ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ଅପ୍ରେଲ ୧୭(ଓଡ଼ିଶା ଡ଼ଟ୍ କମ୍) ବିଶିଷ୍ଟ ସାହିତ୍ୟିକ ତଥା ପୂର୍ବତନ ମନ୍ତ୍ରୀ ନିତ୍ୟାନନ୍ଦ ମହାପାତ୍ରଙ୍କ ମଙ୍ଗଳବାର ପରଲୋକ ହୋଇଯାଇଥିବା ତାଙ୍କ ପରିବାର ପକ୍ଷରୁ କୁହାଯାଇଛି ।
ବାର୍ଦ୍ଧକ୍ୟଜନିତ କାରଣରୁ ଗତ ଦୁଇଦିନ ତଳେ ଭୁବନେଶ୍ୱର ସ୍ଥିତ ଏକ ଘରୋଇ ଡ଼ାକ୍ତରଖାନାରେ ତାଙ୍କୁ ଭର୍ତି କରାଯାଇଥିଲା ଏବଂ ସକାଳୁ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି ।
ମୃତ୍ୟୁ ବେଳକୁ ତାଙ୍କୁ ୧୦୦ ବର୍ଷ ବୟସ ହୋଇଥିଲା । ତାଙ୍କର ଗୋଟିଏ ପୁଅ ଅଛନ୍ତି । ପାଂଚ ବର୍ଷ ପୂର୍ବରୁ ତାଙ୍କ ପତ୍ନୀ ହରପ୍ରିୟାଙ୍କ ପରଲୋକ ହୋଇଥିଲା ।
୧୯୧୨ ଜୁଲାଇ ୧୭ରେ ଜନ୍ମ ଗ୍ରହଣ କରିଥିବା କାନ୍ତକବି ଲକ୍ଷ୍ମୀକାନ୍ତ ମହାପାତ୍ରଙ୍କ ଜ୍ୟେଷ୍ଠ ପୁତ୍ର
ନିତ୍ୟାନନ୍ଦ ୧୯୬୭-୭୧ ପର୍ଯ୍ୟନ୍ତ ରାଜେନ୍ଦ୍ର ନାରାୟଣ ସିଂହେଓଙ୍କ ମନ୍ତ୍ରୀମଣ୍ଡଳରେ ସଂସ୍କୃତି, ଖାଦ୍ୟ ଓ
ଖାଉଟି କଲ୍ୟାଣ ବିଭାଗ ମନ୍ତ୍ରୀ ଭାବେ କାର୍ଯ୍ୟ କରିଥିଲେ ।
ସେ ଭଦ୍ରକରୁ ଦୁଇ ଥର ସ୍ୱାଧୀନ ଏବଂ ଥରେ ଜନ କଂଗ୍ରେସ ପାର୍ଟି ପ୍ରାର୍ଥୀ ଭାବେ ବିଧାନସଭାକୁ
ନିର୍ବାଚିତ ହୋଇଥିଲେ । ସେ କେନ୍ଦ୍ରୀୟ ସାହିତ୍ୟ ଏକାଡ଼େମୀ ଏବଂ ଓଡ଼ିଶା ସାହିତ୍ୟ ଏକାଡ଼େମୀ ପୁରସ୍କାର ଗ୍ରହଣ କରିଥିଲେ ।
ପରଲୋକ ଖବର ପ୍ରଚାରିତ ହେବା ପରେ ବହୁ ବିଶିଷ୍ଟ ବ୍ୟକ୍ତି, ଶୁଭେଚ୍ଛୁ ଖାରବେଳନଗର ସ୍ଥିତ
ବାସଭବନରେ ପହଂଚି ତାଙ୍କର ଶେଷ ଦର୍ଶନ କରିଛନ୍ତି । ତାଙ୍କ ଦ୍ୱାରାଲିଖିତ ପୁସ୍ତକ ମଧ୍ୟରୁ ଭଙ୍ଗାହାଡ଼, ଘରଡ଼ିହ, ନହମ୍ ତିଷ୍ଠାମି ବୈକୁଣ୍ଠେ ଏବଂ ପ୍ରିୟା ଓ ପ୍ରିୟତମା ଅନ୍ୟତମ ।
ଓଡ଼ିଶା ଡ଼ଟ୍ କମ୍