା ପରିବାରଙ୍କୁ ଏହା ଯୋଗାଇ ଦିଆଯିବ ବୋଲି ବୁଧବାର ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କୁହାଯାଇଛି ।
ଏଥିରେ ବିଭିନ୍ନ ସରକାରୀ ବିଭାଗ ଦ୍ୱାରାପରିଚାଳିତ ହେଉଥିବା ଅର୍ଥନୈତିକ କାର୍ଯ୍ୟକ୍ରମର ସଂଯୁକ୍ତିକରଣ କରାଯାଇ ଜମିର ଉନ୍ନତିକରଣ ନିମନ୍ତେ ଯୋଜନା ପ୍ରସ୍ତୁତ କରାଯାଇଛି ।
ଏହି କାର୍ଯ୍ୟକ୍ରମରେ ଭୂମିହୀନ ପରିବାର ଚିହ୍ନଟ, ସରକାରୀ ଅନାବାଦୀ ଜମି ନିରୂପଣ, ଅଭିଜ୍ଞତା ଥିବା ସ୍ଥାନୀୟ ବ୍ୟକ୍ତିମାନଙ୍କୁ ଭୂମି ସଂଯୋଜକ ଭାବେ ନିଯୁକ୍ତ କରାଯିବ ।
ତିନୋଟି ପର୍ଯ୍ୟାୟରେ ହେବାକୁ ଥିବା ଏହି କାର୍ଯକ୍ରମରେ ପ୍ରଥମ ପର୍ଯ୍ୟାୟ ୨୦୧୨-୧୩ରେ ଗଜପତି, ନବରଙ୍ଗପୁର, କୋରାପୁଟ, ମାଲକାନାଗିରି, ରାୟଗଡା, କଳାହାଣ୍ଡି ଓ କନ୍ଧମାଳ ଜିଲ୍ଲାର ୩୦ଟି ବ୍ଳକ ଅନ୍ତର୍ଗତ ୬୦୯୪ଟି ଗାଁରେ କାର୍ଯ୍ୟକାରୀ ହେବ ।
ଦ୍ୱିତୀୟ ପର୍ଯ୍ୟାୟ ୨୦୧୪-୧୫ରେ ଏହି ୭ଟି ଜିଲ୍ଲାର ୩୧ଟି ବ୍ଳକ ଅନ୍ତର୍ଗତ ୩୯୭୦ଟି ଗାଁରେ କାର୍ଯ୍ୟକାରୀ ହେବ । ପ୍ରଥମ ଓ ଦ୍ୱିତୀୟ ପର୍ଯ୍ୟାୟ କାର୍ଯ୍ୟକ୍ରମ ଓଡ଼ିଶା ଆଦିବାସୀ ସଶକ୍ତିକରଣ ତଥା ଜୀବୀକା ନିର୍ବାହ କାର୍ଯ୍ୟକ୍ରମ ଦ୍ୱାରାକାର୍ଯ୍ୟକାରୀ କରାଯିବ ।
ତୃତୀୟ ପର୍ଯ୍ୟାୟ ୨୦୧୬-୧୭ରେ ମୟୂରଭଞ୍ଜ, କେଉଁଝର, ବାଲେଶ୍ୱର, ସମ୍ବଲପୁର ଓ ସୁନ୍ଦରଗଡ
ଏହି ୫ଟି ଜିଲ୍ଲାର ୫୭ଟି ବ୍ଳକ ଅନ୍ତର୍ଗତ ୭୯୧୦ଟି ଗାଁରେ କାର୍ଯ୍ୟକାରୀ ହେବ ।
ଏହି ଯୋଜନାର ସଫଳତା ଦ୍ୱାରା୨୦୧୬-୧୭ ସୁଦ୍ଧା ରାଜ୍ୟର ଅନୁସୂଚିତ ଜନଜାତି ଯୋଜନା
ଅଂଚଳରେ ସମସ୍ତ ଅନୁସୂଚିତ ଜନଜାତି ପରିବାରକୁ ଜମି ଯୋଗାଇ ଦିଆଯାଇ ପାରିବ ।
ଓଡ଼ିଶା ଡ଼ଟ୍ କମ୍
