ଓଡ଼ିଶା ଡ଼ଟ୍ କମ୍ ସମ୍ବାଦଦାତା
ଭୁବନେଶ୍ୱର, ମଇ ୫(ଓଡ଼ିଶା ଡ଼ଟ୍ କମ୍) ରାଜ୍ୟରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ ନିଯୁକ୍ତି ଯୋଜନା (ମନରେଗା)ର କାର୍ଯକାରିତା ନେଇ କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରୀ ଜୟରାମ ରମେଶ ଅସନ୍ତୋଷ ପ୍ରକାଶ କରିଛନ୍ତି ।
ଓଡ଼ିଶାରେ ଏହି ଯୋଜନା ସବୁଠାରୁ ପଛୁଆ ବୋଲି ସେ ଶନିବାର ତିନିଦିନିଆ ଗସ୍ତରେ ଆସି ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ।
ଗତ ଛଅ ବର୍ଷ ହେଲା ରାଜ୍ୟରେ ଏହି ଯୋଜନା କାର୍ଯ୍ୟକାରୀ ହେଉଛି । ଅନ୍ୟ ରାଜ୍ୟରେ ଏହା ସଫଳତାର ସହ କାର୍ଯ୍ୟକାରୀ ହୋଇଥିବା ବେଳେ ଓଡ଼ିଶାରେ ହୋଇପାରି ନାହିଁ ବୋଲି ସେ କହିଛନ୍ତି ।
କେନ୍ଦ୍ର ସରକାର ଏହି ଯୋଜନାରେ ପ୍ରଚୁର ଅର୍ଥ ଦେବାକୁ ଚାହୁଁଥିବା ବେଳେ ଓଡ଼ିଶା ଦାବି ଉପସ୍ଥାପନ କରିପାରୁ ନାହିଁ । ଫଳରେ ବହୁ କେନ୍ଦ୍ରୀୟ ଯୋଜନାକୁ ଓଡ଼ିଶା ହାତଛଡା କରୁଛି ।
ଓଡ଼ିଶା ଏକମାତ୍ର ରାଜ୍ୟ ଯେଉଁଠାରେ ଏମ୍ଜିଏନ୍ଆରଇଜିଏସ୍ ଯୋଜନା ସଂପର୍କରେ ସିବିଆଇ ତଦନ୍ତ ଚାଲିଛି, ସେ କହିଛନ୍ତି ।
ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ଜରିଆରେ ଦେଶରେ ୯୯ ହଜାର କୋଟି ଟଙ୍କାରେ ରାସ୍ତା, ଜଳ ଯୋଗାଣ ଓ ପରିମଳ ବ୍ୟବସ୍ଥା କାର୍ଯ୍ୟକାରୀ ହେଉଛି । ଏହାକୁ ସ୍ୱଚ୍ଛ କରିବା ପାଇଁ ସିଏଜିକୁ ସମୀକ୍ଷା ଦାୟିତ୍ୱ ଦିଆଯାଇଛି ।
ତେଣୁ ପ୍ରତ୍ୟେକ ପଞ୍ଚାୟତ ସ୍ତରରେ ସିଏଜିଙ୍କ ଦ୍ୱାରାନିଯୁକ୍ତ ଚାଟାର୍ଡ ଆକାଉଣ୍ଟାଣ୍ଟମାନେ ସମୀକ୍ଷା କରିବେ । ସେହିଭଳି ଓଡ଼ିଶାର ସମସ୍ତ ୬୨୦୦ ଗ୍ରାମ ପଞ୍ଚାୟତରେ ଥିବା ୧୫ ପ୍ରତିଶତ ପର୍ଯ୍ୟନ୍ତ କାମର ସମୀକ୍ଷା କରାଯିବ ।
ଗତ ବର୍ଷ ରାଜ୍ୟରେ ୬ ହଜାର ରାସ୍ତା ନିର୍ମାଣ ପାଇଁ ୨୫୦୦ କୋଟି ଟଙ୍କା ଦିଆଯାଇଛି । ଏହି ଯୋଜନାରେ ବିହାର ବାର୍ଷିକ ୩ ହଜାରକୋଟି ଟଙ୍କା ଓ ଝାଡଖଣ୍ଡ ୧୫୦୦ କୋଟି ଟଙ୍କା ଖର୍ଚ୍ଚ କରିଥିବା ବେଳେ ଓଡ଼ିଶା ମାତ୍ର ଏକ ହଜାର କୋଟି ଟଙ୍କା ଖର୍ଚ୍ଚ କରିଛି ବୋଲି ରମେଶ କହିଛନ୍ତି ।
ଓଡ଼ିଶା ଡ଼ଟ୍ କମ୍