ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ମଇ ୨(ଓଡ଼ିଶା ଡ଼ଟ୍ କମ୍) ଖଣି ମାଲିକମାନେ ବିପୁଳ ଲାଭ ପାଉଥିବାରୁ ଏହି ଲାଭାଂଶ ଉପରେ କେନ୍ଦ୍ର ସରକାର ଟ୍ୟାକ୍ସ ଲାଗୁକରି ଏହାକୁ ଗରିବ ଲୋକଙ୍କ ପାଇଁ ବିନିଯୋଗ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଧାନମନ୍ତ୍ରୀଙ୍କୁ ପୁଣି ପତ୍ର ଲେଖିଛନ୍ତି ।
ଖଣି ଅଞ୍ଚଳର ଆଦିବାସୀ ଲୋକଙ୍କ କଲ୍ୟାଣ, ଭିତ୍ତିଭୂମିର ବିକାଶ ଏବଂ ନିଯୁକ୍ତି ସୁଯୋଗ ସୃଷ୍ଟିରେ ବିନିଯୋଗ ପାଇଁ ପୂର୍ବରୁ ମୁଖ୍ୟମନ୍ତ୍ରୀ ବାରମ୍ବାର ଦାବି କରି ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଆସିଛନ୍ତି ।
ମିନେରାଲ ରିସୋର୍ସେସ ଟ୍ୟାକ୍ସ ସଂପର୍କରେ ରାଜ୍ୟ ସରକାରଙ୍କ ଦାବି ଉପରେ କେନ୍ଦ୍ରମନ୍ତ୍ରୀ ଦେଇଥିବା ଉତ୍ତରରେ ଅସନ୍ତୋଷ ବ୍ୟକ୍ତକରି ଖଣି ମାଲିକଙ୍କ ବିପୁଳ ଲାଭାଂଶ ଉପରେ ୫୦ ପ୍ରତିଶତ ଟିକସ ବସାଇବା ପାଇଁ ନିଜେ ପ୍ରଧାନମନ୍ତ୍ରୀ ସମୀକ୍ଷା କରି ନିଷ୍ପତି ନେବାକୁ ନବୀନ ତାଙ୍କ ପତ୍ରରେ ଉଲ୍ଲେଖ କରିଛନ୍ତି ।
୨୦୧୨ ମାର୍ଚ୍ଚ ୧୯ରେ ଅଷ୍ଟ୍ରେଲିଆ ପାର୍ଲିଆମେଣ୍ଟ ଲୁହାପଥର ଓ କୋଇଲା ଉପରେ ମିନେରାଲ ରିସୋର୍ସେସ ଟ୍ୟାକ୍ସ ଲାଗୁ କରିବାକୁ ନିଷ୍ପତି ନେଇଛନ୍ତି ଏବଂ ଏହା ଜୁଲାଇ ପହିଲାରୁ କାର୍ଯ୍ୟକାରୀ ହେବାକୁ ଯାଉଛି ବୋଲି ସେଠାକାର ସରକାର ନେଇଥିବା ପଦକ୍ଷେପ ସଂପର୍କରେ ସୂଚନା ଦେଇ ସେ ପତ୍ରରେ ଦର୍ଶାଇଛନ୍ତି ।
ତେଣୁ ଏ ସଂପର୍କରେ କେନ୍ଦ୍ର ଖଣି ମନ୍ତ୍ରଣାଳୟର ଅଭିମୁଖ୍ୟ କେବଳ ମୁଷ୍ଟିମେୟ ଖଣି ମାଲିକଙ୍କୁ ସହାୟକ ହେବ ବୋଲି ମତ ଦେଇ ଜନସାଧାରଣଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ପ୍ରଧାନମନ୍ତ୍ରୀ ନିଜେ ବ୍ୟକ୍ତିଗତ ଭାବରେ ସମୀକ୍ଷା କରି ଶୀଘ୍ର ନିଷ୍ପତି ନେବାକୁ ସେ ଦାବି କରିଛନ୍ତି ।
ଓଡ଼ିଶା ଡ଼ଟ୍ କମ୍
